Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Goffart Jean Les tchafiaedjes do ptit Louwis

 
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: sem 10 awo, 2019 20:23:41    Sudjet: Goffart Jean Les tchafiaedjes do ptit Louwis Responde tot citant

l° 51

Djan-Mi ès’ djoke

Ene grande (èyèt bèle) pâdje di l’istwêre du spôrt dins no payîs vént d’ès’ toûrner. Djan-Michèl Saive a dècidè di djoker ès’ cârîyère di djouweu d’ping-pong. Es’ dérène pârtîye, c’èsteut èl 9 di mé conte l’Istwèle Basse-Sambe à Auderghem.

I faleut bén qu’çoulà arive in djoû. Bran.mint di boutâdje à l’Fèdèrâcîyon èyèt au Comitè Olympique èt Intèrfèdérâl, mins surtout ène cwachûre à s’pîd i gn-a saquantès samwênes ont fét qu’i finiche pa s’dècider.
El pus grand dès pondjisses bèlje di l’istwêre a in gros palmarès. On pout dîre qu’il a mârquè l’istwêre du ping-pong durant quasimint 35 ans.
El pètit Djan-Mi a v’nu au monde èl 17 di novimbe 1969 à Lîdje. A pwêne aveut-i 13 ans qu’i discrotcheut s’preumîyère vènûwe en-èquipe nacîyonâle sèniôr. Et rad’mint,en 1985, i s’instaleut au d’zeûs du tènis di tâbe nacîyonâl en d’vènant tchampîyon à 15 ans. Dins l’fouléye di çoulà, il a rad’mint apougnî l’place di preumî bèlje à Rémo De Prophetis.
C’èst l’cominch’lint d’ène bén fameûse cârîyère qu’a durè sins s’djoker durant 30 ans. Il a finit pa piède ès’ place en 2015 avou l’djon.ne Cédric Nuytinck., qu’aveut 20 ans di mwins qui lî. Durant s’timps-là, Djan-Mi a yeû 25 tites di tchampîyon nacîyonâl. Saquantès-anéyes, i l’a pièrdu à cause d’ès’ frére Filipe qui djouweut bén, mins qu’a d’meuré dins l’ombe du pus vî d’èl famîye.
Il-èst malaujî di mète rocî toutes lès rècompenses, mins saquantes mèrit’nut d’yèsse donéyes. Spôrtif di l’anéye, èl mérite spôrtif, vice tchampîyon d’Europe, preumîyère place mondiâle durant 515 djoûs, vice tchampîyon du monde, répôrte èl top 12 europèyin, coupe d’Europe des clubs tchampîyons, mèdâye di bronze au tchampîyonat du monde à Chiba èyèt co d’s-autès mèdâyes di bronze èt d’ârdjint.

Djan-Mi a fét lès bias djoûs di La Vilète Châlèrwè durant 22 ans avou 22 tites di tchampîyon di Bèljique en tchampîyonat, 20 coupes di no paîys, 7 ligues di tchampîyons èt d’Europe des clubs èyèt in tite di tchampîyon du monde.

Adon qui La Vilète avou dès trèyîns di liârds, l’ome è-st-èvôye à Auderghem.
Il èst d’vènu Présidint dès spôrtifs au Comitè Intèrfédèrâl (COIB) èyèt ètou Présidint d’èl Comissîyon pou lès spôrtifs dès comitès olympiques.

En 2014, il èsteut lomè pou l’dijième côps « spôrtif di l’anéye ». Il èst conu come èstant ène saquî qui wèt voltî èl spôrtivitè èyèt a d’ayeûrs èr’çu ètou l’diplôme du comitè intèrnacîyonâl du fèr-plé.
On pout dîre qu’i wèyeut voltî s’amuser en djouwant. Il a ètou pârticipè à in spèctaque « Show ping » avou lès fréres Taloche, ès’ frére Filipe èyèt l’umorisse Pierre Theunis.
Il a pârticipè à 7 Djeus Olympiques puce qu’èl ping pong a rintrè oficièl’mint en 1988 à Séoul. Eyèt dispus, i lès-aveut fét tèrtous. C’èst d’ayeûrs ès’ méreseû èrgrèt, c’èst qu’i n’a jamés rèpôrtè ène mèdâye aus Djès.
Il a anoncè s’èrtrète intèrnacîyonâle à l’âdje di 46 ans, mins tèneut co à djouwer saquantès-anéyes. Au momint di mète sès palètes dins l’ârmwêre, c’è-st-ène grande pâdje di l’istwêre bèlje èyèt féte pa in walon qui vént d’ès’ toûrner.

e rfondou dins l' Rantoele 90 (esté 2019)
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 2693
Eplaeçmint: Sidi Smayil, Marok

PostDate: sem 10 awo, 2019 20:27:46    Sudjet: Responde tot citant

l° 52

El toûr di France 2019

- Dji n’sé pouqwè, mins dji m’atindeu à z-awè in toûr di France ène mîyète èspéciâl ès’ n-anéye-cî ! Et bén, dj’é stî chèrvu !


