Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Lingaedjes di Beldjike (emiles da Manfred Lejoly)

 
Sicrire on novea sudjet   Responde å sudjet    Djivêye des foroms di Berdelaedjes -> Berdelaedjes
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 2294
Eplaeçmint: Sidi Smayil, Marok

PostDate: mie 17 dja, 2018 22:14:37    Sudjet: Lingaedjes di Beldjike (emiles da Manfred Lejoly) Responde tot citant

Les langues ol Belgique

(Les lwès èt les ûsdances)

Binamé Lucien,

Dè ci côp, po candger, djè n'va nin mè dèspiter po l'trazime côp an dfêt do Rfondu Walon.

Deûs rèmarques què vos av fait lè dièrine fî què vos fourîz adré mi, djusse avant dè qwiter, mè faisèt rèsponde:
"Brusselles est'one vèye flaminde" + "Les dgins dè Wezembeek vlèt qu'on-z-y djanse lè flamind, èt c'est normal"

Normal???????????????????? !!!!!!!! ??????????????????

Què Brusselles anche sètu one vèye flaminde à l'ôridgine, c'est bé sûr lè veûre. Po difèrin.nès
raisons ( plèces d'ovradge o l'administration èt dvins les industriyes qui ont ratiré des dgins
des campagnes, gos' des djins, etc.) i gn'aveût dèdjà des autès langues (p. ègz. lè vî français)
do timps des Bourguignons, èt o 19ime èt 20ime siéque, B. est dèvni one vèye ''multilingue''
avou one tote greusse majorité des francophones. Et çoula èssu c'est l'vran.ye veûre.

'' inte parenthèses" èt po rire : N'est-ce nin drole què vos vôrîz què dj'aprinde lè walon atô mè
ptit-fi d'Anderlecht, poupanr d'one vèye flaminde? Pu séryeûsmint, çoula n'a nou sins': Nouc
dè ses deûs parints nè sét on mot d'walon, èt come èfant à B., i n' l'ôrèt jamais adré ses ptits camarandes. Mi, djè nè l'veûs què quèquès eûres tos les meûs, èt m'santé fait què djè
nè l'vièri wêre crèche ...

Wezembeek-Oppem

1 °

Dè n'sés nin dèvins quine mèseure vos cuènochez les lwès linguistiques belges. Sins rmonter pu lonsse èn'èrî:

Les rècins'mints dè 1920, 1930, 1947 avînent chaque côp lèy' vèy' pus' des francophones èt mons des néérlandophones. Là-dssus, les flamins ont rèyussi à fére interdire lè question des langues dèvins les rècins'mints dè l'avnîr.
Après des fwèrt longuès tchipotes, lè lwè do 8 dè nôv. 1962 a pondu les 3 régions unilingues
néérlandophone, germanophone, francophone.
Lè lwè do 2 d'awou 1963 a crèyé lè région bilingue dè Bruxelles. (avou des hinants avantadges po les flaminds, qui ont dreut à l'mitan des ministres régionaux, èt à 20% des députés, adon què leûs életeûrs nè sont pu què 7-8 % )

Po-z-adôci on pô les frontîres linguistiques, on-z-a fait èssu çou qu'on loume les Communes à facilités. Les conseils èt collèges comunaux dèvèt s'y tèni ol langue dol région, mais les contacts inte l'administration èt les citoyens plèt s'fére ol langue dol minorité què lè lwè
vout dèsfinde.

Totes ces lwès sont rèpris ol Constitution èt nè plèt èsse candgés qu'avou one majorité des 2/3

Comunes flamindes avou "facilités" po les francophones: 6 comunes antô d'Br. , + Bever, Herstappe, Ronse (=Renaix), Spiere-Helkijn, Voeren (=Fourons).

Com. wal. avou "facilités'' po les néérlandophones : Comines-Warneton, Enghien, Flobecq, Mouscron.

Com. wal. avou "facilités." po les germanophones: Malmedy, Waimes.
Les 9 com. germano. ont des "facilités" po les francophones.

