Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Jacques Desmet
Potchî al pådje Di dvant  1, 2, 3, 4  Shuvant
 
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: dju 01 awo, 2019 19:13:47    Sudjet: Responde tot citant

Li cwârbau èt l' lapin.



On cwârbau, rilûjant fin craus,
Si bètch tot glètant d' bigaraus,
Èsteût à djok à n' nin ossî*
Al mére copète d'on cèréjî.

On lapin qu'aveût vèyu l' los'
Taudje. I l'arin.ne : « T'as on bia pos',
Mi èto, dji voureû m'achîre
Èt n' nin bouter come lès mènîrs. »...

« Vî soçon, aus grandès-orâyes,
Stind t' bia mouson aus pîds d'one âye ! »...
Li bole di pwèls choûte li lèçon ;
Là, i s'èdâme come on tasson...

On r'naud, vikant au rastrindu,
Avou si stoumak cotwârdu,
Tchaît tot saisi pad'vant l' plat'néye ;
Èt sins paupyî vos l' aspaléye.

Po fé l' long cu èt n'nin bouter,
I vaut mia yèsse wôt astampé !


*ossî : branler. À one saqui d' pèsant à l'ovradje : « Ti n'osses wêre ; valèt ! Ti n' faîs rin ! » : « Tu ne remues guère, l'ami ! Tu ne fais rien.

Mauj'ni
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: dju 01 awo, 2019 19:15:09    Sudjet: Responde tot citant

Nwêr di gayète

Nwêr di gayète su l' nîve èdjaléye,
Clotchîs : sonoz one sitampéye,
L'Avièrje, assatchîye, clincîye si tièsse
Su s'-t-èfant, mièrnu, sins pont d' pèces.

Minme nin one chabraque po l' garanti
Do frwèd, l' gadelot stindu dins lès strins.
Dès twèles d'aragnes à dispaurpî
Pindenut do twèt qui toûne à rin.

I triyane su l'amindjî dès bièsses,
L'èfant qu'on-z-a lomé Jésus.
Li boû èt l' baudèt lî faîyenut fièsse,
Po l' richandi, sofèlenut d'ssus.

Dissus l' fayé twèt, tot laudje di nîve
One musique tchaît, èle djoûwe : Noyé !
One tchanson qui rapaujîye dès fîves ;
Lès bièrdjîs qui tchantenut : Noyé !

D'après Th. Gauthier

Mauj'ni
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: dju 01 awo, 2019 19:16:45    Sudjet: Responde tot citant

Tchaleûrs d'èsté

Quand pièdrè-dj' mès cougnadjes à bate di tch'vau,
Mès djèriadjes tchêyant al file sins pont d' mau ?...
Odé, sankènaîwe, tot souwant à gotes,
Li Bon Diu m'a tot r'prind, minme mès fligotes !

Va-dj' riskèpî bin rade, tot blanc come nîve,
Coukî mès mwins su m' vinte, li tièsse sins fîve,
Dwârmant stindu, astok d'one foume di pîre.
Tantia, si dj' vos l' raconte, c'èst nin po rîre,

Au nut, dins m' murwè, dji m' waîte tot mièrnu,
Ratindant one comére qu'a co bin v'lu.
Èt come djè l'zi fieûve dè timps di m' djon.nèsse,
Dji rabrèsse leûs lèpes : torlautes ou covrèsses !

Mauj'ni
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: dju 01 awo, 2019 19:17:10    Sudjet: Responde tot citant

Fème.

Pourè dj’ on djoû
Sauteler pa l’ bawète
Po r’tchair dins t’ payisadje
En ti stindant mès mwins ?
Et sayî , au solia,
Lès plaijîs qu’ ti m’ donerès ?

Pourè dj’ on djoû
Mète mès pids dins tès pissintes ?
Etindrè dj’ on djoû
Li tchanson qui t’ vwès voltî ?…

Dji passeros m’ vîye à t’ veûy voltî
Fème,
S’i n’ faleûve qui dj’ sème !
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: dju 01 awo, 2019 19:17:48    Sudjet: Responde tot citant

Fème (2)

Nos cwârps avîn' fwin
Onk di l’ôte.

Tinkis come dès cwades,
Nos cwârps sont-st-aclapés
Onk à l’ôte.

