Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Jacques Desmet
Potchî al pådje 1, 2, 3, 4  Shuvant
 
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 01 awo, 2019 18:39:35    Sudjet: Jacques Desmet Responde tot citant

Tchandjî d’ cassine


Dji n’aveû nin ausse di piède mi vikaîrîye po mès-èfants. Nin ausse di continuwer à viker rèssèréye dins l’ famile qui nos-avîn’ mètu d’ssu pîds tos lès deûs. Èt, si dj’ pèteûve èvôye, dji n’aveû nin co ausse di m’ veûy oblidjîye pa on juje, di waîtî à zèls one samin.ne dissu deûs èt l’ mitan dès condjîs.
Dj’aveû monté one famile, ci n’èsteût nin on tuwadje. Dj’aveû bin l’ drwèt d’ tchandjî d’ cassine èt d’ laîyî là mès cautes.
« Leû pa, c’èsteût one bièsse ! »
Dispôy nosse prumî, il aveût prins dès-aîrs di vî pa. I s’ mousseûve d’one casaque, todi l’ minme, qui n’ lacheût jamaîs. Nin co po l’ fé r’boûre on côp par samin.ne, po tuwer lès microbes glètés pas sès blèfauds d’èfants. Quand nos nos frotîn’ li laurd èchone, dj’aveû è m’ tièsse qu’il èstîn’ sitindu yinte nos deûs, à s’ chûrer d’ rîre èt clatchî dins leûs mwins sûvant nos pôses. Quand i droveûve deûs boton di s’ brayète, c’èsteût wêre assez po laîyî passer l’ mwinre bokèt d’ saucisse qu’i m’aleût bourer.
Dji m’a stî r’moussî avou dès novias foûraus dins on botique. Dj’a rabroké al maujone, li timps d’ m’aler r’nètî èt d’ lès mète. Dj’a pèté èvôye sins rin èpwârter. I n’aveût qu’a r’vinde mès culotes al prumî foû- totin di l’intrè deûs djambes. Èt m’ quarantin.ne di paîres di solers à onk qu’i n’ veût voltî qu’ lès pîds.
Dji m’ sovin co dèl plaîjî qu’ dj’a yeû d’ moussî mièrseûle dins one tchambe d’ôtél, di r’ssèrer l’uch padri m’ ku, èt mi stinde dissu l’ lét lès brès au laudje come li vî Bon Diu d’ssu s’ crwwès. Ô ! Nin on grand lét avou dès falbalas, on lét qui fieût chîlter lès r’ssôrts chaque côp qui dj’ basculeû d’on costé à l’ ôte èt one tièstêre rostîye pa l’ solia.
Dj’a d’moré vélà deûs djoûs à bwêre l’êwe dèl saiwè. Sins mindjî, après-awè sucî l’ dêrène bouboune dèl satchot qu’ dj’aveû acheté à li stâcion avou mès dêrènès brokes.
One samin.ne pus taurd, il distributeû d’ biyèts à ravalé m’ cârte di banque. Dji n’aveû pupont d’ clicotias à r’vinde. Dji m’a ègadjî come feume à djoûrnéye. Dj’ stî dwârmu dins dès maujones po dès feumes pièrduwes, tot mindjant dès satchots d’ frites èt dès rodjes cèrvolas : à plinde èt m’ ripintî dèl zine qui m’aveût prins, mi one comére qu’aveût tot !
Dj’aveû laté mès clés dins on batch à misére. Dj’a stî bouchî à l’uch di nosse maujone, ontieûse come on r’naud qu’areût stî prins par one poye.
« Dji vos d’mande vosse pârdon ! »
Dj’a d’vu r’ssûre one fameûse torgniole. Dj’a riv’nu à mî dins lès montéyes. Mi massale tchaufeût, bolante. Dj’aveû on crin au d’zeû d’on’ ouy. Dj’a passé pas tos lès ponts sins awè l’ coradje di m’ foute à l’êwe.
Al pikète do djoû, dj’a moussî al police leûzî dîre qui dj’èsteû batuwe…
Po lès-èfants, i n’a rin volu motî. Il a stî oblidjî di s’ prusinter d’vant l’ juje po s’ètinde dîre qu’il aveût tos lès twârts. Dj’a r’trové m’ maujone. I m’ pâye one pinsion èt co lès cènes po lès-éfants. C’èst lî qui lès-èlèves.
I m’a co dît mèrci, l’ gote à l’ouy, dè l’zî laîyî…
Marîye Clap-Chabot
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 01 awo, 2019 18:40:22    Sudjet: Responde tot citant

À vosse santé


Po mès peûmons, li médecin m’a dît qui dj’ n’aleûve nin moru si rade qu’i n’ pinseût. Li chimio aveût ravalé totes lès nokètes qui dj’aveû d’dins m’ cwârp, èt qu’i pinseût bin qu’i n’ divreût minme pus m’opèrer. Lî, qui m’aveût dît qu’ dj’ènn’-aveû pus qu’ po chî mwès à viker.
« Dji v’ done co quinze di chance au cint po chî mwès ! »
Dj’aveû somadjî…
I s’aveût mwaijelé à m’ taner avou lès sèt cint mile cigarètes qui dj’aveû fumé tot l’ long di m’ vikaîrîye dispus d’ pus d’ cinquante ans. Il aveût yeû l’ timps d’ lès compter d’après lès paquèts d’ toubak qui dj’ach’teûve tos lès djoûs.
I n’aveût jamaîs vèyu on cancêr raptitî come ça. I m’a d’mander s’ pârdon, d’awè stî diâle èt s’èpwârter d’ssur mî. Dji vèyeû bin qu’il aveût co dèl râje plin sès-ouys. V’là qu’il èsteût gaîye come on pinson. I s’a churé d’ rîre, tot m’ fiant moussî foû di s’ cabinèt.
Dji n’èsteû nin co d’ssu l’ vôye qui dj’a-st-èvôyî one mèssadje à m’ Nènète po lî dîre qui dj’ ravikeû. Èle m’a rèspondu avou trwès : ???
« Champagne, Nènète, Champagne ! »
Dj’a sâyî d’ lî causer, mins èle m’a basculé su s’ bwèsse aus rèsponses. Dji m’a pormwinrné à razouyî lès grîjès nuléyes. Li brouyârd rilaveûve lès bas costés dèl vôye crausse di plaîve.
Di tote maniére, i faut bin prinde tot come ça vint ! Dji bagneû  yinte deûs coleûrs, come dins on film di d’ dins l’ timps : do nwârt èt do blanc. Poqwè nin ; nin dandjî d’ viker plin d’ bouneûr è tèknicolor ! Dj’a moussî dins on botique po m’acheter deûs botèyes di « Chwèt èt Bandon » èt one bwèsse d’oûs d’ caviar. Ça m’a costé l’ pris d’one cope di clicotias d’ôr di quarante caras…
Dj’a drèssî l’ tauve avou on blanke mape. Dj’a faît sauteler l’ flote quand dj’a ètindu toûrner l’ clé dins l’uch. Nènète à moussî dins l’ bèle place. Nin one ouyâde dissur lès vêres à champagne. Nin minme on bètch !
« Dji t’ garantî qu’ c’èst vraî : dji so r’faît ! »
« Jaki, dji m’èva ! »
Èle s’a mètu à tchûler
« Dj’aveû è l’idéye qui t’aleûs moru. »
Èle m’a co dît qui s’ Jéjé n’ ratindreût pus qu’èle fuche vève.
« Jéjé ?!!! » : on djon.nia qu’âreût p’lu yèsse si fî, qu’èle m’aveût prusinté on djoû come on soçon qui bouteût avou lèye dissu s’-t-ovradje ! »
« Nos nos v’lans marier, il èst vèf. I n’ tèneût pus d’ su place di veûy qui v’s-alîz rastaurdjî nosse bankèt. »
Dj’a sâyî d’ gangnî do timps tot li fiant à crwêre qui dj’aveû raconté dès crakes po lî fé plaîjî.
« Po v’ dîre li vèrité, dji m’ va rademint r’trover dins quate plantches. Li médecin qu’ dj’a stî veûy, c’èsteût po-z-awè on radjou po m’ donner l’ bouyon d’onze eûres. Il a arindjî ça po dins quinze djoûs.
« Tu m’ pourès co bin sopwârter quinze djoûs ? »
« Jéjé à pièrdu pacyince. »
« Dji n’ sèrè pus là po l’ Noyé ! »
Èle n’a pus rin volu ètinde. Jéjé l’a v’nu r’qwaîre aviès méyenut.
Mi cancêr à moru d’vant mî ! I-gn-a dès miraukes tos lès djoûs. Dji vike bin binauje.
On s’ passe pus aujîyemint d’ Nènète qui di s’ vikaîrîye…
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 01 awo, 2019 18:54:52    Sudjet: Responde tot citant

