Pablo Saratxaga Site Admin
Date d' arivêye: 2005-07-01 Messaedjes: 1158 Eplaeçmint: Oûpêye
|
Date: dim 15 may, 2016 18:56:33 Sudjet: Damasse... |
|
|
Li 5 di may 2016, po celebrer l' liberåcion do site di grande culteure, patrimoenne di l' umanité, di Palmire, i gn ourit-st on concert.
C' esteut-st on bea concert, foirt simbolike, ki mostere la wice k' ele si trove li vraiye umanité eyet l' vraiye civilizåcion.
Li muzike, eyet l' beaté ki vnèt replaecî les terorisses et leus distrujhaedjes, vo n' la-t i nén ene bele sacwè, on bea simbole ?
I gn a portant todi des nareus; des cis ki ça n' disrindje nén tant k' ça ki dayech distrujhe on payis etir; des cis ki n' ont k' do mespris pol Sireye, kel voeyèt come erirêye ...
Et portant...
et portant, li Sireye, et s' mwaisse veye Damasse, ont pus d' Istwere et d' Civilizåcion (oyi, insi, avou des grandès letes) ki tos les payis d' Urope metous eshonne.
Dji vs mete cial pa dzo les mots d' on scrijheu, Mark Twain, ki screye so Damasse; saetchî di s' live “The Yankees Abroad”, i gn a 150 ans:
Mark Twain scrijha: |
Damasse est ene owassis ki ses aiwes n' ont måy falou po des meyes d' ans et d' razans. Alez ossu lon k' vos vloz dins l' wague passé des cités, todi i gn ourit-st ene Damasse. I gn aveut co nén yeu d' evenmint edjîstré sol Daegn ki Damasse egzistéve dedja presse po ndè rçure les noveles. Dins les scrijhaedjes di tot l' minme ké sieke so pus d' 4.000 ans å long si no est mincioné et ses prowesses tchantêyes [ndt: asteure on sait ki Damasse a bén pus d' 4.000 ans; 8.000 pol moens!] Po Damasse les anêyes c' est djusse des moumints, les decades seulmint des furlokes do tins. Ele muzure li tins nén pa les anêyes mins pas les Impires k' ele a veyou s' elever, lure et croûle e rwenes. Ele veya Baalbek et Thebes eyet co Efêze crexhe et divni di pouxhantès veyes, et co viker po lzès vey dispeuplêyes. Ele veya l' Impire d' Israyel da David et Solomon egzalté, eyet el veya anixhilé. Ele veya l' brotchance del Grece eyet l' Impire d' Alegzande flori et mori. Ele veya Rome si basti; ele veya si Impire rascovri l' monde; ele li veya peri.
Damasse a veyou tot çoula, eye ele vike co. End a ds ôtes ki rclamèt k' on les lome Cité Eternele, mins c' est Damasse ki merite si lomaedje la di plin droet |
Et dins èn ôte live, “The Innocents Abroad”, i dit co:
Mark Twain scrijha: |
Damassse – li Piele do Levant, li firté del Sireye, l' Djårdén d' Eden oridjinnå, li måjhone des princes, des djînes des ledjindes des contes des 10.000 nutes, di l' acî d' Damasse foirt et côpant come on raezoe, del soye di Damasse doûce come li mashale d' ene djonne båshele - li veye ki sol Daegn a wårdé s' no eyet tnou s' plaece et rwaitî påjhûlmint sol tins ki les Impires ki pasnut gostént leu ptite såjhon di firté et d' pompe, divant di si svani eyet toumer e rovyisse. |
Dispoy li tins da Mark Twain, i gn a co yeu kékès impires a toumer flåwes ou a flotches: li britanike (wice ki "l' solo n' si coûtchive måy"), li francès (pa deus côps), l' almand (pa deus côps), li rûsse des tzars, l' otoman, li sovietike, li djaponès,...
bén grandiveus les cis ki pinsèt ki l' Sireye eyet s' peupe pôrént esse distrûts.
PS: po les cis ki vôrént vey li concert:
https://www.youtube.com/watch?v=zl8rqJ6oD-s (li djournêye, èn ôrkesse russe eyet l' rilomé moenneu Valeriy Guerguiyev)
https://www.youtube.com/watch?v=VkFdF02fM2o (li shijhe) |
|