Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Louis Baidjot

 
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 13 dec, 2019 20:59:04    Sudjet: Louis Baidjot Responde tot citant

In mwès d’aousse 1914

Vla 82 ans, ou mwès d’aousse, nosse putit payis, dèrmint cheu (durement secoué) pa l’invasion ki s’abatot sur loû, su rassan.not dri lu Rwa Albèrt dins èn èlan patriotike k’è fwêt l’admirâcion du monde. In ptit payis, soûdé p’ou maleûr, su drèssot d’in bloc, pou rèsister a in jéyant .
1935
Kékes anéyes pus tård, èn ôte mwès d’aousse nous anlvot la Rin.ne Astrid èt adon, lès afants k’dj’astins russintint dja la pon.ne (peine)du tout in peûpe pou ène famiye dins la dèvin.ne èt coume les ptits princes, dju nous sintins tourtous in pö orfelin.
1993
Co pu près, la mwârt du Rwa Baudouin, a l’intréye du mwès d’aousse è moustré ôs politikîs pus près d’leu margayes du bièsses ku dès afwêres des djins, k’in peûpe put su rtouver uni et afitchî des santimants souvint pus alvés ku les cîs k’on wèt tous les djous dins les gazètes.
1996
Ku dire d’aousse 1996 ? A Bèrtrès, après l’angouche (angoisse) pou Laetitia èt l’dimadje du dèlire cand ill’ è rintré, ène orêur kékes djous pus tård cand on-z è sû kwè pou Julie et Mèlissa.
Èt anute, 22 d’aousse, dins tout in payis ki brêt (pleure), les pus dèrs (les plus insensibles) nu rèsistat nin dvant les deus ptits vachês (cercueils). Des larmes sincéres, ène pon.ne malåjîmint cont’nue (une peine difficilement supportable), ês ossi, a costé d’in dègout sins nom pour les tuweus èt les violeus d’afants, in côp d’sumonce pou la Justice èt nös r’prèsantants, pus sougneus d’leu place èt d’leu trêtmant ku dul vîe du nös afants !
Sins sawè si gn’è co rin d’ôte ….

Louwis BEDJOT.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 14 dja, 2022 18:44:33    Sudjet: Responde tot citant

Cand la tère su raveye !

On vint d’ viker et d’ subi dpwis ène pwêre du mwès dins ène boune partie du l’Europe, surtout pou les cîs ki voyadjat bramint, les consèkances du ravikadje (réveil) d’in volcan ku mwintes et mwintes djans nu counichint wêre.

Si su ctwârdu (tordu) nom n’est nin a-z articuler avu nosse boutche du walon, l’ Islande, ki l’ rascwèd (recueille) dins ses montagnes du nîve et d’glaces, est, lîe, in pô pu counuwe, pisk’ile fwêt partie du l’Europe du costé géografike, mês nin co doul C .E. E. sul plan èconomike. Ses bankes nous ont cand minme ont fwêt frûler(trembler), tins d’ l’ hiviêr.

Sa posicion, atère l’ Groenland et l’Ecosse, est idèyale pou nous choufler dzeus l’crâne toutes les çades (cendres) et les fumîres ku ses volcans nous rcratchat (recrachent). Ça fwêt des smwinnes ku l’Eyjafjallajokull nous arouze et kul nuwadje du çades apêtche les avions du voler. Avu des vacancîs stramlés (disséminés) in pô partout dins tous les aéropôrts.

An plinnes vacances du Pâques ! I n’ fåt ni dmander la pagaye ku ça è foutu dins les scoles et le bûrôs. Et les sous ku ça è cousté !

Cand l’ houme årè (aura)anfin compris k’i n’ est k’ in minus(tout petit) su la tère et ku ça n’ lî siêve à rin du s’ dévérouyî (se démener) coume in djâle pou sayî du dominer nosse terre ; adon putète, il lî fårè bin admète sa toute putite posicion et sa fèblesse duvant lu Créateur, Loû k’ è souverin et mwêsse du ttafwêt.

En ôte dèsasse è toutchî la tère lu 12 du djanvî 2010. Vous v’raplèz, lu tramblemant du terre an Haïti. Là, c’est la vie du 300.000 djins (500.000, dit-on asteure su place) k’ont disparu doul vile du Port-au-Prince, raclos duzous leus mwêjons.(engloutis sous leurs maisons) Tous les kwârtîs(quartiers) pôves du dzous dul vile ont sté tout saccadjîs. Lu sort è volu ku l’ malheur s’abaje(s’abatte)sur zés, alors ku les kårtis des dzeus dul vile astint bêcôp pus spårgnîs (épargnés) (les kwårtîs des ritches). Cè k’ il a dvint asteûre, c’est k’ les ritches continuwat à bin viker coume duvant, à caressant les Rikins dins l’ sans du poy (dans le sens du poil), sul timp k’les pôves du dzous dmèrat avu leus miséres, leur ruines et leus mwârts.

Et mågré toute leu pônne (peine), fåt vèy avu ké ardeur et ké volonté lu clergé les-î rmonte lu moral et les incite à s’ mète à l’ovradje pour rbåti leu payis. Et avu ké confiance, ils acceptat leu misère passèye. Lèchîs à zès-minme, coume abandounés, c’est dins leu fwa k’is poûjat leu fwâce et c’est su leus convictions k’ i s’aspoyat pouz aler du l’ avant, mågré tout. Et avu ké couradje ! Et à tchantant coume des vrês Crèyoles.

