Èl-Gueuye-Noere

Date d' arivêye: 2019-05-13 Messaedjes: 198 Eplaeçmint: Tchålerwè
|
Date: lon 03 fev, 2025 23:31:24 Sudjet: Nos des comenes |
|
|
Bonswer tertos,
Ostant ki dj' comprind k' on doet, nouv côps so dijh, ermete les tites des ouves e Feller. Veyanmint k' c' est l' tite d' oridjene dné. Çou k' est comifåt ey obdjectif.
Estans podbon oblidjî d' ermete les nos des bans e Feller come tite principå, virpus e tos les Feller del Daegne ? Podbon ? Plamour ki ça n' est nén des ouves, mins des nos (ledjirmint) « oficirs ». Ça va esse målåjhey manaedjreçmint. Etindoz dins les dujhances comunåles ey ôtès dujhances manaedjreces, si l' walon vént a passer. Dji di ça, mins dji n' so nén conte d' elzès mete e dzo-tite. Do moens, les cis ki rwaitnut vraiymint l' edroet rwaitî.
Li problinme do Feller, c' est k' il egzistêye, å moens, ene ortografeye pa scrijheu. Adon, si on dveut prinde tos les Feller, sins conter les ortografes espontanêyes foû Feller, on sreut bén dins l' penin. La eto ki dj' el pou scrire come dj' el prononce, di manire espontanêye : « Tchâlerwè », avou èn « â » k' on n' uze nén e rfondou. Mins, k' e diss di Lidje ki, sorlon mi prononçaedje, sereut « Liyaitch ». Droci, li « ai », c' est on lon « é ». Todi avou ci rîle la, « Transene » sereut « Trinsèine ». Droci, li « èi », c' est pol sôre di diftongue inte li « è » eyet li « i ».
Dji pou voltî etinde ki, tenawete, i fåt amidrer come on-z el a fwait avou « Flipveye », k' on-z a accepté, u purade rmetou e dvant-plan, li grafeye « Flipvile ». Tot come li no di « Mont-Sint-Wubert », « Mont-Sint-Gubiet », et tchik et tchak. K' e diss avou les nos d' comenes etrindjires k' on-z a rfondou : Atraik ([FR] Arras), Misterdam ([NL] Rotterdam), evnd. ?
Dji n' so nén po leyî on sistinme come li Feller, nén standård, divni pus foirt k' el rifondou. Li Feller, c' est bén po les belès-letes, les ouves, et tchik et tchak. Mins nerén, po les sacwès pus oficires, manaedjreces eyet sincieuses, dji pinse k' el Feller n' a nén stî askepyî po. C' est la l' råjhon po l' ci ki dj' erfuze di l' aprinde a scrire. Ça pout sey foirt bea, ça dmeure nén foirt pratike, foiravant cwand on-z asprouve dispu des ans yet des razans a rfonde on lingaedje, sins sindjî li francès. _________________ El sopoirtance va djonde on si télmint hôt livea k' les sûteyès djins n' pôront pus sondjî a n' nén birer les bezéns. |
|