Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

L' Aberteke di may

 
Sicrire on novea sudjet   Responde å sudjet    Djivêye des foroms di Berdelaedjes -> Berdelaedjes
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: mår 27 avr, 2010 12:45:10    Sudjet: L' Aberteke di may Responde tot citant

L' Aberteke di may

replaece l' Aberteke ås scrijhaedjes :
http://aberteke.walon.org/

Les noveles sont so l' Aberteke ås noveles :
http://aberteke.org/index.php

Sicrijhaedjes
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: mår 27 avr, 2010 12:48:45    Sudjet: Responde tot citant

Powezeye imådjrece

http://wa.wikipedia.org/wiki/Powezeye

Jacques Desmet

http://wa.wikipedia.org/wiki/Jacques_Desmet

Accint di ses scrijhaedjes : Melén

Avou l' mwaisse accint :

http://walon.cultureforum.net/scrijeuses-f8/jacques-desmet-t140.htm#496

E rfondou :

T' es come on bwès d' sapéns

T' es come on bwès d' sapéns
Rimpli d' vevîs.
Ti cour, tes ouys, c' est des miroes ;
Ki dj' î vôreu bagnî !

T' es come ene pitite schavêye
Rascovrowe pa des fleurs.
Nolu nel conoxhe,
T' î as catchî tes screts !

Dins t' vwès, n a come èn eco
C' est l' tchanson do bouneur !
Mi l' aveuss prometou ?
Dji mel dimande asteure !

Tes lepes rishonnnut
Ås yebes les pus tinres ;
On s' î vôreut rpoizer !
Mins, m' î lairess trimper,
M' î rtrimper å matén ?
Î sayî l' gosse del promesse
Dinêye avou tes tresses ?

******************
(Tes ouys)

Solea a l' pikete do djoû,
Solea a l' viespreye,
Les coleurs d' èn airdiè,
Li tchanson d' ene mazrindje :
C' est ça, tes ouys !
Fåt ratinde ki t' voyes.

******************
(Pôrè dj' on djoû ?)

Pôrè dj' on djoû
Sôtler pa l' bawete
Po rtchaire dins t' payizaedje
E ti stindant mes mwins ?
Et sayî, å solea,
Les plaijhis k' ti m' dinrès ?

Pôrè dj' on djoû
Mete mes pîs dins tes pî-sintes ?
Etindrè dj' on djoû
Li tchanson ki t' voes voltî ?...

Dji pasreu m' veye a t' vey voltî,
Feme,
S' i n' faleut ki dj' seme !

******************
(A ! Ké bouneur)

A ! Ké bouneur
Po nos deus keurs
Trop biesses do ratinde,
Trop saedjes po des mintes !...

Adon, t' as stî da mi,
T' as seré tes pougns so mes rins,
T' as greté m' pea so mes spales,
T' as pormoenné tes doets dins mes tchveas.
Adon, t' as stî da mi !
T' as brai et dj' a tchanté,
Nos avans rî a piede alinne.
T' as tchanté et dj' a brai
Nos avans viké a piede alinne.

Nos avans rovyî l' tins,
Nos avans rovyî les djins...

*******
(Kî çk' a dit)

Kî çk' a dit
K' on rtoûnreut a poûssire,
K' on rmousreut e tere ?
Kî çk' a dit
Ki l' vint sereut on linçoû
Po nos epoirter on djoû ?...

Cwand t' endirès
Ni ti rtoûne nén
Dji baxhrè les ouys
Po co t' vey mia !...

I t' polnut emoenner,
I t' polnut aloyî,
I polnut prinde tes niûts,
Ti råyî foû d' nosse lét,
T' epoirter foû d' nosse cwete,
T' esserer dins ene veye,
Ou co t' piede dins on bwès..

Cwand t' end' irès
Ni ti rtoûne nén,
Dji baxhrè les ouys
Po co t' vey mia !...

Ti vikes co dins mes niûts,
Si ledjire so mi spale.
Dji sondje co, tot conte twè,
Tes bresses loyîs a m' cô.
Et dj' etindrè todi
Come li tchanson d ' nos betchs,
Si piede dins nos coirs djus.

************
C' est råle...

C' est råle
Ene sakî ki voet voltî.

C' est pus råle
Ene sakî ki voet voltî
L' ovraedje d' èn ôte.

C' est co pus råle
Ene sakî ki voet voltî
L' ovraedje d' on camaeråde !