El 106 ième toûr di France s’è daleut di Brucsèles. C’èsteut 176 coureûs avou 22 èquipes qui pèrdît l’vôye di Paris en 21 ètapes èyèt su 3480 kulomètes. T’t-au long du tch’mwin, on p’leut compter dissus 10 à 12 mîyons di spèctateûs pou z-ècourâdjî lès coureûs à vélo.

Dji pou min.me vos dîre qu’is-ont travièrsi 744 comunes èyèt montè 30 cols dins lès-Alpes, Vosges èt Pyrénéyes. Etou qu’èl twèt du toûr, c’èsteut l’Iseran avou sès 2770 mètes di wauteû. Tout çoulà pou vos fé comprinde qu’èl mèstî di coureû à vélo n’èst nén toudis aujîye.

El preumî mayot à pwès du toûr èsteut bèlje avou Greg Van Avermaet, no tchampîyon Olympique à Rio. Il èst passè preumî au … meûr di Gramont. Après lî, c’èst Tim Wellens qui l’a yeû. Quant au djône mayot, il a d’meurè lontimps (quatôze djoûs) dissus lès spales da Alaphilipe qu’è-st-èn-équipier da no coureû walon Filipe Gilbert, maleûreûs’mint nén r’tènu dins l’èquipe du toûr 2019.

Eyèt à propos di djône mayot, gn-aveut djusse cint-ans qu’i fèyeut pârtîye du toûr : c’è-st-en 1919 qu’Eujène Christofe l’a pôrtè pou l’preumî côp.

Pou nos-autes, c’èsteut èn-aute anivèrsére : èl preumîère victwêre da no n-Edy Merckx en 1969. Il l’a co gâgnî en 70, 71, 72 èyèt 74 èyèt c’èst lî qu’a wârdè l’djône mayot dissus sès spales èl pus longtimps : 111 djoûs !

Pou lès bèljes, en 2019, gn-a yeû trwès victwêres : Dylan Teuns au d’z-eûs d’èl Plantche dès bèlès fîyes, Thomas De Gendt tout seû à Sint-Etiène èyèt Wout Van Aert au sprint. Lî, il a d’vu abandoner dins l’conte la monte à Pau : il a acrotchî ène band’role.

I gn-a yeû n’mîyète di tout dissus l’toûr 2019. Lès-organisateûs ont min.me d’vu fé djoquer ène ètape tèl.mint i tchèyeut dès grèlons èyèt gn-aveut min.me yeû in gliss’mint d’tèrèn èt pus rén n’saveut passer pou daler viès l’arivéye du djoû.

El gâgnant du toûr 2019, c’è-st-in djon.ne colombien, Egan Bernal. Mins i faut r’conèche qu’èl vèye, on n’saveut nén co qui daleut rèpôrter l’djône mayot tèl.mint gn-a yeû du suspense. Pour mi, èl toûr s’a vrémint djouwè dins l’grande ètape di montagne avou l’Vars, l’Izoard èyèt l’Galibier. C’èst rolà qui Bernal s’a rèprochî d’Alanphilipe èyèt ètou qui Romain Bardet a apougnî l’mayot à pwès adon qu’èl victwêre d’ètape èsteut pou Nairo quintana.

Geraint Thomas, l’èquipier da Bernal,a fini deuzième.

El preumî bèlje, c’èst Xandro Meurisse qui finit 21 ième à quasimint ène eûre du preumî..

e rfondou dins l' Rantoele 91, erî-tins 2019
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon Totes les eures sont a GMT + 2 eures
Pådje 1 so 1

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci



[ Di dvant | Shuvant | A l' astcheyance | Djivêye ]

Cisse pådje est mimbe di l' anea RingSurf des waibes e walon.

[ Passer 1 waibe en erî | Passer houte do shuvant | Les 5 shuvants ]


Powered by phpBB © 2001 phpBB Group