Li matrassî


Li Frèdo ; si comére Louwîse n’âreûve sitî là, il âreût dwârmu d’dins : dins s’ camion !
« Mi yut’ » come il l’ lome, come li grand yut’ di fiêr pindu à chipète dissus li d’vant. C’è-st-on agayon qu’lès-Amèriquins avîn’ tapé là, su l’ bôrd dèl vôye al filéye dèl guêre.
Quand vos l’ purdoz pa li d’vant, vos dîrîz veûy dès laudjès lunètes qui catchenut lès boles dès-ouys d’one oulote sipèsse come one môye di foûr. Pa d’zo ça, bin pingnîye, fine blanke, rilûjante, riglatichante au solia, c’èst come one laudje pèsante moustatche què lî tchaît su s’ minton. Drèssîyes di chaque costé dèl parechoc ; deûs-antènes achèvéyes pa dès rodjès lantiènes trianenut à chaque côp qui l’ bièsse si dispiète.
C’èst tot ç’ qui lès tchèts èt lès poyes, apés su l’ vôye, vèyenut dèl bièsse, divant d’ rèclôre leûs-ouys po d’ bon. Lès cias, pa mirauke, qu’ârîn’ yeu chapé à li d’vant, ârîn’ bin tchèyu mwârt d’astampé, rin qu’a veûy li d’drî ! Ci n’est qu’one bène avou one indjole sins cu ni tièsse, prèsse à rider al mwinre pitit choyadje. Li gueûye d’one trèmouye osse. Dès rouwes à dints grignenut. Lès tire-satchs chîlenut. Lès courwès chifèlenut. Lès manètes sautèlenut. Ét dès batchs di totes lès cougnes, tos comachîs : one èplausse, on flègmon !
Lès-Amèriquins s’è sièrvîn’ come machine à bate lès dinréyes. On d’veûve èforner lès djaubes pa l’ trèmouye, èt lès s’minces, rinètîyes di leû bale di pâye, tchaîyîn’ dins lès satchs agriftés aus tîyaus di d’zo.
Nosse Frèdo li aveût trové one bèsogne què li rapwârteûve bin d’ pus. Avou lès dinréyes, i n’ènn’aveût po bouter qui dèl fin d’ l’awous’ jusqu’aus prumunès djaléyes. Tot l’ monde n’èst nin cinsî, mins tot l’ monde à one bèdréye à s’ maujone ; si nin deûs, si nin d’ pus ! Après saquants-arindjemints, Frèdo aveût parvinu à fé moûre dèl lin.ne di bèdot à s’ machnie… Èt, i s’aveût mètu matrassî.
I-gn-aveût co wêre di matras qu’èstîn’ bourés di r’ssôrt di fiêr à c’ timps-là. One payasse, ci n’èsteût qu’on grand satch di twèle rimpli d’ flotches di lin.ne. On s’i stind d’ssus fin long. On s’ cotoûne saquants côps po bin prinde si foume, èt op ! c’èst po tote ti naît sins paupyî. Al matinée, vosse comére vint drovut lès finièsses èt r’tourner lès payasses po lès ranairî. Al l’ longue, li lin.ne si racrapote, divint deûre… I-gn-a pus qu’a uker l’ matrassî !…
L’indjole mousse è l’ coû. Frèdo diskeûd lès twèles dès matras - plats come dès rin.nes – qu’on late à sès pîds. I mèt s’ machine à l’ovradje. Èle brûtîye di tos lès diâles. Èle triyane di tos lès costés. On côp qu’èlle a atrapé s’ bon trin, èle si rapaujîye po rascoude lès fligotes di lin.ne dins s’ trimouye. Li pouchêre vole plin l’ coû. Li vint l’èpwate : one nûléye vèsse di cane ! Li lin.ne, batouwe, sofléye, rinètîye, potche foû dèl tiyau di d’zo… Frèdo n’a pus qu’a rassèrcî l’ twèle plin.ne come on-oû. On s’ daurereût d’sur lèye po l’èstrimer sins taurdjî.
Lès bèdréyes achèvéyes, Frèdo èst nwêr come on chovion. I ratche. I tosse. I cheût sès loques. I r’chaurdut s’ nez dins-on grand rodje mouchwè d’ potche à blancs pwès, t’ossi laudje qu’on drap d’ mwin.. I satche si vèssîye di pourcia, si toubac èt sès fouyes foû di s’ potche. I s’è rôle one, I l’alume. I satche dissus. I ravale li fumêre. I l’ ridjète pa sès traus d’ nez come deûs soflèts d’ trins à vapeûr. Il èst pèrcé è l’idéye qui ça li r’nètîye sès peûmons. I s’ rècrèstéye dins sès pouchêres. Il èst tot binauje quand i tosse come on vî r’naud. C’èst qu’i boute, li !. I n’a nin peû d’ossî ! I sint bin qu’on l’ riwaîte. I n’ lache l’ostâye qu’on côp scran mwârt djus. I d’vint sankènaîwe. Amon lès insîs, on veût voltî d’yèsse sankènaîwe ! Li mia d’ tot, c’èst lès skèrnaches dins sès paumes, li bokèt d’ dwègt què li manque, si cingue di cû po s’ drompûre…
« Vos froz vosse compte, Frèdo ? »
« Cint francs pîce, nosse dame ! »
C’èst tchêr èt vilin, mins ça vaut l’ pris. Frèdo prins on chame, èt s’achide à l’ tauve. Li cinserèsse li d’mande s’i vout bwêre :
« On p’tit pèkèt, Frèdo ? »
« I n’ vos faut nin drovu one botâye por mi, savoz ! Dj’inme ostant one jate. »
Èle li sièt one jate dèl cafetiére à busète, qui d’meure d’astok tote li djoûrnéye su l’ plate bûse.
« Dji m’ vos va qwêre vos cens su l’ plantchî. »
Èle si sièt dèl pris d’ l’ovradje dins s’ boûsse qu’èst catchîye yinte deûs linçoûs dans l’ grande drèsse. Frèdo ramouye si dwègt po compter lès biyèts. I lès r’plôye dins s’ portèfouye. I lès r’mètrè à s’ Louwîse qui lès r’montrè su l’ plantchî èto, dins s’ catchète da lèye.
On côp qu’on a stî payî, c’èst come quand on a stî priyî po mougnî. I n’ vos faut nin dire : «Panse plin.ne, a r’vwêr marin.ne ! » ça n’èst nin come i faut. I vos faut taper one divise. Li cinsi s’ plind do timps, trop sètch, trop tchôd, trop frwèd. Frèdo è risquéye one :
«Vos âroz one miète di foûre, sins manque ?! »
«Anéye di foûre, anéye à r’moûre ! »
Qwè v’loz rèsponde à ça ? Frèdo fait sine qu’ayî dèl tièsse. Nin dandji dè dîre biacôp po s’ bin fé comprinde !
I vwèt voltî lès cinsîs. Il è-st-a s’-t-auje avou zèls. Do timps d’ guêre, il ont todi bin yeu assez po viker. Èt tot ç’ qu’il ont, i l’ont d’vu rauyî d’ fwace al têre qu’i vikenut d’ssus. Lès cinsîs èt lî, c’èst todi minme aîr, minme tchanson. I n’ sârîn’ lèyî crèche one saqwè à s’ mode. I n’ sârîn’ lèyî one saqwè come èlle a stî èmantchîye. Ci qui vèyenut èvi, c’èst l’ noû !
Frèdo, i n’ sâreût s’èspêtchî dè tchipoter one saqwè què li tchaît è sès mwins po li r’mète à s’ goût. I veût èvi l’ noû ; sins manque, sins grète. I veût tot ç’ qu’è-st-autou d’ li come on disdut d’ tos lès diâles. I li faut todi l’ radrwètî èt l’ rimète à s’-t-idéye. À campagne, i n’èst binauje qui quand i veût lès têres rarindjîyes pa l’ovradje dès-omes : on tchèrwé d’ royons fin drwèts, dès dîjas alignîs au cwârdia, one patûre sins tchèrdons, dès fis d’arcas clawés come one ligne di tch’min d’ fiêr, one banse di cayaus ramoncelés al cwane d’on pachis. Lès rampioules, lès bouchons, lès spines, ça l’ faît monter à s’minces. Au bwès, i n’ènn’a qu’ po lès sapins qui crèchenut à l’alignemint po l’ noyé qui sût. Li ru, i n’èst binauje qui dè l’ veûy sitron.né po passer d’zo l’ rouwe do molin.
Li cinsî, i s’ dwèt bate sins r’lache avou s’ têre tos lès djoûs què l’ Bon Diu li done. Si têre, i n’i r’waîtreût, èle li donereûve dès fènasses, dès tchiproules, dès viêrs-goyèts, dès fouyants, do mildiou, do tchamossé. Cultiver, c’è-st-èspêtchî l’ têre do couru à malvau ; èle toûnereût à misére. I lî faut mète dès-astos ou do bin, èle vos stofereût divant qui vos n’auyoche li timps do dîre pape !
Sins wêre si broûyî, on pout acèrtiner qui l’ cinsî veût pus voltî l’ cwârdia qu’ li tch’vau ; pace qu’il l’a d’vu drèssi, li lacia qui l’ vatche ; pace qu’il l’a d’vu mode. Lèyîz todi cès deûs bièsses là è lès mwins d’on sot dèl vile po veûy ci qu’i ‘nn’èva advinu !
Quand lès grusias raplatichenut lès frumints al têre, quand lès plaîves pourichenut lès fistus, c’èst nin tant lès piètes qui rindenut Frèdo èt lès cinsîs pèneûs, ô non.na ! Dès dinréyes, on-z-è trove di tos lès costés ; è l’Amèrique, è l’ France. On n’ârè nin fwin po ça : i-gn-a jamais yeu ostant d’ canadas ! On s’ ratraperè su l’ suke aus pétrâles ! Ci qui lès rind pèneûs, c’èst leûs-ovradjes qu’ont stî mèsbrijîs. Li pîce èsteût tant bèle ; lès fistus come dès soudârs à l’alignemint. Frèdo lès waîteûve crèche di s’ camion, li ployant di s’ brès raspoûyî al fignièsse au laudje. Li dimègne di l’après prandjêre, li cinsî fieûve on toûr su s’ pîce po yeu l’ouy dissus, waîtî ricroler lès pautes. I s’astampeûve à on pikèt, on fistu d’ dint d’ tchin yinte sès lèpes, fin binauje di s’-t-ovradje…
Èt vola… tot a stî cochèté, distrut, spiyî, sacadjî ; come sitauré par on canon qu’âreût passé on rèdjimint d’ soudârs à pîds al faus…
Li têre a r’prind sès brokes, li têre a gangnî… I-gn-a d’ qwè braîre sès ouys tot foû !…
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 01 awo, 2019 18:55:51    Sudjet: Responde tot citant

