Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

tecses 9 di djun 2019

 
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 09 djn, 2019 1:01:54    Sudjet: tecses 9 di djun 2019 Responde tot citant

co åk di rapexhî.

Toi dwèm´, fré walon

Dispiète tu, fré walon ; l'orèdje hoûle a nosse pwète.
Esse qu'è fî fond di t’y-âme ti fîrté sereû mwète?
Vasse lèyî mete ine brâye a t' vigreûs coq hardi?
Et ti amoûr di t' patreye, èsse-t-i mwért po todis ?
Vasse ti lèyî miner tot pareye qu'in-esclâve?
Et l'tére del Walon’rèye est-st-èle div'nowe hayâve?
Vasse Ièyî l'ètrinjîr ti sprotchî d'sos s' talon
Et fé n' province flaminde di t' bê pays walon ?
Si c'èst st-ainsi Walon, ti n'a qu' çou qu' ti mèrites
Pwisqui ti vous viquer tot pareye qu'ine ermite.
Fôrdjèye twè-minme lès tchin-nes qui t' divèt st-èlahî
Ti n'a qu' çou qui t' rivint, ti n'est qu'on crotalî !

T'as râson, fré walon, rispwèsse-tu, dwème è pâye
Wâde ti bèle confiyince... dimin, fârè qu' t' èl pâye
Rispwèsse-tu, fré walon....Lès lauris qu' t'as k'tapé
Qu'â pris d' leû mèyeû sonk, tès péres avît côpé,
Dimin, seront hinés tot à fond d'ine bassène
Et poûriront mutwè come on hopê d'ancène,
Dimin, divins l' bans'lète ou l' sètch d'on clicotî,
On mètrè lès banîres di tès trinte-deus mèstîs.
Dimin, d'vins lès èglîses, ti hoûtrès soner l' trance
Di totes tès libertés èt come di t’y-indépendance.
Dimin, li mâle aweûre îrè pwèrter bin Ion
Qu' c'èst fini di t' patrèye, qu’i n'a pus dès Walons.
Dimin, ti fîr pèron riviersé par des traîtes
Rispwèserè po todis è fî fond d'ine aîte.
T'as roûvî tès r'vinteûs come tès Franchimontwès
Et ti n' vâs nin lès pon-ne qu'on s'ocupe minme di twè.

Mins, qui veûs dj’ ? A tes oûyes surdèt deûs grossès lâmes
Et çou qu' dji vins di t' dire t'a sûr'mint r'mouwè l'âme
Ka ti vins di t' dressî tot hatihant d' fîrté
Et tot prète a disfinde tès dreûs, tès libertés.

Disqu'â fond di ti-y-âme, dji vins dè lére
Et ti vins dè frusi d'ine sinte èt djusse colère.
Ah bravo, fré walon, come dji t'admire insi
Et dji t'ô gruziner l' Muette di Portici
Dispiète-tu, fré walon, l'orèdje hoûle à nosse pwète
Mins l' fîrté di t' bèle race, è t’-y-âme n'èsteût nin mwète.
 pilori, lès traites, lès laches, lès baligants!
Qu'ont r'noyî leû mandat po plaire as flamingants
A bas les djins sins coûr, come lès polichinèles
Nos f'rans vèy a cès-la qui volèt nos man-cî
Qui n'z'estons belges, c'èst vrèye,... MINS WALONS PO K'MINCÎ
_________________
Li ci ki n' a k' on toû n' vike k' on djoû.


Candjî pol dierin côp pa lucyin, li mie 03 djl, 2019 12:59:41; candjî 1 feye
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 09 djn, 2019 1:02:50    Sudjet: Responde tot citant

Pu des scrijhaedjes da Ziré Malet

(mete come hårdêye sol Wiki:

https://wa.wikipedia.org/wiki/D%C3%A9sir%C3%A9_Malet

Prèmîre lète da Sint Pîre

       Pîre, apôte di Jèsus aux ètranjîrs dol dispéréye, do Pont, del Galatie, di Cappadoce, d’Asie èt co di  Bithynie, rèlîs d’après Diè li Pére dins li bone soce di l’Esprit po choûtèt Jèsus èt yesse bènis pa s’song.

