Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

André Mottet
Potchî al pådje Di dvant  1, 2, 3, 4, 5, 6  Shuvant
 
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 2733
Eplaeçmint: Sidi Smayil, Marok

PostDate: mår 04 fev, 2020 13:10:55    Sudjet: Responde tot citant

On vî pice-crosse,

Dèdjà vèf èt eune miyète halcrosse,

Sintéve qu’il aléve mori.

Mon-Diu, Mon-Diu, disti,

Kimint fé avou lès èfants,

Po ’lzès wårder di bon’ acwérd ?

A galop, amon l’ notêre

Qui lî dèrit dè fé on tèstamint

Po pårtadjî d’avance

Li grosse èritance.



Bone idèye, disti, dj’a cwate djotes

Ine vèt’ èt ine rodje,

On blanc cabus èt on brocalî ;

Èt dj’a cwate èritîs

Djètru, Tchårlote, Êlî èt Jorje

Dji va mète so l’papî

Qui l’brocali, c’èst po Êlî,

Qui l’blanc cabus,

C’èst po Djètru …

Li vète djote,

C’èst po Tchårlote,

èt l’djote qu’èst rodje

ci sèrè po Jorje.

Ossi vite fêt, ossi vite mwért…

On qwîrt l’avocåt, li notére

Èt ine balance d’apotikére…

Po pèser lès cwate pèlés èscomptes

L’onk èt l’ôte fizèt dès comptes,

Dès contes èt dès racomptes…



Mins l’vî pice-crosse

Divant d’aller à Sinte-Ågathe

Aveût rouvi dè sèrer l’ouhe dè stå dèl gade…

Qu’aveût scroté lès cwate djotes…tot ossi rade.

Avève oyou, sotès djins,

Qui n’avez rin…

Èt qui fêt dès tèstamints.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2733
Eplaeçmint: Sidi Smayil, Marok

PostDate: vén 07 fev, 2020 23:00:39    Sudjet: Responde tot citant

Lès hièles…[la vaisselle]

C’èst djôzèf èt Marîye qui fèt lès hièles…lèye rilave, èt lû, i r’souwe [essuye],…comme d’åbitude.

- Djôzèf, n’avéve pus, di tins-in-tins, dès tèmtåcions qwand vos passez podri mi ?

- Oh sya, èdon, m’binamèye…mins ç’èst come il atome [ça dépend]

- Come il..atome ? qwè don, m’binamé

- L’oumeûr qui dj’a…èt çou qui dj’a pôr èl min …

- (eune miyète èstornèye [dur d’oreille]) Kimint çoulà, l’houm’rèce…vormint ?

- Eh bin volà : qwand dji so di bone oumeûr èt qui dji r’souwe lès forchètes, dj’a tofer idèye di v’sitichî l’drimin, …èt qwand dji so d’mâle oumeûr…

- C’ès bon insi, rote lîre ti gazète, dji r’souw’rè bin lès pêlons mu-min.me !
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2733
Eplaeçmint: Sidi Smayil, Marok

PostDate: vén 07 fev, 2020 23:13:35    Sudjet: Responde tot citant

DI WICE VÈGNE-T-ONN’ ?

Nos avans m’nou å monde djusse après l’guêre

Adon qu’i n’aveût co dès tickets po bråmint dès dinrêyes

Ca li råcion’mint dura disk’à décimbe 1948.

Nos vîs-parints avît k’nohou deûx guêres

L’eune èt l’ôte sins cråsse eûrêye.

Nosse gènèråtion a-st-avu l’ tchance

Dè crèhe avou ine grande èspérance,

Què dis-dju là, ine doûce acèrtinance

Qui l’ lèd’dimin sèreût todi mèyeû

Qui çou qu’ nos tayes avît-st-èdeûrer.

*

Bin sûr, on cultivève co avou dès dj’vås

Mins, on vèyéve dès tracteûrs låvå

Dès p’tits Fergusson 20 CV, dès Zetors T25,…

Li mêsse di scole, qu’aveût stu prîzonîr èt tot,

Mins qu’èsteût ossi onk dès råres à-z-aveûr ine ôto

Dihève, å moumint di l’èspôzicion 1958,

Qu’à l’av’nîr, l’ôto sèreût bintôt ramplacèye pa l’èlicoptêre

Puski n’aveût tote li plèce qu’on volève…è l’êr ;

