Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

André Gauditiaubois

 
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 26 dec, 2021 19:26:04    Sudjet: André Gauditiaubois Responde tot citant

A n d r é G a u d i t i a u b o i s ,
3 , r u e F o n t e n e l l e ,
6 1 2 0 - N a u l è n e s .
ð(ð0 7 1 / 2 1 8 1 0 0 .

V è n u a u m o n d e a D a r m è t l ' d e û s d ' a w o u s ' 1 9 4 9 a m è g n û t m o i n s s e d î j
P a r o l i é r e t p o w é t e w a l o n
L î v o g r a f î y e :
" O n n ' a t t r a p e p a s l e s m u s e s a v e c d u v i n a i g r e " - t è y â t e i n f r a n c è s - D e v i l Paradis 1986
"Roudje oranje"-powézîye walone- Fontenelle 1987
"Lès Blankès Dames èt lès Macrales"-CA 1990
"Èl lumson dèl gnût"-CA 1992
"Ène Sadju..."
"Black Country Blues"
Plakografîye:
Alfred-"Black Country Blues"-Comp.CF01.( vikant au côp d'fuzik)
Alfred-"Djan Pinson"("El mau vèyu voltî")(Gauditiaubois-Dunker)-Dicksong.(2ème Prix-Prix des Jeunes GPCW 1984)
Alain Paquet-"Aut'pau" èt "Zigzonzesse Blues"-TLP.
Laurent "René Binamé" Hendschel-"Black Country Blues"-Arèdje.
Alfred-"Condroz and Western" èt "Toudi èchene"-Dicksong.
Nouwâdje Muzike (Gauditiaubois-Villemarqué-Malempré)-"Roudje Oranje","Amoûr d'èstwèles" èt "I pieut sul vile"-El plake.
A parète: Nouwâdje Muzike (Gauditiaubois-Malempré-Neffe-Villemarqué)-"Pîre d'asses"; Amdjoû (Gauditiaubois-Neffe)-"Tango"; Zeupîre (Gauditiaubois-Malempré V.-Malempré D.)-"Emacralèdje".
"Trop Tchaud" maxi-CD 2 Tites FC O98 SOWAREX d'a William Dunker:"Trop tchaud"&"Just like after the ribote blues" (Gauditiaubois-Dunker).
"Trop Tchaud" CD FC 104 SOWAREX d'a William Dunker."Trop tchaud","L'amoûr èst râle","Baby blues","Just like after the ribote blues","Come in solia padri lès breunes","Black Country blues","Èl tango dèl loke a rloktér","Djan Pinson"(Gauditiaubois-Dunker).
Bistokâdje:
Prix des meilleures paroles GPCW 1989 avou "Lârmes" èt "Come l'arègne" su dès arr. barokes d'a G.Egels.
Alain Paquet èyè s'Binde-"Aut'pau"et"Langâdje dès fleûrs"(Prix des Jeunes GPCW 1986).
Pou l'avni:
Boute pou'ne ortografîye unike dès dialèkes walons(un seul gryphème pour plusieurs phonèmes).
Vout fé conète èl walon patavau l'monde tout coum'lant lès walons avou dès muzikes nuzome (New Age, Sympho-Folk-Rock, Alternative, World Music,etc...).

Scrit aujîyemint in Carolo,Lidjeûs èy' Aclot.
Tchît su lès Dochards.
_________________
Li ci ki n' a k' on toû n' vike k' on djoû.


Candjî pol dierin côp pa lucyin, li dim 26 dec, 2021 20:10:08; candjî 1 feye
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 26 dec, 2021 19:26:47    Sudjet: Responde tot citant

"Faut k'dji m'èvaye"
1
Il èst timps k'l'iviêr fuche woute
Èt adon, k'èl solia boute...
Bén râde, vont skèpî lès djèrnons
Èt lès vètès fouyes crèch'ront...
Dji vou trouvér l'bouneûr
Pou co sinti bate èm keûr
Kand dj'èrwétré lès bias-îs
Dèl feume ki dji wè voltî...
Refrain
Dji n' vou né pièt' di timps,
I gn'a l'monde ki m'ratint...
Dji vou vîr blinkî l'solia,
Dji vou yèsse bén dins m'pia...
Faut k'dji m'èvaye...
Faut k'dji m'èvaye...
2
L'amoûr èst dins lès pachis
Èt dji voureu l'vîr ossi...
I faut roubliyî d'yèsse sâdje,
On èst seûl'mint d'passâdje...
Dj'asteu come au cachot,
Mins dj'aveu l'vint dins m'dos
Ki m'èrboure, ki m'intrin.ne,
Dji vou skètér mès tchin.nes...
Refrain final
Dji n' vou né pièt' di timps,
I gn'a l'monde ki m'ratint...
Dji vou vîr blinkî l'solia,
Dji vou yèsse bén dins m'pia...
Faut k'dji m'èvaye... (6x)
Gn'a 'ne sakî ki m'ratint...

Paroles:André Albert Gauditiaubois
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 26 dec, 2021 19:28:03    Sudjet: Responde tot citant

BLAZE (Ernst d'Amberg)(Rica Romeo)

1. Bronson Blues .(étou pa Forlane)
Kand il a pièrdu l'èspwêr, l'ome ki n'crwè pus-z-a
rén,
come in n-aveûle dins l'nwêr, sins blanc baston yè
sins tchén,
a roté viè l'lèd bougnou dèl pwinne, du dèsgoût
d'tout...
Ç'asteut dûr pour li d'vikî...
Sins but', sins cèrtitud', i n'sorteut pus voltî,
èwaré dins l'solitud',
Il asteut tout disbautchî padvant s'murwè spiyî...

(èrfrin) Èl vîye n'èst né toudi bèle, gn'a dès bons
djoûs, dès mwés...
Minme kand nos n'astons né fèl, i n'faut né s'lèyî
dalér...

