Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Rifondou walon ey esperanto
Potchî al pådje 1, 2  Shuvant
 
Sicrire on novea sudjet   Responde å sudjet    Djivêye des foroms di Berdelaedjes -> Berdelaedjes
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: lon 12 nôv, 2007 15:59:08    Sudjet: Rifondou walon ey esperanto Responde tot citant

Dji cmince ene bate di dvize so ç' sudjet la e francès so "Toudi"

http://forum.toudi.org/viewtopic.php?p=39134#39134

On pout evoyî ci tecse la ås djins do "Bulletin wallon". Pus k' i gn a k' el voyèt, mî k' c' est. Tchaeke avou ene pitite rawete da sinne, e walon kécfeye.

Evoyeu do Bulletin wallon : Habets, Pierre, Rue Gérard Wiket, 23, 4672 Sint-Rmey (Saint-Remy). tel. 04 387 50 71

Eplaideu responsåve : Michèle Victoor 04 234 36 56
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: mår 13 nôv, 2007 18:28:44    Sudjet: Responde tot citant

Li papî Thomsin est so "Toudi"

http://forum.toudi.org/viewtopic.php?p=39206#39206
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 15 nôv, 2007 13:05:46    Sudjet: Response da Martin X. (Composs binde) Responde tot citant

Response da Martin X. (Composs binde)

Dji vou bin sayi di fé on ptit papi avou ci ki dji pinse mins come ça m' mwéjit, dji n' so nin sur di yèsse fwart 'aimable'. Ou bé faurè ki dji fasse one sôrt di 'résumé' su l'émission. A vos di vire mins sûr ki faura 'amiderrer' mi 'scridjaeje' ou bé dj'è l'fé en créole ?

Response :

iva po èn årtike la ki vos racontez vosse voye, vosse vicåreye, djans ! (votre parcours) (c' est vos, Mårtén sôdår k' a stî å Congo ?)

http://rifondou.walon.org/tchanson/composs.php#Congo

Et, al fén, djusse sacwantès royes, po clôre li cayet, so l' årtike da Thomsin : mostrer kel sôre di walon k' i disfind, il est ddja moirt : onk k' est a Kourou nel såreut etertini. Les efants del Walonreye n' etindnut pus les accints do walon, come lu avou s' grand-mame, poy ki minme les grands scrijheus nel cåznut nén voltî avou leus zwers ("rejetons").

Dismetant k' avou li rfondou, tolminme ké djonne ki s' sint fir d' esse walon pout rahavter (raccrocher = se réapproprier) l' lingaedje di ses tayons.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
djozewal



Date d' arivêye: 2005-07-01
Messaedjes: 307
Eplaeçmint: bagué !

MessaedjeDate: sem 17 nôv, 2007 0:57:43    Sudjet: Responde tot citant

D'après l' tècse da lome, ki dj'a comincî à lîre pa l' keuwe èt n'nén rimonter pus wôt, ça sèréve bén mia d' fé rèxhe 5 côps on minme tite ki di s' continter dèl fé è rfondu.
Dji clape dins mès mwins. L' idêye èst l' mèyeuse dès mèyeuses. Bén prope à fé wangnî dès banslêyes d' aidants. Oyi-da.
L' aroke c' èst k'ça doneréve èto cink "fin di stock" à n' nén sawè vinde à mitan pri dins s'bén prope èbalaedje di cèlofane !
http://cgi.befr.ebay.be/illustrations-WALTHERY-contes-bon-vi-tins-EO-wallon

Après tot, si ça l' amûze. I n' tént k'a li d' continuwer à doner èt d' après s' èwarer ki 10.000 ecsimplaires n' ont pri ki 15 djoûs po s' èndaler.

Don ôte costé, dissu l' Aberteke, dj' a vèyu k' è 2004 i n' s' a nén mwêji d' ièsse è rfondu compliminté. Contint k' il èstéve !

Dj' aréve dès lètes èt ène miète di tins, ddins on rènondaedje di Rabulèts, dji lomeréve ça "Ène bate d' èruni" . Nén lès pwinnes, i n' s' adrèsse k' à dès nén-lîjheus do walon.
Rivni al copete
Vey li profil di l' uzeu Evoyî on messaedje privé Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 23 nôv, 2007 14:33:01    Sudjet: Responde tot citant

djozewal scrijha:
D'après l' tècse da l' ome, ki dj'a comincî à lîre pa l' keuwe èt n'nén rimonter pus wôt, ça sèréve bén mia d' fé rèxhe 5 côps on minme tite ki di s' continter dèl fé è rfondu.