Pus taurd, si l’ timps lès discrwèj'léyes,
Si l’abitude nos sèpare onk di l’ôte,
Min.me s’i faut m’ piède sur one mwaije vôye,
Dji t’ sûrè dins tès novèlès chavéyes.

Èt, quand t’ènn'ârès dandji,
Dji sèrè pad’vant twè !...

Pa d’zos li stwèlî
Ralumé pas sès tchandèles,
Nos sclats d’ rîre
Riglatich'nut dins m’ tièsse.

Ti m’ min.nerès co
Dins tès chavéyes
Po t’ veûy volti !

Mauj'ni.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: dju 01 awo, 2019 19:18:29    Sudjet: Responde tot citant

Ni m' sicrît pus

Ni m' sicrît pus !
Dji braî mès-ouys tot foû.
Totes mès djoûrnéyes ont l' doû.
Mès bias-èstés sins twè,
C'èst dès nêts sins solia.
Dj'a rèssèré mès brès
To ratindant on mia :
Qui t ' bouche à l' uch di m' keûr
Po racoutî lès-eûres.
Ni m' sicrît pus !

Ni m' sicrît pus,
Po m'anoncî nosse mwârt
À nos qu'èstîn' si fwârt.
Ni d'mande qu'à Diu... qu'à twè,
Come dji t'vèyeûve voltî.
Tu n'ès nin là : dj'a swè
Do rascoûte tès-envîyes.
C'èst comprinde li stwèlî,
Sins soyu l' atraîtî.
Ni m' sicrît pus !

Ni m' sicrît pus !
Dji so tot dins lès peûs.
Mi tièsse èst dins l' nwêreû.
Èlle a aurdé t' doûce vwè,
Èt mès-orâyes chîltèt.
Ni m' mosture nin l' sourdan
Si dj'ènn'a po dès-ans...
Lès mots qui vos scrirîz :
Vosse portraît tot ratchî !
Ni m' sicrît pus

Ni m' sicrît pus !
Tès bias mots èvôyis :
(Wâs'ro dj' co bin lès lîre ?)
Tchèy'nut foû di t' gâsi,
Po lès sèmer su m' keûr.
Dji n' sâreû lès rovî :
(Was'ro dj' co bin lès lîre?)
I sont scrîs po todi.
I sont marqués dins m' keûr !
Ni m' sicrît pus !

Mauj'ni.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: dju 01 awo, 2019 19:19:15    Sudjet: Responde tot citant

Fème (3)

Djë vouro cor-on côp,
On dairén côp,
Quë të m' bèrcîyeros,
Më pinde à tès brès,
Doner on bètch së tès-oûy,
Rabrèssi tès lèpes...

Më dire quë c'èst kine.

Djë vouro cor-on côp,
On dairén côp...

Rëdëv'në l'èfant quë s' rapaujîye.

Djë m'arè bèrci avou dès-ëdéyes :
Lë diâle, lë fème, l'ome,
Së r'trov'ront todë,
Achites a l' min.me tauve...

Pa d'zos l' min.me poumi !

Mauj'ni
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: dju 01 awo, 2019 19:19:46    Sudjet: Responde tot citant

Fème (4)

Rësère lès volèts,
Në rovîye ni lès vèras,
Lë clëtchète.

Lai l' nwêreû
Pèser së l' maujone
Mète dèl wate së lès mërâyes.

Dj'alëm'rè one tchandèle,
po qu'on veûy vëker
Nos bëdons.

Lais monter l' paujêr'té
Jësqu'à l' apaujemint.
Lais l' prandjêre
Nos rascouvrë,
Come lë novèle nape
Qu'on-èdaume po l' fièsse.

Vûde-nos on vêre dë vén,
Ë r'lûrè së l' tauve,
Dins lès ptëtès flames
Quë frëm'jîyenèt...

Po lès pièrdës qu' n'èstans.