Pupon d'feume a costé d'li, rén k'dès vîdanjes di
pèkèt...
Pupon d'soçons-z-avou li, rén k'dès pilés d'cabarèt...

Kand l'alcol vos-z-a mougnî, on n'sét pus çu k'c'èst
d'vikî...
In léd djoû, i d'a yeû s'sau,
"I faut k'çoula finiche..." A-t-i pinsé...
"Dj'a trop mau!... I faut k'çoula finiche..."...
I s'a pindu dins s'guèrnî... I n'vouleut pus vikî...

(èrfrin)

Nos'stons stoumakîs, sézis kand-t-ène sakî s'èva...
Surtout d'ès' trisse façon-la...
On s'dit k'avons rouvyî, k'èst-ce k'on n-areut pu fé
pou k'èm' n-ome n'èl fèye né...
(èrfrin finâl)

2 . Èl fèl èrmoûr .
Dji cache mès mots dins-z-ène bote di strin,
In coutia d'bo dins m'dos assaziné(ye) sins tèmwin...
Èl' pwène m'agne foûrt...
Dès-z-eûres sins fin...
Adon m' tûwe doucèt'mint...
L'èwîye transpèrce èm keûr trisse ki s'dès'bat...
Di babûzes, mi, dji m'bèrce...
Vos n'astèz d'dja pus la...
L'angouche m'agne foûrt...
Dès-z-eûres sins fin...
Adon m' tûwe tout lint'mint...
Vos satchèz m'vîye ki s'è va sins conprinde...
Èl' soufrance m'èvayit...
Dji dwè co tout-aprinde...
L'èspwêr m'agne foûrt...
Dès-z-eûres sins fin...
Adon m' tûwe djintimint...
L'amoûr, èl' inne sont st'in seûl' sintumint,
Chake pas m'è-st-in tourmint, èl' libèrté è-st-ène
tchinne...
L'invîye qui doûrt... Dès gnûts sins fin...
C'èst m'vîye tout simplèmint...
In plus-z-in, deûs... Deûs mwins-in, mi sins vos ...
In carcul azârdeû k'èl timps disface, en'do?
In fèl èrmoûr...
Au lon du tchmwin...
Chûvra mès sintumints...

3 . Ôtèl du cu toûrné .
Ça n'va né foûrt, èm' feume fét co s'mouzon,
Dins mès-orèyes, èle mûze come in picron,
Dji n'ètin k'lèye, tous lès djoûs padrî m'dos
C'èst co margaye dins l'tchambe èyè l'maujo,
Dji seû stoûrdi come dins-in tournikè...
Ça direut mya, si-y-èle sèreut s'grougnè!
Lès feumes sont bén mèchantes,
Lès p'tites come lès pus grandes,
Kand i nos faut dalér...
Ôtèl du cu toûrné... Ôtèl du cu toûrné...
K'èst-ce k'on dwèt fé, pou l'fé candjî d'idéye,
Ach'tér dès fleûrs, dès roûzes, dès tabaréyes,
I n'faureut né, d'è fé dès mèsses d'anéyes...
Lès feumes sont foûrt candjantes,
Lès bounes come lès mèchantes...
Nos faudra-t-i dalér...?
Ôtèl du cu toûrné... Ôtèl du cu toûrné...
Lès feumes sont bén djintîyes, lès lédes come lès
djolîyes,
Kand on n'dwèt pus dalér...
Ôtèl du cu toûrné... Ôtèl du cu toûrné...
Dji d'è d'dja m'sau d'èl vîr avou s'mouzon,
C'èst mya d'fé l'pé, noulu n'aveut rézon...
Èyè adon, dji va scrîre ène tchanson...
Lès feumes sont bén djintîyes,
Lès bèles come lès djolîyes,
Kand i n'faut né dalér...
Ôtèl du cu toûrné... Ôtèl du cu toûrné...
Oyî, mès djins, kand l'drig'noute èst finîye,
C'èst l'minme pou lèye, èle è-st-ètou punîye...
Ôtèl du cu toûrné....
Èyè toudi , après l'plouf' vént l'bon timps,
C'èst come l'orâdje, ça n'dure jamais lonmin...
L'ôtèl du cu toûrné...

4 . C'est bon pou mi .(étou pa Vincent Loss-Lîdje
2003)

Dji voureu yèsse tout binauje... binauje di yèsse
contint...
Min wète, dji seû dins l'disbautche...
Toudi dins lès trèyins...
Dji rote dins l'vikérîye come in vî baudèt d'fosse...
Patavau l'confrérîye, on dit k'c'èst mi l'pus losse!
Dji n'voureu né m'èrpintî...
Dji n'a k'ène seûle parole...
L'infièr ou bén l'paradis...
Dijèz-m'... c'èst kwè l'pus drole...
Dji dirai dusk'au bout sins sogne...
Sins maye èm plinde...
Dji n'comprin né co tout...
Dji n'ai pus l'timps d'aprinde...
Dji tchante çoula su m'guitare
Ki m'chût dispû lonmin...
C'èst pus l'fidèle, plinne d'égards,
Kand dji l'tén dins mès mwins...
Èl muzike, c'èst l'èrméde ki m'fét tout roubliyî...
C'èst l'amîye du powéte...
Çoula, c'èst bon pou mi...
C'est bon pou mi...