Lu réjime du dvant l’ sèyisme n’ è nin tchandjî. Lu payis n’ è nin pus chûr ku dvant et les cîs li sont al tiêsse nu dmandat nin k’ ça tchandje, tant k’ ça va coume ça pour zès ! Sins su souciyî des pôves ! Du ça, les gazètes n’ cåzat rin !

Et nouzôtes, la-ddins ! Pou kî sans-dje ?(pour qui sommes-nous ?) A nouzôtes, dul prouver !
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 14 dja, 2022 18:45:02    Sudjet: Responde tot citant

( I n’ fåt surtout nin awè la tiêsse avå les vôyes, ca c’est in pô tiré p’ås tchfès.)

AWÈ et YÈSSE


Lon des vîs lîves du grammère,
Choûtèz coumint, ène bèle chîje,
Ma mére m’ è fwêt vèy les mistéres
Des verbes yèsse et awè, sins tchmîje.

Dins les mèyeus êdants, tins k’ à fwêre
Gn’ è deus verbes plins d’ artifices ;
Awè et yèsse astint deus fréres
Ku dj’ ê counu djà ou bîrce.

Bin k’nin parèys du caractêre,
On les plot crware jumeaux,
Tant leus istwâre est singuliére
Mês ces deus fréres astint rivaux.

Cè k’ awè årot volu yèsse,
Yèsse vlot toudi l’ awè
A n’nin vlu ni Dieu ni mwêsse
Lu verbe yèsse s’è don fwêt awé.

Su frére awè courot les bankes
A z’ î fjant grand numèro.
Adon k’ èsse, toudi an manke
Soufrot bramint dudins s’paletot.

Tins k’ yèsse apurdot à lire
Et fjot ses umanités,
Du s’ costé, rin à li dire
Awè apurdot à compter.

Awè amassot des fortunes
An biens ossi bin k’ an biyèts
Tins k’yèsse, k’ astot dins la lune,
Su fjot t’tafwêt ratibwasè

Awè nu savot fwêre ku s’ ètaler
Cant i li arivot du s’ moustrer jènèreu.
Yèsse, an rvantche, on l’ pu constater
Ere bin souvint pus grandiveu.

Awè voyadje an classe afwêres,
A mètant tous ses tites à kwète.
Adon k’ yèsse su lêchot si bin fwêre,
Ku ç’ k’il avot, filot à dåripète.

Ritchesse d’ awè n’est nin la sène,
C’est tous cayets dl’ esprit.
Lu verbe yèsse est tout dins la jin.ne.
Ca d’ sa noblesse, c’est l’ prix à payî.

In djoû, à fwace du biestriyes
Pou z’ariver à s’mète d’acôrd
Atère les verbes, fåt nin su striyî.
Mî våt s’atinde et fwêre l’èfôrt.

Et pou n’pus wårder leus misbrouyes
Ou mitan d’tous les mots rassan.nés,
Is s’ont pårti zès deus la bzougne
Pou n’nin anfin dmèrer brouyès.

Lu verbe awè est dandjî d’yèsse
Pasku yèsse, c’est ègzister.
Tandis ku yèsse è bezwin d’awè
Pouz aritchi ses bons costés.

Et après tant d’margayes à n’ a pus fini
Et d’ bièstrîes k’on s’ruprotche toudi
Nôs deus fréres, c’est ma mére ki l’ dit
Ont poulu yèsse et awè stî.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 14 dja, 2022 18:45:29    Sudjet: Responde tot citant

DU L’ NÎVE AL POTASSE .

(pa in martchand d’ angrais.)


Dju nous a souvêrans, du l’hiviêr 2010. C’est dmwin Noyé et vla in gros mwès k’ onz est al nîve, et nin in pô. La spècheur su les hyôts avèjine lu mète, dins nos viadjes doul basse Ardène, on put compter 80 cms bins fwêts. Gn’è des anéyes k’ on n’ avot pus vû ça, et surtout si hyeur (tôt).

I fåt minme aspêtchî les camions d’ rouler su les grandes voyes pou èviter k’is n’ su mètinjent du traviêrs et paralizer la circulacion. C’est nin ça ki fwêt l’afwêre des tchåfeus.

Nin contints d’ ça, c’est l’ sé (sel) ki vint à manker ; onz è cminci pa vinde lu sé agricole, pîs le sé d’ cwizine et l’ gros sé pou les saler les couchèts et i n’ dumeure pus asteure ku dul kaïnite, in sel du potasse ku les cinsîs ont samé des anéyes au lon, ca on n’ avot k’ ça et du basique. Dju cåze jusk’ås anéyes 1950-60 duvant d’awè les angrês complets.

Dju vins d’awè ène pratike pou du sé et dju n’ê sû lî mète ku dul kaïnite. Mu brave chaland, ki va pourtant souvint an Alsace, est sté tout sbaré ku dju lî aprinje ku la kaïnite ku dj’ ê counu vunot adon d’Alsace. I n’avot jamwês atindu cåzer d’ ça.

Et dju lî don apris ku la potasse, àl mwâte sêzon, vunot d’Alsace, pa trins complets, ki passint la frontiére à Ecouviez – Lamorteau, pouz’ èsse, dud’ là, rèpartis , par rames du 60 tonnes (3 wagons du 20 tonnes) dins l’ansambe des provinces du Namur et Luxambourg, k’astint trop lon d’Anvers.

On rçiot dul kaïnite à 11% du K²O (oxyde de potassium), des « sels du potasse » ki fjint 20% et du « chlorure de potasse » ki fjot 40%.

Ces angrais-là, adon, nous fjint vèy bin du timp. I nous arivint dins des wagons raclos, « fermés » coume on djot, et i falot, à l’ sucoube, pèlter tout çà pa l’uche du wagon, dins l’ bègnon, pîs après dins les camions, pou les ramonner dins nôs magasins.

