Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Jules Pirot (Portî)

 
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 3647
Eplaeçmint: Sidi Smayil, Marok

MessaedjeDate: lon 05 dec, 2022 19:48:30    Sudjet: Jules Pirot (Portî) Responde tot citant

Li medcén Rigolet

II est noûv eûres. I fêt spès, fwârt sipès… À Môj’roûle, èmon l’ Patârd, gn-a on gamin qui stronne do croup’. Rigolèt d’à l’ cinse do bwès, on lêd strwèt come on n’è vwèt pus wêre asteûre, Rigolèt qu’èsteûve portant bon méd’cin et qui vèyeûve vol’tî lès pôves, Rigolèt est v’nu vôy li p’tit Patârd qui stronne do croup’.
« Ah ça, Tèrése, di-st-i à l’ mère, vos l’avoz lèyî couru, don, vosse crapôd ! Pwis l’èfant s’a rafrèdi, diâle m’èvole ! Dji wadje qui c’a stî par on courant d’air.
— Bin, que vloz, on n’ sondje nin todi à tot, don, Mossieû Rigolet.
— On î sondje, diâle m’èvole !… Pôve pitit, va !… Enfin, vos f’roz çoci, diâle m’èvole ! Et pwis çola, diâle m’èvole ! Et pwis co ça ! » Et c’èsteûve todi « diâle m’èvole ! » qui roteûve. À chaque côp, lès crapôdes si signinn’, et minme one di zèles si catcheûve dizos li d’vantrin di s’ moman.
II est noûv eûres et d’méye. I fêt spès, fwârt sipès. Li méd’cin Rigolet est su l’uch d’èmon l’ Patârd. « Diâle m’èvole, qu’i fêt spès !, dit-st-i.
— Oyi… N’auroz nin peu, Mossieû Rigolet ?
— Peu?… Dj’a m’ pistolet, savoz !
— Oyi, mais, parèt, qui dj’ vou dire, c’è-st-au Bagn !
— Ô, Tèrése, qui d’djoz là?… Dji wadje qui vos crwèyoz aus sôrcîres!… Diâle m’èvole, qui n’ vègn’nut-èle ad’lé mi !… Gn-a pont d’ sôrcîres, ô, Tèrése ! Li diâle li-minme ni pout rin sur nos. Wêtîz : on lî dit tant dès côps « diâle m’èvole l’ , et i n’ nos-èvole jamais po ça !
— Bin, vos l' savoz mia qu’ nos, vos, Mossieû Rigolet, pusqui v’s-avoz studî; mais mi, dj’a todi peu, ça, au Bagn. Si vos savîz ci qu’on d’djeûve co vêci…
— Oyi, djè l' crwè ! Mais i d’vint tôrd, et fôt qui dj’ vôye co à Stroûlia. Bonswêr, Tèrése ! Et pwis, diâle m’èvole ! djè l' rovieûve : sognîz bin li p’tit, savoz, car i n’ fôt nin djouwer avou l' croup’ ! »
II est dîj eûres. I fêt spès, fwârt sipès… I tchêt dès grûzias, i tone, il alume… Afîye, on vwèt tot l' Fond de l' Wôrène; au coron li bwès d’ l’Abîye si mostère tot nwâr. Li vint twartchîye lès-ôbes, lès nûléyes chûl’nut, on sone à Môj’rèt…
Mossieû Rigolèt d’à l’ cinse do bwès, qu’a studî, qui vwèt vol’tî lès pôves, qui r’vint d’ Môj’roûle, qui dit todi « diâle m’èvole ! l’ et qui n’ crwèt ni aus sôrcîres ni au diâle, Mossieû Rigolèt dischind au Bagn su Margot, si blanc tch’fô… I passe li ri sins rin vôy qui lès nwârs sapins su l’ tiène quand il alume. Vo-l’-là qui gangne li vôye do pus’. Pa-d’zeû, lès nûléyes chûl’nut; mais l’ méd’cin Rigolèt a studî : i n’a nin peû.
Lès-ôbes djèmich’nut; i ploût, i tone, il alume; à Stroûlia, on sone aus nûléyes. È l’ vôye do pus’, Mossieû Rigolèt fêt couru l’ blanc Margot. Li blanc Margot est fwârt doûs; i court bin; gn’a pont di tch’fô come li blanc Margot !