***********************
Dji scrî por vos

Dji scrî por vos, dji scrî por mi,
Sortot paski vos dvoz sawè
K' i frè co bea, k' i frè co bon
Tant k' vos cåzroz nosse vî walon.

(tos les tecses ådzeu vinèt di l' antolodjeye "Fleurs dialectales", 1975)
http://wa.wikipedia.org/wiki/Antolodjeye_%C2%ABFleurs_dialectales%C2%BB
*************
Håsse

Ele doime, miernowe, rischandeye pa les blames,
Sol pea d' bedot codou ås fraijhes.
Ele påpeye des ouys padvant l' feu d' braijhes
K' elle est bele, insi, nosse madame !

Vla k' les blames letchnut ses ptits pîs,
Elle a djusse yeu l' tins d' les rsaetchî
Di l' tchaleur k' el trawe disk' a s' dos,
Et do s' racweti inte ses deus djnos.

Ele si rafeye : presse tot d' on côp,
Vla k' ele si stind å pus lon :
Ene wadjeure, ene ofrande, sereut ç' podbon ?

Ça n' sereut seur ni l' prumî côp !
Est ç' bén mi k' ele ratind
Li stoumak levé come li pwin ?

divins Li Soverdea, l° 272, moes d' fevrî 2010
http://wa.wikipedia.org/wiki/Li_Soverdea_(gazete)
_________________
Li ci ki n' a k' on toû n' vike k' on djoû.


Candjî pol dierin côp pa lucyin, li mie 19 may, 2010 13:37:57; candjî 2 feyes
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: sem 08 may, 2010 19:01:20    Sudjet: René Dehez Responde tot citant

Prôze nén racontrece

René Dehez

Årvey a Jean-Marie Masset (léjhou e si etermint)

Accint di ses scrijhaedjes : Måmdey

Avou l' mwaisse accint ey e rfondou walon :
http://wa.wikipedia.org/wiki/Jean-Marie_Masset

Riprindaedje do tecse e rfondou cial :

C' est d' ene mwin tronnante ki dji prin m' pene po sayî di dire, di scrire tot l' bén ki nos pinsans d' vos et d' vos scrijhaedjes.

Dji cnoxheu vosse famile, mins di vos, dji n' kinoxheu ki l' ouve. Les a dj' léjhou, dai, vos contes et powezeyes ki vos n' signîz gote ou waire, ...C' esteut çoula ossu.one grande pårt di vosse personålté : li discrecion et li respet des ôtes....

Avou vos contes, ki dji rlé a tchake ocåzion, c' est l' walon di m' djonnesse, avou totes ses ritchesses, si tcholeur, si coleur, ki rvént a mes orayes ; c' est li sovni do doûs ramtaedje di m' grand-mere divizant avou vosse mame, e botike sol Noû Pont....

Mins, gråce a vos, Fré Pire, gråce azès ouves ki vos nos avoz leyî, ci bon vî Måmdey ravicrè tofer el memwere di tos les cis ki l' inmèt.

C' est avou respet ki dji vs dis, å no di tos vos Frés do Club Walon "å rvey", Fré Pire et tinoz nos plaeces å tchôd, la-hôt e cir, po l' djoû des ritrovåjhes.

Divins : Li Viye Spawe 1990; riprins dins Li ptite gazete di Måmdey 1/2010
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: sem 08 may, 2010 19:24:04    Sudjet: Responde tot citant

Prôze racontrece / Sovnances / Redjårbaedje

Léon Bukens

Sovnis d' on gamén di noste Årdene

On traeyin so si spale, mi papa aléve co sovint naxhter e bwès. A longuès ascoxheyes, passéve inte les sapins po-z aler so l' crestea, la k' n aveut des faws.

Dj' el veya rivni on djoû al brune, tot hertchant ene grosse faxhene a s' cou et on saetch di schoices, mitan so si spale, mitan so s' traeyin. Leya toumer s' tchedje al tere, distela l' coide ki loyive li faxhene et s' ashida so l' soû po s' rischaper ene miete. Ashiou avou lu, dji n' dimora nén coe bén do tins, et dj' el fijha-st assoti po k' i m' fwaiye potchî e l' air so s' djino, come a cavale...et i s' meta-st a tchanter so l' cadince del muzike :

Roum dou doum, Colas Roubin,
vosse tabeur ni va nén bén,
vosse meskene ni sait danser,
vosse vårlet n' el sait moenner.

A tos côps, s' djino m' evoyive e l' air et dji xhaxhléve di tot m' cour...
- Eco ene feye, papa ! eco ene feye !