Li bîre da Olbêrt di Djiblou

Li paskéye si passe à l’abîye di Djiblou
Acteûrs : 13
Onk ou deûs conteûs
Li Vatchî : Bêrt
Trwès mwin.nes , 1, 2, 3.
Tchènon.ne Sijëbêrt
Prusintatrice avou faus micro
Filmeû avou fausse camèra
2, 3, 4, djins qui l’ prisintatrice va l’zeû pôser dès quèsses
On gamin, qui s’ocupe dèl tièsse di vatche èt qui vént tanawète prusinter s’ tièsse à one fignèsse, èt beûler on côp.
Atinçion ! lès 3 ou 4 djins, polenut yèsse les mwin.nes qu’on yeû l’ timps d’ candjî d’ moussemint
Dècôr
One coû,
Li sale dès mwin.nes,
Fausse camèra, bwèsse di carton
Faus micro d’ carton
Tchèyêre di madjustêr po l’ tchènon.ne
One tièsse di vatche
Fioles, alambic, Sauvadjès yèbes, panîs, casseroles, vères, botèyes, arèsse di pèchon, one lampe à « Idéyes » one tauve.
Moussemints d’mwin.ne
Pancartes : On tape djus ! On n’ boute pus !

Li bîre di Djiblou

Conteû 1 Oyez, Oyez, bravès djins di d’ véci èt d’au lon. Nos v’s-alans raconter li vraîye istwêre dèl bîre da Olbêrt : tchènon.ne copieû-scrîjeû di l’abîye di Djiblou !...
Conteû 2 L’abîye toûne à rén. Godfrwèd, comte di Nameur, èt l’ôte Godfrwès, Duc dès Brèbonîs, n’ lachenut nén di s’ ploter po-z-awè Djiblou dins leûs béns…
Conteû 1 Quand ç’ n’èst nén lès soûdârds dèl prumî, c’est lès cias d’ l’ôte qui nos vègnenut apicî li wêre qui nos d’mère èt foute li fè à nosse pitite vile…
Conteû 2 Lès mwin.nes di l’abîye mourenut d’ fwin. I-gn-a pus rén qui tént d’astamper, lès meurs bakenut, lès twèts sont trawés. L’abîye tchaît è pîce.
Mwin.ne 1 (Un moine, la tête bandée, vient se plaindre au père chanoine assis sur sa chaise de majuster.) Ouy, ouy, ouy ! Qui dj’a mau m’ tièsse ! Waîtîz on pau, pére tchènon.ne. I-gn-a one pane qu’a tchaît d’ssu m’ tièsse ! I faureût r’fé lès twèts !
Tchènon.ne Djè l’ sé ! Djè l’ sé bén mins nos n’avans pont d’ brokes !
Mwin.ne 2 (Un moine avec un pied dans le plâtre, claudiquant.) Aie, Aie, Aie ! I-gn-a m’ pîd qui m’ lance !!!
Tchènon.ne Qu’avoz ?
Mwin.ne 2 Dj’a passé au d’ triviès do plantchî qu’èst tot poûri !!! I l’ faureût r’fé !
Tchènon.ne Djè l’ sé ! Djè l’ sé bén mins nos n’avans pont d’ brokes ! Nos ridans sont vûdes !
Mwin.ne 3 (Un moine plier en deux entre, il se mouche sans arrêt.) È-st-i pôssube d’ièsse arindjî come ça èt d’ tant sofru !
Tchènon.ne Qu’avoz ?
Mwin.ne 3 I plout dins m’ tchambe, èt dj’a-st-atrapé on’ influwènza ! I faureût…
Tchènon.ne Faureût, faureût, faureût ! Nos n’avans pus one broke dins nos ridans vos di dj’ ! Nén on pèlé patârd. Nos-èstans r’nètyî, pèlé come li ku d’on maurticot !
Conteû 1 I-gn-a pus rén dins lès ridans, lès soris courenut dins lès drèsses !
Lès mwin.nes
(Chante sur l’air des bateliers de la Volga.) Nos-avans fwin ! Nos-avans fwin O-o-o-o-o-o ! Nos-avans fwin ! (Lesmoines arborent des pancartes avec : « On tape djus ! On n’ boute pus ! » Le chanoine vient les houspiller.)
Tchènon.ne Al place di v’ plinde : vos n’ sèroz nén pus craus po ça, sayîz d’ trover one saqwè qui nos pourot ramin.ner dès liârds ! Ci n’èst nén tot tchoûlant èt pîler come dès Mad’lin.nes qui nos rècherans foû dèl misére !
Petits jeux de scène avec une ampoule « idée. » Les deux premiers identiques
Lès mwin.nes
(tournent en rond en réfléchissants. Pendant toutes ces jérémiades, on a pu apercevoir le frère Robêrt maître de la basse-cours promener sa vache.)
(Ils viennent montrer la lampe au public, puis vont la présenter au chanoine.)
Tchènon.ne Non.na, ça n’ va nén !
Troisième jeu
Le chanoine montre directement que cette idée ne lui plait pas…
Fré Robêrt Pére Tchènon.ne ! Pére Tchènon.ne !
Tchènon.ne Ô l’ Bêrt ! Ni v’noz nén co vos plinde ad’lé mi, don vos ! Dji n’a pupont d’ brokes !!! Avoz ètindu ?!!! Nén one mastoke !
Fré Robêrt Mins… Mins…
Tchènon.ne I-gn-a pont d’ mins qui tègne…
Fré Robêrt Dj’a-st-one idéye po rawè dès brokes !
Lès mwin.nes
(se sont arrêtés de tourner en rond, ils rient entre eux du frère Robert.)
Mwin.ne 1 Li vatchî d’ l’abîye…
Mwin.ne 2 Qu’âreût one idéye !
Mwin.ne 3 Ostant pichî au meur !
Tchènon.ne Taîjoz v’, vos-ôtes ! Choûtans ç’ qu’i nos va dîre !
Fré Robêrt Vos savoz qu’ dj’a skèpî à Montfwârt, aviè Malines. Èt bén, vélà, m’ matante fieûve dèl bîre à fraude qui vos rideûve dins vosse gazî…
Lès mwin.nes
One bîre !!!  !  !  !
Tchènon.ne Continouwoz Ô ! l’ Bêrt !