In côp baculés àl tère, i falot les rtaper in deujime côp pour à faire des tas du 3-4 bons mètes du hiôt, su 10/12 mètes do long et 4 mètes du lådje. Onz î parvunot à les rtapant à deus côps. La potasse nous avot djà passé 3 û 4 côps dins les mwins.

Et les tas dmèrint là des mwès duvant d’ les samer.

Et c’est cidlé, ku la potasse, ki n’est en some ku du sé, pûrdot l’humidité dl’ êr et duvnot dère coume du bèton.
Cand la sêzon des samadjes arivot, i falot r’prinde tous les tas à l’ pioche, pou polu les pèser et les assatchî. Adon, tout s’fujot co al mwin, à pårtu des satchs.
Peser et assatchî astint les catrime et cinkime côps k’on pougnot dins l’angrês.

Chance k’onz’ére djonne !
* * * * *

A cåzant, dju n’åros pu sû dire dins ké costé du l’Alsace su trouvint les mines.

Lu timps d’ voler su « Google » et on plot rusponde à ttafwêt.

La produccion dul potasse d’Alsace rumonte à 1910, après awè sté duscovrue pa des oumes et ène fame : « Amélie Zûrcher » à 625 mètes du fond et su ène surface du pus du 200 km², å Nord du Mulhouse.

Jusk’an 1947, toute la bzougne s’è fwêt bramint al mwin : des oumes et des tchfås. Après la guêre du 40, les grosses machines ont pris lu rlês (relais).

Dins les deus mines co dovrues, on tire 45.000 Tonnes du sylvinite (sels bruts de potasse) par djoû. An 1987, pou l’anéye, ça fjot 10.900.000 Tonnes.

Asteure, c’est des rogneuses ki grètat l’ min’rê, ki, su des såtrèles, voyadje des kilomètes, pouz ariver jusk’ ou pwisse (puits) ki l’rumonte al surface.

A pårtu d’ là, les sés d’potasse, à pårt la kaïnite, ki n’est ku broyîe à gurzês d’in mm. û deus, sont trêtés pou satchî fû les nichtés et l’sé k’ est d’trop, et ariver insi à z-à fwêre des angrais ki dôzat d’pus (40, 50 et minme 60 % du K²O).

Pou les cultures pus délicats ki n’ supwârtat nin l’ chlore, coumes les lègumes, les canadas, lu houblon, lu toubac, on tchandje les chlorures an sulfates. C’est les engrais les pus rafinés et les pus ritches an potasse.

La potasse dumeure toudi yink des èlèmants indipansabes àl créchin.ne des plantes.
* * * * * *
Dj’ a n’an dit assez pou anute. Vla co k’i rnîve !

Louis Baijot 23/12/2010.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 14 dja, 2022 18:45:59    Sudjet: Responde tot citant

Dins les vîs papîs ku l’Gaston Lucy m’è lêchî, dju vins du rmète la mwin sur in petit calpin twalé qui contint du ses scrîjadjes, cand il ére ou Congo duvant 1930. Lu calpin, sucrit a françès, ca i n’ sucrîjot nin co a walon, et k’è l’êr du s’intèresser å mouches à miel. Pou ène mèyeuse lecture, dju dirans seulemint « mouches », coume lu Gaston djot toudis.

Dju sondje ku des scrîjadjes parèys mèritat d’èsse rutapés et insi du n’nin tumer dins ène brocante û l’ôte.

La mouche à miel û à låme du Congo.

La mouche du Congo Belge est ène djåne mouche. On crwârot qu’il vint du l’italiène, mês on pôrot ossi l’aparinter al palestiniène, al syriène, etc.
Mês, d’après cè k’ dj’ ê vu, dju sondje ku, pouz awè la minme rôbe ku ces dêrines, on put dire ku c’est ène race à pårt.
Nosse mouche è la minme taye ku les sôrtes ku dju vnans d’ cåzer. Ile è trwâs djånes anês et an surplus, in nwâr k’est pus lådje.
Ile est fwârt såvadje, seules kékes sayes pou la domestiker, ont rèyussi, mês avu bramint des rûses.
Dins l’Kasaï, sa tchètoure est à 15-16 mètes de hyôt, dis des cråyes d’åbes trop gros pou les grimpeus noirs î polu monter. Mês, à loyant des chåles du lianes conte la tronce, i plat ariver ou trô d’ vol.

BUTIN.

Nosse mouche rakwèt du miel, du pollen, dul farine du manioc, du sé, du l’êwe et dul rouzée.
Ile garnit ses rayons avu assez bin d’êwe, surtout al sêzon sètche, mês l’ pus souvint, c’est dul rouzée. Ile ramasse dupus d’ farine du manioc ku d’ pollen ; ile a fwêt l’ minme usadje. Ile la trouve dins les les troncs d’ åbes ki siêrvat ås négrèsses à piler les rcinéyes du manioc.
Dins l’ Kasaï, dju n’n ê jamwês vu ène seule avu du pollen, coume dj’ a-n ê vu rarmint avu du miel kwèdu s’ les buchons.
Iles font ène consomacion tèribe du sé. Ile lu trouvat su les êres du feu, èyu k’ les nêgresses fujt lu sé vèjètal.

ROUZEE.
Tous les djoûs, al sêzon sètche, ils vont su les hyêbes dul brousse, dvant ku l’ solê n’ la spouje et la ramon.nat dins les wastês, mês sins les rclôre. Ene curieuse afwêre, ils dèlêchat les bîs pou la rouzée.

MIEL.