Tot d' on côp, i s' aresta, naxhta e s' potche...
- Sepoz vs bén kî dj' a rescontré ? dmanda-t i
- Kî don, popa ?
- Dj' a rescontré l' coucou, et i m' a dit : "N' avoz vs nén on ptit efant ?" "O awè, Monsieu l' coucou, dj' a-st on ptit valet" "Adon, vos lyi poitroz çoula di m' pårt."

Et vola ki m' popa sôrtixha del potche di s' sårot, doûcmint, precieuzmint, come on trezôr, ewalpêye e-n on gris papî...ene tåte di noer pan a mitan souwêye, on pô racoirnêye...

So l' côp dimefiyant, dji hagna on ptit boket del betchete des dints, adon-pwis tote li tåte î passa, nén sins poenne, ca elle esteut ene miete deure...

- Est i bon l' pan do coucou ? mi dmanda-t i.

Mon Diu, k' c' esteut bon ! Bén meyeu k' nosse pan d' tos les djoûs !

Ouy, dji sai ki s' gosse, el diveut å feu - la ki m' popa aveut fwait cure ene petêye crompire et tchåfer s' cafè -, ås sapéns, ås moitès foyes, å maxhaedje di totes les odeurs do grand bwès.
_________________
Li ci ki n' a k' on toû n' vike k' on djoû.


Candjî pol dierin côp pa lucyin, li mie 19 may, 2010 11:38:07; candjî 2 feyes
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: mår 18 may, 2010 17:38:05    Sudjet: Responde tot citant

Novele fantastike

El trezôr do Rouwå

Scrijheu : Firmin Callaert.

http://wa.wikipedia.org/wiki/Firmin_Callaert

divins : "Boignes contes"

http://wa.wikipedia.org/wiki/Boignes_contes_(noveles)

Accint : Tchålerwè

Mwaisse copeye : http://walon.cultureforum.net/scrijeuses-f8/firmin-callaert-t142.htm

Copeye e rfondou :


(...)
Et tos les côps, c' esteut l' rossea Lagasse k' aveut l' dizeu.

Mins gn aveut rén d' drole a ça. Il aveut on mononke ki fjheut avou l' Diale et ki fouméve todi des cigåres. Et, dins ç' famile la, il estént tertous insi, dijheut on.

Avoz ddja veu les gros cayôs ki sont dins l' fond del cårire, mon Dådet ? Ebén, c' est les Lagasse ki poirtént ces cayôs la cwand lzès faleut ebarker. Gn aveut pont come yeusses po l' foice et po tot.

Mins çou k' i gn a d' drole, c' est k' nos n' les avans djamåy seu awè, ni onk ni l' ôte po ndaler cachî après l' trezôr do Rouwå.

Vos n' savoz nén, vozôtes, çou k' c' est l' trezôr do Rouwå ? Non? Ebén. dji m' vos va raconter.

**************************

Gn a bén lontins d' çoula, divant k' on n' mete les fås-cous et les crinolenes, on ritchåd k' aveut pindou s' feme aveut muchî on grand cofe di fier tot rimpli a make di pîces d' ôr, dins l' Rouwå Sint-Pire, a Lambûssåt.

Et dins s' testamint, il aveut fwait mete ki, po poleur disterer l' trezôr, i faleut daler a cwate, a meynute, avou ene noere poye, ki cwand el poye arivreut ådzeu do cofe, ele si metreut a tchanter. C' est a ç' moumint la k' i faleut fer on trô et choper l' cofe. Mins, dispû l' momint ki l' poye ès meteut a tchanter disk' a tant ki l' cofe esteut eberké et metou bén e plaece, dins ene cåve, i n' faleut nén drovi s' boutche po dire rén k' ci soye.

Byin des côps, paret i, on aveut stî po disterer l' fortune, mins gn aveut djamåy pont k' aveut seu rimpli totes les condicions. il avént todi rvinou sins l' magot, tot prous, et gn aveut djamåy pont k' aveut volou spliker çou ki s' aveut passé.

L' anêye di dvant l' cene ki dj' a tiré å sôr avou vo mononke Cacaye, l' ivier k' i gn a yeu des si grossès aiwes, nos convnans a cwate djonneas, el Tetî, Zande do Crås, Batisse do Noer Potaedje, et mi dabôrd, di daler bouter po cachî après l' trezôr do Rouwå.

L' Tetî s' mete e rote po cachî après ene noere poye. Mins ci n’ esteut nén åjhey a trover. Di ç' tins la, nolu ndè voleut pus tni dins s' polî, veu k' on djheut k' ele amonnént do måleur.