5 . Tu pous bouchî min tu n' pous né muchî :
(Gauditiaubois-Dunker)
Tu pous bouchî , min tu n'pous né muchî...
Tu pous soûnér, min tu n'pous né rintrér...
Paskè dj'a sèré l'uch al clé pad'vant...
Tu pous tok'tér, min tu n'pous né rintrér...
"Wéte, dj'a sèré l'uch al clé pad'vant...
Si tu caches di muchî pal fènièsse, sins manke, dji
vûd'ré l'pot d'tchambe su t'tièsse..."
...Tu pous tokî, min tu n'pous né muchî...
Vas-è bridér lès canes èt gorlér lès lumsons...
Vas-è au cènk cint diâle adon yè co pus lon...
Tu pous bouchî , min... Paskè dj'a sèré l'uch al clé
padrî...
Tu pous tok'tér, min tu n'pous né rintrér...
"Wéte, dj'a sèré l'uch al clé padrî...
Si tu caches di montér pa l'èscaule, èt' cu sul dègne,
tu s'ras tout banôle..."...
Tu pous tokî, min tu n'pous né muchî...
Vas-è canér lès gates et gorlér lès lumsons...
Si tu n'vas né au diâle, tu diras-z-au démon...
Tu pous bouchî,min...
Paskè dj'a sèré l'lokè dèl rayèle...
Tu pous tok'tér, min tu n'pous né rintrér ...
"Wéte, dj'a sèré l'lokè dèl rayèle...
Minme si t'arrif' z-al drouvu, adon,L'uch dèl caufe
èst clâwéye, èt pou d'bon!" ...
Tu pous tokî, min tu n'pous né muchî...
Tu pous bouchî,min...
Paskè dj'a frumé l'bawète du guèrnî...
Tu pous tok'tér, min tu n'pous né rintrér...
"Wéte, dj'a frumé l'bawète du guèrnî...
Pou gripér dusk'a véla,ma chére, i t'faura prinde in
n-élicoptére!"...
Tu pous tokî, min tu n'pous né muchî...

6 Nwêre nîve:
A l 'vile basse, padvant l'pipchô, in biyèt d'mile
dins m'mwin,
mi, dji cache aprè m'n-ome, èl cén ki vint dèl nîve !
Dji vou z-in pakson tout d'chûte avou m'n-èspritche,
èm culière,
mi, dji ratin co stilâl' avou s'poûde ki m'fé vikî...
Ki m'fra moru, ki m'fra crèvér...(2x)
Mi, dji m'fou d'tout, dj'a dandjî d'çoula , dji
vol'reu, tûw'reu pou d'awè!
Oyi, dji n'inme pus noulu, dji vos wè z-invi tèrtous',

Dji n'wè voltî k'èl poûde ki brûle mès brès, mès
winnes,
blinke dins mès-îs dismantchîs, flaye come in maka
dins m'tièsse ,
m'èvoye au diâle èt co pus lon ! Paradis, Infièr, aute
pau !
Ki m'fra moru, ki m'fra crèvér!(2x)
Mi, dji m'fou d'tout, dj'a dandji d'çoula ! Dji
vol'reu , tûw'reu pou d'awè, pou d'awè...
A l 'vile basse...
Èl song ki coure dins mès winnes èst seûr'mint come du
tchèrbon,
T'ossi nwêr k'èm keûr, k'èm n-âme!
Mi, dji n'a dandjî d'noulu ! Dji vou dèl blanke poûde
pou m'n-èspritche !
Mi, dji m'fou d'tout, dj'a dandjî d'çoula , dji vou
dèl blanke poûde pou m'n-èspritche !
Dji vol'reu , dji tûw'reu pou d'awè!
A l 'vile basse ...
Ène gnût, dji d'è prindré d'trop Ou bén èle sâra foûrt
mwéche...(
Mi),dji crév'ré miérseû dins l'nîve...
Lès bèrnatis m'èrtrouv'ront...
Stauré t'au dzeu d'in batch a cindes,
Adon, is n'âront pus k'a m'prinde
Èyè m'foute tout d'chûte dins l'bègnon...
Dire èR.I.Pé, rintère, i plout!
Su m'lûja, dji vou k'on clitche dès tabaréyes,
C'è-st-insi k'on dit jonkîye in walon...
Adon dji n'sâré né vrémint tout seû
A yèsse mougnî pauzès vièrs, pauzès moulons...

7. I faut waûdér l'èspwêr.:
1
Tu crwès k'c'èst foutu ,adon, tu n'd'è vous pus ,
tu brés dins tès mwins ,tu n'crwès pus z-au lèdmwin ,
tu n'vou rén sawè ,t'ès come in vî sorèt ,
t'as l'keûr èrsètchî ,tu t'dis poukwè vikî.
èrfrin:
Èl vikèrîye vaut l'pwène èt maugrè lès èspènes ,
èl roûze èst l'pus bèle fleûr èt tant k' bat'ront nos
keûrs,
i faut waurdér l'èspwêr, èl monde n'èst né tout nwêr!
2
Faut toudi l'cachî l'bouneûr ki s'a muchî !I n'tchét
né tout seû !
Faut s'bate pou yèsse eureû !
Tant k'tu n'ès né moûrt , faut skètér lès mwés
soûrts,faut dalér d'l'avant,
moustrér k'on est vikant!(èrfrin)Si yeune di pièrdûwe,
ça fé dîj di rtrouvéye,
kand on s'abitûwe, no keûr èst su l'pavéye...
Ç'n'èst né cès dîj-la ki rimplaç'ront l'in.méye!
Tot fèyant l'pacha,on n'roublîye né s'gatéye!
(erfrin)
3
Vikî sins amoûr...
Èst-ce k'on pout fé çoula ,
c'èst prèskè d'dja l'moûrt ki nos chût k'èst d'dja la
!
Gn'a seurmint n'saki n'sadju ki nos ratint!
I nos faut vikî !Çoula dira mya d'mwin!!!
(èrfrin finål)
8.Lèyons l'muzike:.(Lîdje 2004)

Flayons dins nos mins èt tapons du pîd! Astons sul
dagne pou bén vîkî...
Audjoûrdu yè dmin, i nos faut tchantér...Astons rocî
pou s'amûzér...
Lèyons l' bèle muzike èspitér! Lèyons l' fèle muzike
nos pwartér!
I n' crwèt pus-z-a rén, i voureut crèvér,mutwè k' i
voureut tout rouvî...
Tout n' va né si bén mins n' faut né vikî sins prinde
èl' plèjî d'ègzistér...
Lèyons l' bèle muzike s'èscapér! Lèyons l' fèle muzike
nos bèrcér!
Tchoutons 'ne miyète dès tchansons ki nos-intrin.nut
lon,
Lon dès rûjes dèl vikérîye, dès trèyins, dès
bièstrîyes!
Lèyons l' bèle muzike s'èvolér! Lèyons l' fèle muzike
nos z-èrfér!
Flayons dins nos mins èt fèyons du brût, fèyons don
lès sots toute èl' gnût!
Audjoûrdu yè dmin, i nos faut tchantér, astons rocî
pou s'amûzér!
Lèyons l' bèle muzike èrdjiblér! Lèyons l' fèle muzike
nos zouftér!
Lèyons l' bèle muzike èsplôzér! Lèyons l' fèle muzike
nos saulér!