L' aroke, c' est ki 5 modêyes, ça n' arindje nolu, foû des ... Lidjwès et des Namurwès, k' ont ddja on "walon standård" (li scrît lidjwès d' ouy a stî rfondou pa Haust e 1944).

Mins e Roman Payis, metans : Tintin est ratourné avou l' accint d' Nivele. Iva; ene miete après, on l' ratoûne avou l' accint d' Cerou, on viyaedje a ... 25 km di Nivele.

El Basse Årdene, boutans : el fåreut ratourner avou l' accint d' Bastogne, do Tchestea (Neufchâteau) do Bork (Saint-Hubert), di Måtche (Marche-en-Famenne). Ey eco ! Les cis d' Bietris, di Transene, di Veskeveye, di Bive, di Djedene ni serént nén co ahåyîs : "Ce n' est pas notre walon".

Ene pîce di teyåte ratournêye e walon do Rou (dlé Tchålerwè) l' est do côp après e walon di Mtet (nén ddja 30 km lon).

Dins l' pordjet di motî francès-walon carolo, tchaeke fråze esteut scrîte avou on metou accint, et dire al fén di ké viyaedje !!!!

C' est vormint do ctaeyaedje des cawes di ceréjhes e cwate !!!!!!

Li På-Hinri, lu-minme, ni scrît nén e walon d' Vorou, la k' i dmeure, mins e "rfondou lidjwès" :

Gn a-t ene sakî k' a respondou å Bulletin walon (e francès, ca ôtmint, i nel front nén passer).

Evoyeu do Bultin : Habets, Pierre, Rue Gérard Wiket, 23, 4672 Sint-Rmey (Saint-Remy). tel. 04 387 50 7
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
djozewal



Date d' arivêye: 2005-07-01
Messaedjes: 307
Eplaeçmint: bagué !

MessaedjeDate: vén 23 nôv, 2007 23:49:17    Sudjet: Responde tot citant

Mèn c' èst bén ènndon d' fé à rlaye dès tiraedjes ki n' si vindenut k' dins l' vichnauve èt fini pa djani dsu l' plantchî do gurnî.
D' ène reuwe à l' ôte lès acsints si aujîyemint kandjî permètenut, insi, po lès pîces di tèyates, à dès novias translateus d' awè leû nom dissu l' afitche.

Po lès cîs ki l' picârd intèrèsse :
http://www.leparisien.fr/home/maville/oise/articles.htm?articleid=291373715
Rivni al copete
Vey li profil di l' uzeu Evoyî on messaedje privé Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 29 nôv, 2007 16:55:41    Sudjet: Response da P.H. Thomsin Responde tot citant

Response da P.H. Thomsin

Awè dj'a bin r'cû vosse lète èt l' lîve d' a Lorint, qui dji n' a nin co léhou, come di djusse ! Mèrci co cints fèyes ...

Vos savez, fré, dji n' a rin disconte li r'fondou walon, dè moumint qu'on l' sicrèye po lès djins qui djåzèt vol'tî l' walon, po lès cis qu' èl léhèt sins s' fé dès mås d' tièsse èt po lès cis (i n'a wêre) qu' èl sicriyèt d' adram'. Tant qu' c' èst po loukî lûre si bot'roûle, n' a nou må ! Tant qu' c' èst po s' fé avu bon inte "sincieûs", passe co ...

