Berdelaedjes

[lucyin]

Adaptation de " Le plat pays "1962 de Jacques Brel par MATHIEU SPIT 1934-2022

Payis d'Hêve

Avou sès grizès cinses èclawêyes è payis
Èt qui div’nèt frawiantes qwand l’ solo vout riv’ni,
Sès håyes èt sès balièdjes qui djouwèt-st-a s’ creû’ler
Qu’on dîreût on djeû d’ dames pondou coleûr di pré,
Avou l’ sam’rou qu’amonte dès stås qu’on va drovi,
Avou on vint si doûs qui vos v’ sintez fruzi,
C’èst l’ Payis d’ Hêve è meûs d’avri.

Avou sès clérs viyèdjes la qu’montèt dès rîrèyes,
Dispièlés inte dès vôyes, lès tchamps èt lès hourêyes
Èt ine mane di tcholeûr qu’èlz’avise èwalper
Come ine lèdjîre mousseûre qui l’ solo åreût d’né,
Avou l’ tchanson si doûce dèl djônèsse qui promèt’,
Avou sès môyes di foûre qui djåzèt d’amourète,
C’èst l’Payis d’ Hêve è meûs d’ djulèt’.

Avou sès vîlès vôyes qui wårdèt po hågn’ler
Quéquès flibotes di strin pièrdowes avå l’osté
Èt qui l’ grand vint dès Fagnes kitchèsse sins nou rat’na
Èt lès mahe avou l’ tére, la qu’tot-a-fêt ‘nnè r’va,
Avou l’ grand vint qui trawe, avou l’ grand vint qui côpe,
Avou lès-åbes dès wêdes qui s’ dihågn’tèt d’ leû rôbe,
C’èst l’ Payis d’ Hêve è meûs d’ octôbe.

Avou l’ payis qui r’lût dè blinkant dèl warglèce
Èt on tot blanc solo qui trawe lès oûy timpèsse
Èt s’ tape so lès mohones qui s’ tinèt racrampèyes,
Èt l’ nîvaye so lès teûts qui fond al tchiminêye,
Avou lès djins achous, al sîse, åtoû dè feû,
Avou l’cafè qui r’cût, avou l’ pèkè qu’on beût,
C’èst Payis d’ Hêve qwand i fêt freûd.
_________________
Li ci ki n' a k' on toû n' vike k' on djoû.