9. Arvouye .(Lîdje 2004)
Arvouye...
Dji d'é plin m'sau du cièl di souye...
Arvouye...
Dji d'é plin m'sau di fé l'minme bouye...
Dji d'é plin m'sau rocî...
Et dji m'èva..
C'èst timps d'candjî...
I gn'a pus rén...
I gn'a pus rén pou m'èrtènu...
I gn'a pus rén....
Et putète bén k'dji n'èrvén pus...
Dji d'é plin m'sau rocî...
Adon, c'èst timps d'candjî...
Arvouye...
Waye, c'èst toudi pus bia aut' pau...
Arvouye....
Paskè rocî, dji m'sin bén mau...
Dji d'é plin m'sau rocî...
Et dji m'èva..
C'èst timps d'candjî...
Arvouye....
Dji vou rotér padzou l'solia...
Arvouye...
Si dji d'meure co, dj'va lèyî m'pia...
Èm pia yè mès ochats...
C'èst timps d'candjî yè dji m'èva...
Èm vîye èst bièsse...
Èm vîye èst bièsse... sins ratirance...
Dji vou dès fièsses...
Dji vou dès fièsses... èt fé bombance...
Èl vîye èst bén trop courte...
Au maleûr, dji di fourte!

Arvouye... (Èt c'èst tèra...)

10 . Intrèye frède .
(Mouchastron èt Cachaplace)

Lès vins d'oneûr, lès vèrnissâdjes, lès plakes-in
n-oûr...
Wétèz l'dalâdje! Is sont rola autoûr dèl tauve,
Dès mouchastrons-ou bén dès fauves...
Pou dire èl vrèye... Ça leûs plét bén!
C'èst co pus guèye kand c'èst pou rén!
Is vont s'tchaukî dins l'capotine,
Sakans ptits fours... dèl galantine,
Du caviar...du saumon fumé,
Du vin mousseû pou l'fé passér
Èt pon d'dringuèye pou lès mèskènes,
Èl boudène plène... Arvouye Marène!
C'èst dins l'édèn min c'èst l'infièr,
Is sont tout fèls, is sont tout fièrs,
Mins-is sont bièsses com'dès tchaufièrs,
Dès côps l'sotrîye n'a pon d'frontière!
Pou dire èl vrèye... Ça leûs plét bén...
C'èst co pus guèye kand c'èst pou rén!
Lès grandiveûs fèy'nut d'leû gueûye,
Bondjoû Madame,dji n'bwè pon d'eûye,
ça n'èst kante minme kè dès bribeûs,
Dès cachaplaces nâreûs, glèteûs...
Èt pon d'dringuèye pou lès mèskènes!
Èl boudène plène... Arvouye Marène!

Gauditiaubois - Hembersin såf 5, 2005

PS
dvins l'tchanson "teches-tu ène miyète" (DFBB), dji n'Djåze nén d'èstwèles à keûwe min di cwèyès stwèles, nin d'siteules a cowe min di keûtès steûles, pas d'étoiles à queue mais de coites étoiles...
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 26 dec, 2021 19:28:43    Sudjet: Responde tot citant

Bén râde fåra awè dès diplomes pou djåzer walon, nenni, dji vou dîre pou djåzer do walon èt bén seûr è francès èt lès inocints du peupe autodidakes èt dèl tradicion dèl boke (orale) n'aront pus l' drwèt di s' sièrvi d' leû lingaedje sins l' pèrmission du SLRE, CLRE, SLLW, UCW èt vos 'n' åroz...

Disfince di sprèkter walon èt d' ratchî al têre... Lès lingwissses ont prî l' pouvwêr, li tradicion orale èst su s'cu, vla l' timps nouvia du "stade anal" walon: Tchîr dès lîves et du papî, seûle façon d'après l' SLRE èt leûs soçons d' scaper nosse lingaedje è dandjî d' disparucion.

Oyi, l' walon n'èst pus on parler mins du scrijaedje di lîves. Adon k' lès tèknikes modèrnes, informatike èt audio-visuwèl (disaedje-tchoutaedje-wètaedje), èternèt, cd-r, dvd, mp3 pourît sièrvi l' tradicion dèl boke a l' orèye. On sort on assimil walon èt gn'a pon plake avou, mins on a drwèt a 3 Feller difèrints.

On a 'ne dozêne d' èmissions TV (Wallons-nous èt sakans pîces) par anêye èt Wallons-nous (pus è francès k'è walon) n'èst né dins l' lisse officîre dès émissions dél "LA2", c'è-st-ène èmission "fantôme". Dvins "Wallons-nous", gn'a cauzu k'Jany Paquay ki djåze è walon èyè lès comèdyins dins lès boukèts d'èrportaedjes di pîces è walon (né lès mésses dèl djôye), minme dès djins ki swè dijant montenut dès pîces è walon dispus pus d' 20 ans ni savenut né ou n' voulenut né rèsponde è walon, adon k'on poureut yèsse ène miyète ipocrite è prèparant lès rèspondås è walon; di totes façons, l'èmission èst prèparéye è francès, lès teknicyns èstant dès purs analfabièsses francofones; on n' si muche pus pou moustrer k'èl walon è-st-ène "langue morte" come li latin èt k' si l' mêsse è latin a disparètu, i dmeure li tèyåte è walon come cèrèmonîye èrlijieuse avou tous sès mistères...