Fré Bêrt Ç’ bîre la, èsteût boune po tot : lès bouflètes ! po lès rumatisses ! po l’ fwète ! po lès-agasses ! li r’tour d’âdje ! On pouroz sâyi d’ènnè fé èt l’ vinde !!!
Tchènon.ne Téns, poqwè nén ? Vos ‘nn’è sèrîz capâbe ?
Fré Bêrt I m’ chone qui dj’ poureû. Dji m’ sovén co dès yèbes qui m’ matante mi d’mandeûve d’aler saucler d’ssu lès fossés èt dins lès bwès !
Tchènon.ne Vos-avoz dandjî d’ qwè, po nos fé ça ?
Fré Bêrt Dès yèbes, dèl ope, dès botèyes, dès casseroles…
Tchènon.ne Vos l’s-âroz ! Mès fréres, vos-îroz d’ner on côp d’ mwin à Fré Bêrt po lî aler qwêre lès suvadjès yèbes èt dè l’ ope.
Fré Bêrt Oyî, dji vou bén, mins quî qui r’loukerè à m’ vatche ?
Tchènon.ne Onk dès-ôtes mwin.nes !
Lès mwin.nes
Nén mi, nén mi !
Fré bêrt Faurè qu’ dj’èscoléye li cia qui va waîtî à m’ nwèraude !... C’èst l’ dêrène qu’i nos d’meure, èlle è-st-one miète tinre, èlle a on stoumak di poume cûte. Èt, s’on nè l’ sogne nén comufaut, à timps-à eûres, èle ni taudjerè pus wêre d’atraper l’ chite èt d’ si laîyî moru d’ fwin !
Tchènon.ne Ni tanoz nén vosse tièsse avou ça, vos vwèroz, nos l’ sognerans come l’èfant di s’ mame !
Fré Bêrt Èwou frè dj’ mès brèsséns ?
Tchènon.ne Nos vos frans dèl place véci. I m’ chone qui ça convéreût bén po fé vos brichondadjes. Mi dji m’ va scrîre à nosse pâpe Inocint po lî d’mander s’ bènèdicsion, èt à nosse bailly po nos p’lu mète à yute dès trècas, èt payîs lès tayes qu’i faurè.
Lès mwin.nes
(installent (ombres chinoises) frère Bèrt dans son coin, d’autres font semblant de chercher dès herbes aromatiques.)
Jeux de scène muet : pendant que le frère Bèrt travaille dans son labo, les autres moinnes essaient de savoir ce qu’il s’y passe. Le frère Bèrt goute à ses mixtures…
Fré Bêrt Sayans n’ on pau ça ?...
I m’ chone qui dj’a mètu trop d’ sayu…
 ! Ça sèrè mèyeûs insi !...
Non, trop pau d’ règlisse !...
Ça n’ést nén mwai !...
C’tila, c’èst minme fwârt bon !...
 ! È v’la on clapant !...
(Fré Bêrt tént one chique di tos lès diâles. Li grosse cloke sonne po lès vèpes…)
Mwin.ne 1 (passe dissu l’ sin.ne tot criant.) À vèpes ! À vèpes mès fréres ! Il èst l’eûre !
(Lès moines vont se recueillir. Frère Bêrt, arrive complètement bouré !)
Mwin.ne 1 Il èst pèté qui l’ diâle !
Mwin.ne 2 Jézus’, Marîye, Djosèf !
Mwin.ne 3 C’è-st-ontieûs !
Tchènon.ne Sint Djozèf, ôra pro nobis !
Fré Bêrt (qu’a ètindu « Djosèf » ataque one tchanson…)
Fré Bêrt Djozèf, vos-avoz dès pûs, djè l’s-a vèyu couru d’ssu vosse tièsse !
Djozèf, vos-avoz dès pûs, djè l’s-a vèyu couru d’ssu vosse ku !