Qui l’pétrole èsteût ine dinrèye miråculeûse

Qu’alève à turtos diner l’grand-chic,

Avou l’èssence, li mazout, lès plastiques,

Èt tos sès « dérivés », min.me dè rodje à lèpson…

Èt ossi tot çou qu’on polève veûye à l’tèlèvuzion :

Zorro, Tarzan, li foutbal’ èt lès nègues è l’Aâââfrîk…

*

Après lès grandès grèves di l’an swèssante,

On-z-a pèrmètou à tot l’monde d’aveûr ine rôlante,

On-z-a supprimé à galop lès trams, lès trains èt lès bègnons,

On-z-a tapé so lès routes dès hopês d’camions

Qu’alît pus vite èt qu’cost’rît mwinse di çans’

Qui lès ch’mins-d’fèr avou leû fwète intèrtinance…

Come s’i n’ fåreût måy rifer lès novèles

Èt lès vîyès vôyes… todi pus vite à dintèles ;

Mi vî-popa a vèyou monter l’ligne di tram en 1907

Et l’a vèyou dismonter 50 ans pus tård, en 1957.

*

Fåte dès ôtos, il a falou rintrer sès poyes…

Et fåte dès voleûrs, il a falou sèrer l’ouhe dèl mohone.

Ca, qwand dj’èsteu gamin, l’vîye bobone

Ni sèréve nin l’ouhe…sote mi coye ;

Di tote façon, i n’aveut rin à haper !

Dès hopês d’camions, volangn’ dîre…

Tos lès djous, on pô pus gros qu’ ayîr

So dès novèlès ôtoroutes, po-z-aler à l’mér

Èt pwis en Espagne, puski l’pétrole n’èsteût nin co trop tchîr…

*

Nos avîz fêt dès scoles po bin gangnî s’chére,

Sûrs qui nos èstîs d’aveur di l’ovrèdje,

Qui l’monde intîre nos ratindève,

Min.me si, so l’intrifête, li Congo, nos l’avîz pièrdou.

Awè, on-z-a volou crêure qui nos èstîs-st-arivés…

Dji n’wèz’reû dîre « parvinous »…

Adon-pwis qu’ å vrêye, on d’nève dès çans ås djins,

Po qu’ i lès alouwèsse li pus sovint à målvå

Èt dès avantèdges qu’on dit « sôciål »

Pris so l’gågne di l’an.nèye..qui vint.

Disqu’à tant qui l’système pète, anfin !

*

An 1973, li pétrole a monté…

Mins lès djins avît pris dès åbitudes

Lès dètes ont k’minci à griper,

…èt lès takses avou l’min.me sèrvitude ;

Li tèlèvuzion a fêt dim’ni sots lès bordjeûs

Qui n’sont pus v’nu al sîze po taper lès cwårdjeûs,

Nè d’ l’ osté, s’assîr so li p’tit ban…

C’èst qui, parèt-i, l’modèrnité vout dès ècrans !

Po poleûr sûre li train è tîdje,

On-z-a-st-èvoyî lès fèmes ovrer à Lîdje

Ou à Brussel, avou l’ train Libour’tonn’

On-z-a stichî lès èfants al crêche

Po lès fêt (må)aclèver par dès ètrindjîrs

Po r’toumer stantche al nut’

Po magnî a galop eune pizza

Po s’taper l’cou è fôteûy

Po wêti on bièsse feûlièton al TV

Et djêri so on modèle ( ?) di vèye qui n’ègzistèye…

Nin.

parexhou e rfondou dins l' Rantoele 93 (bontins 2020)
_________________
Li ci ki n' a k' on toû n' vike k' on djoû.


Candjî pol dierin côp pa lucyin, li lon 09 mås, 2020 11:14:52; candjî 1 feye
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2733
Eplaeçmint: Sidi Smayil, Marok

PostDate: mie 12 fev, 2020 21:30:51    Sudjet: Responde tot citant

Li prumî djoû,…

Logik’mint, li Bon-Diu k’minça l’crèyåcion à tot fabrikont l’loumîre. Bien.

On n’sé nén à quèle eûre qu’il ataqua ; mins l’èst certain qu’à c’momint-là, i f’zeûve neûr come è trô d’cul d’on nègue, pusk’i n’aveût co pon d’ loumîre ; on n’aveût nén co invanté lès loumîres di potche èt l’Bon-Diu n’aveût noule tchondèle, nè nou kinkèt.