Tot d’on côp, clap ! Qui gna-t-i yeû, ô, sobayî ? Li blanc Margot court todi… Poqwè n’ coûrreûve-t-i pus? Mais w’è-st-i Mossieû Rigolèt d’à l’ cinse do bwès, qu’a studî, qui dit todi « diâle m’èvole ! », et qui n’ crwèt ni aus sôrcîres ni au diâle ?
Mossieû Rigolèt est stôrè dins one basse ! I n’ sét nin quî qui l’a apougnî et foutu djus d’ si tch’fô dins l’êwe et d’dins lès brous; mais il î est!… Ah ! qu’il est bin arindjî, Mossieû Rigolèt, d’à l' cinse do bwès, li grand strwèt come on n’è vwèt pus wêre asteûre, Mossieû Rigolèt, qu’a studî, qui vwèt vol’tî lès pôves et qui n’ crwèt ni aus sôrcîres ni au diâle !
Il est dîj eûres et d’méye. I fêt spès, fwârt sipès. L’oradje est yute, li cloke di Stroûlia bat s’ dêrin côp. … El’ vôye do pus’, quî est-ce qui court, quî est-ce qui rote?…
Li blanc Margot court todi : li cinse n’est nin Ion et i s’ rafîye do r’vôy si stôve. I va rwè, l' blanc Margot : gn’a pont di tch’fô come li, yût-eûres long, yût-eûres lôdje !
Mais, vêla, bin Ion padrî li, quî est-ce qui rote?… N’est-ce nin Mossieû Rigolèt qu’a studî, qui n’ crwèt ni aus sôrcîres ni au diâle et qui dit todi « diâle m’èvole ! » ?
Il est tot paf, Mossieû Rigolèt ! I comince à-z-î sondjî : n’a-ce nin stî l’ diâle que l’a èvolé ainsi djus d’ si tch’fô dins l’êwe et d’dins lès broûs ? Li blanc Margot n’a nin tchèyu, li !… Et qui va-t-on dire à l’ cinse?… Li qu’aleûve si bin à tch’fô, jamais i n’aveûve tchèyu !…
Ah !  qu’ Mossieû Rigolèt aureûve bin v’lu fé astôrdjî l’ blanc Margot ! Mais l’ blanc Margot court todi; i n’ètind nin criyî padrî li :  « Ôwe, Margot!… Ôwe, Margot!»
Et Mossieû Rigolèt qu’a studî, qui r’vint d’ Môj’roûle, qu’a stî èvolé djus d’ si tch’fô et qu’est tot paf, Mossieû Rigolèt saye di moussî fou dès basses et dès warbîres.
I va yèsse onze eûres. I fêt spès, fwârt sipès. L’oradje est yute… Sobayîy, ô, ci qu’on fêt à l’ cinse do bwès ? Quand il a comincî à toner, ènawêre, « Mon Dieu ! l’ a-t-èle dit l’ cins’rèsse, « et nosse René avô lès vôyes, quén’fîye au fin mitan do bwès ! ». Ossi rade, on a alumé deûs tchandèles divant l’imôdje d’à sint Dônât et i s’ont mètu à priyî tortos : lès djins d’à l’ cinse, et Tavîye d’èmon l’ garde qu’èsteûve vineuwe à l’ chîje, et Tonasse, li vôrlèt.
II ont priyî d’ bon cœur, surtout Tavîye d’èmon l’ garde, qui vèyeûve vol’tî Mossieû Rigolèt.
Asteûre qui l’oradje est yute, on d’vise èsconte do feu. Tonasse, li, fêt dès-atche… tchou!…
« Vo-l’-rilà ! » dit-st-èle li cins’rèsse tote binôje, et Tonasse court à l’uch po r’mète li blanc Margot…
Mais poqwè r’mousse-t-i tot d’ swîte ? Poqwè èst-i blanc-mwârt come ça ?
« N’est-ce nin li ? » dimande-t-èle Tavîye.
— Gn-a persone su li tch’fô,  rèspond-t-i Tonasse tot pèneûs. Margot est tot seû, fin miêr-seû ! Et i s’ met à brêre, et l’ cins’rèsse avou li, et Tavîye ossi qui vèyeûve vol’tî Mossieû Rigolèt.
