 |
Berdelaedjes
Forom di berdelaedjes e walon, so tot l' minme ké sudjet
|
| Vey sudjet di dvant :: Vey sudjet shuvant |
| Oteur |
Messaedje |
Èl-Gueuye-Noere
Date d' arivêye: 2019-05-13
Messaedjes: 186
Eplaeçmint: Tchålerwè
|
 Date: mår 04 djl, 2023 22:38:50 Sudjet: Tuzaedje sol pézetsé |
 |
|
Vola èm tuzaedje sol pézetsé (prononçaedje zero-cnoxheu) tins d' ene bate di dvize so Discord.
| Citåcion: |
Dji croe k' c' est ene manire d' acsegnî li prononçaedje zero-cnoxheu (li rfondou a l' orå, dj' ô bén).
Ci prononçaedje ci est fwait po ls aprindisses ki n' ont nole conoxhance do walon, virpus d' on lingaedje d' oyi nerén. El rapoirt ortografe-prononçaedje est totoute, adon pus åjhey po yeusses.
Mi, dj' inme ostant k' les aprindisses tchoezixhnut on prononçaedje purade coinrece ki rfondou. Ça n' dimore k' èm gosse.
Li problinme d' on prononçaedje erfondou, c' est k' on piede totes les tchôzes coinreces k' egzistnut co a l' escrit. La eto ki, disk' asteure, nolu n' cåze dinsi. Contråvmint å rfondou k' est scrît pa bråmint des djins.
|
_________________
El sopoirtance va djonde on si télmint hôt livea k' les sûteyès djins n' pôront pus sondjî a n' nén birer les bezéns. |
|
| Rivni al copete |
|
 |
Reptilien
Date d' arivêye: 2017-07-01
Messaedjes: 263
|
| Date: mie 05 djl, 2023 8:35:33 Sudjet: |
|
|
Li PZC n' est nén oblidjî, si èn apurdisse vout prinde l' accint lidjwès i pout.
Cwand vos av aprins l' inglès, vos l' avoz bén aprins avou l' prononçaedje RP, endon ? Vos n'avoz nén prins l' accint ostralyin u tecsan (do Tecsass) ?
Ene djin k' aprind l' francès e France, ele ni va nén prinde l'accint bedje, marseyès u kebecwès, et c' est nén ces accints la ki sont metous å dvant divins les diccionaires papîs.
Po les apurdisses ki n' ont nole atnance avou ene veye, u on pårler coinrece, on fwait cwè ? On n' pout nén mete å dvant l' prononçaedje... dji n' sai nén... vervitwès.
Vos djhoz :
| Citåcion: |
| Li problinme d' on prononçaedje erfondou, c' est k' on piede totes les tchôzes coinreces k' egzistnut co a l' escrit. |
Mins, ça, ça n' våt k' po les cis ki cnoxhnut l' pårler coinrece. Les ôtes n' ont nén consyince di çoula.
Et s' on vout daler pus long : èn aclot ki dit (et scrît e Feller) « i(s) tchantont » mins k' i n' pout k' tchoezi etur « i tchantèt » et « i tchantnut » e Rfondou, voz dirîz surmint eto k' on « piede totes les tchôzes coinreces » ? Mins adon våt mia scrire e Feller !
Mi ki dit « i m' chène » mins k' i m' fåt scrire « i m' shonne » e rfondou, ça m' fwait todi drole, et ça våt po tos les cis k' apudnut li Rfondou et ki cnoxhnut leu pårler coinrece, mins l' prononçaedje « chon-ne » egzistêye.
Li sacrifice ni plait nén a tertos, mins i fåt sayî d' sondjî plus long k' a lu.