Tolminme, i ndè trove ene å Coulot.

- Laliye, dit-st i a l' feme, èm voloz bén vinde vo noere poye ?
- Prin l’ po rén, m' fi. Ti m' distchedjrès d' ene bele rujhe. Gn a lontins assez ki dji cache a m' endè fé cwite, di cisse sale biesse la.

El Tetî prind l' poye padzo s' bresse et nos vént adverti po daler cisse niût la sins pus tårdjî.

Nos nos metans e rote k' i fjheut tossu noer ki dins on for.

A meynute, nos esténs tos les cwate dins l' Rouwå, avou des schoupes et des hawes, pestelant dins les hôtès yebes, po trover l' plaece do trezôr.

Tot d’ on côp, vla l' poye ki s' mete a tchanter d' ene drole di façon, come on vî cok erumé.

(...)

**************************
El cofe est vormint disgadjî.

Nos nos metans a deus d' on costé yet Batisse di l' ôte, lu k' a l' foice d' on lûteu, et nos cminçans a-z asprouver d' lever l' cofe po l' fé sôrti do trô.

Cwand il a stî astampé, nos vudans wôrs do trô po fé on ptit toubak, divant d' amarer l' cofe avou des coides po l' fé monter pus åjheymint.

Adon, nos voeyans vni vier nos on grand gayård k' aveut ene båbe e ponte tossu noere ki del djumasse. Et so s' gåtche bresse erployî, gn aveut ene tiesse di moirt.

(C' esteut l' noer Zidôre, compurdoz).

I s’ vént mete å boird do trô e s' abaxhant po waitî Batisse ki vneut di rdischinde didins. I leye tchaire el tiesse di moirt ki berôle disk' a dins l' fond.

El grand måbelair dimande po l' rawè.

- S' i vos plait, rindoz mel !

Nozôtes, nos nel schoûténs nén ddja, sondjant bén ki ci n’ esteut nén l' moumint d' pårler.

Mins vla k' i s' mete a braire sins låtchî et a supliyî k' on lyi rinde ès tiesse, fotant ene veye come onk k' on åreut schoircî.

Tant k' a l' fén, Zande, pierdant pacyince, s' abaxhe, ramasse el tiesse di moirt et l' tape wôrs do trô e criyant:

- Tén, vo l' la, et va-z å diale ki t' vegne cweri !

Målureus petcheu ! Boune Notru-Dame di Sint-Amadou !

I n’ aveut nén atchvé del dire ki l' cofe coulbute, nos fjhant voler e l’ air, et ki l' trô si rbouche avou on brût come cwand i gn a on ralaedje-plin dins l' fosse.

Et nos cominçans a-z atraper so nos carcasses des côps d' baston ki tcheynut tossu roed et tossu spès k' des gurzeas.

Dins l' noer, come nos avans polou, nos avans prins nos djambes e spales et nos estans rarivés onk sins l' ôte a l' måjhon di m' pårén Flupe ki nos ratindeut po si e cas nos åréns yeu dandjî d' lu.

Dispu don, dji n’ sai nén s’ i gn a co des cis k' ont stî asprouver, mins çou ki dj' sai bén, c' est k' on n’ poleut pus må d' nos awè, nozôtes, po daler disterer l' trezôr do Rouwå.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: mie 19 may, 2010 15:14:01    Sudjet: Responde tot citant

Tchansons / Redjårbaedje

Redjårbeu : Willy Marchal

Accint : Inguezêye

Les bråvès djins

Scrijheu & compôzeu : Georges Brassens (Chanson pour l’ Åvergnat)

Mwaisse copeye :
http://walon.cultureforum.net/tchansons-eyet-paroles-f5/willy-marchal-t144.htm

E videyo : http://youtu.be/xDBWs3MwX-M

Copeye e rfondou :

I.

Ciste air la, c’ est por vos, vijhén
C’ est po l’ vere d’ aiwe, c’ est po l’ côp d’ mwin,
Ki m’ ont rtapé cwand flåwe et påle
Dj’ end aveu pezant so mes spales.

Vinoz a m’ tåve ki vs m’ avoz dit,
Vos boeroz l’ cafè avou mi.
Cwand les pice-crosse, les bén-rimplis
Cloyént leus ouxhs divant mes pîs.

Vos pinsez k’ ça n’ est cåzu rén,
Mins ça m’ rapåjhele doûcetmint.
Ådjourdu, dj’ î sondje co todi :
Por mi c’ esteut ça l’ paradis.

