Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Félicien Barry

 
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 2691
Eplaeçmint: Sidi Smayil, Marok

PostDate: dju 13 fev, 2020 13:45:02    Sudjet: Félicien Barry Responde tot citant

— Polyte, il èst sèpt heûres djusses ; on èva
Zante a pris in liard dins l' poche di s' djilet, l'a fét sonér su s'vêre, pou aplér l' garçon d' café èt, moustrant no camarade, i soufèle dins ses dints :
— Ç'èst mossieû Polyte qui désaltère ! Nè l’ tuwèz nén. Nos aurunes trop d' rûjes avou ses rèliques !...
Mins Mossieû Polyte ni s' bile nén pou si wére. Il alonge douze francs su l' tâbe come in minîre, salûwe à la ronde à môde des mousquetères di l'ancyin timps, èt r'monte dins l' bagnole aussi majèstuweûs'mint qu'in sègneûr !...
— Tchaufeû, mètèz les gaz, s'i vos plét.
Polyte a lêchi tchére ses mots avou 'ne téle désinvolture qu'in sclat d' rire général réspond à no jwèyeûs compére, tandis' què les vijins d'meur-nut tout pafs. Djosèf, docile, aspoye su l' champignon ; El moteûr tousse in caup ou deûs, sins rèyussi à dèmarér.
— Hé, là ! pon d'quénte, hein !... Ene bougîye encrasséye, azârd ?...
El tchaufeû r'sautèle à têre, r'luve èl « capot » d' l'auto (en walon, on poureut dire èl couviète, èn' do ?) tchipote ène myète à toutes sôrtes d'afêres bizâres dins l' cârburateûr, sins qu' Polyte compèrdiche èl pus trête mot dins les tuyaus, les boulons èt les tièsses d'écrous.
— Ça va d-alér ! El moteûr èst-st-arivè come nous : il a swè... In saya d'eûwé èt dins deûs munutes, nos stons pârtis.
******
Ç'ît vré... In p'tit momint après, tout simplemint, sins mistère, èle tchèréye déambuleut su l' grand'route, fonçant tout drwèt su Nameur...
******
Su Nameur ?...
Pouqwè ? Polyte conèt pourtant bén l' pays... Adon ?... Zante a beau toquî au careau dèl cabine. Djosèf èt, Polyte riye-nut come des sots èyèt l' camion continûwe ès' randonéye au long d' Moûse... Quén idéye èst-ce qu'il a passé dins 1' caboche di no pècheu ?...
Trwès quârts d'heûre pus târd, èl camion s'arêteut d'vant in p'tit cabarèt d'èl rûwe di Fiêr, in p'tit cabarèt come i d-a à Châlèrwè, à Mons èt minme à Nameur. In p'tit cabarèt avou 'ne fègnèsse èyu ç' qu'on lit ces mots-ci :
« RESULTATS SPORTIFS
EN PREMIERE MINUTE »
Polyte, grand amateûr di fote-bale divant , l'étèrnèl, a voulu awè les résultats des matches divant d' rintrér à s' maujone ! A-t-on idéye di, ça ! Quén lubîye !
— Is sont là, madame ? quèssione-t-i à l' patrone..
— Qui, don, mossieû ?...
— Les résultats du fote-bale, da, madame...
El feume rimplit les pintes qui Polyte a comandè en rintrant, s'asseûre qu'i gn-a des autes cliyents dins l' cabarèt, pwis rèspond en souriant :
— Vos savèz bî qu'on n' djouweut nin audjourd'hu, don ?...
— Hein ?...
— C'èst-st-ainsi pourtant, môssieu. On l'a mètu dins les gazètes, advant-hîr...
— Ah ! bon sintimint, ça m'a scapè... Qui dj'seus bièsse ! In distoûr di quénze kilomètes, chis d'mis aclapès au long d' mes reins pou awè roubliyî çu qu' les gazètes ont imprimè...
Les feumes èt les èfants, d'meurès su l' camion, couminch'nut à s'énèrvér, surtout qu'el gnût pwinte dèdjà...
In agent d' police, les poûces intassîs dins s' cinturon, s'aproche du camion, wèt les pècheûs dins l' cabarèt, fét 'ne crâye à l' huche èt, intèrpèlant Djosèf, grogne in ultimatum en boune èt dûwe forme : « Stationnement interdit, feu rouge pas allumé, c'est clair, contravention... »
— Ah ! non, mossieû l'agent, vos n' f'rèz nén ça à des brâvès djins qui morunent di swè èt qui s'in vont d'ayeûr tout d' chûte...
— Mes regrets, service, devoir...
Polyte ni pièd jamés l' nôrd ; i prind in vêre qu'èl patrone vént d' chèrvu, èl mèt dins yeune des mwains du « représentant de la force publique » èyèt choquant avou ç'ti-ci, i l'invite à l'vér s' pinte à l' glwêre di « Namur-Sports » èyèt d' ses supôrtérs ! .. .
- L'èfèt a stî foudrwayant ! ... El policiér a souri, a carèssî l' dèmi èt l'a vudî d'in trét —
intrè nous, il aveut in goyî come ène tchaussète ! — a ajoutè à ses r'mèrcîy'mints :
— Les amis, n' trinnèz nén droci ; si l'inspècteûr vèneut à passér, dji poureûs awè des enwîs... d'acôrd ?...
— D'acôrd... èt mèrci !
— Mèrci ?... intrè walons !...
— Deûs caups mèrci ! . . .

e rfondou:
http://rifondou.walon.org/Barry_Felicyin.php#polite
so Wikipedia:
https://wa.wikipedia.org/wiki/%C3%85_rcoe_des_rwenes_(paskeyes)
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon Totes les eures sont a GMT + 2 eures
Pådje 1 so 1

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci



[ Di dvant | Shuvant | A l' astcheyance | Djivêye ]

Cisse pådje est mimbe di l' anea RingSurf des waibes e walon.

[ Passer 1 waibe en erî | Passer houte do shuvant | Les 5 shuvants ]


Powered by phpBB © 2001 phpBB Group