Lès mwin.nes
(horrifiés) Ô ! Ô ! Ô !
Tchènon.ne Ô ! l’ Bêrt, fré ! Di djû ! Fré bêrt, taîjoz v’ !
Fré Bêrt Vos, vos, vos m’ donroz vosse pârdon, Fré Tchènon.ne i… C’èst dèl faute dèl bîre, èle mi monte al tièsse ! Va falu qui dj’ taudje di cachî après lès bounès dôses, sinon, sinon, sinon, dji n’îrè jamaîs è paradis ! Dji d’vén on mwai crustin ! Dji djûre come on laîd tchirou, on baligand !
Tchènon.ne Non.na savoz, Fré Bêrt ! Dji v’s-ègadje à continouwer au pus rade ! Tote li vicaîrîye di l’abîye ripwâse dissu vos spales !
Fré Bêrt Dji, Dji, Dji v’s-acèrtinéye qu’avou tot ç’ qui dj’ bwè, l’uch dèl paradis sèrè por mi li djoû qui dj’ rissatcherè mès guètes po d’ bon… (I tchule tot d’djans ça !)
Tchènon.ne Savoz bén qwè, Fré Bêrt, Vos n’avoz pus dandjî dè v’nu aus vèpes !!! Dji vos done li pèrmission d’ priyî dins vosse laboratwêre !
(Lès moines sortent de scène. Le frère Bêrt retourne dans son laboratoire, il fait de nouveaux èssais, et redevient pompette et se remet à chanter.(ombres chinoises))
Fré Bêrt Alez, Marie Clape Chabot, trossiz bén vos cotes quand vos-îroz, oup la lâ !
Alez, Marie Clape Chabot, trossiz bén vos cotes quand vos-îroz co !
(Lès moines sont effrayés d’entendre cette chanson !)
Mwin.ne 1 Mon Diu ! Mon Diu !
Mwin.ne 2 Donoz lî vosse pârdon, Sègneûr !
Mwin.ne 3 Il a l’ diâle è s’ capotine !
Mwin.ne 1 Vade retro Satanas’ !
Mwin.ne 2 Dji mè l’ va rapwârter à nosse tchènon.ne !
Lès mwin.nes
Priyans èchones por lî !
(Le frère Bêrt, chante et danse, il se déchaîne !)
Tchènon.ne Ô ! l’ Bêrt, taijoz v’ asteûre !
Fré Bêrt Dji, dji, dji v’ l’aveû bén dît, don, qu’ça toûnereût mau ! I, I, I vaureût mia qui dj’ tape dju !
Tchènon.ne Non.na savoz ! Èwou ènn’èstoz dins totes vos sâyes ?
Fré Bêrt I n’ mi manque pus qu’one rawète po, po, po qu’ l’afêre vôye al lècsion !
Tchènon.ne Vos vèyoz bén don, qu’i vos faut continouwer, vos-èstoz à deûs dwègts d’ nos chaper !
Fré Bêrt Oyî… mins m’ paradis, lî, il èva d’ssu flote !
Tchènon.ne Savoz bén qwè, Fré Bêrt, dji n’ vou pus d’ vos come vatchî d’ l’abîye : lès mwin.nes waîterons à vosse nwèraude, i dîront dès pâtèrs por vos. Dji vos lome Mwin.ne brèsseû d’ l’abîye à paurti d’audjoûrdu ! Vos pudroz l’ nom d’ mwin.ne Olbêrt ! Dji vos done mi-y-absolucion à one condicion !
Fré Olbêrt À on condicion ? li quène ?
Tchènon.ne Al condicion dè tchanter dès tchansons d’èglîje !
Fré olbêrt Dj’ènnè conè qu’one : Laissez couler ! laissez coulâ !
Tchènon.ne Vos n’avoz qu’à l’ gruziner à bachète, c’èst tot l’ minme one tchanson d’èglîje !
Conteû 1 À fwace d’awè sâyi sès bîres, Fré Olbêrt à trové l’ boune mèseure. Lès mwin.nes è fabriquenut l’ bîre à tonias. On rarindje l’abîye. On-è cause laudje èt lon. On-è cause minme al tèlèvision !
Sin.ne dèl Tévé, micro trottoir.
Pruzintatrice
Mèsdames, Mèsssieûs, Bondjoû ! Véci Canal Zoom ! Dispôy tot-on timps, on n’ cause pus qu’ dèl bîre di Djiblou. One bîre qui n’ sâreût mia convenu po soladjî tos lès maus, po vos r’mète dissu pîds au pus rwèd ! Nos-avans véci avou nos-ôtes, dès djins què l’ont sâyi èt qu’ènnè sont foû binaujes !
Vos, Monsieû (lui tendre le micro.) qu’ènnè pinsez v’ ?
L’ome Madame ! I-gn-a pont d’ mots po dîre li bén qu’ ça m’a faît : dj’aveû dès rumatisses… dji n’a pus rén ! Dji n’a pus mau mès rins !!! Quand dj’è bwè, dji n’a pus mau nune paut !
Pruzintatrice
Èt vos nosse dame, qwè ‘nn’è d’djoz ?
Li dame Mi madame, dji ravike, dji m’sins come à vingt-ans !!! Dji m’ sin capâbe di tot ! Dji so tote radjon.nîye !
One ôte fème
Dj’avo on’ èfant qu’aveût l’ fîve lin.ne ! Il èsteût blanc come on mwârt qui s’ rilève po pichî. Il aveût tot l’ timps dès-ouys brèyauds èt l’ gote à s’ nez. Djè lî ènn-a d’né ; d’ssu deûs djoûs il a stî r’tapé !
On’ ôte ome Mi, dj’ènn-a d’né à m’ bèle-mame. Èlle aveût todi on sêr visadje quand èle mi vèyeûve ! ‘Là qu’asteûre, èlle osse di rîre tote li djoûrnéye ! Ci bîre là : c’è-st-on mirauke ! Dji bèni l’ mwin.ne Olbbêrt tos lès djoûs qui l’ Bon Diu m’ donne ! Quand i sèrè mwârt dji voureû qu’on-è faîye on sint !
Prizintatrice C’èsteût nosse micro-trotwêr è dirèk dissu l’ bîre dau mwin.ne Olbêrt di l’abîye dins lès rouwales di Djiblou. Au plaîjî d’ vos r’veûy li samin.ne qui vént por on novia micro-trotwêr dissu lès sôrcîres di Lonzée.
Conteû 2 Vos vèyoz come èlle èsteût rinoméye dins tot Djiblou èt cor au d’là ! Mins nosse brâve mwin.ne Olbêrt aveût dès r’môrds di consyince. Il a stî r’trover li Tchènon.ne Sijebêrt.
Mwin.ne Olbêrt
Rén à fé, rèvèrend pére tchènon.ne. Rindoz m’ mi vatche ! Dji n’ pou continouwer come ça ! Dji m’ dâne ! Oyi, dji m’ dâne po l’ètèrnitè. Dji tape djus !
Mwin.ne Sijebêrt
Non.na savoz, nom di Diu ! (Pârdon Sègneûr !) Vos nos v’loz r’mète su lès strins !!!
Olbêrt Non.na, mins qui dj’ moure dimwin, èt dji n’irè jamaîs au paradis !
Sijebêrt Ni v’ tribolez pus avou ça !!! Vos sèroz pârdoné d’avance po tos lès pètchîs qu’ vos froz è l’ nom d’ noste abîye !
Olbêrt C’èst bén l’ vraî ci qu’ vos d’djoz là ?
Sijebêrt Vos m’ purdoz por on flacheû ?
Olbêrt Non.na mins… Si vos sâriz tot ç’ qui dj’ faî quand dji so bèrzingue…
Sijebêrt Djè l’ sé, Djè l’ sé… Dji v’s-a ètindu d’ pus d’on côp. Mins vos p’loz d’naler ! Vos-èstoz pârdoné d’avance !
Conteû 1 C’è-st-insi que nosse bon mwin.ne Olbêrt à p’lu continouwer à fabriker sès bîres, sins s’ fé trop d’ mau d’ tièsse po sès pètchîs, bwêre èt tchanter sins rat’na !!! Èt l’abîye rècrauchî sès tchaussètes à vinde dèl bîre. Tant qu’a fé, minme qui lès Djiblotins li ont monter one posteure èt one place à s’ nom !
Conteû 2 Nos vos l’avans raconté come on nos l’a raconté. Si vos pinsoz qu’ c’èst dès faloutes, èt qu’ c’è-st-one maîje paskéye, sâyiz todi d’ bwêre saquants possons d’ bîre di Djiblou, divant d’ nos disdîre ! Nos-è r’causerans après !
Maujeni
Jacques Desmet
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 01 awo, 2019 18:56:56    Sudjet: Responde tot citant

Dji sèreû on violon

Dji sèreû on violon : qu’on djouwe dissus mès bwès,
Dji donereû à m’ musique, lès-aîrs qui v’ doneront swè ;
Vos-istwêres di antadje, di bètch dissus vos trèsses.
Dji sèreû fine binauje ; djondu pa vos carèsses.

Èt n’ waurder à chaque côp qu’on muselinadje di notes,
Qui tchante à r’laye è m’ tièsse à ‘nnè div’nut fine sote.

Si dj’ sèreû one guitâre, kékîye dizo vos dwègts,
Dji m’ mètreû à mèsure, po fé valu vosse vwès.
Mès cwades tote trianantes mousserîn’ didins vosse keûr,
Dji sèreû fine binauje, d’ayincî vosse bouneûr.

