|
Berdelaedjes Forom di berdelaedjes e walon, so tot l' minme ké sudjet
|
Vey sudjet di dvant :: Vey sudjet shuvant |
Oteur |
Messaedje |
Reptilien
Date d' arivêye: 2017-07-01 Messaedjes: 263
|
Date: mår 30 dja, 2024 11:34:44 Sudjet: -wer |
|
|
Ene djonne djin mi fé sawè k' c' est målåjhey po èn apurdisse di fé l' diferince, e Rfondou, etur les mots ki s' finixhnut pa -wer et ki l' R si prononce (po les sustantifs) : abatwer, ablocwer, afinwer, bonswer,espwer, pårlwer, swer, trotwer,... u nén (po les viebes) : atouwer, djower,...
E Feller, c' est pus simpe. Po les viebes : -wer (-wér), -wè ; po les sustantifs -wêr (-wêr′), -wèr (-wèr′), -wér (-wér′), -war, -wâr, -wër.
Dji n' risinteu nén ci målåjhisté la. On m' dit k' i fåreut mete on -e å coron, minme si c' est omrin, come divins acceswere, browere, conservatwere.
Mi, dji n' e sai rén. Dji respond biessmint k' on shût l' francès, mins est çki c' est vormint ene response ça ? |
|
Rivni al copete |
|
|
Thedarkfly
Date d' arivêye: 2023-12-15 Messaedjes: 18 Eplaeçmint: Hu
|
Date: lon 11 mås, 2024 18:17:55 Sudjet: |
|
|
Bondjoû,
Dji tuze å mot "èn" ki pôreut bén esse sicrit "en" e rfondou paski gn a nén d' maxhisse possibe avou l' son ɑ̃.
Mins tolminme, on scrit "èn" avou ene faflote po bén mostrer ki l' "n" si prononce (si dj' a bén etindou).
Motoit ene possibe relijha po rinde ci cas pus åjhey est di mete ene faflote e rawete ? Mins ça va dans l' sinse contråve do disfaflotaedje
abatwèr, ablocwèr, afinwèr, bonswèr,espwèr, pårlwèr, swèr, trotwèr, ...
Mins pus lådjmint, i gn a ene målåjhe e walon po saveur kimint marker les cossounes ki s' prononcèt, i gn a bråmint des manires ki n' sont nén cowerante :
"e" å coron : "gade"
dobe cossoune : "måss"
crole : "as' fwin ?"
faflote divant : "èn"
rén : "set"
|
|
Rivni al copete |
|
|
Pablo Saratxaga Site Admin
Date d' arivêye: 2005-07-01 Messaedjes: 1158 Eplaeçmint: Oûpêye
|
Date: mår 12 mås, 2024 0:09:16 Sudjet: Re: -wer |
|
|
Reptilien scrijha: |
Ene djonne djin mi fé sawè k' c' est målåjhey po èn apurdisse di fé l' diferince, e Rfondou, etur les mots ki s' finixhnut pa -wer et ki l' R si prononce (po les sustantifs) : abatwer, ablocwer, afinwer, bonswer,espwer, pårlwer, swer, trotwer,... u nén (po les viebes) : atouwer, djower,...
|
A noter k' po les sustantifs c' est todi cossoune + -wer
I n' a pont d' egzepcion.
Po les viebes c' est todi voyale + -wer
(såf ene seule egzepcion: li viebe "tcherwer", ki c' est "*tcherower" (di "tcherowe") avou l' dierinne voyale do bodje k' a stî spotcheye (come talon > taloner > talner; evnd.).
Citåcion: |
Mi, dji n' e sai rén. Dji respond biessmint k' on shût l' francès, mins est çki c' est vormint ene response ça ? |
C' est foirt sovint des calcaedje di mots francès avou l' cawete "-oir";
li mot peurmint walon åreut dvou esse avou l' cawete "-oe".
I gn a eto kékès mots avou -er (sins "w" pa dvant) ki s' prononcè "èr'".
I gn a kékes mots walons, eyet des calcaedjes di lingaedjes tîxhons (soeye-t i direk, soeye-t i pal voye do francès) avou ene cawete "-er" (ki corespondreut a des cawetes -oir/-eur e francès, ou -oe/-eu e walon), ou co des calcaedjes do latén.
les mots walons corespondèt sovint a des parints francès avou -erf/-ers (ki, e francès li "f" ou "s" del fén ni s' prononce nén) :
* nier (fr: nerf)
* tier (fr: thiers)
* vier (fr: vers)
* r(i)vier (fr: revers)
* cier (fr: cerf)
* transfer (fr: transfert)
mins pa côps e francès avou ça finixh avou -er et s' prononcî "èr'" (et nole marke ortografike e francès portant) :
* infier (fr: enfer)
* ivier (fr: hiver)
* fier, scroufier (fr: fer)
calcaedjes do latén:
* madjuster (la: magister)
* påter (la: pater)
calcaedjes di l' inglès ou l' almand:
* baster (en: baxter)
* cazer
* lazer
* pulover
* revolver
Et po fini, kékes mots ki finixhèt avou -er ki s' prononcèt -é;
paski c' est des viebes eployîs sustantivmint a l' infinitif :
* d(i)djuner
* dinner
* soper
* goster
* pårler
(et on dierin, lu tot seu, ki n' est nén on sustantif mins èn addjectif :
* amer, amere, amermint )
Thedarkfly scrijha: |
Bondjoû,
Dji tuze å mot "èn" ki pôreut bén esse sicrit "en" e rfondou paski gn a nén d' maxhisse possibe avou l' son ɑ̃.