Leu låme est fwart brune ; ile n’est nin l’fin goût du nosse miel d’Europe, mês est bon cand minme. Du tout timps, la låme est tiède, rapport à l’êr dou payis. Il n’ vint nin à gurzês. Dju sondje ossi ku la tchaleur î est pou yåke.
Il est kwèdu surtout su les plantes doul famiye de papiyonacées est p’ås grands åbes dul forêt. Ces papiyonacées pôrint z-èsse, du pus k’ la tchaleur, yène des rêsons k’apêtche la låme du prinde, coume ossi les accacias et les trèfes.

TCHETOURES NATURELES .
Dj’ans vu ku les mouches fujint leus tchètoûres dins les grands åbes, mês toutes les sôrtes d’ åbes nu convnat nin. Iles chwâsichat sourtout lu « Mukenie », åbe à roudje bwès, k’est sins nodance.(goût particulier), û don bin les termitiéres duslêchîes û in tuyô d’mètal lådje assez


TCHETOURES DINS EN’ ÅBE.

L’åbe estant rpêré pa l’essaim , iles aturpurdat lu nètiyadje, ène rude buzougne, ca les åbes fwârt gros catchat ène masse du dèbris. Dèbris k’iles dèblayat su 90 cms du hyôt, nin d’pus. Adon, ils fujat dul cire pou fwêre in tèt, ki va soutnu les nichetés ki sont pus hyôt ; la calote du cire dot z-à soutnu ène masse pas des côps ènorme, ki put fwêre juska deus mètes du spès et i fåt co tâbler su la plûve ki mousse dins la pouriture du l’åbe.

Å mwins 95 % des tchètoures dins les cråyes d’åbes sont coume çà. La calote,dot ossi, soutnu lu poids des mouches, lu gatô et les provisions et il est pus k’ rare ku la calote nu vinje à céder, mågré la mwateur du l’êr.

Il est vrê ku la tchaleur n’è wêre du prîje su la cire. Ca bin ku kes åbes sûjinjent vîs, is n’ sont nin mwârts pou çà ; duzous les tropîkes, la sève permanante est lu mèyeu des rmédes conte lu couladje doul cire. La calote et l’intréye doul tchètoûre n’est nin pus spèsse ku la cie de celules, dju sondje ku la cruweur des dèchèts an contact avu la cire k’ile consolide.

Les rayons ki s’ trouvat dins ces tchètoûres-là sont en rapôrt avu la place du voude déblayé.

PARTICULARITES.

Les mouches nu mètat nin toudi leu låme pas dzeus leu couvain, coume iles le fjat avå-ci, mês bin s’les costés. Dj’ê kèru à sawè poukwè. La calote du soutnance garantit les mouches des nichetés ki pôrint tumer, mês la plake du cire lêche mågré tout passer les odeurs. Adon, la låme pourot couru, tandis ku sul costé û minme pas dzous, la låme est ou courant d’êr.

Dju pourchûrans l’côp ki vint sul pollen, la cire, lu samadje, la rècolte et l’usadje dul låme, l’hydromel et tout l’rèsse.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 14 dja, 2022 18:46:27    Sudjet: Responde tot citant

Sins l’ culto.
Sins l’ culto, årosse dou pwin ?
C’est avu l’blé k’on fwêt la farine.
L’oume et les afants, tourtous murrint d’ fwim,
Si dins les fonds et s’les colines,
On n’labourot pus, al chîje û å matin.

Sins l’bouladjî, kî frot la mitche ?
Sins l’ bokion, l’oume des bwès
Sins poutrèles, coumont k’on frè
La måjon du pôve et et la cie du pus spès ?
… Minme nosse tchin n’årot nin sa niche !

Eyû dwâmrosse, dis mul, sins maçon ?
C’est si bon d’ awè tchèkin sa måjon
Usk’ on s’ rutrouve al tåle, an famiye.
Kî nous coûrot la soupe, ou feu ki pètrîye,
Sins l’ tchèrbounî, k’è fådé l’tchèrbon

Sins l’ tisseu, éyû årosse la twâye ?
Et sins tayeu, kî nous keudrot l’habit ?
I n’ fwêt nin tchôd à l’huche duzous les stwayes
Irins-dje tout nu, nute et djou ?
A l’iviêr surtout, cand l’ pif duvint tout bleu.

Inme lu sôdârd, ki dot t’ dusfinde
Inme bin ta mére, ou keur si tanre
C’est pou la dusfinde ossi k’i s’bat
Cand l’enemi vanrèt pou t’prinde.
Ku dvanrosse, sins l’ brâve sôdârd ?

Inmèz les mèstis, lu min.ne coume lu vô ;
Gn’ è bramint des sots, mês pont d’ sots mèstîs.
Et toute la terre duvanrè coume in grand tchantî
Û tchèke mèstî siéve tous les ôtes,
Et tchèke ovrî nous siêve tourtous.

Sucrîjadje da Djan AICARD,k’è scrit « Main des Maures » (1908)
Scréfiyî à Toulon, lu 4 du fèvrî 1848. Ruvôy lu 13 du may 1921

Powète, romancî et scrîjeu dramatike, Jean AICARD, rampli du sn’ afance méridionale, duvint, dins ses ovradjes lu « chantre » dul Provence, lu djon.ne soçon du Lamartine, poul kè il è scrît in compliman t k’ è sté couroné pa l’Académie françèse.

Rumètu à walon li 5 d’aousse 2011 L.Baijot
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 14 dja, 2022 18:46:55    Sudjet: Responde tot citant

Coumint k’ onz è vnus à l’indjole (PC)

Dju duvros putot dire : « Coumint k’dj’ê vnu ? », ca gn’è yu mwintes vôyes pouz î parvunu.

