lucyin
Date d' arivêye: 2005-07-07 Messaedjes: 3663 Eplaeçmint: Sidi Smayil, Marok
|
Date: sem 10 fev, 2007 18:20:49 Sudjet: Li djoké påpåd |
|
|
Li djoké påpåd (l'enfant endormi)
Li fime est rashiou so ene doûce croeyance, ki mo des djins, e Marok li dnèt co po vraiye. Ça s' pout foirt bén k' ene comere åye èn efant, et k' on n' a pus coûtchî avou si ome dispu bråmint dipu d' 9 moes. Adon, on dit kel påpåd s' a djoké dins l' vinte del mame. En arabe, on dit "ringuede".
Cial, ene des deus eroyenes, Mounia Ousfour, va dmander a on curé-rbouteu (fqih), di lyi fé on talisman po-z "edoirmi" si efant, cwand ele ratind d' troes moes. Paski pocwè ? Paski si ome a "broûlé" come on dit avårla. Dj' ô bén k' il a passé e stoumeligne e l' Espagne, po waitî d' aveur di l' ovraedje. Ele n' a waire di cwårs, et ele vôreut bén k' i rvegne po vey eskepyî l' efant.
Li fjheuse do fime, Yasmine Kassari, c' est ene tote djonne reyalijheuse, k' a ddja siné on documintaire. Elle a studyî a l' INSAS, a Brussele. Li produjheu, c' est Jean-Jacques Andrien, on vî rôlî do cinema walon.
Li fime a ddja stî fwait e 2004. C' est on fime d' oteur, ki s' passe cåzu tot dins on ptit viyaedje dilé Taourirt, inte Fes et Oujda, å Marok. Gn a cåzu pus k' des femes, lavola. Tos les omes sont-st evoye come clandestins. I n' î fwait nén åjhey viker.
A rilever : tot l' fime est cåzé dins les deus lingaedjes ki s' praticnut podbon dins ç' payis la : l' arabe marokin est djåzé di tos les djonnes acteurs. Les pus vîs djouweus d' role cåzèt amazir (berbere) a môde do Rif.
"Voeyoz bén ces 2 langues la" a dju dit a Fadila Laanan, ki dj' a rescontré a Casablanca, po li dvant-l'-prumire do fime, "ebén, dins 100 ans, elle åront disparexhou. S' i gn a nole fele politike linwistike po lzès schaper."
Li fime a rascodou ene cåkêye di rcompinses, inte di zeles, li prumî pris del fiesse do fime marokin a Tandjî e moes d' decimbe 2005, li pris del meyeuse feme fijheuse di fimes al 3inme fiesse do fime di Copenhague et eto a Nape, a Mar Del Plata (Årdjintene), a Andjî (Angers), eyet, pol cougnet, li pris do publik al fiesse do cinema d' Nameur.
Ene des grandes cwålités di l' ouve da Yasmine, c' est di wårder l' suspinse, mågré k' i n' si passe cåzu rén dins l' fime. Et minme li fén, la ki Mounia Ousfour va disfé li talisman, et l' taper li scrijhaejde a l' aiwe, po rewoeyî l' edoirmou efant. Sabaye si ça reyussixhrè ? |
|