Èt n’ waurder à chaque côp qu’on muselinadje di notes,
Qui tchante à r’laye è m’ tièsse à ‘nnè div’nut fine sote.

Si dj’ sèreû on saxo, li qu’a branmint à dîre,
Dji pwatereû vosse tchanson, al cia qui vos-atîre,
Dji sèreû voste aidant, quand vos sèroz mouwé,
Si vos-avoz dès plâyes, dj’irè vos lès r’ssouwer.

Èt n’ waurder à chaque côp qu’on muselinadje di notes,
Qui tchante à r’laye è m’ tièsse à ‘nnè div’nut fine sote.


Si dj’ sèreû on piano, mès touches blankes èt nwêres,
S’èvolerin’ don randon, po r’blankî voste istwêre,
Cour’rin’ dizo vos dwègts, djouwerîn’ one sinfonîye,
Vos ratinderin’ su l’ vôye, tot l’ long d’ vosse vicairîye.

Èt n’ waurder à chaque côp qu’on muselinadje di notes,
Qui tchante à r’laye è m’ tièsse à ‘nnè div’nut fine sote.

Maujeni

Dji sereu-st on violon k’ on djowe dissu mes bwès
Dji rexhreu foû d’ mes coides des airs ki vs dinrént soe
Des istweres di hantaedje, di betchs dissu vos tresses,
Dji sereu fén binåjhe, djondou pa vos caresses

Et n’ wårder a tchaeke côp k’on muzlinaedje di notes
Ki tchantrént e vosse tiesse a vs fé divni fene sote.

Dji sereu-st ene guitåre, kekeye dizo vos doets,
Dji m’ metreu a muzeure, po fé valeur vosse vwès.
Mes coides tote triyanantes mousrént didins vosse cour ;
Dji sereu fene binåjhe d’ ahessî vosse bouneur.

Dji sereu-st on sacso, lu k’ a bråmint-st a dire,
Dji poitreu vosse tchanson å ci ki vos atire
Dji sereu vost aidant, cwand vos serîz mouwêye ;
Et cwand vs årîz des plåyes, dji vs les ireu rsouwer.

Si dj’ sereu piyano, mes toutches blankes eyet noeres
S’ evolrént d’ on randon po rblanki voste istwere ;
E cori dzo vos doets, djouwant ene sinfoneye ;
Et vos ratinde sol voye, tot l’ long d’ vosse vicåreye 

----
A stî replaidî e rfondou sol Rantoele-gazete
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 01 awo, 2019 18:57:45    Sudjet: Responde tot citant

On fë

Dj’âro p’lë tchaîr sër on fë quë m’ârot yë r’mostrer : Vos savoz nosse pa, vos n’avoz pës à vos dëscoradjî. Po soyë èvou quë dj’ va r’pwâser mès pènas l’ samin.ne quë vént, djë m’ va fé l’ mèstî d’ barakî.
On fë coureû à pîds. Alez, nosse pa, djë m’a djûré qu’on frot lès quarante këlomètes dë Brussèles èchone. Alez, ratchîz vos peumons, Ratchîz ! Alez, on s’ rëlève, in ! Ayë ça qu’on l’ pâye së toubak.
On fë ècolo. Bondjoû nosse pa, non.na djë n’a ni frwèd. Së mès massales sont blankes mwates, c’èst pace quë dj’a v’në à vélo. Tënoz, ça c’èst m’ soper por al naît : lèguëmes, spënache, one poume, tot ç’ quë vént d’adlé l’ cinsî quë boute sins-angrais. Së djë n’ so ni moussî comëfaut, c’èst quë dj’ rabroke dë m’ lèçon d’ ioga. Djë n’a ni yë l’ timps dë m’ tchandjî.
On fë qu’ârot stî dins l’ polëtëque : Më, don nosse pa, djë m’ va vôter po lès djins dè mëtan : Hèdebouw èst bén trop à intche, Èlio, c’èst l’ drwète tote ratchîye, èt l’ fë Michel, acoplé avou l’ NVA, ça m’ faît r’nauder.
On fë, rén qu’on fë. Qwè !

« Bondjoû, m’ fë, tot va bén ?

« Vos avoz faît vos d’vwêrs po d’mwin ?

« Bâ ! On faît todë l’ diâle pës laîd qu’ël èst ! Nos comandrans one pizza. Nos rawaîterans Rèyal dë Madrëd – Barcëlone, dëssë l’ tévé. »
On grande brake dë fë.
« Bone cîze, nosse pa, djë so v’në avou mès deûx coméres po sayî d’ nos-èsoketer tot fëmant one role dë toubak aus-yèbes. Vos savîz qu’ Freûd purdéve dèl drogue à banseléyes ?  !, faut quë dj’ vos l’ dîye, dj’a stî tapé à l’ëch dë m’ sëcole, mins n’ vos-è fioz ni : djë m’ va arindjî ça. Bone cîze, nosse pa, nosse bënamé pa... »

Maujeni
Ortografe dë l’auteû (come à Djodogne èt avaur là)
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 01 awo, 2019 18:58:31    Sudjet: Responde tot citant

Avou on vêre

Avou on vêre dissu m’ tauve èt vosse foto dins mès mwins,
Dji passe mès cîzes au comptwêr à ratinde lôyeminôyemint,
Pace qui dji n’ sé vos rovî, èt qu’ po-r-vos, dji n’ so pus rin,
Mès-ouys riloukenut dins l’ vûde, dji n’ so pus qu’on disbautch’mint.

Avou on vêre dissu m’ tauve èt vosse foto dins mès mwins,
On vêre di bîre dissu m’ tauve èt vosse foto dins mès mwins,
Poqwè ç’ qui dj’ vos-as pièrdu, dji mè l’ dimanderè todi.
Dj’a sayî sins l’ sawè fé, à cachî à vos rovî.

Avou on vêre dissu m’ tauve èt vosse foto dins mès mwins,
Li musique tchante au pus fwârt, dji vos l’ dî, dji n’ l’ètind pus,
Quand dji rawaîte vosse foto, avou nosse boneûr pièrdu.
Lès copes dansenut autou d’ mi, à s’ bètchoter d’èstchauf’mints.

Mins mi, dji so tot seû avou vosse foto dins mès mwins
On vêre di bîre dissu m’ tauve èt vosse foto dins mès mwins,
Pace qui dji n’ sé vos rovî, èt qu’ po-r-vos, dji n’ so pus rin,
Dj’a dî qui dj’ vos roviyero, vos m’ lèyoz tot seû su m’ fwin.

Avou on vêre dissu m’ tauve èt vosse foto dins mès mwins,
Avou on vêre dissu m’ tauve èt vosse foto dins mès mwins.

Adaptation de « Un verre sur la table » de Julie Daraîche,
Licence You Tube Standard
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 01 awo, 2019 19:00:06    Sudjet: Responde tot citant

Face book

Li vèrité : mins po qwè fé ?
C’èst d’ssu Face book !
Yèsse lîbe : mins po qwè fé ?
Ti l’ès d’dja d’ssu Face book !
Li justice : mins po qwè fé ?
Tortos l’ dîjenut dissu Face book !
Rouwer dins l’s-atèléyes : mins po qwè fé ?
Èle courenut sotes dissu Face book
Face book ni réguèle rén :
On’ oucha po m’ tchén…

Maujeni[/b]
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 01 awo, 2019 19:01:13    Sudjet: Responde tot citant