Lès savants modernes pinsèt, sins trop s’ disburtiner, qui l’Bon-Diu k’minça à fé dèl loumîre li soi-disant prumî djoû èt qu’i s’arindja - po n’nén compliquer lès afêres - , po -z- oyu doze eûres qui freût clér èt doze eûres qui freût neûr : il y eut un soir et il y eut un matin.

Li Bon-diu n’èst nén compliqué !

C’èst lès omes (èt surtout lès fèmes qui sont compliqués),

…èt lès politicyins avou dès moncias d’règlümints,

…èt lès dokteûrs nèyîs divint leûs bocôs,

…èt lès djudjes qui cwîr’nèt l’motche è l’ôrlodje

…èt l’Eglîze catolike qu’invante dès novias catrèsimes tos lès djoûs : li ci qui vout trover l’Bon-Diu n’a nén mèsåhe dé fé dès grondès scoles.

N’a bråmint dès savants qui radjoutèt qui li Bon-Diu a mètu lès doze eûres di loumîre å miton dè prumî djoû, inte sîh eûres å matén èt sîh eûres à l’nêt ; i n’a wêre di discussion la-d’sus nén pus, pace qui si c’åreût sti l’contrêre, c’èsteût djusse parèye !

Portont, gna tot-l’min.me dès djins pus subtiles qui…

(Extrait de « Li Crèyåcion dè Monde ») andremottet47@gmail.com

Gn a ene sitroete plake d' eredjitrumint del pîce.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2733
Eplaeçmint: Sidi Smayil, Marok

PostDate: vén 14 fev, 2020 21:18:32    Sudjet: Responde tot citant

LI MAVA



« Et tot çolà èsteût bon » a-t-i dit l’Bon-Diu (Bible, Chap1)

C’èsteût bon ! Come di djusse, pusqu’i n’aveût co nouk qu’aveût invanté l’måva…..deûs lignes foû di m’sicrîadje d’sus Thîn :

Divins l’timps, et sins r’monté fwart lon èn’èrî, n’aveût qui lès ritches qui magnînent dè ; di c’timps-là, i n’aveût qui dès bons afêres; on n’aveût nén co invanté l’måva.

Asteûre, tot l’monde a l’dreût dè magnî dè froumadje, min.me si po çolà i fåt fabriker dè måva à moncia,…

Avou tot çà, ådjoûrd’heu, i n’fèt pus à n’è trover dè bon,…et caetera, et caetera……

Li måva èst donc eune invantion moderne, d’après guêre, èt surtout d’après lès on.néyes 1970, quond’ on-z-a pinsé qui tot l’monde èsteût ritche, po s’payi eune auto èt -z- aler en vacances en Espagne;

èt å min.me momint, lès djins ont pinsé qu’i -z- avînent dreût à tot (come par ègzimpe, l’èssence bon martchî) èt i-z-ont k’minci à div’nu våréns èt n’ont pus pris lès pwin.nes dè fé eune saqwè d’bon…

(Extrait de : Li crèyåcion dè Monde) andremottet47@gmail.com
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2733
Eplaeçmint: Sidi Smayil, Marok

PostDate: vén 14 fev, 2020 21:22:58    Sudjet: Responde tot citant

Li convwè (d’après J.d’Ormaison)



Qwand on vint å monde,

On potche divins on trin

Èt on toume… so sès parints.

Èt n’ s’apinse-t-on nin

Qu’i f’rît bin l’voyèdje avou nos,

Sins måy distèler l’gadot.



Portant, vinrè-st-on djoû… !

L’ ciss’ dèl tote djèrin.ne ståtion

Là qu’i n’vont nin pus lon,

Moutwè sins prinde radjoû,

Nos lèyant là tot seûs

Télfèye bin målureûs



…Po pwèrter l’bèzace.

A mèzeûre qui l’timps passe,

Dès novês djins montèt è trin,

Qui pidront bêcôp dèl plèce :

Frés èt soûrs, po fé fièsse

Amices, èfants èt min.me Rosalîe

Qui fourit l’amoûr di nosse vîe…



Brâmint tap’ront djus

(min.me l’amoûr di nosse vîe),

Lêront, pus ou mons grand, on vû…

Dès ôtes si f’ront si p’tits,

Qu’on veûrè nin qu’i s’sont disdit.



Ciss’ voyèdje an trin nos dôrè dès djôyes,

Dès pon.nes, dès ratindèdjes èt bin dèl vôye,

Dès å-r’vèy, èt ossi dès adiès.