Awè mins vola, parèt, dji saye, mi, dè fé (ri)v'ni a nosse bê lingadje, totes lès binamêyès djins qu' èl vèyèt vol'tî, mins qu'i n'ont wêre l' ocasion dèl håbiter. Pus vite qui di m' fé "glèter l' minton" avou lès plankèts qui fèt dèdja partèye di nos sôciètés, dji saye, mi, dè fé l' "ûnité" åtoû dè lingadje di nos tayes. Dji saye, mi, dè rapoûler tos lès cis qui n'ont pus, èl tièsse, è coûr èt pôr èl boke, qui deûs' treûs p'tit bokèts di nosse "vî" lingadje. C' èst po cès djins la qui dji coûrt tot-avå l' province di Lîdje po 'lzî dîre lès sinteûrs, lès coleûrs, li sawoura d'on lingadje qu' èlzî raspite tot doûç'mint èl tièsse (ine confèrince, mitan francès, mitan walon, qui dj' a d' né 30 fèyes èt qui c' n' èst nin co tot!). C' èst po cès djins la qui dji passe tos lès djoûs a posse po 'lzî fé prinde consiyince qu' i djåzèt l' walon tos lès djoûs, sins l' savu a pus sovint, èt qu' i frît bin dèl raprinde pitchote a midjote ("Les liégeoiseries" so Vivacité-Liège-matin, so l' côp d' 8h20). C' èst po cès djins la qui dji scrèye on p'tit bilèt avou on p'tit catrin, divins 'ne gazète po rin, qui 250.000 manèdjes polèt lére totes lès saminnes, dispôy 1988. C' èst po cès djins la qui dji done, tos l's-ans dispôy cwatre ans, so l' viyèdje di Noyé d' Lîdje, (todi po rin), 10.000 pitits lîves come li ci qu' vos troûv'rez chal. C' èst po ratoker l' feû d' leû sov'nances, po raviker l' èhowe di leûs-at'nances ... Si cès djins la n' vinèt nin , tot seûs, a walon, c' èst l' walon qui lès va rèscontrer... Såf qui ...

Såf qui cès djins la ni polèt fé l' vôye vè nosse walon qu' avou çou qu' ènn' ont wårdé (nin todi bramint), çou qui vout dîre chake "si" walon ... Såf qui cès djins la, qu'ont dèdja bin målåhèye dè lére deûs mots è walon, si nos volans lès r'mète sa l' ton di nosse "vî", fåreût qu'on 'lzî r'mèt'reût è l' oûy çou qu'il ont dèdja-st-è l' orèye (c' è-st-insi qu'on raprind a lére li walon, èdon!), èt nin 'ne sacwè qui n' ravise rin por zèls.

Awè, fré, mète, divins lès mins d' cès djins la, dès lîves è r'fondou walon, mi sonle-t-i qui c' èst lès toûrmèter po rin ... Mi sonle-t-i qui c' èst 'lzî d'mander 'ne si grande fwèce qu' i vont taper djus å pus-abèye ... Mi sonle-t-i qui nos difèrints walons ni mèritèt nin ça (n' ont-i nin chake leûs pièles, di cès pièles la qui blaw'tèt èl mémwêre di "cès djins la", come dès mèyes di steûles è cîr d' ine bleûve nut' ?) ... Mi sonle-t-i qui nos n' avans nin l' dreût di r'noyî ci bê lingadje la qui nos-a-st-ac'lèvé, dispôy dès siékes, èt qui nos-a fêt crèhe, so l' hôt dèl Walon'rèye ... Nos n' alans nin tot l' minme nos nèyî a voleûr pouhî è Moûse avou 'ne banse! Adon ...

Adon, vos l' årez compris, dji n'a nin l' minme piceûre qui vos po d'ner, å walon, li grand côp d' min qu'a dandjî oûy. Qui volez-v', chake sès makèts, èdon ! Å rés', dji n' so sûr qui d' ine sôre: dji n' a mutwèt nin tot-a fêt rêzon, tot-a fêt bin l' toûr, mi "pédagojîye" n' èst nin télefèye li pus djusse, mins li r'fondou walon, lu, n' arindj'rè måy lès potikèts dès cis qui volèt bin fé 'ne pitite fwèce po sayî di (r')trover leû "prumîre vwès". Li r'fondou walon ni frè måy qui d' èlzî mète dès hames èl vôye, adon qui c' èst tél'mint åhèye, èt plêhant tot-a 'ne fèye, dè lèyî raspiter sès "p'tits boneûfs". Lès binamêyès djins qui dji v' djåse mi d'mandèt qwè èt come, rapôrt å "r'fondou'. I sont tot pièrdous ! Parèy qui l' èfant qu'on vint d' lî côper l' côrdon po l' deûzinme fèye. Ènnè volèt nin, al copète dè martchî ! Ènn' årît-i sogne? Mi, po m' pårt, dji såye di lès rapåfter atot fant r'glati li walon qui nos mète li coûr al djôye ...

