Berdelaedjes

[Èl-Gueuye-Noere]

Bondjoû,

Dji scrî l' årtike so François Twiesselmann. Dj' a dvou askepyî on noûmot po l' djonnlaedje dins l' minme famile : « intra-djonnlaedje ». Dji n' so nén seur po l' uzaedje d' « intra » e walon.

Ça dmeure « intra » come e latén ? Ubén ça dvént « etra » come pol betchete latene « inter » ?
_________________
El sopoirtance va djonde on si télmint hôt livea k' les sûteyès djins n' pôront pus sondjî a n' nén birer les bezéns.

[Pablo Saratxaga]

Bonswer,

notez bén ki "djonnler" c' est grossir po cåzer des djins, on l' eploye po les biesses

dji n' sai nén si les betchetes latenes intra-/inter- on l' minme etimolodjeye ou nén; mins i m' shonne k' i gn a-st ene (pitite) diferince di sinse (intra- : å dvins di; inter-: emey di, inte di).

Sol DTW on trouve 35 mots avou l' betchete eter- (= la:inter-), ossu bén des vîs mots k' des noveas.

I gn a 3 mots avou etur- :
* li mot "etur" lu-minme
* etur-deus (ki c' est on compôzé di "etur" et "deus"
* "eturdjin" (= fr:entregent, qui dji n' sai nén ddja çou k' ça vout dire); tot veyant l' restant, dji l' rifondreut "eterdjin"; dj' ô bén: "etur" come mot tot seu; "eter-" come betchete.

I n' a nén on seu mot avou "intra-" (çou ki n' vout nén dire k' i n' ârè nén onk ou l' ôte k' aparexhrè dins on motî nén co rwaitî;
mins tot veyant les 36 ôtes mots avou "eter-" (inter-), on pout dire ki cisse cawete latene la (intra-) ni fwait nén des mots e walon.

I gn a bén "d(i)vins", "d(i)vintrin" po cåzer di sacwès ki sont-st "å dvins di";

Purade ki d' fé on noûmot dj' eployrè ene perifråze.

(et dji n' arive nén a tuzer a on mot francès po çoula nerén... si c' est bén çou ki corespond a l' inglès "inbreeding" ki vos vloz dire (= aveur des efants emey des près parints).

A noter k' i gn a ene sôre di "en:inbreeding" k' est pûni pal lwè eyet l' moråle; ci-la a des mots e walon: incesse, incesteus (notez bén nén "incest_i_eus" come e francès): èn efant d' ene relåcion incesteuse.

[Pablo Saratxaga]

Po "eturdjin", a vey come li mot shonne esse vî et avou on sinse foirt spepieus, dji l' wådreu come "eturdjin" (dj' ô bén, "etur les djins").

ça vénreut del fåconreye, po-z acmoirdeut les fåcons a vey des djins.
On côp k' il estént bén afaitis, et n' pus s' emayî; adon on djheut k' il avént d' "eturdjin".

did la des sinses (e francès todi), po les djins, di bén poleur si mete emey les djins (ou co, del fé po ndè saetchî do profit).

[Pablo Saratxaga]

(et s' i fåt vormint fé on mot avou "intra-", dji sereut pol wårder "intra-" (avou minme li loyeure)

[Èl-Gueuye-Noere]

Al plaece di « djonnlaedje », on pôreut prinde « riprodujhaedje ». Çou ki dene « intra-riprodujhaedje ». Motoit bén radjouter ki « djonnlaedje » est måhonteus po les djins dins les motîs, ene miete al môde di « magnî ».
_________________
El sopoirtance va djonde on si télmint hôt livea k' les sûteyès djins n' pôront pus sondjî a n' nén birer les bezéns.

[Pablo Saratxaga]

A noter ki "intra-reproduction" n' est nén vormint on mot e francès (on nel trouve nén dins les motîs, et minme on cweraedje so Google nel mostere ki deus côps, dins deus fråzes d' on minme fitchî PDF).

C' est purade deus mots metous eshonne.

Oyi, on calcaedje setch po ratourner èn årtike sincieus ça ireut (mins ça dvreut esse "intra-rprodujhaedje", avou spotchaedje do "i" del betchete r(i)- di "r(i)produre", la ki "intra" finixh pa voyale).

Ou co "r(i)produjhaedje divintrin"

Ou co "intra-rproduccion" ou "r(i)produccion dvintrinne"

(cwand i gn a ene pwaire -aedje/-(å)cion li prumire a pus on sinse di l' accion et l' rizultat (po dire "cwè"); li deujhinme on sinse pus come li tcherpinte ki l' permete ou come processus (po dire "pocwè, kimint")).

Metans, po "L'hétérosis existe toutes les fois où des animaux de diverses races sont fertilisés, ou lorsque des animaux de la même race de deux lignes différentes, sélectionnées pour leur modeste degré d’intra-reproduction, sont fertilisés."

dj' eployrè "intra-rprodujhaedje" (eg: ... ou cwand des biesses del minme raece di deus lignêyes diferinnes, tchoezeyes po leu fwebe digré d' riprodujhaedje divintrin, sont-st esminceyes.)

Mins, po "L’intra-reproduction tend à augmenter
l’homozygotie à gène loci, donc ces animaux ont tendance à être légèrement plus homozygotes avec leur allèle gène que la population sauvage. "

dj' eployrè purade "intra-rproduccion" (eg: Li rproduccion dvintrinne tind a-z acrexhe l' omozigoteye a djinne loci, dj' ô bén ki ces biesses la ont-st on clintcha a-z esse ene miete pus omozigotes avou leu djinne alele ki les cis k' vikèt a l' estat såvadje.)