Mais Tonasse è-st-on-ome. Vite, il èsprind s’ lampe, court à l’uch, potche su Margot, et èvôye ! Dins l’ rouwale do pus’, il arête li tch’fô, i choûte, pwis i crîye : «Hê… houpe!… hê… houpe ! »
Vêla bin Ion, Mossieû Rigolèt l’a ètindu. Il est binôje, Mossieû Rigolèt! et i rèspond : «Hê… houpe!… hê… houpe!»
Tonasse a bin rade sitî d’dé li.
« Jésus’ todi, Mossieû Rigolèt, come vos v’là ! dit-st-i. Avoz tchèyu ?
— Tchèyu? tchèyu?… Non, dji n’a nin tchèyu! Dj’a stî èvolé au grand vint ! »
Mossieû Rigolèt r’potche su Margot : mais i tronne et i dit au vôrlèt:
« Rotoz pa-d’vant avou vosse lampe, Tonasse ! » Tonasse roteûve pa-d’vant, et dins li-minme i sondjeûve : « Èvolé au grand vint!… I sont bin malins po ça! Ci qu’ c’est quand on a studî : on lès trouve totes ! ».
Il est onze eûres. Dizeû l’ bwès, inte deûs grosses nûléyes, on bokèt d’ lune vint wêtî à craye. À l’ cinse do bwès, on crîye, on rît, on brêt. C’est qu’il est riv’nu, Mossieû Rigolèt d’à l’ cinse do bwès, li grand strwèt come on n’è vwèt pus wêre asteûre… Il a stî vôy à Môj’roûle li p’tit Patârd qui stronneûve do croup’ ! Lès coméres ont vèyu s’ bia mouss’mint tot dôboré d’ brous. « Maria !…  binamé bon  Diè !… sinte Geneviève !  crîy’nut-èle.
— II a stî èvolé au grand vint ! » lèzî dit-st-i tot bas Tonasse li vôrlèt, an l’zî clignant l’ouy.
Mossieû Rigolèt, po s’ compte, est riv’nu. Quand i s’aurè dismoussî et r’moussî, i sèrè clér et i pore soper, pwis aler coûtchî et dwarmu… s’i n’a nin peû.
One saqwè d’ sûr, c’est qu’ dispeû ç’ nét-là, Mossieû Rigolèt n’a jamais pus dit « diâle m’èvole ! » Lès mwêchès linwes dîj’nut co qu’il a stî tot disfranchi et qui, quand i d’veûve riv’nu d’ Môjroûle à l’ nét, il aveûve bin sogne, divant d’ pôrti, di dîre à Tonasse, li vôrlèt : « Vos vêroz au-d’vant d’ mi, savoz, Tonasse !… Ni rovyîz nin di v’nu jusqu’au Bagn, savoz ! ».
Vola l’ istwêre d’à Mossieu Rigolet d’à l' cinse do bwès, li lêd strwèt come on n’è vwèt pus wêre asteûre; d’à Mossieu Rigolet qui vèyeûve vol’tî lès pôves et qu’a stî vôy à Môj’roûle li p’tit Patârd qui stron-neûve do croup’; d’à Mossieu Rigolet qu’a studî, qui d’djeûve todi « diâle m’èvole ! » et qui n’ crwèyeûve ni aus sôrcîres ni au diâle; d’à Mossieu Rigolet qu’a stî èvolé djus do blanc Margot, qu’èsteûve tot paf et qu’a stî disfranchi; d’à Mossieu Rigolet qu’èsteûve portant bon méd’cin, qu’est mwârt come lès-ôtes, ‘l-a d’djà lontins, et qu’ Tavîye d’èmon l’ garde vwèt co vol’tî, car èle nos-è d’vise todi…
 
« Contes dau Ion et did près *, Djiblou, 1950, pp. 119-125. Parexhou po cmincî dins « Contes wallons. Les fauves da nosse vie mère », Namur, 1903; riprins dins l' grosse antolodjeye Piron.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon Totes les eures sont a GMT + 2 eures
Pådje 1 so 1

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci


Powered by phpBB © 2001 phpBB Group