Dèvins les comunes walones, i gn'a jamais anvou one plainte vènant d'on minoritaire.

E-z-ès Fourons, fé des an.nés 70, an.nés 80, c'est'on' awireûs hasanrd qu'i gn'a jamais anvou on mwèrt,quwand qu'i gn'aveût tot' èn' onc' des aradges èmantchés par les ban.nes néo-nazis do VMO, do Were Di, etc.

C' èsteût l'ûsadge què les djins dè ces comunes dèhînent one fî po totes è quine langue is vlînent rèçûre des documints, p. ègz. les convocations po-z-aler voter. A l'adge dè l'informatique, cè n'est nin manlêhé d'"encoder" çoula. Adon sorvéve lè Minisse des Affaires Intérieures Flamindes Leo Peeters. Par one circulaire do 16/12/1997, les Comunes flamindes
sont ôblidgés d'èvoy' tos les documints à-z-ès administrés è néérlandais. Ces qui vôrînent qwand min.me l'aveûr è français dèvèt rèfére one dèmande oficiéle po chaque papî!
One sépe circulaire ministérielle qui candge lè Constitution. One saqwè dè jamais vèyu.
I est clér què cè n'est ré d'aute qu'one tchican'ri. Mais dèspô ci djôr, les difèrints Minisses flaminds des Affaires Intérieures tènèt compte dè cisse circulaire po rèfuser dè nommer des borguèmêsses.

Po cisse-là, èt co po d'autes tchican'ris advère les francophones, lè politique flaminde a sètu pusieûrs côps critiqué par l'Europe, èt minme on côp par l'ONU. Mais naturélmint, l'Europe
come l'ONU nè cuènochèt què l' Belgique ... qui transmet à l'administration flaminde, là què çoula passe d'on côp an classmint-poubelle.
Des tribunanls dè prèmî instance francophones ont dèné twèrt àl Flandre po des plaintes an civil an dfêt dè cisse circulaire. Minme lè Cour d'Arbitrage a dèné twèrt àl Flandre po des aspects des leûs circulaires èt décrets. : Résultat : Classmint-poubelle.
Les Flaminds savait bé qu'is n'risquèt ré. Les politiciens fr. n'ont nou pouvwèr an fédéral, èt co jamais des djudges flaminds îront conte lè Sainte Mère Patrie Flandre. On pout les comprinde: Zelles né pus n'inmèt nin d'aveûr les cwètes pneus dol vwèture trawés, èt des pîres è-z-ès fignesses.

A Wémes, totes les convocations électorales sont imprimés s'on documint recto-verso, fr. d'on costé, allemand dè l'aute.

2 °

I est tot' nèt' clér què totes ces lwès nè djansèt dè ré d'aute què des rapwèrts oficiéls é-z-ès
administrations, èt inte ces administrations èt les administrés. Ré do monde à vèy' avou les langues què les dgins djansèt ol vèye privée, dèvins n'importe quine comune !!!!!!!

Mais veus vôrît què s'on tèritwère X on seûdje ôblidgé dè djanser one langue Y ??!!??
Dj'espére vran.ymint aveûr man compris !
Valà, ol cwène Man.m'dî - Wéme, tamin ''gîtes meublés " ont plèce po rçûre pusieûrs mèye des ''vacanciers'' . An pus' dè çoula, n'estans wère à pu d'one eûre dè vwèture po quéques miyons des dgins. (Hasselt, Lîdge, Mastric, Heerlen, Ais', Cologne, Düsseldorf) ..

C'est poqwè, qwand qu'on s'pourmine so les ptitès vôyes, qwand qu'on côrt è-z-ès bwès, qwand qu'on rôle à vélo so les RAVeLs, on-z-ô totes sôrts dè panrlers, mètans co l'pu sovint des panrlers néérlandas/flaminds, èt çoula nè dèrindge nouc.

Djè so èssu tèmon què les sèm'dis èt dîmègnes à l' pisse dè ski d'Ôvîfa, i's djanse à 80%
néérlandais / flamind, èt c'on fî, çoula nè dèrindge nouc.