Nonna fré, dji n' vou nin prinde li wadjeûre qui li "r'fondou" sèreût l' pèce po mète so l' trô d' nos difèrinces. Dji so pus vite po "chake sès ritchèsses" ... Nonna fré dji n' vou nin prinde li risse qui nos n' sèrans pus, dimin ou d'après, qu' ine tote pitite pougnêye di "waloneûs", qui tot l' monde louk'rè po dès "rèscoulés" èt qui nolu n' comprind'rè pus ... Dji creû mi, qui tos nos walons s' divèt mète sa leû trinte-deûs po fé fièsse avou tot l' monde', mins qu' ci n' èst nin po çoula qu' tot l' monde deût-st-avu l' minme mousseûre.

Å treûs vîs-omes, s' i plêt-st-a Diu.

Ine bone annêye (dèdja), ine bone santé (èt tot çou qui va-st-avou), sins roûvî tote mi camaråd'rèye, come di djusse.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 29 nôv, 2007 17:07:03    Sudjet: Gn a bråmint des rshonnances Responde tot citant

Gn a bråmint des rshonnances inte si ovraedje eyet l' ci des rfondeus (li pårteye "cossemaedje do walon").

Dji voe minme les deus come alant foirt bén avou n' onk l' ôte.

Si ovraedje po fé raprinde ene miete di walon åzès cis ki, so Lidje, ont co des bokets d' lingaedje et des sons dins leu tiesse.

Li nosse, po les cis ki cmincèt djusse avou l' idêye di "fé ene sacwè pol Walonreye", tot l' raprindant...

... åzès cis ki sont dins des si ptitès coines k' i gn a nén deus pelés lives si sont scrîts dins leu walon da zels, ey eco...

... åzès djonnes ki volèt rexhe foû des sudjets ki li walon classike ni sopoite nén (cåzer d' l' Afrike, di l' espåce, des copiutreces di måjhon...)

I fåreut motoit prezinter ås binamés "vîs-waloneus" lidjwès li rfondou come li sistinme k' a fwait cnoxhe leu bele lete "å" al Walonreye etire. ... Et nén lzî dire ki cisse lete la, et tot l' sistinme Feller, les pareys a zels ki viként e 1907, i nel volént nén. Nén ndpus ki 90 % des scrijheus do payis d' Lidje. Et portant ...
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
djozewal



Date d' arivêye: 2005-07-01
Messaedjes: 307
Eplaeçmint: bagué !

MessaedjeDate: dju 29 nôv, 2007 20:58:45    Sudjet: Responde tot citant

Xhouter, lîre èt scrîre.
Trwès difèrintès tchôzes...
Lès acostumances k' on n' vout nén kandjî... lès idêyes k' on s' (a) faît èt k' on n' vout pont lêyî tchêre... lès ovraedjes k' on faît, todi lès mèyeus, èt lès cîs dès ôtes ki n' valenut nén lès pwinnes di lès riwêtî sins ratinde d' è sawè ène miète di pus... l' walon k' è pus auji à lîre è fonétike... lès mots d' a costé ki sont si diférints k' on n' lès pout nén comprinde adon k' lès cîs d' nosse vichnauve sont si doûs à oye... evd.
Èt, po fini, todi l' minne antiène : " Nosse bè linwaedje i nos l' faut chaper mins dji n' sé nén comint. Cki vos fyèz èst foû di m' n' orbêre : ça dwèt nén ièsse bon !"
Måy ène fiye on ècoraedjemint à n' si nén djoker ! On fini pa z-awè pèzant !
Rivni al copete
Vey li profil di l' uzeu Evoyî on messaedje privé Viziter l' waibe di l' uzeu Jabber
Pablo Saratxaga
Site Admin


Date d' arivêye: 2005-07-01
Messaedjes: 1148
Eplaeçmint: Oûpêye

MessaedjeDate: dju 29 nôv, 2007 21:50:19    Sudjet: Re: Response da P.H. Thomsin Responde tot citant

Response da P.H. Thomsin scrijha:

Såf qui cès djins la, qu'ont dèdja bin målåhèye dè lére deûs mots è walon, si nos volans lès r'mète sa l' ton di nosse "vî", fåreût qu'on 'lzî r'mèt'reût è l' oûy çou qu'il ont dèdja-st-è l' orèye (c' è-st-insi qu'on raprind a lére li walon, èdon!), èt nin 'ne sacwè qui n' ravise rin por zèls.