Mins tolminme, on scrit "èn" avou ene faflote po bén mostrer ki l' "n" si prononce (si dj' a bén etindou).
|
C' est sortot po fé l' diferince avou "en" ("e" pa dvant voyale; asteure sicrît "e-n"; eg: "e-n almand", å cmince do rfondou on scrijheut "en almand").
Et po-z aveur ene rishonnance avou les rîlêyes :
* si / ès / s'
* ti / èt / t' (la "èt" c' est po fé l' diferince avou "et" = "eyet")
* ni / èn / n'
Citåcion: |
dobe cossoune : "måss"
|
çoula c' est foirt foirt råle; i gn a k' cwate mots:
* måss (fr: mars)
* ess (fr: est) (ça permete di fé l' diferince avou l' viebe "esse", eyet l' cogne coûtchantrece "ès" = si)
* ouwess (fr: ouest) (li fén si doet scrire del minme manire ki l' ôte; come c' "ess", adon ça doet esse "ouwess")
* boss (ki c' est on calcaedje di l' inglès "boss"; et ça permete di fé l' diferince avou "bosse" (d' on bossou))
Citåcion: |
crole : "as' fwin ?"
|
neni, e rfondou c' est "ass", on radjoute on 2inme "s" : ass fwin? ass veyou; saiss, voess,...
(etimolodjicmint c' est djusse li "s" k' a continouwé a-z esse prononcî dins ç' cas la (kesse al 2inme djin singulî).
ça n' rote ki cwand l' codjowaedje finixh avou ene oyåve voyale, li cogne dimandrece est avou -ss;
si l' codjowaedje finixh avou ene oyåve cossoune (eg: magnes, waites, neteyes, finixhs) adon c' est l' prono "tu" ki vént pa drî: magnes tu? waites tu? neteyes tu? finixhs tu?)
(ça s' pout fé dins l' prumî cas eto: as tu fwin, as tu veyou, sais tu, voes tu? = ass fwin, ass veyou, saiss, voess?)
c' est l' veur ki ci-la est mo drole,
dj' a les pinses ki c' est cåze do francès "sept" (sins "e" al fén).
ça pôreut esse "sete" (avou on "e", come e castiyan "siete");
i n' a pont d' risse di maxhî avou èn ôte mot. |
|
Rivni al copete |
|
|
Pablo Saratxaga Site Admin
Date d' arivêye: 2005-07-01 Messaedjes: 1158 Eplaeçmint: Oûpêye
|
Date: mår 12 mås, 2024 0:57:54 Sudjet: |
|
|
I gn a d' ôtès målåjhîstés :
* ey = li betchfessî, ou "e" + "y" ? (metans, "beyole" ci n' est nén "bîyole")
* an/in/on + cossoune : voyale di nez + cossoune; ou voyale + "n" + cossoune ?
et co kékes ôtes...
Notez ki dji n' kinoxhe nou lingaedje ki n' åye nén des sfwaitès rujhes;
a pårti do moumint k' i gn a pus di sons ki d' senes di scrijhaedje i gn årè todi des cas ene miete foû scwere.
Ey aveur on sene po tchaeke son, c' est pår trop pezant.
Motoit ezès scrijhaedjes devanagari (48 senes : 34 cossounes et 14 voyales) (*) ou hangul (27 cossounes et 23 voyales) (**) ?
(*) : mins li devanagari n' est nén èn alfabet, mins èn abouguida : les voyales n' ont nén l' minme categoreye ki les cossounes, et n' si polèt nén combiner del minme manire => i gn a des combinaedjes ki n' si polèt nén scrire, ou co avou les "voyales implicites", pa côps on n' sait nén s' i gn a-st ene voyale (on "a" pol devanagari) ou bén si c' est ene cossoune tote seule.
(**) : ci sistinme est foirt bén fwait po scrire li corêyin, mins, come i gn a, come po tos les lingaedjes, des assimilaedjes di sons, on n' prononce nén vormint çou k' est scrît; i fåt cnoxhe li lingaedje po bén poleur lére.
PS: 27 cossounes et 23 voyales ... mins i scrijhèt tchaeke sillabe e-n on bloc; dins les fontes (eyet dins l' ecôdaedje unicôde) c' est ces blocs la ki sont-st ecôdés (ça fwait ki ça rshonne a des caracteres chinwès). End a.... 11.721 diferins ! |
|
Rivni al copete |
|
|
Thedarkfly
Date d' arivêye: 2023-12-15 Messaedjes: 18 Eplaeçmint: Hu
|
Date: mår 12 mås, 2024 9:07:53 Sudjet: |
|
|
Merci bråmint des côps po les esplikêyes foirt completes !
Dji tuzéve ossu a on cas e francès (minme si l' ortografe francesse n' est nén todi èn egzimpe) avou li minme målåjhîsté : li viebe "fier" (fiyî) sconte del addjectif "fier" (fir). |
|
Rivni al copete |
|
|
|
|
Vos n' poloz nén enonder des noveas sudjets dins ç' forom ci Vos n' poloz nén responde a des sudjets k' i gn a dins ç' forom ci Vos n' poloz nén candjî vos messaedjes dins ç' forom ci Vos n' poloz nén disfacer vos messaedjes dins ç' forom ci Vos n' poloz nén vôter dins les ploncaedjes di ç' forom ci
|
Powered by phpBB © 2001 phpBB Group
|