Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Jacques Desmet
Potchî al pådje Di dvant  1, 2, 3, 4
 
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 3647
Eplaeçmint: Sidi Smayil, Marok

MessaedjeDate: dju 01 awo, 2019 19:39:50    Sudjet: Responde tot citant

Lès pîres dë Gob'tindje

I-gn-a d' ça dès-ans èt dès razans, lë bièrdji dè l' comëne, c'èstot-one saqui ! C'è-st-à lë qu' tot l' vëladje donéve sès bèdots po qu'ës vôyenèche së r'pache à campagne : së lès têres dès pôves, së lès têres qu'on lai courë à rôyes po lès rècrauchis, dins lès chavéyes po r'nèti lès bouchons, së lès stindéyes qu'avîn' rëpauteler après l'awous', jësqu'à dins lès bwès qu'èstîn' rëchëré dë ç' qu'ë-n-avot à mougni. Tos lès djous, à l' pëquète, on l'ètindéve cwârner po ramonç'ler avou s' tchén lès gadlots autou dë s' baston.

Nosse bièrdji, c'èstot-on vrai sauvadje, ë n' causéve waîre. Tot seû, tote lë djournéye avou dès bèdots, ça vos fwârdjîye on caractêre dë sot, come on baston d' chëte, qu'on n' sét pës pa wou l' prinde. On d'djéve minme qu'ël èstot one miète sôrci së lès bôrds. Ël èstot mau rëv'nant, à n' s'è ni fé one ëdéye, avou tot ç' quë r'chonéve dë d' près come dë d' lon à one djins. D'astchaîyance, ça alève li coster one fameûse fêrdin.nes !..

On-èstot ni lon èri dè l' fén dè l' mwès d' djëlèt'. Lès pîces èstîn' dëdjà vûdîyes dë leûs dinréyes. Ë fiéve tchôd à cûre sëcaugnes èt cayaus. Jésus èt Sint Pîre qui vèyenèt tant volti nosse pëtët vëladje, s'avîn' dët : « Téns, nos-îrîn' bén jësqu'à Gob'tindje, po l' fièsse di nosse Sinte Marîye-Mad'lin.ne. Ë rotîn' tos lès deûs, souwant à gotes. Sint Pîre bëkéve së tos lès cayaus, dè l' pouchêre aclapéye à sès lèpes : « One vôye come on n'è vwèt pës, min.me dins vosse payës, Sègneûr ! » Së Jésus n'arot ni yë sti là, djë wadje quë lès « fèrdome ! » èt lès « nom dë diâle ! » arîn' potchi à l' acheléye fou dè l' bouche dë nosse sint.

Naujë d'ètinde l'ôte braîre èt s' dësbautchi, Jésus l'a rèvôyi au paradës : bén bënauje, Sint Pîre, quë n'avot rén à chëfler dè l' fièsse à Gob'tindje.
Èt volà Jésus mièrseû së l' chavéye. Ël èst naujë, ë n' sint pës sès djambes, ël a fwin èt pad'zeû tot, ël à one bouche come on craya !

Come ë djont l' campagne inte Djê èt Gob'tindje, ë tchait bëk à bëk avou on vî-y-ome quë rawaîte à sès bèdots : c'èstot l' bièrdji dè l' comëne. Cor-on brëbeû, mouwe-t-ë l'ôte dins sès dints. Seûr cor onk qui tape l'ovradje à rén, èt quë s' pormwin.ne d'one tchapèle à l'ôte àprès one crosse dë pwin, onk qu'a dè l' mwate tchau dëzo sès brès.

Jésus vént adlé lë, li dët bondjou èt stinde së bëdon : « Vos n'arîz ni one miète d'aîwe por onk quë fait l' vôye dë Sinte Marîye-Madelin.ne ? » Sins minme rëlèver sès-ouy së l' cë quë li cause, lë bièrdji li ratche on mokion quausë së l' pwinte dë sès chabots èt : « Të n'as qu'a d'mèrer à t' maujone, nâwe, pourë tchén qu' t'ès ! Më-y-aîwe, c'èst por më èt po mès bèdots. Passe të vôye ! »

« Djë dirè on pâtêr por vos à Sinte Marîye-Mad'lin;ne ! »