On a ène èmission radio (côpéye è 3) pa samwinne, mins asteûr, c'è-st ène eûre èt 'ne rawète, li londi a 9 h so Vivacité ex-Fréquence Wallonie; èmission "fantôme" né dins l' lisse dès èmissions di Vivacité. Lès vîs cayèts dèl radio èt dèl TV è walon ki dvrît yèsse rimètou è mp3, CD èt DVD, sont st'in trin d' yèsse noyî dins lès caufes, di s'disfacî dins lès archîves oudoubén mutoi bén volés. L'UCW a on noû magazine è A4 mins s' site èternèt èst su s' cu dispus pus d' 1 an. Kand dji dminde dès splicaedjes al Minisse so l' CLRE, in scrijeû walon tchit dins s'marone èt brèt so l' forom di Toudi pask' il a pawou d' piède dès subsites ki n'a maye yeû, dispus il a stî rèconpinsés pa lès sincieûs du pouvwêr è plèce... Li feller èt li rfondou nè sont k'dès-ostis pou mète li lingadje (osti di comunicâcion) su du papî ou dvins dès trêtmints d' tèkce ou pdf èt maye ène fén è swè... Li but èst di scapé l' walon èt né lès soces ki boutnut poul walon.

Li Clre,Sllw & Ucw polnut disparète avou tous sès caches a places, çu ki conte, c'èst k' dès uzeûs du lingâdje survikenut dins l' monde francofone dès sincieûs d'brussèl... Li francès spotchî dès mérdias francofones bèrjes èst l'inmi du walon et nin li France èyè si bièsse lînwe apinse lès Viroux vu k' lès langaedjes réjionaus sont quante minme mia disfindus, ècoradjîs èt difuzés dvins l' France jacobine ( avou Bayrou, çoula dira co mia) ki dvins li Bèrjike communautêre et K' ça fuche li cominålté ki s'ocupe du walon èt né l' réjion walone li moustêre bén, mins dji dote k' ès' manîre di fé fuche difèrinte di l' cène dès brusselêr(e)s. Dji m'ocupe di tchansons è walon èt dins lès tchanteûs, gn'a wére di djåzeûs-è walon; å dérin concours à Lîdje, lès seûls ki parlît euch' patwès, c'ît lès picards di France d'Achteure ki ont fé peû å spikèr du posse; dji crwè k' c'èst come dins lès pîces walones cåzumint toudi montêyes è francès pa "les maîtres de la joie", li tchanson come li tèyåte è-st-in postiche, ène pèruke, in néz di clône mutoi l' furonke d'ès mononke mètu l' timps di sakantès tchansons ou d'ène pîce et k'on rsatche å pu râde kand on èst foû du trèyin; c'èst in lingâdje di cwarmê, d'opèrètes, di folklore; c'èst come mète ène crawate ou in tchapia ki sint l'naftaline. Li walon èst divnu in djeu d'rôle, c'èst tchètês & cwatepèces...Kand lès walons pårlît co walon, c'èst l' francès k'asteut l' langaedje du dimègne ou d' cérémonîye; asteûre, c'èst l'contrêre, li vernake èst toumé su l' pourcia...

Vos avèz dit endogène & vernaculaire?? In lingâdje ki n'èst pus in loyin social, a pièrdu si-åme èt divnu 'ne moirte lînwe... Si l'walon nè rprint né l' parole i dvénra moya èt come gna pon d'lînwe dès sines è walon i sra totafèt moirt.Li CLRE va mutoi cachî d'fé toûrner leû tåve pou fé rivnu lès sprits dès sprèkteûs... "Walon, ès' chal... Adon flaye trwès côps!!! "... Bén seûr on n'poura maye èspètchî lès sincieûs d'si rassonler pou gloûssî d' l'artifaye endogène dès andjes èt d' leûs vîs papîs russes, d'ès donèr dès pris litérêres intur zèls mins l' UCW come riprèsintint di totes lès soces di teyâte "amateur" di Walonrêye poureut sôrtu d'ès "biliguisme" pa in règlumint pus fèl so l'èployaedje du walon dvins leûs soces èt mutoi candjî l'concours du Roi Albert è championat d'inprovizâcion è walon (l'èrgrèté Bernard Perpète k'aveut lancî li "Ligue d'Impro" amon nos-autes vneut do tèyâte walon)... Li seûle vrèye inovåcion utile po li scapaedje di nosse pârler èyèt apoirtéye pa l'ranteûle, c'èst l'imèrsion lingwistke walone dins lès rachonaedjes waloneûs come on fét dins lès cours di lînwes èstranjères. Come scrîjeûs walon, dji n' pou pus continûwer a scrîre è walon èt wangnî dès yards a l'èscoupe avou sins mè dmander si dji n' seû né parèye a tous cès cache a crousses fonktionêres ki vikenut su l' cadâve di nosse vi lingaedje; sins sawè si gn'a co 'ne sakî ki comprint çu k' dj'èscri èt çu k'Wiyam èt lès-autes tchantenut, poukwè continûwer a scrîre dès tchansons èt dès tèkses dins ène lînwe k'on n' djâze cauzu pus ...