A vos tortos, lès faveûrs èt li pais à blame. Ki li Bon Dju sôye bèni, li pére di nosse Sègneûr dins si grand pârdon ; I nos’a

rastampèt pa li r’vicaedge do Sègneûr k’a brokèt foû dès mwarts po on vikant espwêr, po one bone èritance sins toûr di godis èt ki vos’èt promètu au ciél à vos’autes k’estéz prèt’s po lès dêrins momints. Vos î triyanez di djôye, portant, i vos faurèt co dol pasiyince, fé preûve di vos’ fwèt come di l’ôr, po divnu one boune sakî èt l’oneûr do Chris’ quand I rvêrèt.

           Sins l’aveur vèyu, vos l’vèyez voltî ; sins l’aveur vèyu, vos wespiyez d’one fèle djôye èt  vos estez acertinès do rcîre li sêwadge. (sauvetadge ?)

Ci sêwadge là,  profitauve por vos, a stî anoncèt pa lès profêtes : i z’ont cwèri lès pondants èt lès djondants èt sayi  d’advinèt quand Jèsus sèrèt dins lès pwin nes èt pu après dins li pu fèle dès glwêres. I z’ont saîsi ki ci n’esteut nin por zèls, mê pu rade por vos ci mèsadge là  èt  po lès cis’ ki causèt di l’Evangîle.

Min me lès andges nn’èt pôrin n’ yesse djalous !

           Tinéz dreu vos’ cervia, wêtéz à gougne po n’nin passèt iute di ci ki gna à rcîre dès lumiéres do Chris’.  Come dès èfants qui choûtèt, ni vos lèyez nin alè à vos viyès abitudes di qwand vos n’compurdî rin.

Dol min-me maniére ki li Ci ki vos houke èst Sint, divnéz Sint dins dot vos’ vicadje.

I l’èt d’alieûrs sicrît : « vos sèréz sint paceki dji su sint. » Et si vos loméz Pére li Ci ki pèse sins fêt di pu po onke ou po l’aute, minez v’ bin au long di vos’ vicaiyerie, min-me long di d’ci.

Ci n’èt nin pa l’ôr oudobin l’ârdgin ki vos’ estez chapès dès vîyès maniéres di vos ratayons, mê bin pa on rare song : li ci do Chris’ ; on l’a advinèt dispôye longtimps èt çoulà sorvint asteure por vos.

Avou Li,  vos crwèyez à Diè co l’a fêt ravikèt èt Li a d’né li glwère. ki vos’ fwè sôye di min-me ki vos’t’ espwêr.

           Tot siyant li véritè, vos’âmes divnèt sintes po vos veuye vormint voltî come dès frés

Di bon keur, in-mez vos onke l’aute sins relache, ravikès avous lès causadges do Diè qu’èst vikant po todi : « ca tot cwarps èst come l’yèbe èt tote si glwère come li fleur d’yèbe ; l’yèbe flanit èt li fleur tché ! Mê li causadge do Sègneûr  dimeure po todi. »

C’èst ci causadge là k’èst li Bone Novèle por vos.

           Tapez foû totès caponeriyes, douces alin nes, djalouseries èt totès mau-dijances.

Come dès èfants al’ fachète, bèvez do pur lècia po créche dins li sêwadge di vos’t’ âme por ostant ki vos gostîche ki li Sègneûr èst binamé.

Parvinez d’dé Li, pîre vikante, tapéye dju pa lès omes, mê rèliye come on trésôr addé Diè. Vos’autes ossi, estez pîres vikantes maç’néyes sol’ bâtimint ki siève à l’oeuve do Sègneûr èt bin riçue pa l’ Bon Diè. Ca il èst scrî : « voci ki dji maçnéye èt Sion, one fèle pîre di cwane, rèliye, insi, l’ovrî pou s’î fiyi. »

           L’oneur èst por vos, lès crwèyants, mê po lès autes mau-crwèyants : « ci pîre là èst divnuwe li fèle pîre di cwane ; i gna dès cis’ ki s’margouyeront po s’pîre là, dès autes tchéront à cause di lèye. » I s’trèbukeront à cause di leu mau-crwèyance ; c’èst po çoulà ki sont advinus.

           Vos’autes, vos avez stîs  tchwèsis come sint payis, on peûpe rèlî po z’anonci lès paters au Ci ki vos’ a aminèt al’ clârtè  do djoû : divant, vos n’estîs k’on tropê, asteure, vos astez li peûpe da Diè !

Vos n’estîs  nin co si prôpe dins vos’t’ âme ; asteure, vos avez ricî li pardon.