Såf ki, vos n' trovroz nolu emey les rfondeus po vs ataker ey ataker vosse bouye come vos l' fijhoz avou l' nosse.
Nolu n' vos espaitche di roter l' voye ki vos avoz tchoezi et d' atôtchî les djins ki vos vloz atôtchî; mins adon, pocwè vos n' voloz nén k' des ôtes rotexhe des ôtès voyes (des nén co afroyeyes, ki pus est), pocwè n' voloz vs nén k' on saye d' atôtchî des ôtès djins?

Vos savoz, li lingaedje walon, c' est nén vosse djouwet a vos tot seu, il est a tertos, a tos les cis kel volèt bén eployî po dire des beles come des laides. C' est insi, i vos fårè bén sopoirter k' i gn åye del diversité, k' i gn åye des djins ki tuzèt ôtrumint.

Citåcion:

Awè, fré, mète, divins lès mins d' cès djins la, dès lîves è r'fondou walon, mi sonle-t-i qui c' èst lès toûrmèter po rin ... Mi sonle-t-i qui c' èst 'lzî d'mander 'ne si grande fwèce qu' i vont taper djus å pus-abèye ...


Mins nolu n' va "mete dins les mwins" d' nolu des lives e rfondou; i sont vindous, els atchete kî vout.

Citåcion:
Lès binamêyès djins qui dji v' djåse mi d'mandèt qwè èt come, rapôrt å "r'fondou'. I sont tot pièrdous !


I n' a pont d' råjhon, i sufixh delzî dire çou k' c' est: ene ortografeye sitandårdijheye. El ci ki vout scrire avou el pout aprinde, el ci ki n' vout nén (ou ki n' inme nén) i pout passer houte.

Mins del minme manire ki nozôtes on respectêye k' i gn a des djins ki n' volèt nén scrire li lingaedje walon avou ene seule ortografeye, acceptez et respectez k' i gn a des djins kel volèt.

Citåcion:
mins qu' ci n' èst nin po çoula qu' tot l' monde deût-st-avu l' minme mousseûre.


Oyi da, on pout bén tertos aveur ene mousseure diferinne... tant k' c' est nén l' mousseure do rfondou, c' est çoula?
I gn a-st on grand problinme avou li ptit discours di tolerance ki vos avoz: c' est ki vos nel pratikez nén vos-minme! Vos vloz bén del tolerance pol dujhance da vosse, nén pol dujhance do vijhén...

A mi, el mousseure ki dj' a bon avou, c' est li rfondou, di ké droet voloz vs m' espaitchî d' l' eployî?
Di ké droet voloz vs m' espaitchî di poleur atchter des bindes d' imådjes sicrîtes di cisse manire la?
Mi dj' a bon di lére Gaston Libiestreye, pocwè nel pôreu dj' nén?

On pout bén aveur des mousseures diferinnes? et bén, pratikez çou k' vos pretchîz.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Pablo Saratxaga
Site Admin


Date d' arivêye: 2005-07-01
Messaedjes: 1148
Eplaeçmint: Oûpêye

MessaedjeDate: dju 29 nôv, 2007 21:58:03    Sudjet: Re: Gn a bråmint des rshonnances Responde tot citant

lucyin scrijha:

... åzès djonnes ki volèt rexhe foû des sudjets ki li walon classike ni sopoite nén (cåzer d' l' Afrike, di l' espåce, des copiutreces di måjhon...)


Ça n' a rén a vey; on pout scrire di tot çoula e walon d' Transene... d'ayeurs, vos l' avîz ddja fwait :)

Li rfondou n' permete nén di scrire pus ou des sacwès diferinnes; i permete djusse d' esse pus léjhou, pa pus di djins.

Citåcion:
I fåreut motoit prezinter ås binamés "vîs-waloneus" lidjwès li rfondou come li sistinme k' a fwait cnoxhe leu bele lete "å" al Walonreye etire. ...


