Pablo Saratxaga Site Admin
Date d' arivêye: 2005-07-01 Messaedjes: 1156 Eplaeçmint: Oûpêye
|
Date: sem 16 dja, 2016 20:29:41 Sudjet: li a-bole (et co ds ôtes) alfén so Windows! |
|
|
Boune novele po tos les waloneus, et tos les cis ki dvèt taper des letes a accints ou co dins l' alfabet fonetike eternåcionå.
Avou l' sistinme Linux c' est pår åjhey, gråce al tape "compose" ki permete, come si no el dit, di compôzer tot l' minme cwè, a pårti d' ene rîlêye di tapes simpes.
I sufixh di defini ene secwince di compôzaedje; et come li cogne di ces definixha la c' est tot biesmint on fitchî d' tecse, c' est vormint foirt åjhey.
C' est insi ki dj' pout, dizo Linux, åjheymint taper å, Å, Ç (e grande lete), «, », œ, Œ, et co ds ôtes; tot çou ki dj' vou, et tot çou ki dj' end a mezåjhe.
Mins so Windows...
So Windows i n' a rén d' té.
Et tos les cis k' avént cnoxhou li sistinme "compose" di X11 (li sistinme grafike des unix, come Linux) ont todi stî foirt disbåtchîs.
C' est l' veur, po ene sacwè ossu simpe ki l' sene "çanse" (¢) dji tape avou l' sistinme "compose": Compose + / + c; avou Windows i vs fåt fé Ctrl + Shift + U + 2 + 3 + c
Dj' ô bén, avou Windows i vs fåt kinoxhe li valixhance limerike dins l' ecôdaedje unicôde di çou k' vos vloz taper... nén foirt amiståve çoula.
Mins vola k' gråce å Samuel Hocevar çoula a candjî po tofer (et po on mî)!
Lu minme fén disbåtchî cwand il esteut-st oblidjî d' eployî Windows, a scrît on ptit programe k' epleminte li sistinme "compose" po les sistinmes Windows.
Et ça rote foirt bén!
Çou k' est bén eto, c' est k' on pout rcopyî l' fitchî d' definixhas k' on eploye dizo Linux; ou djusse ahiver l' vosse.
Les definixhas ki vnèt avou l' programe eployèt Compose+a+0 po l' a-bole; come dji so-st afaiti a Compose+a+a, dj' a djusse ahivé on fitchî .XCompose dins m' ridant d' uze Windows, avou les royes shuvantes:
<Multi_key> <a> <a> : "å" aring
<Multi_key> <A> <A> : "Å" Aring
"<Multi_key>" c' est l' no del tape "compose", shût l' secwince k' on vout (chal deus tapes "a" et deus tapes "A" respectivmint), et après les deus ponts li rzultat k' on vout.
I fåt djusse kinoxhe li lomaedje des tapes (po les letes simpes c' est åjhey; po des ôtès sacwès vos ploz dmander chal dji metreut les nos)
Po pus di racsegnes, et po-z aberweter l' programe, alez s' vey la:
http://linuxfr.org/news/sortie-de-wincompose-0-7-5 |
|