           Mès binamés, dji v’dimande vormint come ètranjîrs ou voyadjeûs, di vos’ abstinu dès mwaîs plaîjis ki vont à l’esconte di vos’t’âme èt li fiyêt do twârt.

Minez v’ bin au mitan dès mau-tôurnès ca i causèt mau d’vos come mau-fiyants.

Vos’ bone vicaîyerie lès’ aminerèt à priyi èt tchantèt li glwêre do Sègneûr kand I rvêrèt.

           Po l’Sègneûr, choutos bin lès cis qui vos minèt su l’bole, kékefiye èvoyis par Li po aurgouwèt lès mau-fiyants èt complimintèt lès cis ki oeuvrèt po l’bin.

Ca c’èst li volontè da Diè ki, oeuvrant po l’bin, vos clapîche lès mwaiches linwes dès mau-pinsantès biesses. Œuvrés come vos l’vlez  vos min-me, nin toûrsiveus, sierveus di Diè ; veyez voltî tot lès dgins, surtout vos frés, siyez Diè di bon keur, bistokez li Rwè.

           Vos, lès domestics, choûtez vos maîsses, bin sûr lès amichtauves, mê ossi lès pu malaujîs, ca c’èt bin do sopwarter lès pèsantès pwin-nes pa amichtè po Diè.

Ké pwin-ne vormint à sopwarter lès justès pwin-nes ?

Mê si vos fiot li bin èt sofru quand min-me, c’èst’one grâce addé Diè. Vormint, c’èst çou ki vos ratind ca li Chris’ a ossi sofru por vos èt mostrèt insi k’Il faut sîre au vèna, Li ki n’a fêt nol mau. « I ‘a nin stî toûrsiveu quand l’a stî mautraîti .» I n’a nin rindu li mwaîs côp d’linwe, sofrichant, i n’man’seuve nin, mê rilancèt pu rade li Ci ki pèse tot bin justumint. « Su l’crwè di bwès, Il a pwartèt nos pètchîs dins s’cwârps » po ki, mwarts à nos pètchîs, nos vikinches po l’onêtreté. Vos estîs pierdus come dès bèdots èt asteure, vos estos rachon-nèts paujères autou di vos’ Bierdgî.

Dol si fête maniére, vos lès feumes, choûtez vos’ omes, min-me si i n’siyèt nin li Parole, po ki soyinches binauches do veuye kimint leus feumes si minèt. ki vos’biaté ni soye nin di d’foû d’vos, twèlètes èt orèyeries, mê bi dins vos’ keur, dins vos’t’âme douce èt paujère : volà çou ki Diè veut voltî. C’èst’insi ki dins l’vî timps, lès sintès dgins vèyin-nes voltî li vicadge di leus’ omes. Sarah, vos’ vî mére à tortotes choûteu Abram en l’lomant « si sègneûr » ; vos’astez sès èfants si vos v’minez sins v’z’èwarèt, sin yesse disbautchîes.

Vos lès omes, minez on bon vicadge avou zèles, en lès compurdant tot lès mètant à l’oneûr : c’èst zèles ki discloyèt li vîe : vos paters griperont addé Diè.

           Adon, vos’autes tortos, rachonés  dins li « veuye voltî », èt li pârdon, kékefiye agngnolèt, rindan li bin po l’mau, bénichez vos frés èt vos sèrez bènis à vos’tour.

« Li ci ki vout in-mèt li vîye èt aveur dol binauchté  dins sès djoûs dut tinu s’linwe èt sèrèt sès lèpes dès invanîyes èt di totès mwaîches divises, si mète èrî do mau, fêt li bin èt cwèri li pais, ca li Sègneûr tint lès jusses à gougne èt choûte leus paters ; li Sègneûr veut èvî lès cis’ ki fiyèt li mau. »

           Et ki vos frot do mau si vos’avez li dâr po l’bin ?

Soyez binauches d’alieûrs quand vos soufrichrez po l’justice, ni v’s’èwarez nin èt nin yesse disbautchis ; ki do contrêre : dins vos’keur, bènichez li Sègneûr, todi près’ à z’esplikèt vosse crwèyance, vos’t’espwêr. Fiyé l’ avou douceûr èt rèspèt, drwèt dins vos botes, insi vos pôrez vos disfinde èt èsplikèt vos’ bone drwèture dins l’Chris’, ca i vaut mî sofru tot fiyant li bin ki fiyant li mau ; poro valu ki Diè li vluche bin.

