Berdelaedjes

[lucyin]

ene rîlêye di tecses ritrovés so ene schayete dins les årtchives da Pire Otdjake. C' est do walon do Coûtchant, Il ont l' air d' awè stî scrîts po ene bate di scrijhaedje do Bambwès (2004 ?) la k'on dveut fé des arimés di 8 vers ût-pîtés po ls efants. Pire Otdjåke aveut stî avou Lucyin Mahin a on raploû di rindaedje des pris po ç' bate la.

Sacwants d' ces tecses la ont stî rmetous dins on Singuliers, mins flotchreçmint å no da Lucien Mahin

Jean Wyns vineut todi ås raploûs des walons scrijheus d' après l' Bambwès.

In pansârd

A pwène a-t-on l’ cu toûrnè,
Què m’ grand-pére chere au bufèt,
L’ drèsse ayu sont lès gatôs,
Lès boubounes au cacaô.
Râde, i ‘nnè mindje ène douzène,
R’vént s’achîre, l’ mine inocène.
Quand m’ grand-mére vout ‘nnè doner,
I prind s’n-ér l’ pus-èwaré :
« Ça, c’èst drole, di-st-i toudi,
seûremint qu’on-z-a dès soris ! »

El båbe

Au grand jamés, nu bon-popa
N’aveût yeû ‘ne bârbe come èç’ tèle là !
Èle asteût rôse èt toute chouflèye,
Èle èrcheneut a ‘ne grosse nuwèye !
Nén l’ nuwèye qu’amwinne èl mwés timps,
L’cène qui danse padzeû lès djârdins.
S’on-agne dèdins,
I-gn-a qu’ du vint :
Cè n’èst qu’ çoula,
‘ne bârbe a papa !

Ariére sézon des 3-20

C’è-st-ène drole dè caboche,
Qu’èst bén moche !
Èle a ‘ne grande, léde, lôtche boutche
Qu’èst toute routche.
Sès-oûy’ bén adouvrus
Su l’plène gnut,
Mousseneut du feu qui danse
Dins s’ grosse panse.
N’eûchèz nén peû, mès djins,
C’èst l’ grigne-dints !

• in grigne-dints : betterave creusée dans laquelle on met une bougie.

« La grenouille qui veut se faire aussi grosse que le bœuf ».

Dins in djârdin ‘ne guèrnoûye
Vyeut grochi ‘ne bèle citroûye.
Lèye qui d’meureut si p’tite,
S’a mis a l’tièsse in djoû
Dè d’vèni come in chou !
Èle avala dès mites,
Dès mouches, dès papiyons ;
Èle âla meume, pa côp,
Qu’a mindjî dès lum’çons !
S’ drole dè côrps d’vèneut rond…mès…
Èle n’asteut nén contène
Dè s’ pètite, streute boudène !
Èle asproûve co ‘ne sakwè :
Èle mindje tout in porè…Asteûre…
A vous-ôtes d’ad’vinér
Ç’ qu’i va li ariver !

Lès p’titès fwins dès sèt nins

- Jwayeûs, qu’èst-ce qui vos f’reut pléji ?
D’mindjereûs voltîye dès pichoulis.
- Prof, vîye soçon, v’léz dèl salâde ?
D’émereûs bén mia dès pastènâdes !
- Atchoum, rén d’ trop pwèvrè, seûremint ?
Nènni, âââ….pwène in bouquèt d’ pwin.
- Timide, pour vous, dès vitoulèts ?
Bin, bin….ène târtine dè pwèrèt.
- Grincheûs, avéz fé vo menu ?
I n’mè fôt qu’dès-oûs dèsbatus.
- Dôrmeûr, a l’fin, avéz chwèsi ?
Wâââ…..dèl maquèye avou dès radis.
- Pour vous, Simplèt, m’ pètit colô ?
Dès vôtes avou du cacaô.
Bon-apétit, djintis p’tits nins,
Mindjèz, mindjèz djusqu’a pus fwin !

Sôrcière des 3-20

Alons, alons, sondje ène sôrcière :
An dèskindant djusqu’a su tère,
Si d’va m’ poser su in clotchî,
Dè m’va piquer l’ plante dè mès pis ;
Si jamés d’arive dins in trô,
C’èst seûr què dè va m’ casser l’ cô ;
Si d’véns a tchèye dins l’ pètit ru,
Crènon, c’èst m’ cu qui va yèsse cru –
Su m’fwè, c’èst vré, s’a dit l’ sôrcière,
C’èst bén mia què d’dèmeure an l’ér !
_________________
Li ci ki n' a k' on toû n' vike k' on djoû.