lucyin
Date d' arivêye: 2005-07-07 Messaedjes: 3758 Eplaeçmint: Sidi Smayil, Marok
|
Date: lon 13 nôv, 2023 13:08:03 Sudjet: Chantal Denis |
|
|
Nosse lingadje
C’è-st-on foû bia lingadje qu’on cause après nos-ôtes,
Qui raconte sès racènes au truviès d’ sès patwès,
Qui cause come one tchanson èt sint bon come one vôte,
Qui d’chind dins vosse gôsî come on vêre di pèkèt.
Do fond dèl Picardîye jusqu’au coron dès Fagnes,
Tot en choutant causer lès djins d’ nosse Walonîye,
On direûve qu’on bon vint s’a pris dins l’ bwès d’ Marlagne
Èt qu’il ènn’a rèchu one tote bèle mélodîye.
Èt dins ç’ bia lingadje-là qu’a l’ coleur di l’Ârdène,
Sintoz l’ bon gosse di laume, di bons frûts ou d’ verdeûs,
Di miscoterîyes, di waufes et d’orêyes di bèguènes,
Sès mots ont stî fwardjîs pa totes sôtes di bouteûs.
C’è-st-on p’tit lingadje qu’a passè l’Atlantique
Po qu’ nos tayons cinsîs î vaynuche fé leû nid.
Èt waurder bin vikants lès mots èt leû musique
En s’ rachonant al chîje tot causant d’ nosse payis.
I-gn-a pont d’ mot qui manque po sayî d’ si comprinde,
Nin dandjî d’ casser s’ tièsse, on cause fwârt aujîyemint.
C’è-st-on fwârt bia lingadje qu’i nos faurè disfinde
Avou tos sès r’vazîs po l’ flori simplumint.
D’abôrd chaque mot qu’on lache dit bin ci qu’i vout dîre,
Ni v’noz nin mau comprinde quand on vos dit « patwès ».
I faut yèsse pêrcè fwârt po conèche lès frontîres
Pace qui n’s-èstans tortos dès èfants da Tchantchès.
C’è-st-on lingadje qui cause come on tauvia d’ârtisse
Èt qui cause co voltî po rîre èt sinte vos pîds.
Nos-aprinde lès-ûsances, qui cause avou franchise
Qui tchante come on pinson quand on l’ maîstri voltî.
C’èst dîre qu’ c’è-st-à maulvau si on l’ riwête di crèsse,
Ci foû bia lingadje-là qu’on-z-a traîtî di p’tit.
Portant quand on l’ conèt, c’è-st-one fameuse ritchèsse,
I-gn-a pont di p’tite fièsse qui n’eûche co si londi.
Èt dès corons d’ Mâmdi tot d’chindant j’ qu’à Djodogne,
On dîreûve qui lès mots d’ nosse pitite Walonîye,
Tot passant pa Nameur, Chârlèrwè ou Bastogne,
Âront faît su pont d’ timps one tote grande sinfonîye.
Chantal Denis
e rfondou: scoles di Bive 14 di nôvimbe 2023
Metou e muzike pa Willy Marchal, sitroete plake "Tchansons e walon", 2023 _________________ Li ci ki n' a k' on toû n' vike k' on djoû. |
|