Mea Culpa di brêre avou lès vias ki voulenut m'pia yè mès-ochats mins scrîre è walon , c'èst pîre k'ène droke pou mi. Hypocrisie et Malhonnêteté intellectuelle sont-elles traduisibles en wallon? Trotsky d'jeut k'c'asteut l' burocrassie k'aveut tûwer l' rèvolucion russe, avou l' walon, èle a d'dja yeû s'pia ... Gråce, Lucyin pou toutes lès indvencions dès ranteulîs. Li walon, c'èst come l'ècolodjèye, il åreut falu s'd'ocupér gna 30 ans pask'asteûr , il èst cåzu trop târd. Djozèwal m'èsplike k'asteûr pou scrîre sol Forom di Toudi è walon, faut èvoyî avou l' traduksion è francès, mutoi k'on n'polreut né prèter sièmint è walon dins l'rèpublike di José Fontaine; èm soçon Manu Simon kand il a bouté 3 mwès a "Wallons-nous" vleut mète dès sous-tites è francès, dji propôze di mète dès sous-tites walons kand on î pâle francès ou bén dès vwès foû (voix off pou lès franglofones). Po l' lète a l'minisse, èle a rèspondu a costé dèl plake è m'èvoyant lès novèlès lwès so l'CLRE èt JLF (l'ome k'a indvinté l' mot "Endogène" pou fé pus sûtî, minme lès èstratèrèsses èployenut dès lingaedjes "endogènes", au Futuroscope, is djâzenut lîdjwès. Tot cachant 'ne miyète su l' nète, dj'a trové l' mot "endogène" come mincion lingwistike su in site afrikin francofone di lingwisses èt pou zèls, li lînwe "endogène" di "Côte-d'Ivoire", c'èst li francès populêre lokal adon rola "endogène" vout dire "créolisé" èt çoula voureut dîre k'èl walon n'èst k' du francès spotchî; dji crwè k'is ont st-èmantchî çoula pou l' brusselêre...

Dji propôze pou k'èl ministrèsse fuche conpètante di candjî "Service & Conseil des langues régionales endogènes" è "Service & Conseil de l'endophasie communautaire") nè riske né d' piède ès plèce di prèzidint; gn'a rén a fé disconte cès parvenus-la èyèt leûs mèdcins lèjistes univèrsitêres, lès "Experts Koekelberg" du Boulevard Léopold II, li côpeû d' mwins d'nègues. Is dispinsront toudi 5.200.000 AF tot lès-ans a målvå èyè l' walon s' momifiyera dins s' sårcô. Lucyin m' dit :"

On lingaedje n' est moirt ki cwand n' a pus nou cåzeu. End a co ene pougneye." ; adon faureut mutoi rachènér lès dérins cauzeûs du lingaedje walon foû dès tchapèles, potales èyè neûrès lisses tot spèrant k'on d'è frè nè in lîve di pus :"l'atlas linguistique des derniers jaseurs wallons".

André Gauditiaubois, 2007
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 26 dec, 2021 19:56:48    Sudjet: Responde tot citant

Dji'm va tout brouchter

Dji'm va tout brouchter (Dust my broom)
Dji m'èrlève al pikète du djoû
Adon k'dji'm va tout brouchter...
Dji m'èrlève al pikète du djoû
Adon k'dji'm va tout brouchter...
Dji l'a trop vèyu voltî,
Waye èle dwèt s'èdalér!
Dji va scrire tout plin d' lètes èy'ûkî lès djins k'dji conèt,
Dji va scrire tout plin d' lètes èy'ûkî lès djins k'dji conèt,

Si dji n'èl trouv' né a Djiblou,
Dji cachré du costé d'Baulèt...
Dji n'vou pupont d'coumère ki cache des galants al ville basse,
Dji n'vou pupont d'coumère ki cache des galants al ville basse,
C'ès-t-ène foûrt mwèche feume, èle m'a fé dès cwanes in masse...
Dji crwè bén, dji crwè bén ki dj'va rvènu,
Dji crwè bén, dji crwè bén ki dj'va rvènu,
On n'pous né m'tréter come ça,
Dji n'sé né quand dji s'ré la...
Dji m'èrlève al pikète du djoû
Adon k'dji'm va tout brouchter...
Dji m'èrlève al pikète du djoû
Adon k'dji'm va tout brouchter...
Dji l'a trop vèyu voltî,
Waye èle dwèt s'èdalér!
On m'a ûkî dèl chine, noulu n'l'a vèyu di s'costé-la...
On m'a ûkî dèl chine, noulu n'l'a vèyu di s'costé-la...
Si dji n'èl trouve né z-aus Philippines,
Dji l'cachré z-au congo ou l'Angola...

André Gauditiaubois 2020

https://www.youtube.com/watch?v=3rQXeQYDNiE
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 26 dec, 2021 19:57:45    Sudjet: Responde tot citant

Le Blues du Pays Noir et de la Cité Ardente enfin réunis! (Richard Joelants)

Kand l'rèvèy' sone tos lès djoûs a matin,
Dji mèt' divins mès pîds, mès pantoufes,
Dji dis'hin lès montêyes rouf-rouf
Dji beû 'ne jate di neûr cafè,
Dji m'rinètèye divins l'vi bassin,
Avou m'brikèt, dji m'va st'ovrér,
Dji prind l'ôtobus' di sih-eûres
Dj'arrif a sèt-eûres po pointér,
Po roûvi k'l'ovrèdje èst deûr,
Lès ovris djàzèt d'condjis,
Dè foutèbale, dès bês dèrbys
Èt dèl saminne dès trinte-deûs-eûres,
Lès sindicats ont promètou,
Branmint dès çans', branmint dès qwàrts,
Lès sindicats ont promètou,
Mins, awè, mame, c'èst po pus tard,
Bin pus tard, branmint pus tard ...
Asteûre vo-m'-Ia, lès mins màssèyes,
C'èst nàhihant d'èsse on man'daye,
1 fàt-ovrér tote ine djoûrnêye,
Po on patron s'crèvér a l'tèye,
C'èst nin k'dji seûye fènèyant
Min vikér po ovrér, ça n'èst nin vikér
D'alieûrs, dji n'oOveûre nin minme por mi,
Fat nin d'mandér!
Dji sèrè crèvé d'vant m'pinsion,
Magni tot crou pa l'polucion ...
1 fàrè fé l'rèvolucion
Èt trâwér l'panse dès gros patrons,
Dès plins d'dollars, dès cras minisses ...
Sins-avu sogne dèl male police ..
Parèt-i, fat branmint mis s'têre
Nin s'plinde, nin hoûlér, nin brêre ...
R'montér l'rèvèy' po d'min matin
Èt tos lès djoûs,
Tos lès djoûs fé l'ènocint...