« Bof... Ça sèrot co l' Sint Tibaut, l' Sint Mèdaud, l' Sint Pëchaud ou l' Sint Tchîyaud, èt co tos l's-otes, por më c'èst broque dë viole, tortos dès diâles tot ratchis. Pète èvôye rademint, ou bén të vas oyë à fé à m' bordon ! »

Tranquële come Batësse, Jésus n' rèspond rén. Bén seûr quë l' vëcairîye dwèt yèsse dêre dins lès cmpagnes, mins tot 'squ'adon, sondje-t-ë, on n' li a jamais sèré l'ëch, ni li r'fëser one gote d'aiwe. Comint è-st-ë possëbe d'ètassi ostant d'èguiëgnes dins s' capotëne. Tot dous, Jésus s'achid astok à l' mau èlèvé. Assotë dè veûy l'ome ossë paujêre, lë bièrdji s'astampe, rodje come on coq. Ça n'èst pës d'vëser qu'ë fait, c'èst bwârler. Sès-ouy li bolenèt fou dë s' tièsse, à s' fé pës laid qu'ë n'èst : « Mins pa tos lès diâles, va-s' më laiyi tranquële, passe të vôye man.nèt bok, t't à l'eûre djë m' va fé on maleûr ! »

Jésus s' rastampe, rote one dîjin.ne dë mètes èri, s'astaudje, së r'toûne, tot paujêre po rawaiti l' bièrdji pèneûs'mint. L'ôte, qui n' ratindéve qu'on capougnadje po passer sès niêrs, monte à s'mince, on sope au lacia ! Ë s'abache, ramasse on gros cayau èt l' lanci après l' tièsse dè l' chëminaud. Ç'tëcë crîye dë mau come on pièrdë...

Tot d'vént nwêr sër on nëk dë fëste. C'èst l' tonwêre quë rèspond, quë s'ènonde jësqu'à Gob'tindje. C'èst l'alëmwêre quë sclate dëssës l' vëladje. Èt après... pës rén... pës ni on brut... come s'ël arot yë on mwârt së tote lë stindéye... Pëpont d' bièrdji, pëpont d' bèdots, pës rén qu' dès blankès
pîres, grëmîyes avou lès têres ; lès rès' dè l' bièrdji èt d' sès bèdots.

C'èst dë ç' djou-là, qu' lès Gob'tindjis on d'vë tâyi leûs pîres, pace qu'i-gn-a onk di d' zèls quë n'a ni volë paurtadji s't-aîwe !

---
e rfondou sol Wikipedia walon

https://wa.wikipedia.org/wiki/Floriconte_des_pires_di_Gobtindje
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3647
Eplaeçmint: Sidi Smayil, Marok