Pocwè voleur lzî prezinter l' rifondou?
I n' end vlèt nén; et c' est leu droet. Mi dji lzî prezintreut l' rifondou tot lzî djhant «c' est nén por vos, vos n' inmrîz nén».
On n' fwait nén boere on bådet ki n' a nén soe, endo?
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 30 nôv, 2007 12:42:56    Sudjet: Re: Gn a bråmint des rshonnances Responde tot citant

Pablo Saratxaga scrijha:
lucyin scrijha:

... åzès djonnes ki volèt rexhe foû des sudjets ki li walon classike ni sopoite nén (cåzer d' l' Afrike, di l' espåce, des copiutreces di måjhon...)


Ça n' a rén a vey; on pout scrire di tot çoula e walon d' Transene... d'ayeurs, vos l' avîz ddja fwait Smile


C' est l' veur : dji vén rtrover 5 pådjes ki dj' a scrît e 1982 sol waerbea des vatches (varron, hypodermose bovine). Gn a nouk k' els a lî. Lucyin Léonard, k' els a rçû, a fwait on comintåre e francès : "Quel fermier achèvera la lecture des 5 pages de texte ?" Mi, dj' aveu l' dår, adon, di fé on cours di livea univiersitaire sol maladeye, nén on racourti po les cinsîs. Mins dji n' comprindeu nén co les pondants et les djondants do monde des waloneus. Dj' a leyî ouve tot on tins avou l' "prôze nén racontrece". Pu, gråce a Diu, ça a raspité...

Citåcion:
Les binamêyès djins ki dji vs djåze mi dmandèt cwè et come, rapoirt å "rfondou" . I sont tot pierdous ! Parey ki l’ efant k’ on vént d’ lyi côper l’ coirdon po l’ deujhinme feye. Endè volèt nén, al copete do martchî !


Djusse po dire ki, les binamêyès djins d' nos djins, come les cis d' Lidje, ni voeyèt nén voltî li rfondou po cmincî. Mins, al sicole di Bive ki dj' fwai dispu 2002, tos les mårdis après-nonne do moes d' måss et octôbe, gn a des djins ki vnèt d' 20 a 40 km åtoû d' Bive. Do moens, c' est la k' i dmorèt asteure. Mins les sons do walon k' il ont-st e l' oraye, c' est des accints di Walcoû, di Sombrefe, d' Inguezêye, di Måtche, di Beamont-dlé-Ståvleu, maxhîs avou les cis d' Bietris, di Yåle, di Graide, d' Åbî, di Såcere.

Kimint vloz ki dj' aprestêye ene sacwè scrîte e sistinme Feller, et ahåyî totes ces djins la ?

Dabôrd k' avou li rfondou, on rtrove åjheymint tertos si accint. Al fén, il acceptèt l' sistinme. Mins tchaeconk rilét les fråzes avou si accint. Gn a minme ene djin ki candje li tecse po rmete on sinonime di s' payis, minme on rfrancijhî, estô do mot k' est scrît (ça, c' est co dpus ki lére dins si accint). Dji les leye tertos "aveur bon".

PHT a l' tchance ki, so l' aroyaedje del Province di Lidje k' i cåze, li scrijhaedje a ddja stî "rfondou" pa Haust dispu 1944. Ôtmint, i n' pôreut nén scrire "des råyeus d' clås dins des årmås" a Serè. I dvreut di tote foice mete "des râyeus d' clâs dins des ârmâs". Cénk kilometes pus lon, a cmincî d' Lexhi (Horion-Hozémont), i dvreut scrire "Mârtègn va so s' djârdègn; i veût on lapègn ki magne si perzègn; i houke si tchègn; li tchègn vore sol lapègn..." Les Lidjewès potchrént foû d' leus clicotes divant ene sifwaite ortografeye. A Hu, i dvreut mete "tchestia, bassinia, pontia..."; et a Faimonveye, sabaye... portant, c' est province di Lidje...
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Berdelaedjes Totes les eures sont a GMT + 2 eures
Potchî al pådje 1, 2  Shuvant
Pådje 1 so 2

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci


Powered by phpBB © 2001 phpBB Group