Merci vijhén, cwant vos iroz,
Dins l’ dierin corti po tertos,
Vos iroz droet, padrî les stoeles,
Å Pere Eternel !

II.

Ciste air la, c’ est por vos, comere,
Po l’ boket d’ pwin et li ptit vere,
Ki m’ ont rmetou droet so mes pîs
Cwand dj’ åreu volé po magnî.

Cwand les ritchåds, et les pouris
Les cis ki n’ vicnut k’ po l’ plaijhi,
S’ è metént å raeze do gozî,
E riyant di m’ vey disbåtchî.

Bén seur, ça n’ esteut nén bråmint,
Mins ça m’ restchåféve tot eddins,
Et cwand dji rsondje a ci ptit vere,
Dj’ el voe co rglati dins l’ loumire

Merci, comere, cwand vos iroz,
Dins l’ dierin corti po tertos,
Vos iroz droet, padrî les stoeles,
Å Pere Eternel

III.

Ciste air la, c’ est po ene sakî
Ki dj’ n’ a croejhî k’ on côp, mins ki
A totshûte metou dins mes mwins
Ses mitches di djambon et d’ blanc pwin.

Les djins k’ on croejhe ni vs voeynut nén,
Por zels, vos estoz moens ki rén.
Cist ome la esteut ôtrumint,
I m’ a rwaitî tot påjhirmint

I n’ m’ a rén dit, mins on sorire,
Ça pout drovi totes les bårires;
Di m’ tiesse a tchessî mes nûlêyes;
Tot s’ bouneur la m’ a fé tchoûlé.

Merci, bråve ome, et cwand vs iroz,
Dins l’ derin corti po tertos,
Vos iroz droet, padrî les stoeles,
Å Pere Eternel

Cordoba, 03/01/2010
_________________
Li ci ki n' a k' on toû n' vike k' on djoû.


Candjî pol dierin côp pa lucyin, li mie 06 awo, 2014 12:50:43; candjî 1 feye
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: mie 06 awo, 2014 12:46:20    Sudjet: Responde tot citant

Li voye do bribeu

1906
Muzike : Maurice Duhamel
Cåzaedje : Gaston Couté

Mwaisse modêye : http://walon.cultureforum.net/t144-willy-marchal#513

E videyo : http://youtu.be/5t5LK0Gx_AY

Respleu

Gn aveut ene bele grande voye di tere
Triviersant les tienes et les plins,
Asteure, n’ est waire pus lådje ki m’ mwin,
Pa woû va dj' poleur passer dmwin ?

1

Su l’ voye dispoy mi pus djonne ådje
Tos les djoûs d’ l’ anêye,
Ritrovant les minmès viyaedjes,
Les minmès tchminêyes,
Stindant l’ mwin po on boket d’ pwin,
Ene peme tote tavlêye,
E candjant d’ plaece come dji l’ etin,
Dji vike a m’-n idêye.

2.

Dj’ passe long erî des gros cinsîs
Di leus rosses di tchéns !
Tot cachant après l’ plaece ossu
Po-z î rovyî m’ fwin ...
Si dj’ a èn oû, c’ est on festin
Ki m’ va rimpli l’ vinte,
Et l’ tchôde prandjire dins l’ moye di strin
Personne po m’ li rprinde.

3.

Dins l’ tins dji passéve åjheymint
Pa ene ôte viyaedje,
Asteure c’ est des grands tchamps d’ frumint,
D’ avoenne ou bén d’ oidje.
On-z î est frexh a poenne k’ i ploût
Et après l’ nûlêye,
Come on n’ voet pus s’ i gn a des broûs,
Fåt shure li pavêye.

4.

Tchaeke anêye e tcherwant leus teres
I m’ volnut m’ passaedje.
S' è vont rpinti, ces mougneus d’ tere !
Waitîz m’ laid vizaedje !
Seur k’ i gn a co des aloumetes
E fond di m’ bezace.
Li feu d’ infier k' dj' elzî va mete
Mi frè rtrover m’ plaece ...

Dierin respleu

On rvierè m’ bele grande voye di tere
Triviersant les tienes et les plins;
Dins wai d' tins, rserè pus lådje ki m’ mwin,
Dj’ el ritrovrè come dins l’ vî tins.

Moirmont, 08/01/2010

Les deus tchansons fourît tchantêye e cåbaret walon d' Bive, li semdi 27 di måss 2010.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Berdelaedjes Totes les eures sont a GMT + 2 eures
Pådje 1 so 1

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci


Powered by phpBB © 2001 phpBB Group