 |
Berdelaedjes
Forom di berdelaedjes e walon, so tot l' minme ké sudjet
|
| Vey sudjet di dvant :: Vey sudjet shuvant |
| Oteur |
Messaedje |
lucyin
Date d' arivêye: 2005-07-07
Messaedjes: 3664
Eplaeçmint: Sidi Smayil, Marok
|
 Date: lon 18 set, 2023 22:59:11 Sudjet: |
 |
|
| Citåcion: |
Manfred Lejoly
Bonute, Lucien
Av' anvou dès damadges avou l' tron´mint d'tère ?
Ci tèribe tron´mint, lès grandès-êwes ol Grèce (après lès feûs), èt co bécôp pé ol Lybie ...
Pôvès dgins !!!!!
Manfred. |
Nonna, gn a rén yeu di nosse costé.
Gn a nou si grand må k' i gn a on ptit bén ki va avou. Totes les djins on stî di dnêye (midones) [généreux]. Gn a yeu des covtoes et di l' amagnî a rdoxhe.
L' organizåcion a l' air d' esse al leccion [très efficace]. Les camions arivèt tcherdjîs a Tahnawt (å pî d' l' Atlasse). Lavola, gn a come on sistinme di grand botike, avou on relijha [sélection] des sacwès k' ont stî apoirtêyes, li metaedje dins des raiyes [rayons d'étalage], pu tcherdjaedje dins des ptitès otos ki les vont vont poirter dins les viyaedjes. Cénk "manaedjeus" sont raloyîs avou les telefones et les éndjoles ås responsåves des viyaedjes et ås magazinîs. Il evoyèt çou k' les djins ont dandjî, po n' pont awè di cschiraedje [k'chèradje = gaspillage].
Ouy, les scoles ont ricmincî. Totes les scoles do payis, di prefabrikés, ont toumé e-n ene blesse. Po les efants des primaires, il ont scole dins les toeteas [teûtês, tentes] montés pa l' årmêye, dins les viyaedjes minmes (por zels dimorer dé leu famile).
Les cis di sgondaire sont-st evoyîs a Marakech, la k' i sont cpårtis inte les coledjes avou des internats. Lodjîs, nouris et scolés po rén. Mins il a falou cwiter l' famile. Gn a bråmint k' ont tchoûlé, copurade les pus djonnes des scolresses...
Ça a l' air bråmint pus daccion [convenable] k' e l' Libeye et minme e l' Grece.
_________________
Li ci ki n' a k' on toû n' vike k' on djoû. |
|
| Rivni al copete |
|
 |
lucyin
Date d' arivêye: 2005-07-07
Messaedjes: 3664
Eplaeçmint: Sidi Smayil, Marok
|
| Date: lon 25 set, 2023 19:07:08 Sudjet: |
|
|
| Citåcion: |
Dimitri François li 9 di setimbe
bondjou ,
dj'a atindu al pitite lukète ki vosse paîi aveu oyu on tronmint !!
Djèspère di totes mè fwaces ki vo n'avé nin oyu tro di sketaedje ??
Bin à vo. |
| Citåcion: |
Gueuye-Noere li 9 di setimbe
Bondjoû Lucyin,
Dji vént d' lére avou l' hosmint d' tere k' a trevni el Marok. Pôreut vali ki vos dalez bén eyet ki n' vos n' av nén di damadje ? |
Meye escuzes di n' aveur nén drovou vosse mailete pus vite. Mins dj' aveu toplin des cayets e trexhe [en préoccupation].
16 djoûs pus tård, gn a co des ratakes (ritronnaedjes après l' prumî hosmint) mins nén si foirt.
Les djins ont rçû di l' amagnî, des covietes et des mousmints a make. On lzî a basti tertos des toeteas po viker et doirmi, famile pa famile.
Gn a 2 930 viyaedjes ki s' ont rsintou do stombixhmint [secousse]. Ça fwait 2.800.000 dmorants k' ont leu måjhon distrûte u dlåbrêye. 20.000 måjhons sont djus; 30.000 ôtes sont disbrôlêyes.
Gn a ossu des bastimints istorikes k' ont stî distrûts, aprume li moskêye Ben Toumer a Tin Mal.
Çou k' on n' è cåze nén, c' est les biesses. Come c' esteut del nute, et k' les måjhons sont ene so l' ôte dins l' pindant do tiene, les biesses (gades et bedots, kécfeye ene vatche) n' ont pont d' plaece a l' ouxh. Elle estént dins des ptits ståves divins l' måjhon (li lodjisse est ådzeu des ståves. Adon, li bisteu a cåzu tot crevé, stofé dins l' croûlaedje des toets d' tere et maké pås sômîs d' bwès des plafonds. Gn a des viyaedjes ki ti n' î såreus dmorer, tant k' ça flaire les curêyes (charognes).