Gauditiaubois-Muzike d'a Dünker (1975).
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 26 dec, 2021 19:59:35    Sudjet: Responde tot citant

Li 26 d'sètimbe sol Grand Place di Brussèl, on fièstra li Francèse Cominalté avou in spèktake èrtransmètu in dirèk sol prumîre chinne télé di nosse RTBF viè 20H30 (è praymeu) avou l'concours dès 10 tchansons bèrches sol danse avou Jacques Brel èyè "La valse à mille temps", Adamo avou "Vous permettez, Monsieur", "La danse des canards","Born to be alive", Maurane avou "Danser"; dji nd'è rouvîye mins l'cène k'dji n'rouvîye né, c'èst "El mambo dèl loke a rloktér"; muzike d'a William Dunker et parole d'a mi.

Oyî, mès soçons, pou l'prumî cô dins tote li bèle istwère di Bèrjique, on va ètinde ène pètite tchanson è walon sol Grand Place di nosse vîye fèdèrâle capitâle et çoula a l'okâzion dès fièsses dèl Cominalté Francèse di Bèrjike, oyi li fièsse di Walonîye-Brussèl francofone. Mirâke a Brussèl, li Walonerêye ègzisse! William tchantra parèt-i è duwô avou ène canadiyène, come çoula, i n'âra né frèd s'cayau. "El mambo dèl loke a rloktér" n'èst né 'ne tchanson poètike mins ène paskêye a l'ancyène a l'Henri Golan, Camille Trouillet oudoubèn nosse Bob.

Dj'aveu scrit lès paroles è 1989, pou 'ne candidate au Grand Prix de la Chanson Wallone, l'afêre k'a fét toumer l'meur di Berlin pa èfèt papiyon, èl côp 'yûs k'è Michel Feilner a gangnî l' prumî pris èt l' pris du mèyeus djône colon du vî bleû; Lorint Hendschel a stî 2ème.

Li muzike dèl prumîre vèrsion aveut stî scrite pa Fabienne Gossart, ène djône akordèyonisse di Marcinelle èt dj'aveu pris li spotonime di Léon Lechien; mins l'tchanteûse, Mireille Lambert, l'Edith Piaf du Scapè (Moncha/sol/Sampe), n'a né stî rèlîye a l' présèlektion du Hénaut, maugré ki come deuzième tchanson, c'èsteut "Ene pètite tchanson è walon" (muzike:Marc Keiser di Mont'gnî), èrprise pus târd pa nosse Jesebel.

Annie Rak aveut seûrmint des soçons a pistonér oudoubén Emile n'èsteut né co d'acoûrd. Adon dj' a rmètu l'particion dins in ridant, tot ratindant dès mèyeûsès djournêyes.

Au GPCW 1989, dj'a gangnî li pris dès mèyeuses paroles, 10.000f ki dj'a partadji a frére avou les soçons dèl binde au Georges Egels di Tchapèle. "Rin, qu'ine fèye, Elvis", paroles di Jacques Lefèvre et muzike d'a Valentin Theunis n'a stî tchantêye rin qu'ine fèye (poûve Elvis) paskè Jacky n'a pont yeu d'pris adon k'il èsteut pîd d'gayole, dji vou dire favori.

Il areut pu yèsse William Dunker a l'place di William Dunker avant William Dunker ki s'lomeut co Alfred. Mins on n'aleut né dné d'pris a in n-ome avou 'n' marone di cûr nwêr et in costume di Davy Croquette avou in n'égue (grand moukèt) dins s'dos m'aveut dit l'juré JLF dins l'ascenseur du palâ dès congrès.

Téns, gn'a rén d'foûrt candjî dispus 20 ans dins l'walone tchanson. Mins c'èst l' djoû ki l'rifondou a seurmint cominchi kand l'idêye "d'un gryphème pour plusieurs phonèmes" a crèchu tot du long d'èm prumî cauzâdje avou l' djône gayard d'Hastière lomé Lorint, li Bob Dylan di Dinant; faut dire k'il aveut l'minme tchimîche et l'agayolâdje du goria a muzike a boke.

On ratint toudi 'ne plake avou lès 2 boukèts, moncheû Hendschel... Michel Valère areut dvu awè l' pris du pus long tite di tchanson walone avou:"Mins pouqwè yèsse disbautchî quand ça n'va né, i vos faut l'fé dalér!" mins l'meur a toumé pou d'bon a Berlin li 11 di novimbe 1989.

Come dji vos l'dijeut dj'a rmètu l'manuscrit du Mambo dins-in ridant èt fin 1996, William m'a dmindé dès nouvias tèkses pou s'prumî CD èt Singlè, dj'a mètu lès paroles du Mambo avou lès sakantès-autes nouvès tchansons et a m'grande surprîje kand li plake-lazer a sôrtu gn'a bén râde 12 ans, li boukèt afro-kubin èsteut d'dins. "N' vènèz né dîre k'èst c'èst sale ça" a couminchi li conquête du monde.

Dins l'monde (im)pitoyable du Dalâdje walon, i n'faut maye bachî lès brès; si çoula n'passe né pas l'uch, faut cachî swète pa l'bawète, swète pa l'rayèle et faut sawè ratinde li bon moumint pou grawér s'no su l'âbe di nosse bia lingâdje.

Li 26 d'sètimbe, gn'âra co dès waloneûs k'aront mau leû panse, tant pîre pou yeûs' èt zèls, mi, dji sré binauje di yèsse contint d'yèsse a l'SABAM.

Boune Fièsse a tèrtous' !