Li problinme, et ça vos avoz metou l' doet dissur, c' est cwand l' PZC moenne a on prononçaedje ki n' egzistêye nén. Ça c' est del biestreye ! |
|
| Rivni al copete |
|
|
Pablo Saratxaga
Site Admin
Date d' arivêye: 2005-07-01
Messaedjes: 1156
Eplaeçmint: Oûpêye
|
| Date: mie 05 djl, 2023 9:41:38 Sudjet: |
|
|
Istoricmint, å cmince do rfondou (et minme ene miete divant, avou l' eplaidaedje di "mes 3000 prumîs mots d' walon") i gn a-st avou ene tchuze di "4 grands diyalekes" do walon. Totes les tchuzes do rfondou ont shuvou çoula (a cmincî pa les letes O, C, E, S po les côdes motîs).
Et adon, tchaeke mot e rfondou åreut cwate "prononçaedjes sitandård".
Mins cwand i gn ourit l' eplaidaedje do prumî motî e rfondou so papî (et amon on vraiy imprimeu et vindou lon et lådje, ca i gn aveut ddja yeu des eplaidaedjes di l' esplicant motî (R9) a kékès dijhinnes divant çoula),
l' eplaideu n' voleut k' ON SEU prononçaedje po tchaeke mot.
Bén seur, mi dji pinséve ki ça dvreut esse li lidjwès, Mwaisse Arsouye, li Bon Diu si åme, ki ça dvreut esse li namurwès, Lucyin lu balzinéve etur li pårler d' Bastogne et d' Bive... Dji kénte, mins c' est po dire ki ça åreut stî pår målåjhey di s' mete d' acoird, et pus del mitan des djins åreut stî måle.
Adon, on prinda des bokets d' onk et d' l' ôte. C' est l' veur k' i gn a nole plaece la k' on djåze insi po do veur, mins i gn a todi ene plaece - et minme tot plin - wice ki ç' prononçaedje la egzistêye po do bon et esse eployî.
Do côp, on pout dire ki c' est bén do walon, et on walon ki tot l' minme kî comprindreut.
(ci fourit bén pus målåjhey di dner on no a ci prononçaedje la)
Candjî pol dierin côp pa Pablo Saratxaga, li mie 05 djl, 2023 11:57:02; candjî 2 feyes |
|
| Rivni al copete |
|
|
Pablo Saratxaga
Site Admin
Date d' arivêye: 2005-07-01
Messaedjes: 1156
Eplaeçmint: Oûpêye
|
| Date: mie 05 djl, 2023 9:52:40 Sudjet: |
|
|
Sol Wiccionaire (et tot la k' i gn a l' plaece assez), dji sereut po rivni åzès raecinêyes do rfondou, et di mete les "4 prononçaedjes" (ki plèt pa côps esse moens). Avou li pzc e pus ptit, avou ene sipitante notule po dire ki c' est èn acmaxhant prononçaedje, po cwand on n' pout nén mostrer les 4.
Po "eshonne" ça dinreut:
* ɛ.ˈʃɛn (C), ɛ.ˈsɔ̃l (E) (et dji n' sait nén cwè po O et S), ɛ.ˈʃɔ̃n (pzc)
Po tchestea:
* t͡ʃɛs.ˈtɛː (E,S), t͡ʃɛs.ˈtja (C,O,pzc) |
|
| Rivni al copete |
|
|
Èl-Gueuye-Noere
Date d' arivêye: 2019-05-13
Messaedjes: 186
Eplaeçmint: Tchålerwè
|
| Date: mie 05 djl, 2023 22:33:32 Sudjet: |
|
|
| Citåcion: |
| Cwand vos av aprins l' inglès, vos l' avoz bén aprins avou l' prononçaedje RP, endon ? |
Tins d' mes sgondaires, li prononçaedje, ci n' esteut nén ça. A l' univ, on pout tchoezî inte l' erpé ubén l' « accint des Uyessês ». Do moumint k' on dmeure cowerint. Dj' a prindou l' erpé, come vs el dijhoz. Nén paski c' esteut li pézetsé do Rweyåme-Uni, mins paski dj' inme bén cist accint la, minme si les cåzeus natifs el voeynut puvite evi.
| Citåcion: |
Ene djin k' aprind l' francès e France, ele ni va nén prinde l'accint bedje, marseyès u kebecwès, et c' est nén ces accints la ki sont metous å dvant divins les diccionaires papîs.
|
C' est l' veur. Metnant, el grande pårt des accints francès-cåzants n' sont nén foirt diferins d' el ci d' Paris. Åré les foû-riles come vs el av escrît. Avou ça k' on pout radjouter l' « âksent deu Liyéééch ».