Pocwè scrîre

1. I m’ sonle ki l’ prumîre dès rêzons, c’èst di s’ fé plêzîr, si prôpe plêzîr. Pace k’on djowe avou lès mots, lès sons, lès îmâdjes, lès ratoûrnûres. Dji n’ pinse nin k’i gn-a dès cîs ki scrîhèt è walon èt k’ ça lès- anmèrde. C’èst tot fî parèy po tos lès cîs ki scrîhèt dins n’impôre ké lingadje.
Après ça, c’èst l’ plêzîr d’èsse publiyé èt insi di pârti çou k’on-z-a scrît avou dès djins k’ ça intèrèsse.
2. Et pwis dji m’a racsègné one miète addé deûs di nos mèyeûs scrîjeûs. Po tos lès deûs, çou ki compte, c’èst d’ lèy dès traces, dès traces do walon èt dès traces di zèls min.mes.
* « Tot l' timps qu' dj'a d'meuré a l’ospitô à n' sawè causer, dj'a bén tûzé... èt dji m'a dit qu'il èstot timps di r'prinde mi plume si dj' voléve polu mostrer à mès-èfants d'èwou qu'i v'nîn', poqwè qu'il èstîn' walon, èt qu'i-gn-avot pu qu' nosse lingadje po dîre qu'il l'èstîn' co walon !
Vola, quéquefîye bén qu'i va moru di s' bèle mwârt, mi dji bouterè todi po qu'i vike ! Si on djoû li batch si r'toûne su l' pourcia, èt qui l' Walonîye divént maîsse è s' maujone, quéque fîye qu'i-gn-aurè on politiki po l' rimète su lès rayes, mins ça, ci n'èst qu'on sondje ! » (J.Desmedt)
* « Je pense que l' Europe a la chance de disposer d' une richesse culturelle basée en grande partie sur sa diversité dont ses langues. Les conserver n'est pas un repli sur soi, mais une contribution au fond commun. Quelque chose qui doit nous rapprocher des autres, nous inviter à les connaître, à partager. Avons-nous envie que nos descendants ne comprennent plus leur nom de famille ? Celui de leur rue ? De leur village ? D'une uniformisation limitée à une civilisation d' un anglais élémentaire, de la Pizza et de la musique électronique ? On parle de multiculturalisme et on se félicite de la disparition du wallon comme si passer de stade bilingue-biculture au stade Unilingue était un progrès.
L' écriture en wallon permet d' augmenter un peu le patrimoine littéraire de la langue. Le moine copiste du haut Moyen-Age ne savait à quoi servirait son travail et pourtant, un jour vint la Renaissance. » (JP Dumont)

3. One ôte rêzon pocwè scrîre è walon, c’èst k’on-z-î a brâmint pus’ di tchance d’èsse publiyé k’ si on scrît è francès.
4. Mins on s’ pout dmander cwè cand i gn-ârè pus k’one pougnèye di lîjêus. Ça s’ ramwindrit dja on bê côp. Est ce k’on va co publiyer ? On pout bin sûr mète sès tècses so l’ ranteûye, mins ça n’candje rin a nosse afêre : s’i gn-a pupont d’ lîjeûs po lès lîves, i gn-ârè pupont non pus so l’ ranteûye.

----
lî pa Joël Thiry al Ronde Tåve "pocwè scrire e walon", Fiesse ås lingaedjes walons, Nameur, 2017.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 01 awo, 2019 19:02:29    Sudjet: Responde tot citant

Li grosse vatche

Su one idéye da Jules Mazy
C'èsteût à l'a.an, li solia lûjeût dins on blouw sitwèlî sins nûléye, j'èsteû bin luné èt dji m'a-st-arindjî po d’n'aler fé on tour à vélo...
Dji pèséve dissu mès pèdales tot binauje, dj’èsteû minme èwaré d’ m’ètinde tchanter. Dj’a taurdjî po m’ ripwâser èt r’prinde alin.ne. Dj’a stauré m’ vélo dins l’ fossé. Dji m’i a achid, tot jusse divant l’ bourikèt pa wou qu’on pout prinde li pîssinte qui vos ramin.ne fén rwèd dins l’ vijnauve, èt qui côpe è deûs, li cloture di ronces dèl pré dès vatches.
Dins l’ pachîs, tot jusse pa d’vant mi, one bèle fwate BBB (Blouw,Blanc, Bèlje), à r’lèvé s’ mouson djus dès yèbes, avou l’aîr di m’ dîre : « Qwè vous’ twè ? » Àl tête, on via co mia toûrné qu’ lèye, on ku d’ polin, fougniv’ dins s’ pé.
Dji m’a lancî èt wazu li lachî one marimince : « Maria todi, qu’ t’ès bèle avou tès deûs djanes pindants agrifetés à tès-orèyes ! »
« Ti trove ça bia t’ minme, d’mé-cougnî ? » qu’èle m’a rèspondu su sès grands tch’vaus. « Ti vwèreûs t’ feume avou deûs parèys djanes clicotias èt on caraco dispairî : ti trovereûs ça bia, twè ? Lauvau à l’Europe à Brussèle, ci n’èst qu’ dès baudèts, i n’ont nin waîti al coleûr di m’ rôbe ! I m’ont moussî come on spawèta ! »
One vatche qui bèrdèle avou tote si tièsse ; c’èsteût d’djà s’barant, mins one qui faît dèl politique, ça, dji n’aveû co jamaîs vèyu, ni ètindu !
Dj’a d’moré one apéye, tot paf d’astampé, divant d’ polu lî rèsponde.
« Oyî, vos sèrîz bin dins l’ bon, mins vos clicotias, c’èst come nosse cârte d’indentité da nos, èt ça c’èst l’ vosse ! On sét d’èwou qu’ vos v’noz, quî ç’ qu’èst vosse pa, vosse man. Al kéne cinse èwou qu’ vos-avoz skèpî. Avou vos djanes pindants, vos p’loz voyadjî dins tos lès payîs, on sarè todi quî qui v’s-èstos ! »
« Ti djouwes avou mès-aburtales, twè ? Dji sèreû lîbe là, awè dès-abondrwèts come lès vatches di l’Inde, èt m’ polu pormwinrné pa t’t-avau lès tchamps. Ti veûs bin qui dj’ so rèssèréye dins on pachis, èt quand ç’ n’èst nin pas dès fîs d’Arca, c’èst pas on filé qui t’ done one drine à chaque côp qui dj’ passe mi tièsse trop lon. Ça sièt à qwè tot ça ? Ti mè l’ poureût dîre ? »
Dj’a bèguyî : « Po nos-ôtes lès-omes, ci qui compte, c’èst d’ sawè dèl quéne sôrte di vatche qui v’s-èstos. Si vos-èstoz one vatche po l’ lacia, ou one po l’ tchau ! »
« Comint wâze ti mi r’mète à totes cès sôrtes di bièsses qui végnenut d’abaguer dins nosse payîs ? Dès limousines dèl France ; ni ku, ni panse, ni tète, dès Holsdteins d’au Canada, qui n’ont qui l’ pia d’ssu leûs-ouchas. Dès vraiyès bare-à-boles. Dji m’ dimande todi bin comint qu’ nos twas polenut griper la d’ssus, sés’ mi. Mi vijène mè l’ dîjeût co l’ôte djoû : « Mi fèye, i-gn-a dès cias, one gade avou on cindrî, i griprin’ dissu. » Ça n’ mi s’bare nin qu’ lès-ârtisses ont-st-èmantchî l’ faus-cougnadje ! »
Èlle a rataqué : « Waîte mi bin, ti n’ mi sâreûs r’mète à cès cârcasses là d’ètrandjîres ? »
Vos l’ savoz èto qu’ lès vatches sont fwârts dèlicates.
Po l’ rapaujî one miète : t’âreûs yeu dît one qui n’aveût nin r’waitî s’ botroule divant d’ si r’lèver, djè li à faît lès cwances dèl veûy voltî.
« Non.na, m’ bèle BBB, c’èst vos l’ pus bèle, vos, l’ pus grosse, vos qui nos faît lès mèyeûs vias. C’èst vosse prumî ? »
« Meû non.na, c’èst d’djà m’ trwèsyinme, li cinsî à v’nu qwêre lès deûs prumîs à camion po l’s-èmin.ner dji n’ sé où, mès pôves-èfants ! »
Djè lî a d’mandé s’ nom. « L’cinsî m’ lome Maggie. » m’a-t-èle rèspondu. I m’a choné qu’ dj’avo d’dja ètindu ç’ nom là quéque pârt.
Èle s’a lèyî riv’nu à lèye èt, buk à buk, ‘là qu’èle m’atauche : « Mins si vos crwèyoz qu’ c’èst l’ pompon d’ pwârter dès djanes plastrons come cètila à vos-orèyes, poqwè qu’ vos n’è pwârtoz nin, vos ! »
« Vos crwèjèl’riz one comére, vos sâriz dirèk, quî ç’ qu’èlle èst, rén qu’a lîre qwè su sès clicotias. Bondjoû madame, vos-èstoz 45 ans vîye, vosse pia èst blanke ôrléye pa l’ solia, vos-avoz yeû quatre èfants avou quatre difèrints-omes qui vos pâyenut po-z-ètèrtinu, chaque leû djon.ne, èt vos-èstos novèlemint prèsse po rataquer l’ cinquyinme. Â ! Èt por vos Madame ci sèrè qwè ? Dji veû qu’ vosse pia èst nwêre, qui v’s-èstos costrî, qui v’s-èstos 50 ans vîye, qui v’s-avoz quatôze èfants au Zimbabwé prèsses à potchî èvôye di d’là po v’nu dins nosse payis, qui vos-èstos courûwe èvôye dèl radjoû d’ Sangat ! Volà, lès présintadjes sont faît. ! »
Dj’èsteû storné su l’ côp ! Èle ni s’ continteûve nin d’causer, èlle aveût tote si tièsse po fé l’ lèsson aus-omes !
Dj’a r’prins m’ vélo. Djè lî a dît : À onk di cès djoûs èt à s’ via èto. I m’a choné qu’èle aveût l’aîr di s’ foute di m’ binète, po l’ paskéye qu’èle vineût di m’ djouwer.
To rabrokant, dj’a tuzé à ç’ qu’èle mèteûve su l’ tauve. Tot compté, tot rabatu, èst ç’ qui ç’ sèreût si s’barant qu’ ça po lès-omes ? Bin sûr, audjoûrdu avou lès novèlès machines, on-z-âreût co rade tchandjî lès pindants po dès « T-shirts » èlèctroniques èwou qu’on-î poreû lîre tot ç’ qui nos-avans dins nosse tièsse. Pus moyin d’ raconter dès craques. Pupont dandjî d’ clignètes. Rin qu’en vos crwèj’lant, on sâreût çi qu’ vos-avoz è l’ tièsse. Si vos bèrdèloz dins l’ posse à imaudjes, on sâreût d’avance qui v’ racontoz dès faloutes po nèyî l’ pèchon.
 ! On vos lome Jule. Come mi, mins dji so pus fwârt qui vos.
 ! Vos vèyoz voltî m’ tchapia ! Mèrci branmint dès côps, mi c’èst vosse sitoumak qui m’ plaît bin !
 ! Vos-èstos champète ! Bin mi, ‘là qui dj’ vin d’ moussî foû pa l’ grand pwate dèl prîjon. Si vos-aloz à intche, dj’irè drwète. Nin dandjî d’ vos trècasser avou mi ! Dji n’ so nin malauji, savoz !
 ! Vos-èstos tote pèneûse !
I-gn-a one saqwè qui n’ va nin ? Dîjoz m’ on pau ?