Cand dj’ê rpris les afwêres an 1954, les ordinateurs astint des fwârt grosses machines ku, seules, les bankes et les pus grandes sociètés plint s’ payî.

Nouzôtes, dj’astins co ou tout vî système pou tout scrîre al mwin, coume ou bon vî timps des mwanes.

Des factures fwêtes al mwin (calcul et scrîjadjes), avu les cate opèracions k’onz avot apris à scole, sins rouvî la preuve par nûf, ki vnot bin à pont ; in bleu papî carbone glissî atère les foyes, ki copiot la prèmîre foye sul doube k’on wårdot pour loû et pou scrîre, lu bon vî crayon à l’aniline, k’i falot wêtî du n’nin suçî, peur d’awè la lingue toute violète.

Bin chûr, il a n’ è falu, dul paciance et bin des anéyes pouz s’amèliorer, mês, onz î è arivé.

Rupurdans la vôye ou dèbut. Tout s’fujot al mwin, les papîs dul comptabilité, les lètes du vwatures pou voyî les wagons, sins compter k’avu la guêre, i falot des papîs pou ttafwêt : awè doul farine, du tchèrbon, dou suke, doul margarine et tout l’ rèsse. I gn’avot des timbes de ravitaymint pour n’ importe kwè.

Les comptes, adon, amon les indèpandants, astint rudimantêres ; is s’rèsumint à un bon gros calpin et kékes cahiers. Ça sufijot tant et plus. Mês, lu fisc est duvnu pus mèfiant. Les taxacions par comparêson, d’après l’ trin d’ vie et les imposicions d’office astint mounôye courante.

Pouz èviter des margayes continuwèles avu les impôts, lu seul moyin astot du tnu ène comptabilité réguliére. On sondjot èsse trankile. Dijans à passant, k’å djoû d’anute, ça n’è wêre tchandjî. La voracité du l’Etat nu fwêt k’ d’ågmanter et l’avnir n’est nin roze. Mês lêchans ça d’ costé et ruvnans à nosse sudjet.

An 1954, on s’è mètu dins l’mouvmant et il èfalu du timp pou s’î mète. On nul rugrète nin co anute

Heureuzmint, les machines à calculer ont arivé. Nin les ptits bijous ki tnat al potche, mês des mastodontes du pus d’ 10 kilos, avu des claviers coume des afitches et in grand levier k’ i falot atchî à tchéke côp. Çut-ci a disparu pou fwêre place à in bouton électrike. Sins rgrets !

Dju dos asteure vous espliker coumint martchint les ptites machines à manivèles pou ène mwin et à levier pou l’ôte mwin.
La pôsicion des chifes du 0 à 9 su fjot avu in curseur pou tchèke colone : à drète, les unités et à ruvant à hintche les dîjin.nes, les çantin.nes etc. Lu dèplaçmint d’ène colone à l’ôte su fjot ou levier et la manivèle comptot à tchèke tour. I falot don dèplacer d’in costé û d’l’ôte et tourner û dustourner. Ene mervèye pou l’èpoke !

Pou multipliyî 27 x 18, avu l’curseur, fwêre 27, vunu à hintche avu l’levier pou fwêre 270 et tourner 2 côps, cè ki dène 540, pîs ruvnu à drète et dustoûrner 2 côps pou ariver à 18 ( 20-2). Pou diviser, on fwêt l’contrêre.

Pour z’à ruvnu al comptabilité, il è don falu tnu des lives comptabes (achats, vantes, financiers, etc)
I falot des colones séparées pou tchèke janre de denrées, an kilos et an francs. Cand on sét k’on s’ocupe du grains et d’aliments, du farine et d’tchérbon, d’angrais et par après du prodwits phyto, pon s’rin d comptze dul buzougne ku ça dnot.

Les totaux astint fwêts tous les mwès et i falot k’ ça clope, çu ki n’astot nin toudis l’ cas. Adon, falot kèru, pas des côps lontins. Ou dbout dl’an, tout ça dvot su rdjonde å franc près, pouz awè la concordance, sins cåzer dl’ invantaire . Tout c’ k’ére an magasin dvotz’èsse rpris an francs et pa kilos.

Pîs è arivé la comptabilité à dècalke ; ène prèmîre rèvolucion ! Onz avot ène plake an mètal à trwas pinces, k’on pinçot dins la padje gåtche du rèjisse à scrîre. Ene deujime pince tunot l’ carbone à place et la trwajime, la fiche à rampli. Çu système-là fujot gangnî du timp et rastrinde les erreurs.
On scrîjot su la fiche pincie al padje de gåtche les chifes comptabes et su la foye du drète, la vantilacion du l’ècriture.
Lu problème ére toudis des fiches jènèrales et les fiches du tchèke compte. On n’è rin sins må, don ! C’ére, ma fwè, in progrès k’a valot la po.ne ! On s’a n-è siêrvu bin des anéyes !

Su ç’ timp-là, on s’aprètot tout douç’mint ås ordinateurs. Pou nouzôtes, ça è vnu dul Banke dul Société Gènèrale.Dj’ans dit ku les bankes astint des précurseurs et on lz î dot d’à n-awè mètu mwintes su la vôye.
Ile avot in programme k’il mètot al disposicion du des clients. Vla coumint k’ ça martchot. La Banke nous fournichot des règisses bin tûzés, dju dos dire. Dju les ramplichins et tous les mwès, on les rmètot à l’ Ajance, ki s’tchèrdjot d’les voyî à bon pôrt. Là, les ècritures astint ancodées et après 2-3 smwin.nes, i nous rarivot la comptabilité du mwès.