Çou qui fêt danser l’trôye,

C’est di doner dèl djôye

Di s’ètinde avou lès djins dè convwè

Tot fant nos min.me tot nosse possibe

Sins dîre qui c’èst pènibe.



Nos n’savans nin d’avance

Wice qui l’ trin nos dôrè qwitance.

Volà powè nos d’vans viker ureûs,

Fwért amiståve èt djènèreûs.

C’èst çoula qui compte vrêy’mint ca :

Qwand nos distèl’rans, nos divrîs, pa !

Ni lèyî qui dès bês souv’nîrs

Å ciss’ qui continouwèt leû voyèdje…

Sèyansse contints di çou qui abètche,

Avou grande ric’nohance å Cîr

Po parèye valureûs pèlèrinèdje.



Mèrci ossi ås voyadjeûrs dè min.me convwè.

Èt divreû-dju co d’hinde å l’prumîre gåre,

Dji so binåhe ma fwè,

D’ aveûr fêt l’ vôye sins nol’ ripwès.



[A.MOTTET,07-02-20]
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2733
Eplaeçmint: Sidi Smayil, Marok

PostDate: vén 14 fev, 2020 21:24:18    Sudjet: Responde tot citant

C’èst Batisse qui rèsconteûre on martien :

- vos djåsez l’walon ?

- awè, awè !

- vos mès’rez tortos treûs mètes di hot ?

- awè, awè !

- èt vos avez tortos catwaze deûts à chaque min ?

- awè, awè

- avou dès bagues, dès fronds d’ôr èt dès pièles à tos lès deûts ?

- nèni, nèni, savez, rin qui lès parvinous.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2733
Eplaeçmint: Sidi Smayil, Marok

PostDate: mie 01 avr, 2020 16:37:27    Sudjet: Responde tot citant

COROZ-VITE



Vo-nos-là rèssèrés

Disseûlés èl mohone

Fåte d’ine vîye lède corogne

Qu’a bin idèye di nos mèz’rer

Come ayîr li misèréré.



L’ ènocint d’à costé

Dèrit qui c’èsteût l’guêre

Qui turtos d’vît d’morer

Inte di cwate meûrs avou bobone

Si tinre ås coches èt fer påter.



Tos lès minisses èt lès èspêrts

Ont dit qui falève si laver lès mins

Lès droguisses comptît dè vinde dè savon,

Mins lès djins ont tûzé à leûs bas-fonds

Et is-ont raflé tot l’papî drî-min !



Mortalité :

Lès bièssès djins atrapèt ine vète sogne :

Li corande, qu’is loumèt core-vite,

Qu’on dit ossi vète hite,

Tinève à gogne !
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2733
Eplaeçmint: Sidi Smayil, Marok

PostDate: mie 01 avr, 2020 16:38:44    Sudjet: Responde tot citant

COUCOUROUCOUCOU….(ôde à la poule)



[en temps ordinaires]

Li poye qu’a l’tchance dè viker an plin êr

N’a nole oligåcion dè ponre ine oû

Tos lès djoûs.

Cisse poye-là pond à s’bone sonlance,

Qwand èle énn’a îdèye,

S’èle n’a nole maladèye

Èt d’après çou qu’èle mète è s’panse…



[temps de coronavirus]

Li neûre poye dèrit :

- Wèy, båcèle, i parèt qu’is-ont l’couranana !

- Ènn’ disse nin, don là ?

- C’èst come dji v’zèl dit !

Li djône Tarzan arrive èt brêt

Qu’ is vont turtos aveûr li vète hite.

- Nos alans èsse turtotes falyite !

- Mi, dj’a l’dreût dè ritrêt

- Èt d’alieûrs, i sofèle di bîhe !

Li vîye poye rilèva si tch’mîhe :

- Nos d’vans fèr les cocognes !

- Nèni, on nos couyonne !

Volchal qu’arive li vî Casanova :

« Saveûr li pouna èt l’cova,

« ôtrèmint, vos årez l’crèva ! »

Li djônne Pétronille dimanda :

- Dji so djônne, dj’a l’dreût dè viquer…

- Mins mi, disti l’vî rastacwêre,

« Dji v’dis qui fåt ponre come d’timps d’guêre ! »



André MOTTET
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2733
Eplaeçmint: Sidi Smayil, Marok

PostDate: mie 01 avr, 2020 16:39:35    Sudjet: Responde tot citant

COUCOUROUCOUCOU….(ôde à la poule)



[en temps ordinaires]

Li poye qu’a l’tchance dè viker an plin êr

N’a nole oligåcion dè ponre ine oû

Tos lès djoûs.

