Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Châles Delaite

 
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: lon 02 set, 2019 12:42:03    Sudjet: Châles Delaite Responde tot citant

Châle Dèléte; Charles Delaite

C' esteut aprume on pondeu.

Mins i s' a eto foirt interessé å walon.

Tot efant, il aléve avou s' pa, Ernest Delaite, et Djan Haust mon les djins di Rdû [Ne11] et d' Transene [Ne12'] po rimpli les kesses di l' inkete po l' ALW.

Cwand dj' a-st adjinçné li raploû po mete so pî li soce des rcåzeus del Basse Årdene (1995), il î esteut. Did la, dj' a stî sovint dé lu po prinde les mots k' il aveut ramexhné pol Rasgoutadje des Bassårdinreces (S117).

Il aveut bråmint des scrijhaedjes e walon, mins cwand il a morou, dj' a raté s' feme di 10 munutes: ele vineut d' baguer et epoirter / distrure tot ses papîs.

Vola kékes pitits tecses k' i racontéve, et k' on parexhou dins "li ptite gazete des Bassårdinreces" (et onk u deus dins Singuliers). Dj' è rmete onk dins l' Rantoele 91.
_________________
Li ci ki n' a k' on toû n' vike k' on djoû.


Candjî pol dierin côp pa lucyin, li lon 02 set, 2019 12:46:46; candjî 2 feyes
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: lon 02 set, 2019 12:43:09    Sudjet: Responde tot citant

Les spoûles da Châles du mon Yopôl.

In mon-parant

Gn avot l' vî Tatâ k' avot pris in lîve k' avot passé ene pate èt la tîesse dins la bricole. Et i dusmantche la bricole du sto, pî i l' ramonne sins l' dustraper a l' tunant pal dubout du fil. I l' lèyot trinner su les cate pates.
I rasconture lu Camile du Boutchî.
Al place du dire bièsmint « bondjoû » come asteure, c' astot l' aladje [la coutume] dinltins du dire ene pitite frâze du circonstance. Ça fwêt k' i lî dit :
" C' est des mon-parant, da ça, èt ki n' su monnèt nin åjîmint, savèz !"

Pî, i rmousse a sa måjon; et mète lu lîve su la tåle pou l' dustraper. Mês vou l' la k' i l' låtche et l' lîve chipe vôye pal cârô dul vite k' astot spiyé.

Et l' vî Tatâ, filozoficmint :
"O, ça n' fwêt rin ! On s' ruwêrè, va, mon-parant !".

Châles Deléte, 1996
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: lon 02 set, 2019 12:43:32    Sudjet: Responde tot citant

Châle Dèléte

Colâ Burdache èt l' singlé.

In djoû, dju wè lu grand Colâ Burdache rèchu du bwès. C' astot èn ome avu in fin bounètré [allongé] vizadje et des brès come des bringounês d' voleur (des brès ki pindint djusk' ås dgnos)
- Û k' t' es co sté. don Colâ ? Bracner chûrmint ?
- O nèni, m' fi. Dju su toudi du costé dul lwa, séss, mi.
- Ebin, cweski t' fwès la dabôr ?
- Dj' ê sté pourmonner èt dju nn ê oyu ene fâmeuse. Dj' ê tumé båbe a båbe avu ene herdulêye du singlers ! I gn è-n avot ene çantinne, al bone.
- Têss tu, va ! Tu m' è contes ene, du flåwe !
- Dju t' di k' i gn avot bin 80.
- Hôw ! Rastrind, don !
- Toudi bin 60 !
- Ayi, ça va, hin !
- Siyè, å mwins 40.
- Tu n' mu frès nin cwâre ça chûrmint ! Ene carantinne ?
- Pou dire lu vrêy ûsk' il est, i gn, è-n avot 20.
- In côp pou tout, di-m' la vèrité.
Et, tout lèvant ses deus brès pus d' in mète hôt, i m' ruspond.
- Ây, dju t’ va dire lu vrêy. I gngn avot k' ink, mês c' astot in tèribe !
Pu, in pô jinné, vou l' la rvôye a-z ascôjant les fetchîres a grandes hazêyes.