Poul mwès chûvant, tout parèy ; les 2 mwès astint rpris assan.ne et coume ça jusk’al fin dl’anéye. Gn’avot pu k’à rmète lu dêrin mwès ou comptabe ki fjot la dèclaration ås contrubucions.
I dmèrot co in « hic », c’est d’falu atinde 2 -3 smwin.nes pouz awè ène situacion, cè k’astot pas des côps jin.nant.
Lu timp è passé et les indjoles (PC) ont vnu à in prix pus abordâbe, c’est k’ è atiré l’public. Dj’ans fwêt l’ pas ; dju nous ans « informatisé », coume on n’dijot nin co adon.
Lu programme comptabe F… astot monté, in programme bin fwêt pou l’èpoke et ki s’amèliorot å long des mwès.
Pou fwêre des ôtes buzougnes, on wêtot d’couniche kékes bribes de « Basic » et ses »go to ». Dl’astins
lon d’fwêre des mèrveyes ; mês djà bin contants coume ça !
La société du programme est counu des rviêrs, à passant d’ène mwin à l’ôte.Al fin s’è prèsanté ène måjon capabe, k’è continuwé à nous soutnu in moumint. Mês, ils avint leu programme à zès, bin supèrieur ou nô. Dj’ans don adopté lu leur, toudis amèlioré, et dj’as sans bin fièrs.

Pîs è arivé ISABEL ki fwêt tous nôs payemints, sins problème. Mî k’ ça ; lu programe comptabe è sté rloyî à Isabel et nôs transferts sont asteure rupris d’ofice dins nôs lives, sins î mète la mwin..
Kè rmuwe-mènadje su ène vie !
Dju finirans à djant å cis ki vôront bin nous lire :

Les vîs s’ souvanront, les djon.nes apranront.

LB 29/10/2011
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 14 dja, 2022 18:47:17    Sudjet: Responde tot citant

Les canadas.

Bramint des djans sont sbarés du vèy k’ène plante si ordinêre pwâte tant d’ noms diférants, minme d’in viadje à l’ôte, mês nu savat z’a-n espliker la rêson.

Pou les mète à l’êje, dju vons sayî dul lz î dire cè k’il a rtoûne.

Mètans d’abord sul costé la « patate douce » k’est ène plante tropicale ki r’san.ne à nos canadas, mês k’on n’ rasconture nin avå ci, si çu n’est dins les boutikes spécialisées.

Lêchans ossi d’costé, la grande marguerite de 2 mètes du hyôt, ène plante vivace k’è pris l’nom du sa tribu d’orijine ‘TOPINAMBOUX’ (Topinambas), ou Brésil. On saye dul fwêre rintrer dins les tchèsses, mês i fåt l’raclôre, ca l’djibî a-n est friand, nin seulmint des rcinées, mê ossi du foyadje k’i broute à plêji

Nosse canada, loû, provint des Andes, dou Pèrou et dou Chili. Su nom d’origine vint d’ Haïti : Batata (1519). Lu mot, ki vint du l’espagnol est intré dins mwintes lingadjes, à sawè :An Norvéje : POTET ; en Suwède : POTETIS, an Angletère :POTATO, an Grèce, PATATA, etc. à fwêt ku la plante î arivot. Pou nouzôtes, PATATE s’est stindu(1765) cand on n’a plantot co wêre an France.On counut :patates, petotes dins mwintes réjions walones.

Dins l’ walon d’Charlerwè, patate dèsignerot lu topinambour, du mwins cè ç’ ku djat les Francès. Dju vous l’rind pou l’prix k’i m’cousse. Du toute façon, lu terme topinambour (1655) è voyadjî avu l’ôte mot : poire de terre jusk’ al fin du XVIII°, Çu dêrin mot est sté adapté ou néerlandès AARDAPPEL et à l’almand : KARTOFFEL, pouz èsse sutindu dins les pays du Nord du l’Europe et jusk’an Russie. Mês ruvnans à nosse Pitite Beljike.

Après Lîdje, ile su loume « CROMPIRE. »,à chûvant lu terme olandès « GRONDPEER » qui vut dire « PWARE DU TÈRE ». Ça s’comprind åjîmint, ku Lîdje, k’ est près vèjin dul Hollande, ruprinje à sa mode lu mot hollandais pouz à fwêre « CROMPIRE »

Tins k’ dj’î sans, à Bohan-sur-Semois, à stoc dul France, èyû k’on cåze lu tchampnwès, ki n’ è rin à vey avu l’Hollande, lu canada su loume : « PWAS D’ TÈRE ».

C’est yåk du bin’ ètonant, mês k’î frindjes ?

Pou l’mot « CANADA » û « CANADO », c’est tout boun’mint l’ Canada k’è dné s’nom al plante k’i nous avoyint et ki s’è fwârt sutram’lé dins toute la Walonie

On s’dumande pas des côps poucwè k’à Bertrix, is djat des « TRUKES ». Grandgagnage et les ôtes î wèyat ène « TRUFE DU TÈRE , mot ki s’è racourti et s’è rmètu ås usadjes doul réjion et passer du « TRUFES » à « TRUKES. ».

Pou Grêde, c’est co ène ôte afwêre. Les Grêdîs djat : des « CARTOUCHES ». Alèz vèy poucwè ? Eh, bin, c’est la déformacion plêjante du mot Kartoffel , ki s’årot fwêt à l’ocupacion almande du 14-18 et k’è dmèré dins l’walon du viadje

Dju vôros, pouz achèver, rinde homadje à nosse canada, ène plante ki, tins doul dêrnîre guêre (1940-45) è vnu bin à pont , dins les campagnes et surtout dins le viles , pou subvunu ås dèfayances dou ravitaymint.