Gn a nén si grand må k' i gn a on ptit bén. Des plaeces k' i n' avént pupont d' aiwe dispu kékes anêyes, gn a des sourds k' ont rsôté. On esplike çoula pa ene potche di poujhåvès aiwe [nappe phréatique] ki s' a fwait rlever dins les ridaedjes des blokeas d' rotche. Mins gn a motoit ossu des ôtes sourdants ki s' ont assouwé.
_________________
Li ci ki n' a k' on toû n' vike k' on djoû. |
|
| Rivni al copete |
|
|
lucyin
Date d' arivêye: 2005-07-07
Messaedjes: 3664
Eplaeçmint: Sidi Smayil, Marok
|
| Date: lon 25 set, 2023 20:50:47 Sudjet: |
|
|
| Citåcion: |
Mareye, di l' Aisse del tuzance di Bive
Cher Lucien,
J’espère que tu vas pour le mieux et je m’inquiète pour toi, les tien set ta terre d’accueil.
Si tu as un peu de temps juste donne-moi de tes nouvelles ?
bisous
Chaleureusement et solidairement.
Marie Hardy |
(e walon) O neni, dji n' so nén moirt !!!
(ratourné do francès) Vos ki voet todi totes rôzes et totes violetes [optimiste invétérée]: hosmint d' tere: 2950 morts <> accidints d' rôlaedje å Marok e 2022: 3200 moirts (dins les anêyes 2010, c' esteut 4000 et des).
(e walon= Våt mî esse dins si ptite måjhon dins l' Atlasse, minme cwand l' tere hosse, ki d' aler e-n oto so les voyes do payis.
_________________
Li ci ki n' a k' on toû n' vike k' on djoû. |
|
| Rivni al copete |
|
|
lucyin
Date d' arivêye: 2005-07-07
Messaedjes: 3664
Eplaeçmint: Sidi Smayil, Marok
|
| Date: mie 27 set, 2023 23:17:18 Sudjet: |
|
|
| Citåcion: |
Alban Leloup
Bondjoû Lucyin !
Mande escuze si dji n' vos a nén scrît pus timpe po dmander des noveles après l' hosmint d' tere e Marok, mins dj' aveu ddja veyou vo messaedjes so l' forom des Berdelaedjes. Dj' a stî mo rapåjhté d' sawè k' i gn a rén yeu d' vo costé (el Hamdouli'Allah!)
Ké måleur tolminme po totes ces pôvès djins... |
Gråces po vosse messaedje.
Après-dmwin, dji va vey cwè e payis k' a stî cschoyou l' pus, ey apoirter ene miete d' amagnî po les bedots, et des prodûts conte les viers. Dj' alans po cmincî a Tin Mal (moskêye Ben Toumer, distrûte cåzu tote); pu nos waitrans d' aler dins des viyaedjes foû des grandès voyes do costé del passåjhe do Tizi n Tess. Dins les mwaisses viyaedjes et les ptitès veyes, i rdoxhnut did tot (amagnî, mousmints, covietes, toeteas...).
Gn a co pacô des ratakes di hosmint. Dijhoz vos priyires po k' i n' nos arive rén d' måhaitî.
_________________
Li ci ki n' a k' on toû n' vike k' on djoû. |
|
| Rivni al copete |
|
|
lucyin
Date d' arivêye: 2005-07-07
Messaedjes: 3664
Eplaeçmint: Sidi Smayil, Marok
|
| Date: lon 02 oct, 2023 12:04:48 Sudjet: |
|
|
Dj' avans stî vey låvå, sol miercorin (comene d' Irhil, e plin Grand Atlasse). Li voye n' a polou esse disbleyeye ki troes djoûs après l' mwaisse sitombixhmint [secousse principale]. So ç' tins la, on a parachuté des amonucions et emoenné sacwants coixhîs e-n elicoptere (di l' årmêye).
Nos lzî avans poirté di l' amagnî po les gades et les poyes, mins bråmint ont stî touwêyes. Les ôtes ont stî vindowes, ca les djins n' avént pus wice les lodjî. Il è dmoréve tolminme assez po fé plaijhi ås ptits acleveus.
Eyet des djouwets po ls efants, k' estént fén binåjhes. Mins i s' faleut djoker dilé les toeteas metous mierseus, ca tchaeke efant vleut awè åk (come di djusse). Dins on viyaedje, ci n' åreut nén yeu stî possibe.
Dj' avans eto dné ene miete di cwårs direk a des cenes u des cis ki nos rescontrént so les voyes. Dj' aveu mi aidant amazir-cåzant avou mi, çou k' esteut beacôp pus åjhey po-z atôtchî les djins. Et m' feme po djåzer avou les cmeres k' on rescontréve.