AG

(emile a Lucyin Mahin do 27 d' awousse 2009)
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 26 dec, 2021 20:08:03    Sudjet: Responde tot citant

Tu pous bouchî mins tu n'pous né muchî 1 Tu pous bouchî mins tu n'pous né muchî, Tu pous soûnér mins tu n'pous né rintrér Paskè dj'a sèré l'uch al clé padvant, Tu pous toktér mins tu n'pous né rintrér... Wéte, dj'a sèré l'uch al clé padvant, Si tu caches di muchî pal fènièsse, Sins manke, dji vûdré l'pot d'chambe su t'tièsse, Tu pous tokî mins tu n'pous né muchî... Va-z-è bridér lès canes èt gôrlér lès lumçons, Va-z-è aus cink cint diâles, adon èt co pus lon... 2 Tu pous bouchî mins tu n'pous né muchî, Tu pous soûnér mins tu n'pous né rintrér Paskè dj'a sèré l'uch al clé padrî, Tu pous toktér mins tu n'pous né rintrér... Wéte, dj'a sèré l'uch al clé padrî, Si tu caches di montér pa l'iscaule, El cu sul dègne, tu sras tout banôle, Tu pous tokî mins tu n'pous né muchî... Va-z-è canér lès gates èt gôrlér lès lumçons, Si tu n'vas né z-au diâle, tu diras-au démon! 3 Tu pous bouchî mins tu n'pous né muchî, Tu pous soûnér mins tu n'pous né rintrér Paskè dj'a sèré l'lokèt dèl rayèle, Tu pous toktér mins tu n'pous né rintrér... Wéte, dj'a sèré l'lokèt dèl rayèle, Minme si t'arrif' a l'ouvru, adon L'uch dèl caufe èst clawéye èt pou d'bon, Tu pous tokî mins tu n'pous né muchî... Va-z-è canér lès gates èt gôrlér lès lumçons, Si tu n'vas né z-au diâle, tu diras-au démon! 4 Tu pous bouchî mins tu n'pous né muchî, Tu pous soûnér mins tu n'pous né rintrér Paskè dj'a frumé l'bawète du guèrnî, Tu pous toktér mins tu n'pous né rintrér... Wéte, dj'a frumé l'bawète du guèrnî, Pou gripér dusk'a véla, ma chère I faudra prindre in n'élicoptère, Tu pous tokî mins tu n'pous né muchî... EVND DP-Dunker-GauditiauboiS

rimetou e rfondou sol Rantoele
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 26 dec, 2021 20:10:26    Sudjet: Responde tot citant

Trècas ("ouest-wallon de l'est")

Dji seû dins l' trècas,
Dji sin k' çoula n' va nin fwârt...
Min dji n' seû nin stila
Ki sra sézî kand i sra mwârt!

Twè, tu crwès k' ça va dalér mya
Tout vikant dins l' monde dès sokias...
Tout djusse a costé dèl plake...
Tout
djusse a costé dèl plake...

Tu pinses mutwè bén k' dji seû sot
Èt k' dji t’ raconte dès babûzes...
Min dji sé k' i gn' a dès pus sots
Ki nos foutront dins lès rûzes!

Adon, tu n' auras pus k' a braîre
Kand tu conpèrdras mon frére
K' on t' aveut stitchî dès crakes...
K' on t' aveut stitchî dès crakes...

Oyî, tout va fwart bin...
On d' cès djoûs, gn'âra pus rin!
Wéte, twè, tu n'arêtras né l' progrès,
Min tu pous contér su lès baudèts...

Mi, dj'inme co mya d' meurér tout seû
Sins awè sogne, sins awè peû...
C' èst trop taurd pou r' tournér s' frake...
C' èst trop taurd pou r' tournér s' frake...

Dji seû dins l' trècas,
Dji sin k' çoula n' va nin fwârt...
Min dji n' seû nin stila
Ki sra sézî kand i sra mwârt!

Si tu crwès k' ça va dalér mya
Tout vikant dins l' monde dès sokias...
T’ès djusse a
costé dèl plake...
T’ès djusse a costé dèl plake...

Schoûtåve so Vo-Buze

https://www.youtube.com/watch?v=WS54IDu1PsA
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 26 dec, 2021 20:11:03    Sudjet: Responde tot citant

TROP TCHAUD.
(AWOUSS')

Dji wéte pa l'fènièsse lès pautes-in fièsse,
L'èsté dins lès tchamps rint sès-èfants,
Dins l'campagne pèzante, padzou l'solia,
Èl bon timps nos tchante l'awouss' nouvia...
C'è-st-in fèl momint, èl vikérîye
Va tout doûcètemint, plinne di sondj'rîyes....

I fét trop tchaud pou pinsér boutér,
Dji d'meure stauré, èm' pètit colô,
Dins m'longue tchèyère, come in fènèyant,
Tout bèrlondjant, dji ratin l'iviêr...

Pièrdu dins m'tuzâdje, mès-îs s'sèrenut,
Dji wè dès mirâdjes ki m'èpwârt'nut...
Pièrdu dins l'dézêrt, dji crwè moru,
Dji seû su m'tchèyère, dj'aveu dwârmu...
Vos-astèz dlè mi, in vêre a l'mwin,
Dji l'bwè pou no-yî... Ène swè sins fin...

I fét trop tchaud pou pinsér boudjî
Dji wè vos-îs, èm' pètit colô,
Èt vo bia rgârd èst plin d'alumwêre,
Dj'ètin l'tonwêre bouchî dins nos cwârps...

In fameûs-orâdje lume èl bèdèr
Èy'in fèl ramâdje èsclate dins l'nwêr,
Pièrdus dins l'dèzîr, nos 'stons lèdjîres
Èt nos cavolons come dès plomions...
Nos n'fèyons k'in cwârps avou l' pléjî
Di nos vîr voltî d'pus-in pus fwârt

I fét mwins' tchaud, i plout a saya,
D'meurons moyas, èm' pètit colô...

Dins l'gnût d'èsté, dalons pourmènér,
Nos rabrèssî padzou l'èstwèlî...

A.GAUDITIAUBOIS
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon Totes les eures sont a GMT + 2 eures
Pådje 1 so 1

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci


Powered by phpBB © 2001 phpBB Group