MessaedjeDate: dju 01 awo, 2019 22:46:26    Sudjet: Responde tot citant

Sovnances


Dj’ a sèptante ans, mi vikaîrîye èst padri mi, èt dj’ so bin binauje insi. Dji vous dîre qui dj’a faît m’ bèsogne. Djè l’a faît do mia qu’ dj’âreu p’lu l’ fé. Dji n’ di nin ça po r’çûre dès complimints. Non, tot ç’ qui dj’a faît, dj’i à crwèyu, dj’a tot doner d’ mi po l’ fé, avou m’ keûr, lès-ouys bin au laudje, mins, todi avou one pitite idéye è m’ tièsse ; one pitite idéye, qui vos chufèle dins lès tch’vias, qu’ ça poureût co yèsse mia au lon, au solia, lon èri d’ tot ça…
Avou m’ feume, dj’a yeu èt sâyî d' fé crèche come i faut nos trwès-èfants Dj’ lès-a aîdî po leûs scoles, dins lès grands momints come dins lès p’tits, waîtî à lès fé viker èwou qu’il ont trové place, èwou qu’i sintenut bin. Dj’a bouté al banque quausu vingt-cinq ans divant qu’èle ni tounenuche à côpeûs d’ bousse. Dj’a tchandjî d’ mèstî po yèsse à m’ compte. Dj’a monté chî sociètés. Dj’ârè bouté di dîj-ut’ à sèptante ans : dès djoûrnéyes di doze, quatôze, quinze eûres d’afiléye, divant d’awè one miète di timps por mi. Dj’a sorviké aus-uchîs, aus controleûs dès contrèbucions, aus pikèts d’ grève. Dj’ a monté dès murâyes, rifaît dès vélos, dès-autos, dès machines à laver, dès machines à sètchî lès tch’vias, dès sêres, èt dès djouwèts. Dj’a passé dès chîjes trawéyes à l’ospitau, dj’a ratindu dès-eûres au lon dins m-y-auto. Dj’a boudjî, dji n’ sé combin d’ côps lès meûbes po leûs boums, èt leûs Vèspas tote man.nètes po polu r’moussî ad’lé zèls. Dj’a d’vu donner à mougnî à sèt tchins, ostant d’ tchèts, cinq canaris, trwès-quate rats d’ grin, èt dj’ lès-a tortos ètêrer quand il ont crèvé. Dj’a ècrauchîs doze cokias par an po qu’ nosse famile ôye todi do bon à mindjî, èlèver dès pôyes po leûs-oûs, fé pache dès bèdots po leû tchau. Dj’a pâyi po m’ feume quand èle m’a tapé à l’uch. Dj’a pâyî po lès scoles d’a tortos, leûs tchambes di studiant, èt co leûs dringuèles.
Audjoûrdu, ‘là qu’ tot ça èst yute, oyi ça, dji m’ done li pèrmission d’aler viker à mès-aujes, bin lon èri d’ tot ça. Asteûre, qui dj’ n’a minme pus one mastoke pad’vant mi, nin on fayé patârd dins m’ potche, dj’a bin è l’idéye do profiter dèl mwinre chiquèt d‘ timps qui m’èst d’ner bin lon èri d’ tot ça. Djè l’ rèpète. Dji vou viker paujêremint, mi r’pwâser sins rlache, div’nu miliârdaîre di timps à piède, èl dispinser bièssemint, l’ taper au diâle èt co pus lon s’i faut, pace qui dj’ sé bin què l’ lèddimwin, quand dji m’ rastamperè po prandjêre, i sèrè todi èwou qui dj’ l’a tapé.
Avou lès dêrènès brokes qu’i m’ dimeurenut, dji m’a pâyî one vîye cayute astoke d’on richot, sins courant, avou on pus’ po l’êwe, èwou qu’ i gn-arè nollu po m’ vinu fé assotî. Dj’a co acheté on djon.ne tchin qui vikerè co bin quinze ans vî. Avou one miète di chance, i vikerè pus lon qu’ mi. Èt asteûre, dji m’ va achîre à ratinde do moru, tot passant m’ mwin su l’ tièsse di m’ tchin, tot rawaîtant l’ richot, tot mi d’djant qu’ lès pèchons zèls, i sont bin binaujes di n’awè pont d’ sovnances.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3647
Eplaeçmint: Sidi Smayil, Marok

MessaedjeDate: vén 13 dec, 2019 18:31:01    Sudjet: Responde tot citant

Djë t' vwè volti, më p'tët Mélin,

On n' cause pës waîre lë walon dins nosse Walonîye,
Ël-èst tot jësse bon à-z-aurder dins lès viserîyes.
Së place d'asteûre, c'è-st-au muséye Guggenheim.

Co saquantès djins qu'èl djaurgonenèt au Wisconsin,
One brèssîye qu'èl law'taiyenèt à Mélin :
Zèls èvôyes , ë sèrè spèpyi adlé Guggenheim.

Nos-ârans pièrdë lès paroles da nosse mame ;
Véngt-ans ? Cénquante ? Ë sèrè djës,
C'èst nos racënes qu'on arè pièrdë.

Mins më, djë n'èl rovîyerè jamais,
Jësqu'à m' dairëne blame,
Djë causerè come nosse mame.

On m' pëdrè quéquefîye por on dinosaure,
On d'mé-cougni, one bièsse à paurt,
Auyenéye dins l'aléye da Guggenheim...

Lë cë quë vos min.n'rè, vos dirè :
« C'èst tot ç' quë d'mère dès Walons,
Audjoûrdë : ë n'a pëpont,

Së vos voloz co l' ètinde causer,
Vos d'vroz nachi po-z-è trover...
Quéquefîye bén qu'à Mélin,

Vos l'ètindroz co tchanter. »
« Compëdroz co s' tchanson,
À l' rakëlot dè Walon ? »


Ë vos dirè :



Djë t' vwè volti, më p'tët Mélin,
Tote më djon.nèsse i è-st-au r'cwè,
Më dîros' bén ? Sés' bén poqwè ?
Pace quë t'-m'as bèrci dins tès brès !


