Berdelaedjes

[Pablo Saratxaga]

Dji so ki riscrît so wikisourd li motî da Villers di 1793 (E212);
et dji vént d' toumer so ene pådje wice k' on voet, assez clairmint i m' shonne, des a-bole ( å ) :

* åté
* åtoû ou âtour

Adon, c' est motoit des a-tchapea (â) avou l' tchapea scrît foirt sitroet;
mins dins "åtoû", sol minme mot, on-z a èn accint bole sol "a", eyet on tchapea foirt sipaté sol "u", et sol minme roye, "âtour" avou on tchapea sol "a" ...

Kimint l' veyoz vs ?
C' est la: pådje 22 do papîscrît

[Reptilien]

Por mi c' est des a-tchapea, waitîz å mot « bechou » li mot francès « pâle », on direut eto k' il a-st on a-bole.

[lucyin]

Dji pinse eto ki l' idêye des a-bole vént da Jean Haust / Jules Feller, cwand il ont forbatou li rujhe des longs O / longs A inte Serè, Lidje, Vervî et Vizé (la ki l' betchfessî å si prononce come li betchfessî ô).

Gn a des notules dins les BSLLW di 1900-1901 ki dnèt des ôtes manires d' è rexhe, avou do sorfaflotaedje.

Li grand wangnaedje do scrijha å, c' est cwand Wisimus el va prinde pol motî d' Vervî, dedja atuzlé a môde di rfondaedje inte li prononçaedje "au" (Vervî minme ?), li prononçaedje "an") (co noté insi dins E165), li prononçaedje "â" (Årdene a Nonne di Vervî, noté insi e E200, minme viyaeje ki E165), eyet l' prononçaedje "ôn" (inte Vervî Lidje et Vizé, bén oyåve dins les tchansons da Jacques Lefèfre eyet Jean-Pierre Darras / Droles di lodjeus).

Li Cambresier mete des â, et Forir eto, mins des côps foirt sipotchîs a l' imprimaedje.
_________________
Li ci ki n' a k' on toû n' vike k' on djoû.