Berdelaedjes

[Pablo Saratxaga]

Dji ravike ci sudjet ci.

Sol wiccionaire i gn a yeu des intrêyes fwaits avou on bodje A=bev- (eg: "bevåve").

Mins ci rfondaedje la n' a nén co vormint stî decidé.

cial:
https://berdelaedje.walon.org/viewtopic.php?t=1915&highlight=boere
on aveut discuté do codjowaedje di "vey" eyet "croere";
avou A=vey- et A=crey- respectivmint.

Mins po "boere" ça aveut stî leyî sol costé.

C' est nén ttafwait l' minme; les disfondowes sont purade avou on "u" (A=buv-); mins eto des A=bwèv-, A=bwov- ou co A=bov-, et minme A=bèv-).

Dji pinse, come dji l' aveut ddja metou e 2016, k' i dvreut aveur on candjmint d' voyale (dj' ô bén, nén A=boev-)

Li kesse c' est, bev- ou buv- ?
Dins les lives di codjowaedje ça n' nos aide nén télmint; des troes grands k' i gn a; end a onk po A=buv (Stasse), ey onk po A=bev (Gilliard) (li 3inme, Francard, a A=bov).

Mins cwand on rwaite li parintêye, li "u" spite pus sovint:
* A+-aedje : 4 disfondowes: O,E,S = buv-, C = bwèv-
* A+-åve : 5 disfondows (E,O,S), totes avou buv-
* A+-eu/-euse : 11 disfondowes a l' omrin (C,O,E) : bwèv-/bwov- (4 côps), bèv- (2 côps), buv- (4 côps)
* A+-ou (pårticipe erirece): 2 disfondowes (C): bwèv- et bèv-

Dins C1 et C8 c' est a tot côps bwèv-, dins O4 (et O0) on trouve les deus cognes bwèv- et buv-.
C' est po çoula ki, å cmince, "boere" aveut stî rfondou sins candjmint d' voyale.

Mins on voet ki l' pus corant c' est avou candjmint d' voyale.

Ene idêye c' esteut d' shure li modele di "croere" et "vey";
mins c' est nén parey; po ces deus la, c' est ene dimeye voyale (-y-) ki shût; po "boere" c' est on -v-
Eto, po "vey" et "croere", les cognes avou -wey-/-way- sont corantes (motoit pa assaetchance avou l' francès), mins cwand c' est sins /w/ c' est tofer /è/ et nole ôte voyale.

Dj' a les pinses k' i fåreut prinde A=buv- po shure li pus lådje oyowe.

Après i gn a l' pårticipe erirece; "dj' a buvou" est ene miete drole;
mins on pôreut fé on pårticipe disrîlé, "dj' a bevou/dj' a beu" (come ça a stî fwait po "lére" : dj' a léjhou/dj' a lî; adon ki l' pårticipe erîlé åreut stî "lijhou").

Do côp, dj' atåvele :

Atuze des troes bodjes: A=«buv» B=«boe» C=«boev»

boere

pr. : boe, boes, boet, buvans, buvoz, buvèt ~ boevnut
er. : buva, buvas, buva, buvîs, buvîz, buvît
er.d.: buveu, buveus, buveut, buvéns, buvîz, buvént
fut. : boerè, boerès, boerè, boerans, boeroz, boeront -- boeress
cond.: boereu, boereus, boereut, boeréns, boerîz, boerént
su.pr: boeve, boeves, boeve, buvanxhe, buvoxhe, buvexhe ~ boevnuxhe
su.d.: buvaxhe, buvaxhes, buvaxhe, buvénxhe, buvîxhe, buvénxhe
imper: boe, buvans, buvoz
part.: bevou (ou beu), bevowe, buvant


Eyet:
buvaedje, buvåve, imbuvåve, buveu, buveuse (eto buvete, buvant, minme si c' est motoit bén des epronts do francès)
Mins:
boeresse, boevreye (-resse et -reye s' aclapèt sol bodje B).

Eto:
buvraedje (come li boket -buvr- di: abuvrer, abuvroe, rabuvrer)