           Chris’ èst mwart on seûl côp po tos lès pètchîs, Li, Jusse po lès injusses,  po nos minèt à Diè ; touwèt pa s’cwârps, ravikant pa l’Esprit. C’èst’insi k’ I l’a stî prêtchi èt prîjon aux cis’ ki ni crwèyinn’nin à l’pasiynce èt à l’pârdon da Diè.

           Zèls iûte avou Noé, k’ont bâti li grand batia, ont stîs chapèts dès grandès’ êwes : vèyos : çoulà riprésinte dèdjà ki c’èst l’êwe do batème ki vos chape dol’ man-nestèt èt vos’ ègadge dins li bone consiynce po Jèsus-Chris’. Li èst passèt au dizeu dès andges, di

tot ci k’estot  li pu hôt èt li pu fwart po rdjonde li drwète di Diè.

           Pinsez’î bin : li Chris’ a sofru dins s’cwarps, adon nos plans dire ki li ci k’a sofru dins s’cwarps n’èst nin dins l’pètchî. Po çou ki nos dmeûre à vikèt, ki s’sôye dins li dar di Diè. Eles sont bin yutes totes lès canailleries, lès disbautchances, lès sôladges èt co do priyi totès idoles.

           Lès payins si sbarèt pace ki vos n’dârez nin su tos cès pètchîs là èt i bèrdèlèt su vos’autes : i s’esplikeront avou li Ci ki juche lès vikants èt lès mwarts.

C’ès po çoulà ki li Bone Novèle a stî anoncéye à tortos, mwarts èt vikants. Ki vikinche come li vout Diè !

           Li fin did’ tot n’èst nin long, adon, i vos faut yesse binamés, fêt à mèsère dins l’amougnèt èt l’beure èt dins tot vos’vicaedge. Apreume, oyez bon keur intur vos’autes, cèst li bon moyin po fêt li mwins’ di pètchîs ; dinez v’ à lodgi onk l’aute sins grûlèt.

Chaque avou çou ki l’a, siervez v’ onk l’aute avou l’amistèt da Diè ; tot çoulà po ki li glwère di Diè passe pas Jèsus-Chris’. A Li, tote li glwère èyèt li fwace  po todi !

           Mès binamés, ni vos’èwarés nin po lès bis’bisses intur vos po vos mète à l’èpreûve come si c’esteuve on sakwè d’drole. Mê si vos tuzez fèlemint à l’sofrichance do Chris’, rafiyez v’ ki li djoû ki rvêrèt, vos v’sintîs lèdgîres èt dins one djôye sins parèye.

Soyez binauches si on v’z’a fêt dès’ afronts po vos’ fwè au Chris’ ca l’Esprit èst’avou vos.     Ki nol di vos’autes n’ôye à sofru come margouyeû ou voleûr ou moûdreû, min me racusète, mê si c’èst sofru come crustin, vos n’divez nin aveur onte : rindez glwère à Diè po çoulà.

Ca c’èst li momint ki li jugemint kimince pa li soce di Diè. Adon, si kimince por nos, ki sèrèt-ce po lès cis ki n’vlèt nin crwêre à l’ Bone novèle ? « Si li ci k’èst drwèt dins sès botes èst’à pwin-ne chapèt, li mau-fiyant, d’où va-t-i s’mostrèt ? » Voci ki lès cis’ qui sofrichèt avou l’acward di Diè èt ki fiyèt li bin dinèt leus’ âmes au Ci k’a fêt li monde.

           Lès vîs come mi, tèmons dès rascrauwes do Chris’, nos d’vant yesse là po li glwêre dès dêrins djoûs.

Pachez li tropê da Diè tot wêtant bin à li, sins fwarci, mê avou plaîji, nin po yesse payis, mê di bon keûr, sins yesse grandiveus, sins wêti did’hôt èt tot mostrant li bone vôye ; èt quand li Bierdgî rivêrèt, I vos bistokrèt po todi.

           Dol’ min-me maniére, lès djon-nès dgins, choûtez ès vîs, soyez bin aclèvès onk l’aute, ca Diè kipite lès grandiveus èt dène l’amistè aux pitits ; bachez l’tiesse quand Diè l’dimande po ki vos r’dresse à prume ; tchèrdgez totes vos peûrs su Diè ca I l’a sogne di vos. N’èst fiyez nin d’trop dins l’amougni èt l’bwèsson, wèyez sur vos èt l’z’autes.