Châles Dèlète, mars 1996.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: lon 02 set, 2019 12:44:23    Sudjet: Responde tot citant

Co yène

C’ es-st ene pitite gamine k’ è sté ou boutike avu sa mère. Et la boutikîre lî dène ene bouboune.
- Kesk’ on dit asteure ? di-st ele la mére
- Co yene, man !

(Châle Dèléte)
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: lon 02 set, 2019 12:45:48    Sudjet: Responde tot citant

Les bracnîs

1. Lu Burnet

Après la guére du 14, i gn-è brâmint des djonnes du c’ payis-ci ki nn ont nnalé su Paris, poul rubâtichadje dul France. Ciddé à Rdû, gn-è oyu les Lambert, gn-è oyu in pö d’ toutes les sörtes. Et pîs ç’ cöp-là, à Davdisse, i gn-avot yink k’on loumot l’ Burnet. Ç’astot Constant k’on l’ loumot. Naturelmint, cand lu rbâtichadje è yu sté fwêt, bin, il è ruvnu, més après 20 ans, 22 ans, 23 ans, moutö. Més, duvant d’ènnaler, ç’astot djà in bracnî, hin. I mètot des bricoles ås lîves. Et i ramassot les lîves; èt naturelmint, i les fricassot, hin. Et cand il è ruvnu d’ Paris, i dit: « dju m’ va rfé in toûr ou bwès, disst-i. Et il arive dins l’ bwès d’ Djimbe, èt i gn-avot in grand clériss, k’i nous racontot, hin « èt i gn-avot in lîve, oh, il avot bin in mète du wöt, disst-i. Et i gn-avot toute ène ribambèlrîye du ptits lîves k’astint assîs tout åtoûr, disst-i, ki l’ choûtint. Et vous n’ savèz nin ç’ k’i djot? - Les amis i fåt bin wêter à vous, pasku l’ Burnet è ruvnu, disst-i »


2. Lu vî crolé d’ Viance èt les djonnes


Z-öz ddjà moutö oyu cåzer du vî crolé d’ Viance, dins l’ tins? I mètot brâmint des bricoles ås lîves, hin. Et les djonnes l’avint sî in cöp pou vèy ûsk’i mètot les bricoles. Et il avint pris ène cizète, èt åtoû des bricoles, i cöpint les iêbes, pou fé cwâre ku l’ lîve avot passé, k’il avot mougné les iêbes més k’i n’avot nin passé dins la bricole. Et i wêtot ça, don, li. « ah bin là yåk, là! » Et i rwête comifåt. «ây, hê, valèt, Bon Diu!, més les lîves n’ont pont d’ cizète, séss, disst-i ».
Il avot bin veû k’ ça avot sté cöpé al cizète!

3. Lu vî crolé d’ Viance ou tribunâl

I gn-avot l’ gârde Vilé d’ Transine ki lî tume sul dos k’il astot ki duscrotchot in lîve a ène bricole. Crak, hin! Procès! Evöye ou tribunâl! Il arive ou tribunâl, il avot djà d’ pus d’ 70 ans. Et l’ juje lî dit: « Vous öz bracné?. - Bin ây, ây! - V’ l’avouwèz? - Bin, ma fwè, disst-i, pou ku l’ gârde m’è pris, disst-i, èt il est assermanté, disst-i... dju n’ såro dîre k’ây, don, disst-i. - choûtèz bin, disst-i l’ juje, vous öz d’ pus d’ 70 ans; dju va v’ grâcier, disst-i, à cåze du vost âdje, disst-i, més v’ m’alèz djèrer, pou ça, ku v’ n’î rîrez pus jamés pus. - Dju vous l’ djère, da, mossieû l’ juje, jamés pus dj’ n’î rîré pus. »
Et il avance dé l’ bûrô du juje, èt i s’ pantche à s’n orèye: « Lu prochin ku dj’ prêré, ça srè co pour vous, da, disst-i! »

Châles Dèléte, a walon du Rdû
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon Totes les eures sont a GMT + 2 eures
Pådje 1 so 1

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci


Powered by phpBB © 2001 phpBB Group