Djë t' vwè volti, më p'tët Mélin,
Lûrot-ë co lès sèpt' solias,
Lë plaîve tchaîrot co à sayas,
C'è-st-adlé twè quë dj' so-st-au mia,


Bondjou, frérot ! Bondjou, gamin !
Vos v's-è sov'noz dè l' mai d' nosse man,
Vos v's-è sov'noz dè l' gout d' nosse pwin,
Quand' on d'mèréve co à Mélin !


Qu'on s'assayîve à prëstë l' pausse,
À machi l' bëré èt lès guèsses,
Avou nos p'tëtès pougnes totes crausses,
Sayant d' aîdi à fé soperèce.


On arot dët come s'on d'jéve mèsse,
Vos v's-è sov'noz d' sès doucès djèsses,.
Qu'on avot co nos tâyes dë wèsse !
Èt qu'on vëkéve co à Mélin !


Quand' on avot co nos bèlès croles,
Vos v's-è sov'noz d' sès doucès paroles,
Qu'èle dëjéve po nos rapauji
Quand' nos-èstîn' naujis.





Combén d' côps avans-n' sèmé lès wadjes,
Fait dès loyéns avou dès twatches,
Satchi l' lacia au pés dès vatches,
Quand on vëkéve co à Mélin.


Bondjou, gamin, bondjou, frérot !
Por më, ë m' chone quë dj' i so co,
Vos v's-è sov'noz dès tch'vaus d' nosse pa
Qu'ë faléve min.ner au cwârdia ?


Nos véyîn' volti lès stindéyes,
Sogni à r'laye po lès dinréyes,
Nos-ascauchîn' totes lès chavéyes
Quand on-asplanéve tot Mélin.


Tot ç' quë nosse pa nos-a aprins,
Tot c' quë nosse man nos-a aprins,
C'èst d' travayî po l' lèddëmwin,
C'èst d' causer à môde dë djint.


Por më, të d'meûres todë l' pës bia
Djë vou fé soyë qu'on t'èl dîye
Djë sèrè r'machi à t-y-aurzîye,
Pa d'zeû nosse man, pa d'zeû nosse pa,


Au d' bout d' mès rôyes, djë m'ènn'irè avou m' lingadje,
Djë sèrè l' daîrén, djë wadje !...
Po lès daîrënès s'minces quë dj'arè sèmé,
Djë lairè m' place à qui mèch'ner...

Mauj'ni

riscrît e rfondou namurwès so Wikisourd

https://wikisource.org/wiki/Dji_t%E2%80%99_ve%C3%BB_volt%C3%AE,_mi_p%E2%80%99tit_M%C3%A9lin
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3647
Eplaeçmint: Sidi Smayil, Marok

MessaedjeDate: vén 13 may, 2022 17:14:50    Sudjet: Responde tot citant

Alzheimer

Quand nos
-èstîne priyî d’on costé ou l’ôte,
À on mariadje,
On-ètêremint,
È voyadje :
I-gn-aveût todi one djins ou l’ôte,
Qu’acoureûve ad’lé lèye,
Come à l’ fièsse,
Come à mèsse,
Come à cofèsse.
Èle mi laîyeûve ratinde d’on costé ou l’ôte,
Po choûter,
Po cofèsser
Leûs miséres.
Fé one crwè d’ssu leûs bratches à onk ou l’ôte.
Dji d’meure pièrdu d’on costé ou l’ôte !
Asteûre qui s’tièsse è pièrdûwe d’on costé ou l’ôte,
À l’ maujone di r’pôs,
Au trwèzyinme
Dins s’ tchambe,
Dins l’ colidor.
Èle pormwinrne one malade come lèye, d’on costé à l’ôte.
À l’ bèsognî,
À fé leû mârtchi,
Vélà, catchîye,
Po-z-achèvé leû vikairîye ?
Bon Diu d’ Bon Diu,
On l’ sét bin qu’i faut moru,
Mins poqwè deûs côps djondu,
Dji d’meure pièrdu d’on costé ou l’ôte !
Maujeni

so Payis Condruze (https://www.facebook.com/groups/dumontjoelandsdesmet/permalink/5107576599334986/)
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon Totes les eures sont a GMT + 2 eures
Potchî al pådje Di dvant  1, 2, 3, 4
Pådje 4 so 4

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci


Powered by phpBB © 2001 phpBB Group