Qwand des ètrandgîrs pindèt l'crama avan valà, is sayèt an pus sovint d'aprinde vite lè français
mais ol famile èt avou leûs camarandes is continuèt dè djanser leû langue maternelle.
Poqwè nin?

Dèvins pusieûrès cwènes dol Flandre, nin tot' avan, mais dèvins pusieûrès cwènes, qwand des dgins djansèt français sol vôye, is s'fèsèt adrangoner, insulter, man'cer . Est-ce mî?

Hal (Halle) est one pètite vèye flaminde an sûd dè Brusselles, là qu'des Brusselwès alînent voultî beûre one jate dè cafè lè dîmègne après-nône. I gn'a quéques ans, lè borguèmêsse instala on niméro dè tél. spécianl àl comune po les blanques-pansses qui vlînent racuser on comerçant qui areût djansé è français avou des canles.

Dèdjà què comercialmint c'est èwèrant, c'est illégal advère les lwès belges, èt çoula va à l'èsconte des traités internationaux. Bé sûr, ci mayeûr n'a jamais sètu puni

Adon des flaminguants alînent dol neût (qué coradge!) coler des afitches sol vitrine dè ces
comerçants : " Ci comerçant est on manva Flamind. Les bons Flaminds n'actèt ré adré on manva Flamind"

Tot ci qui cuènot l'istwère do 20ime siéc' pout bé aveûr freûd o dos.

(pètit passadge è fançais, po çou qu'i gn'a trop' des mots techniques )

En 2002, la Résolution n° 1301 demande instamment à la Belgique de ratifier enfin la Convention-Cadre pour la protection des minorités nationales, ainsi que le Protocole 12 à la Convention Européenne des Droits de l'Homme et des libertés fondamentales. (qui interdit
toute forme de discrimination, dont celle basée sur la langue.) Tous les parlements, fédéral et fédérés, ont approuvé ces textes, sauf la Flandre. Si bien qu'en 2018, la Belgique se singularise encore toujours par ce déficit de démocratie.

Fant-z-i rènovler què lè tote grande majorité des dgins dol Terre sont po l'mons bilingues, èt sè sièrvèt sovint assez dè deûs langues lè minme djôr?

Deûs ptits égzimpes cuèmint on mache les langues panhûlmint:

1 ° : One famile nombreuse dol comune dè Wéme: Pére walon, mére provnéve des viadges "almands" (com. dè Bûtba / Bütgenbach) . Pu vîche des èfants, one bancelle, vèni an monde antô dè 1950.
Qwand i èstînent tortos antô dol tanve, is djansînent lè haut-almand, avou alfî on spot dè plat-almand. A fait què les èfants ont vni ol sècole , les èfants djansînent walon inte zèles, qwand leû mére n'esteût nin avou zèles.

Qwand lè galant, dèvni pu tanrd l'ome d'one des bancelles, qui vnéve dol ''vîche Belgique'', esteût là, tot l'monde djanséve français.

Qwand lè galant, dèvni pu tanrd l'ome d'one aute cuèmére, qui lu vnéve do costé dè Mondjôye esteût là, tot l'monde djanséve almand.

C.à.d. : Qwand qu'c'est possibe - qwand qu'on 'n' est capanve - on djanse tofèr lè langue què tos ces qui sont rassonlés comprindèt.

2 ° : Dj'esteûs dièrin'mint ol bibliothèque do Rwayâl Club Walon dè Man.m'dî, à conter l'cansse avou M. Marcel Piette, bibliothécaire. Nos djansîs bé sûr è walon, èt lè discussion pwèrtéve djustèmint so l'ûsdance pratique des difèrin.nès langues. N'estîz tos les deûs' d'acwèrd què sè one dgin qu'on n' cuènot nin areût moussé dvins èt dèmandé one acsègnance è français, n' arîz rèspondu è français. Cè fout M. Piette qui dèt: C'est'one question dè ''savoir-vivre".

