Berdelaedjes

[lucyin]

Les Noés de c'temps-là.


Han, les Noés d’il a soixante ans,
On ne l’z oubliera djamins,
Il apportéet’ des rêves à l’z infants,
Du bonheûr, del joie branmint !
Dins l’plache de devant, il avot enne crèche,
Ee gros Jésus, enne n’avièrge,
Séet Djoseph coupé dins du carton,
‘n candeye à mode de lampion.

Audjerd’hui, quand c’est les fiètes,
Des dgins on fait tourner l’tiète,
Des briyants, du champagne, des quéquets,
‘d a téelmint qu’on ne set pus qué !

Au villâge, on viyot que c’éet l’Noé :
‘l avot n’guirlande au boutique,
Su l’moute du bouché, c’éet magnifique,
‘l avot ée petit Père Noé.
Dins l’cwègne nié lon de l’église el z’infants
S’muchéet’te in ravisant
Devins l’belle plache de devant du notaire
Ee biau grand sapégne tout vert.

Mais c’t au nuite qu’on widiot l’pus voltié,
On s’in dallot rawaitié
A n’ferniète des petites lampes ‘lectriques,
Pou nous z’autes, que c’éet magique !
C’éet à l’vitrine de l’électriciégne,
On demorot des heures de lon,
Pasqu’in pus de ça, ‘l avot dins ée cwégne
Ee posse de télévision !!!

Pindant l’longue nuite du véegt-quate décimbe,
Père Noé venot dins nou chambe,
Au debout du lite, i mettot n’cougnole,
On ne l’a djamins vu, que c’in drole …
Timpe au matègne, on se levot bié râte,
A pan de quemîche on cachot
L’précieuse déerée, et on se carougnot
Pou l’dessègne su l’rond in plâte !

Han, les Noés d’il a soixante ans,
On ne l’z oubliera djamins,
Sans morgnife eye tout séepes pourtant
Nous rindéet’te heureux vréemint !
_________________
Li ci ki n' a k' on toû n' vike k' on djoû.