Ni fåt nén rovyî eto ki tot çk' est lon d' Paris, ki ci soeye li prononçaedje u ls ôtès sacwès, n' sont nén bén rwaitîs e francès. Come si gn aveut ene sacwè sincieuse k' acertinreut k' Paris fwait todi-tofer tot bén pol francès.
| Citåcion: |
| Et s' on vout daler pus long : èn aclot ki dit (et scrît e Feller) « i(s) tchantont » mins k' i n' pout k' tchoezi etur « i tchantèt » et « i tchantnut » e Rfondou, voz dirîz surmint eto k' on « piede totes les tchôzes coinreces » ? Mins adon våt mia scrire e Feller ! |
C' est l' veur k' on piede sacwantès sacwès avou l' rifondou, mins contråvmint å pézetsé, on n' piede nén tot. Ça, c' est ene diferince k' est, a m' shonnance, mo impôrtante. Gn a co des traeces des cognes coinreces avou, metans, les betchfessîs scrijhas. Cwek' on pout asprover d' elzès mete dins l' pézetsé, mins i fåreut des prononçaedjes a pårt po tchaeke, çk' i n' sereut målåjhey a fé eyet podbon nén pardiene nerén.
Pinsez-vs vraiymint k' el Feller, c' est l' mia tot rwaitant l' ahouwaedje des tchôzes coinreces ? Dj' ô bén, on sistinme ortografike k' a stî askepyî po sindjer l' ortografe do francès eyet po-z esse tacsé a tos les lingaedjes d' oyi d' no payis. La eto k' i gn a des mots e Feller carolo ki dji n' a djamåy oyou prononcî del môde avou l' ci k' is sont prononcîs. Metans, « môjo » ki m' famile a todi prononcî dinsi « maujone » (sins naziålijhaedje di l' « n » ey avou on « au » court). Dj' end aveu ddja dvizé lanawaire avou « dispintchî » ki dji ni trouve nén so les papîs (mins dji pinse awè comprindou pocwè après).
| Citåcion: |
| Li problinme, et ça vos avoz metou l' doet dissur, c' est cwand l' PZC moenne a on prononçaedje ki n' egzistêye nén. Ça c' est del biestreye ! |
C' est l' rujhe k' on-z a voltî e-n aprindant l' neyerlandès (foiravant d' el Beldjike) eyet k' on nos tacse l' accint di l' abéyene (Algemeen Belgisch Nederlands). El pé, c' est k' les scoleus cåznut todi e « tusentåle » foû des luçons.
| Citåcion: |
| Sol Wiccionaire (et tot la k' i gn a l' plaece assez), dji sereut po rivni åzès raecinêyes do rfondou, et di mete les "4 prononçaedjes" (ki plèt pa côps esse moens). Avou li pzc e pus ptit, avou ene sipitante notule po dire ki c' est èn acmaxhant prononçaedje, po cwand on n' pout nén mostrer les 4. |
Ci sreut ene clapante idêye, come di djusse.
_________________
El sopoirtance va djonde on si télmint hôt livea k' les sûteyès djins n' pôront pus sondjî a n' nén birer les bezéns. |
|
| Rivni al copete |
|
|
|
|
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci
|
Powered by phpBB © 2001 phpBB Group
|
FAQ
Cweri
Djivêye des mimbes
Groupes d' uzeus
Si fé mimbe
Profil
Lére les messaedjes privés
S' elodjî