C'one fî, nin po çou què l'walon sèreût mons què l'français, mais lè moinde politesse fait qu'on djanse ol langue què tos ces qui sont là comprindèt.

L' "identité" dè chaque dgin est " multiple"

Chaque fî qu'on vout raclôre one saquî dèvins one seûle imandge dè çou qui fait si ''identité'',
seûch-z-i lè coleûr dol pê, lè rlidgion, one langue, etc...on-z-è s'one pinte fwèrt dandg'reûse.

Djè consîyreû à tot l'monde dè lîre '' Les identités meurtrières ", dè Amin Maalouf, éd. Grasset & Fasquelle, 1998.

Qu'on s'rapinse èssu çou qui s'a passé ol ex-Yougoslavie.

Qwand, dèvins on tecse dè M. Hendschel, djè lî ''walonitude'' o contexte qui cite ci mot, djè cmince dèdjà à-z-aveûr des botons.

Tot çou qui ravisse dè près ou bé min.me dè lonsse à dè ''l'identitaire'', dè '' l'ethnicisme'', do ''nationalisme'', mè fait vômi.

Dj'in.m'ri tofèr lè walon, langue dè mes djeux d'èfant, pu tanrd langue dè mes camarandes dè djônesse, èt djè so neûr aiche qwand qu'on l'dèsogne, mais djè n'vinreûs jamais so l'idé dè l'imposer dèvins téle ou téle contré, nin pus' què djè n'sondge à imposer mes gos' ol musique ou bé ol cuhène!

Manfred Lejoly , 4950 Ôtrowandge, o meû d'djanvîr 2018
_________________
Li ci ki n' a k' on toû n' vike k' on djoû.


Candjî pol dierin côp pa lucyin, li mie 17 dja, 2018 22:19:08; candjî 1 feye
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2294
Eplaeçmint: Sidi Smayil, Marok

PostDate: mie 17 dja, 2018 22:15:47    Sudjet: Responde tot citant

Gråces co 13 côps. Oyi, tot çou ki vos djhoz est foirt sûti. Et gn a toplin des sacwès ki dji n' saveu nén.

Djusse: Lorint Hendschel ni scrît pus e walon u sol walon dispu 2002. Wice av veyou "wallonitude" ? Avîz vs li minme schôpiaedje cwand Léopold Sedar Senghor djåzéve di "négritude" ?

Pout on publiyî vosse lete ? So les Berdelaedjes ? Todi nén dins l' Rantoele ? Portant ci sereut on bea sudjet, et n' a waire di djins ki sårént fé 3 pådjes insi e walon.
Djusse eto: bén dire ki l' sudjet n' est NéN: fåt i sayî d' wårder l' walon? Et si c' est k' oyi, pa ké voye?

Ki ça vos våye bén, et å moes d' måss, si on vike co (plait-st a Diu, dijhèt les crustins et les moslimîs... et metans les djwifs ossu).
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2294
Eplaeçmint: Sidi Smayil, Marok

PostDate: mie 17 dja, 2018 22:16:52    Sudjet: Responde tot citant

Citåcion:
Manfred Lejoly

Rèsponse à vosse mail do 7 dè djanvîr 2018

On grand merci d'aveûr respondu si rate!
Binamé Bon-Djû ! Lucien, vos m'surprindroz tofèr. Djè m'atindéve à esse ray' è boquèts. Djè v' vèyéve dèdjà rassonler do sètch bwè po-z-èsprinde lè grand feu dè l'Inquisition, là què djè cram'reûs avou tot çou què dj'a sècrit è m'vicanri ! Et éssi, djè clôreûs mè grande gueûye one fî po totes. Lè côp des djayes po tos ces qui n' mè plèt vèy'.
Ol plèce dè çoula, on dîreût què vos estoz d'acwèrd so des boquèts !

Négritude : Dj'a one flanwe sovnance d'aveûr lî ci mot an dfêt dè Aimé Césaire, L.S. Senghor èt d'autes , djè pinse què c'esteût dèvins one anthologie, mais djè n' nè mè sovés nin pus' què çoula.