Çou k' on a dit sol boune organizåcion di l' aidance a l' air li veur. Dj' avans monté dik' å dierin viyaedje avou ene voye. Et la les djins ont des toeteas, des mousmints et d' l' amagnî, eyet gn a co des moultîs [muletiers] ki les poirtèt pus hôt, dins les viyaedjes sins voye.
Dji m' va fé ene pådje so l' eciclopedeye:
https://wa.wikipedia.org/wiki/Hosmint_d%27_tere_do_Hawse_(2023)
_________________
Li ci ki n' a k' on toû n' vike k' on djoû. |
|
| Rivni al copete |
|
|
lucyin
Date d' arivêye: 2005-07-07
Messaedjes: 3664
Eplaeçmint: Sidi Smayil, Marok
|
|
| Rivni al copete |
|
|
lucyin
Date d' arivêye: 2005-07-07
Messaedjes: 3664
Eplaeçmint: Sidi Smayil, Marok
|
| Date: mie 27 dec, 2023 19:45:32 Sudjet: |
|
|
| Citåcion: |
Joselyne Mostenne
Au JT, ayîr, on-z-a vèyu on « reportage » su l’ Maroc, quausu 4 mwès après li trimblumint d’ têre. I-gn-a co tant d’ sofrances dins l’Atlas, ça faît mau ! |
Li rujhe avou les rapoirtaedjes vinant d' Urope, c' est k' i doeynut mostrer l' mizere po-z awè des rwaitants (li contråve des rapoirtaedjes marokins, la k' on n' voet ki les beas costés).
On sait bén ki l' profete Salomon n' est pus la avou ses ptits diåles po rbasti totes les måjhons so ene nute.
Dj' a cåzé enute å matén avou mi aidant e l' farmaçreye (li ci k' esteut sovint so les fotos) k' a stî ersè a Imizmiz, si payis. Les "cwénzinnes" (2500 DH = 250 uros, cåzu li SMIC), ont stî versêyes ås djins des viyaedjes les pus dlåbrés dispu l' moes d' octôbe.
I sont-st anoncîs so les sûtifones, et les djins les vont toutchî a leu banke (k' il ont dclåré al comission). Pont d' abribance [corruption] des tchampetes, cayides... come dinltins.
Les cwårs arivèt asteure ås cis des ptitès veyes (come Imizmiz). Les djins sont so leu sûtifone (ou leu biessifone) tote li djournêye tot ratindant l' fameus messaedje.
Les comissions k' ont tourné po vey les djins k' ont yeu leu måjhon dihåjhinêye ont stî shuvous pa ene deujhinme ekipe (po vey s' i gn aveut pont d' distoûnmint, come c' est l' cas dins 36 payis avou les cwårs di l' estat). Pu ene troejhinme.
Les somes prometowes po l' ribastixhaedje kimincèt a-z ariver ås cis ki n' ont rén po si rlodjî. Les dierins ci serè les cis k' ont stî rlodjîs foû d' leu viyaedje. Come mi aidant k' a l' måjhon di s' pa distrûte, mins gn a pus nolu k' î lodjive.
On-z a dihalé les rwenes et on cmince a rbasti, avou les maçons do payis. Çou ki rescourcixh [fait redémarrer] l' economeye. Et wårder l' årtchitecteure. Bråmint pus sûti ki di dner l' martchî do rbastixhaedje a ene grosse boesse etrindjire (come les "Bouygues") por zels fé des bildignes !
Al kesse si kes djins n' avént nén trop froed, i m' a respondou k' i gn aveut des covietes tant k' on vleut. Bén seur, les gaztîs et gaztresses des djournås-tévé n' ont pont trové d' tchambe a 22 digrés po lodjî. Mins nozôtes ossu, e moes d' decimbe et djanvî, on dmeure dins des måjhons a 10°. On wåde les paltots ådvins, et s' racafûler dins des covietes. Ci n' est nén çoula l' mizere.
| Citåcion: |
Ô, mèrci po vos èsplicadjes èt… l’ bone ôrganisâcion dès marokins !
Tot ça èst ècoradjant, vormint. |
_________________
Li ci ki n' a k' on toû n' vike k' on djoû. |
|
| Rivni al copete |
|
|
lucyin
Date d' arivêye: 2005-07-07
Messaedjes: 3664
Eplaeçmint: Sidi Smayil, Marok
|
|
| Rivni al copete |
|
|
|
|
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci
|
Powered by phpBB © 2001 phpBB Group
|
FAQ
Cweri
Djivêye des mimbes
Groupes d' uzeus
Si fé mimbe
Profil
Lére les messaedjes privés
S' elodjî