Les vîs s’ramémorat les trins plins d’ djans ki vnint rampli leus valises amon les cinsîs. Timp d’ miséres ku ç’timp-là. Vous m’ direz ku ça valot co mi k’ les rutabagas : mot suwédwas ( rotabagge). Sayèz pou vèy.

Les Almands, al guêre du 40, ont acouradji lu plantadje du canadas dins les viyes patures, pouz apwârter ène rawète ås timbes du ravitaymint. C’ére bin nècessêre et ils î avint intèrèt ; ça calmot les djans, k’avint in pô yåke à mète al tåle pou les afants.

Sins èsse in règal, les canadas duvnint bin mèyeus cand l’ couchet avot passé la pate dudins ( cand i gn’avot in boukèt d’lård à mète avu.)

Et si on mwindjot ène frite !

Louis Baijot – Nov. 2011
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 14 dja, 2022 18:47:47    Sudjet: Responde tot citant

« Mu » Lîdje après l’ drame.

Lîdje, c’est m’vèye. Lîdje, c’est one vèye come on’ ôte. Djans, les Lîdjeus su fiyat k’ile
est åtrumint. Tous les djans d’ène vèye sondjat k’i gn’è pont d’parèyes.
A Lîdje, cisse samwin.ne, gn’ avot des djon.nes ki passint leus ègzamins, des vîs k’ achtint des cadôs d’ Noyé pou des djon.nes, tins k’ is passint leu smwin.ne du contrôles, gn’ avot des djon.nes ki, les ègzamints fwêts, achtint des cayèts az ofru ås vîs, gn’ avot des vindeus et des vindeuses pou dné les cadôs à yink et à l’ ôte. I gn’ avot du vant. Et pîs, à noune, tous les djoûs, tourtous purdint l’ bus al place Sint Lambert pouz intrer étudier û pou catchî les cadôs

Mårdi, à Lîdje, gn’ avot in tuweu. In mec è tiré dins les djins. Il è blèssî, massacré, min.me in poupâ et pîs lou-minme, chûrmint.

Onz è cåzé d’ Lîdje pa ttavå l’ dègne, coume on l’avot fwêt du Colombine, an Norvéje, et du toutes les places èyû k’ in djoû , in fô abat des djins k’ n’ avint rin fwêt d’ôte ku d’èsse là.

Lîdje è s’ Kim de Gelder, sun Anders Breivik ; Lîdje est du s’ timp . Ene vèye du s’timp , nin ôte ku lz ôtes, ni parèye ås ôtes .

Vous savèz kwè, d’ Lîdje ? Ene vèye du noune dins in payis à bîje ; onz a rtint d’ pus la tchaleur des djins ku l’ agrès des fåbours. A Lîdje i s’ dit k’on fwêt toudi ttafwê in pô pus fwârt ku lz’ ôtes, ène miète åtrumint ossi. On l’è dit des gréves, on l’è dit des afwêres, on l’ dit co dul dicåce.

C’est à Lîdje k’ in minisse d’Etat s’è fwêt likider, à Lîdje k’on s’ ofure ène gare ku les Rikins trouvrint trop grandiveuse. C’est à Lîdje ossi k’on rèche les terasses des cafès, si vite k’i fwêt 10 degrés pou fwêre la nike ås Italyins. C’est à Lîdje k’on fièstèye lu 14 di julèt al place dou 21. C’est amusant du sondjî yèsse françès.

C’est à Lîdje ku l’viadje du Noyé, les ptites cahutes an bwès èyû k’on vin des wåfes et des boujies, est pus grand k’in vrê viadje. C’est à Lîdje k’on n’ rate nin yène.

Lu strimadje d’ène esposicion –et dj’ sés yåk- à Brussèle, cumince toudi à kwart d’eure an rtard, après kékes verbiyadjes dins les 2 lingues et 2 coupes du champgne, les pus spèpieus vont kèru in resto.

A Lîdje, cand on sondje ataker à 6 eures al nute, il est 8 et dmi bin fwêt cand on sondje å prèmî discours dins in rafut infernal, et vès mignute û éne eure å matin, onz è sbaré d’vèy k’ i gn’ è pus rin à flûter.

C’est dins l’ « Carré » ku l’ Lidjeu aprind à bwâre à s’tapant dins l’ dos, à rabressant les potes et les couméres … bin dvant d’awè l’ådje du mwin.ner .

Et pîs,i gnè la fiêsse du l’avnir, la fiêsse d’ène vèye ki vut rèchu d’ ses miséres. Lu Standard et 2 côps champion ; on båtit d’ tous costés ; ile vut fwêre l’esposicion d’tous les payis an 2017 et tchèke côp, cand ile sondje ku tout va bin aler, lu sort û bin Lakschmi Mittal lî met des bastons dins les djambes.

A Lîdje, gn’ è 2 ans, à 100 mètes doul place Sint Lambert, deus grosses måjons esplôsint. Des mwârts, des blèssîs, des cliniques dèbordèyes. C’est ossi des imådjes k’ont fwêt l’ tour du monde. Ç’ ére jusse après les fiêsses ….

A Lîdje, on va les rcrinde, les fiêsses !