Wallonitude : Dèvins on tècse trové so Internet, djè pinsse (sins esse sûr) què l'tit' esteût ''Qué walon po dmwain?"
C'est l'contexte dol phranse, lè sins' què l'auteûr met o mot qui m'est ètrandgîr. L'auteûr dèsplique qu'on pôreût sondger à basti on standard po chaque groupe des panrlers walons mais qui vant mî fé on seûl standard, po deswalper lè sintimint dè walonitude.
I m'sonne què po wèrander èt dèsogner one langue, cè n'est nin télmint on sintimint mythique qu'i fant, mais pu vite do coradge, dè l'ovradge, do timps, one dose dè sètudes linguistiques
séryeûses, etc.

Come n'avans on djôr discuté, c'est possib' qu'i m' manque on gène po couri avou les motons .
Djè n'a sûr ré conte les dgins dè Namur, Neufchâteau ou bé Hout-Si-Plout. Cuèmint sèreût-ce possib', pusquè djè n' cuèno nin one seûle dgin d'avan là! Mais djè n' comprinds nin né pu poqwè djè deûreûs esse tot spécianlmint amitieûs avou zèles, po l'seûle raison qu'is djansèt des panrlers d'Oïl qui ravizèt pus' ou mons lè mîne.
Po saqués costés dè m' mentalité - djè pinse à-z-ès riyotris do Carnaval - c'est clér què djè ressins pus' dè preum'sté avou les limborgwès dè Maastric ou bé les almands dè Cologne qu'avou les walons dè Laroche.

Djè meûsère mes sympathies d'après lè manimint èt les actes des dgins, nin d'après l'hasanrd dè là qu'is ont vni an monde.

Berdelaedges: Publier? Poqwè nin? N.B.: Djè n'sé minme nin çou qu' c'est!
Mais adon, svp, lèyez mi orthographe téle qu'elle est, minme plin.ne d'èreûrs, pu vite qu'avou l'orthographe dèlègné - pardon - rfondu . A cansse què mète mè no dèso one aute orthographe, c'est mète mè no dèso one saqwè què djè n'a nin sècrit.

Rantoele ? Poqwè co rèvni avou çoula? Vos estoz an corant dol lète què dj'a sècrit à l'éditeûr.

I gn'a one ligne dè vosse mail què djè n'comprinds nin bé:
Djusse eto: ben dire ki l'sudjet n'est nen : fât i sayî d'wârder l'walon? Et si c'est qu'oyi, pa ké voye?

Ol "conclusion" dè m'long tecse, dj'a bé sècrit què djè m'rafîye qwand qu'on dèsogne lè walon

Po quine vôye?
Vos av' télmint pus' d'expéryince què mi.
Djè dîreûs par des racwèradges séryeûs èt rigoureûs ol linguistique
Par dol bone littérature
Par des rassonlmints, des cactaedges come is dhèt à Manm.dî . A condition què çoula fasse èssu vèni des cès qui n'djansèt pu - nin - nin co lè walon.

Adon on rètoume so l'question ''éternelle" : Vant-z-i mî què chaque vèye ou bé viadge dèsogne sè prôpe walon, ou bé est-ce mî dè fére one novèle langue standard ?
(Novèle langue, o minme sins' què l'français est one novèle langue advère tos les panrlers qu'on-z-a djansé so l'tèritwère dol France.)

N'avans dèdjà alowé des hectolites dè ratchote po cisse question, djè n'a pu invie, djè beûs mè camamèle, èt çoula m'apèchton.

Qu'i v' vasse bé !

Manfred L.

_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Berdelaedjes Totes les eures sont a GMT + 2 eures
Pådje 1 so 1

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci



[ Di dvant | Shuvant | A l' astcheyance | Djivêye ]

Cisse pådje est mimbe di l' anea RingSurf des waibes e walon.

[ Passer 1 waibe en erî | Passer houte do shuvant | Les 5 shuvants ]


Powered by phpBB © 2001 phpBB Group