Cisse poye-là pond à s’bone sonlance,

Qwand èle énn’a îdèye,

S’èle n’a nole maladèye

Èt d’après çou qu’èle mète è s’panse…



[temps de coronavirus]

Li neûre poye dèrit :

- Wèy, båcèle, i parèt qu’is-ont l’couranana !

- Ènn’ disse nin, don là ?

- C’èst come dji v’zèl dit !

Li djône Tarzan arrive èt brêt

Qu’ is vont turtos aveûr li vète hite.

- Nos alans èsse turtotes falyite !

- Mi, dj’a l’dreût dè ritrêt

- Èt d’alieûrs, i sofèle di bîhe !

Li vîye poye rilèva si tch’mîhe :

- Nos d’vans fèr les cocognes !

- Nèni, on nos couyonne !

Volchal qu’arive li vî Casanova :

« Saveûr li pouna èt l’cova,

« ôtrèmint, vos årez l’crèva ! »

Li djônne Pétronille dimanda :

- Dji so djônne, dj’a l’dreût dè viquer…

- Mins mi, disti l’vî rastacwêre,

« Dji v’dis qui fåt ponre come d’timps d’guêre ! »



André MOTTET
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2733
Eplaeçmint: Sidi Smayil, Marok

PostDate: mår 21 avr, 2020 16:48:39    Sudjet: Responde tot citant

N’avîz nin dit « bièsse » ?



Di totes lès bièsses qu’i n’a so l’têre,

M ’aveût-i dit on vî notêre,

C’èst l’ome, parèt, qu’ èst l’ pus malin !

C’èsteût todi scrît è s’ calpin.



Nos savans bin totes lès sot’rèyes,

Måcules, guéres èt ôtès bièstrèyes,

Qui nos èstans bon à tot fé,

Sins min.me vormint èsse èstchåfés !



Îr, li rinnète [grenouille] donève li timps

Oûy’ , nos hoûtans l’ bul’tin å poss’ ,

Çou qui va nos toumer so l’bosse.

Mins c’èst po l’mons, fwért incertin.



Come è l’osté, - v’sèrîz djalot -

Volà on djou di sèt solos,

On djoû d’ prétins, dih-nouf dègrés,

Noss’ vî neûr tchèt, tot èsbaré,

Plonke è s’ tchèna, bin dècidé

À passer l’nut …sins èdjaler.



- Què lî prind-i ? distèl nosse dame.

I fêt fou bon…. - Dji vou, bouname,

Qu’on malin tchèt, sét mî l’mètèyo

Qui l’ome dè posse, èt volà tôt ;

N’ont-i nin dit qu’ l’ alève djaler ?



- Dji t’ l’ aveût dit qui hoûte li TV.

-

Djitla Vèdi 20200419
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2733
Eplaeçmint: Sidi Smayil, Marok

PostDate: vén 24 avr, 2020 18:03:24    Sudjet: Responde tot citant

Confinåciyon :

Li botique dè djårdinî èst droviète…

- Ine feume, å cile qui l’ sût : i gna eune bèle cawe !

- L’ôte, eune miyète èstornêye : Awè, båcèle, c’èst bin deûr

- Anfin, mi, ça irè vite…i ’n’ mi fåt qui dès romètes ! [haricot]

- Vos l’avez dit : ine vrèye robète ! [lapin]

- Ah, i m’sonle qui li cawe diminowe…

- Quène indjince ! i fåreût dèl rit’nowe…

- Surtout qwand lès pratiques [clients)] si mètèt à tchoukî

- I n’såreût tol’min.me nin chiervî deûx candes è min.me timps

- Portant, qwand on-z-a ine parèye botique…

Eh-là vos deûx, c’ès po ouye ou po d’min, po li d’vant ou pas podri ?

(s) Ôniswaki-Mâlipanse 20200418
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon Totes les eures sont a GMT + 2 eures
Potchî al pådje Di dvant  1, 2, 3, 4, 5, 6  Shuvant
Pådje 5 so 6

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci



[ Di dvant | Shuvant | A l' astcheyance | Djivêye ]

Cisse pådje est mimbe di l' anea RingSurf des waibes e walon.

[ Passer 1 waibe en erî | Passer houte do shuvant | Les 5 shuvants ]


Powered by phpBB © 2001 phpBB Group