C’èst bin lès preûves qui c’èst lès vatches qui fujenut avancî lès-omes. Pus jamais vos n’ rawaît’roz lès vatches avou vos-ouys come divant.
Dji sèreû dèl comission, djè lî donne dirèk li pris Nobel à ç’ Maggie là !

Drole di sôte di djins lès-omes qui fujenut sopwârter aus-ôtes totes lès mariminces qu’i n’ sopwatrin’ nin por zèls !

Maujeni

----
a stî replaidî e rfondou dins l' Rantoele-gazete.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 01 awo, 2019 19:03:33    Sudjet: Responde tot citant

Nin arindjî

Dj’âreû p’lu yèsse kuré, zwèpeû, yèsse pindu,
Priyî Allah èt yèsse baurbu,
Mins…
Ça n’ s’a nin arindjî. Ça n’ s’a nin arindjî.
Dj’âreû p’lu m’ mète à min.nadje avou on bia p’tit ku,
Èt tos lès djoûs ‘nn’è yèsse faurbu,
Mins…
Ça n’ s’a nin arindjî. Ça n’ s’a nin arindjî.
Dj’âreû tant vèyu voltî, bwêre èt mougnî,
Awè dès coméres, lès cougnî.
Mins…
Ça n’ s’a nin arindjî. Ça n’ s’a nin arindjî.
Oyî, mins dj’a rèscontré Mayane :
Dj’âreû p’lu li fé pwârter dès cwanes.
Mins…
Ça n’ s’a nin arindjî. Ça n’ s’a nin arindjî.
Dj’âreû p’lu, sins m’ fwârcî, fé ribote,
À scarèt, boguer mès tchabotes.
Mins…
Ça n’ s’a nin arindjî. Ça n’ s’a nin arindjî.
Dj’âreû p’lu scrîre dès banceléyes di tchansons,
Dji n’ saveû djaurgoner qu’è walon.
Èt…
Ça n’ s’a nin arindjî. Ça n’ s’a nin arindjî.
Dj’aveû co saquants pilûres di Viagra,
Po m’ p’lu vanter èt m’ mète au mia.
Èt…
Ça s’a bin arindjî. Ça s’a bin arindjî.
Dji m’a ragrancî d’one vîye comére,
Qui s’ènnè v’leûve à m’ catche misére.
Èt…
Ça s’a bin arindjî. Ça s’a bin arindjî.
N’avans tos lès deûs dès claus d’ vacha,
Nos l’ savans qu’ on n’a pus qu’ dès chitas,
Èt…
Faut bin s’ènn’arindjî. Faut bin s’ènn’arindjî !
Ayîr, èst mwârt, bin lon su nos d’drî,
Nos pudrans d’mwin sins bèrlondjî.
Mins…
Faurè s’ènn’arindjî. Faurè s’ènn’arindjî.
Faurè s’ènn’arindjî. Faurè s’ènn’arindjî…
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 01 awo, 2019 19:04:17    Sudjet: Responde tot citant

One di pièrdoûwe

One di pièrdoûwe...
I t’ faleûve rade couru èvôye,
Ti fleûr ènn’aveût pâr trop swè,
T’as rèlî dès-ôtès convôyes,
Po t’ ripachî à d’s-ôtes saiwès !

C’èst twè qu’a-st-arindjî l’ passéye,
Ti voleûves ribôguî tès potches,
T’as vûdi m’ boûsse su l’ pavéye,
Po m’ laîyî là, ni pau ni fotche.

Ti t’ plaîjeûs mia dins lès wachis’.
Si c’èst come ça qui t’ veûs t’ bouneûr,
T’aler catchî dins dès bouch’nis’ :
Waîte à tès rôyes, waîte à tès-eûres.

Tot paujêremint avou m’ mayon,
Dji v’leûve viker on vraî bouneûr,
Sins v’lu monter d’ pus d’on scayon,
Sins piède on pli, ni m’ dame di keûr.

Avou mi, t’as pougnî trop timpe,
T‘as volu djoûwer t’ djeû tote seûle.
Dji v’leû waitî pus lon, pus simpe.
Dj’a doté d’ tot dè yèsse mièrseûl.

C’est dins m’ maleûr qui dj’a r’prins fwace,
Dj’a p’lu tchwèsî on novia djeû :
One di pièrdoûwe : dîj’ volenut s’ place
Dji n’a wêre dimoré chômeû !

Maujeni
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon Totes les eures sont a GMT + 2 eures
Potchî al pådje 1, 2, 3, 4  Shuvant
Pådje 1 so 4

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci


Powered by phpBB © 2001 phpBB Group