Mauj'ni
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: dju 01 awo, 2019 19:20:15    Sudjet: Responde tot citant

Ome

Rawaite bin dins l' vî murwè,
Qu'est là, pindu, su li tch'minéye.
Rapinse aus djous qui t'as yu swè,
Rapinse à tès djon.nès-anéyes.
Èt, si l'umaudje n'est pus si bèle,
Sondje au timps qu'il a falu,
Su l' vôye qui min.ne aus stèles,
Po bin comprinde ci qu' t'ès div'nu !
Rawaite au d'là dèl vi murwè.
Si ti n' vwès rin, mèts tès lunètes ;
Si ti n' riconès pus t' binète,
C'èst qu’ ti n'ès pus l'ome qui t' vwès !
C'èst qu’ ti n'ès ni l'ome qui t' crwès !
Mauj'ni
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: dju 01 awo, 2019 19:20:44    Sudjet: Responde tot citant

Fème (5)

Lès fouyas tron.nîn' padri l’ bîje.
Coukîye divant on bon fè d’ cwasses.
Dji t’as sèré di totes mès fwaces.
Ti n’aveûs qu’one pitite tchimîje.

Dj’a d’né on bètch su tès p’tits pîds.
Tès lèpes au laudje, dj’a sti binauje.
Quand t’as frum’jî, dj’èsteû à m’-y-auje.
Dj’a d’né on bètch su tès p’tits pîds.

Mièrnoûwe, t’as disnukî tès trèsses
Qui t’as stindu su l’ pia d’ bèdot.
Dj’a passé m’ mwin tot l’ long di t’ dos
En ratindant qui ti m’ rabrèsse.

Dj’a d’né on bètch su tès p’tits-ouys,
I s’ont r’ssèré pad’zos mès lèpes.
Èl savîn'e-t-i qu’ c’èsteût-on cèp’ ?
Dja d’né on bètch su tès p’tits-ouys.

T’areûs seûr co bin volu rîre...
One gote a couru su t’ massale,
Èlle a taûrdji dins-r-one fossale
Divant di s’piède dins-r-on sorîre.

Ti n’aveûs qu’one pitite tchimîje.
Coukîye divant on bon fè d’ cwasses,
Dji t’a sèré di totes mès fwaces.
Lès fouyas tron.nîn' padri l’ bîje.

Mauj'ni
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: dju 01 awo, 2019 19:21:11    Sudjet: Responde tot citant

Dji m' bat'rè

Dji m' bat'rè avou lès strwèts d'idéye,
Qui r'fus'nut todi d' chouter lès djins.
On dirè d' mi : « T'ès dèl boune anéye ? »...
Dji m' tinrè aux lèçons d' mès parints.

Dj'irè al traque aus bièsses di grègne
Qui profit'nut su l' dos dès djins.
Èt si on djoû, i faut qu'on m' sègne,
Ça sèrè po l' bin d' mès parints.
Mauj'ni

Dji sèrè d’à vos

Dji sèrè da vos, sins fin,
Jusqu'au d' bout d' mès sondjes :
Paurtadjant nosse fwin
D' frum'jons trop coûts.

Dji sèrè da vos, sins fin,
Jusqu'au d' bout d' nosse tchin.ne.
Dji sèrè vosse frum'jon.
Vos sèroz m'-y-alin.ne.

Mauj'ni
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: dju 01 awo, 2019 19:21:43    Sudjet: Responde tot citant

Dji sèreû on mouchon,

Dji sèreû on mouchon,
Dji grip’reu aus nûléyes
Sicroter dès dj’oûs d’ bon
Po s’ laudje nîtéye.

Dji sèreû one sauvèrdia
Aus plumes d’èsté,
Dj’ireû qwaîre li solia
Po nos l’ mète su l’ costé.

Dji sèreû on tirliri
Potchant d’one coche à l’ôte
Dj’agrip’reû m’ nid
A vosse finièsse, sins onte.

Mins dji n’ so qu’on mwaîs scrîjeû,
Qu’a dès vîs sondjes plin s’ tièsse,
Qui voureût co fé fièsse,
Èt qui n’ sét catchî sès peûs.
Mauj'ni
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon Totes les eures sont a GMT + 2 eures
Potchî al pådje Di dvant  1, 2, 3, 4  Shuvant
Pådje 3 so 4

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci



[ Di dvant | Shuvant | A l' astcheyance | Djivêye ]

Cisse pådje est mimbe di l' anea RingSurf des waibes e walon.

[ Passer 1 waibe en erî | Passer houte do shuvant | Les 5 shuvants ]


Powered by phpBB © 2001 phpBB Group