Come on lion, li diâle toûne autoû, cwèrant one sakî à crochi. Tinez bon, acertinés ol’ fwè, sèpant bin ki lès’ autes crustins dins l’monde ètîr ont sovint li min-me dôsséye à sopwartèt. Quand vos’aurez sofru, Diè, ki vos’a houkèt a paurti si glwère dins l’Chris’, I vos rimètrèt d’adreu, vos rèfwarcirèt, vos’ astokrèt.

A Li li fwace èt l’oneûr po todi !  Awè !

           Dji vos scrî tot çoulà pa Silvin ki dji veût voltî come mi fré po vos mostrer ki volà lès bonès matènes da Diè : tinez v’z’î. L’èglîche di Babylone, tchwèsiye dol’ min-me manière ki vos, vos r’mèt li bondjou ; mi fi, Marc, eto.

Rabressos vos onk l’aute avou amour, pais à tortos k’estez avou l’Chris’ ! Awè !
_________________
Li ci ki n' a k' on toû n' vike k' on djoû.


Candjî pol dierin côp pa lucyin, li dim 09 djn, 2019 1:06:32; candjî 2 feyes
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 09 djn, 2019 1:03:16    Sudjet: Responde tot citant

Li Crapaude. . .One dgin ?. . Nenni valet !!!

Kwate djon nes èt spitantès coméres po spaumèt vos orèyes :
Vinos lès veuye, lès choutèt, vos n’lès rovîréz jamê ca vos vikerez one chîje fwart plaîjante.
Seulemint kwate tchèrîyes , one tauve, leus dèts, leus pougnes, leus ceudes, leus pîds èt surtout leus vwès. . . Evoye po on concinr di prèmî tchwès.
Wêtez c’èst Charlotte ki louke èt l’êr po r’cîr li « la » dès andges : èle lès’ î sorie. Pa dzeu s’massale, li diyapason po si en cas les andges si brouyerint (ôh- ou-hôô. . .)
Et adon Pascale ki n’ratind ki l’prèmîre note po s’kitapèt, potchèt, dansèt à mèseure, soriante (Li ptite sori ki danse. . .) : on veut do côp k’èle èst voltî èt s’plèce au mitan dès’ autes
I gna co Marie ki hagne dins lès ritoûrnèles, grète èt bouche sul’ tauve di tchin’ne avou plaîji po dinèt li mèseure aus’ès tchansons.(Timps d’èralé, timps d’èralé. . .)
Et pu Sabine : éle vos kakyîe li keûr èt lès orèyes di s’clére vwè (mê Mossieu vos’estot drole, lèye m’ vêci a ddé mès bèdots. . .)

Vormint, èles ont amantchèt one afêre come on n’a nin co vèyu ni voci ni pu lon : vinos, vinos lès veuye èt lès chôutèt.
Zîré
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dim 09 djn, 2019 1:03:40    Sudjet: Responde tot citant

Mi tchôkmwart                    (Mon cauchemar)
 
          Tins,. . .dji m’dispièt’, dji ravike ? Portant, dj’ai yu drwèt à l’encens èt l’bènite êwe, maugré mès pètchîs. . . Et don volà qui dji m’dispièt’. . .
 
Et pu, c’èst kî c’t’èfant là ad’dé mi ? L’èt mêgue, nwère di pia, l’a l’êr di sofru, i n’a dandgî kétefiye di mi ?  Sintans s’tchaleur. . . mê     . . . mi ossi . . .mès mwins sont nwères èt mès brès ossi èt tot m’cwarps. . . Et. . . d’ôu s’ki dji su, dji n’conu nin s’payis ci. . . Et totes cès nwères èt croléyès dgins ?. . On dirot tot dès arabes, dès èritréyins ; i blonzèt, lès ouyes vudes, i z’ont dès ruses po s’tinu dreut . . . Dj’ai fwin, l’èfant ossi, sins manke,  èt co tos lès autes. . . Vont’i moru ?. . . èt l’èfant ? . . . Et,  mi ossi ? . .
 
            D.M.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon Totes les eures sont a GMT + 2 eures
Pådje 1 so 1

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci


Powered by phpBB © 2001 phpBB Group