Pierre Kroll, lu 14 déçambe 2011

(ratourné pa Louwis Baidjot)
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 14 dja, 2022 18:48:14    Sudjet: Responde tot citant

Nwâr coume in tcherbounî al fåde

Cåzer du mèstî d’ fådeu et d’ sa fåde n’ est nin si åji k’ ça.
La fåde, c’est coume èn afant. On n’ put nin la lêchî à lie-minme ; i fåt yèsse dulé nute et djoû.
Ene fåde, c’est bê, mês i fåt la fwêre et l’ aturtunu et surtout la rèyussi ; vous n’astèz nin sins sawè k’ ène fåde est fwête pou brûler dou bwès, à kwète du l’êr, bin raclôs, pou ku l’bwés duvinje du tchèrbon et apêtchi k’i n’ prinje feu.
Du tchèrbon d’bwès, ki n’ dot nin vnu à bréjes non pus !

Coumint k’on s’î prind ?

Onz’ atake pa nètiyî, lådje coume ène grègne et co d’pus, la place k’on vut la fwêre, bin plate sins lêchi des broustons, des cayôs et des wazons pa ttavå, ka i va falu rustuler bin prope après les kékes djoûs d’ ovradje k’i fårè pou mon.ner à bin nosse coûtée.

Lu fådeu fwêt talantout in fossé pou tnu la fåde bin sètche. I pût ossi z’an’alver in pö l’nivô.

An plin mitan et à grands côps d’ masse, lu mwêsse-tchèrbouni afonce adon 3 pikèts, yinke dulé l’ôte à triangue pou fwêre coume ène tchuminée. C’est par là k’on mètrè lu feu l’fåde, avu du bwès ki prind l’ pus vite.
On wête ossi du n’nin awè des bwès trop gros ki n’srint nin percés cand les ôtes srint djà à l’ètat d’bréjes.
Adon, i gn’è pus k’à tchèriyî al berwète les chêdes du bwès rufindues et d’ les camper, aspoyîes su les pikets, al z’î dnant in pô du pîd vè l’mitan et insi d’ner sa forme al fåde. Ile va rsan.ner à ène molinée, mês an bin pus grand.
In côp l’ prèmî lit du rondins bin avançî, on campe dussus in deujime lit du pus gros bwès, pîs su ç’ti-ci, in trwâjime et pa des côps in katrime, si la fåde est fwârt grosse.

Tout ça fini, à s’ siêrvant d’ène chôle pôsée su la fåde, on la covure du mî k’on put avu foyes, des wazons, dul tère et les dèbris dul fåde du dvant, pou l’ bwès su consume sins êr, sauf k’on lêche à ras d’ tère kékes bawètes pou fwêre du tiradje à l’alumadje.
Cand la fåde est bin prète, on prind kékes sayês de çades toutes roudjes, vunant d’èn feu vèjin et on les voude pal tchuminée du mitan pou dèmarer l’feu.
Cand c’ti-ci è bin pris, on bouche la tchminée avu des gros wazons, du minme ku les bawètes du tour. Et insi lu feu continue à brûler sins flames, à tchandjant lu bwès an tchèrbon.
La fåde est yåk ki vike. Rin k’à la vèy, lu tchèrbounî sét ç’ki dot fwêre.
S’ ile s’afale d’in costé, c’est ku l’ calcinage va trop vite à ç’ place-là.
Adon, vite bouchî les trôs ki fumat et z’à fwêre des ptits du l’ôte costé pou rètabli l’èkilibe.
I fåt compter kékes djoûs pouz ariver à ses fins. Et c’est cillé ku la paciance du tchèrbounî est mètuwe à rude épreuve.
Cand onz è covru la fåde du mî k’on è polu, il arive souvint k’ à brûlant, si ène coche bouje in pô, ile antrin.ne les cies dà costé,
les wazons su dèplaçat et vlà in trô al fåde et c’est assez pou la rater.
I convint don d’èsse su place pou rarandjî la coviête et çà, nute et djoû. I fåt ossi compter avu l’vant. S’i dvint trop fwârt, on dresse des clôyes du gnêsses pou l’tampèrer.

La fåde an plin.ne buzougne dègadje ène blantche fumîre, ki dvint pus brune cand lu coûjadje arive à sa fin. Fwête dul séve du bwès ki s’èvapore, ile est cråsse et cole ås habîmints, cè ki les rind nwârs et rloujants. Pîs, tout douc’mint, ou dbout d’kékes djôus, la fåde s’afale su lîe-minme, moustrant par là k’il est timps d’ dusfourner.
On dovure la fåde d’in costé pou la lêchî rafrèdi et cand c’est fwêt, on cmince à ramasser les çades frèdes. On prind pou ça la fon.ne à boules, à 10 dints, ki siêve pou les canadas et k’on cheut pour lijî l’ pus bê. On mèt l’tchèrbon à satchs et la berwète est toudis là pou transbahuter jusk’ à l’tchèrète ki les va ramon.ner al måjon û don bin vè la fondrie.
Les rbuts ,la tère et les wazons ki dmérat sont mètus d’ costé pou covru la fåde ki chûrè. Ca, si l’bwès est bin fourni, on put fwêre kékes fådes yène durî l’ôte , û 2-3 assan.ne, s’i gn’è du monde.
C’est pou ça k’on put co vèy anute, dins certins tchamps, des grands ronds du nwâre tère ki markat la place des faudes.

C’est à pô près tout c’k’i dmère des fådes du dinltins.
-----------
Gn’avot ås Hauts-Bûtês dulé Monthermé, èyû k’on va à St Antwane, lu seul fådeu ki dmèrot sul pays après-guêre. Ç’ére « Agapit ».
Les djins d’ådje duvat s’a souvnu ; il avot in solé avu ène fwârt supèsse sumèle, cè ki l’êdot à router.
Ça n’ l’è n in apêtchî du fwêre lu sacristin « ås Butês » et alumer les boujies dèrant mwintes annéyes, avu in costume bin prope. C’éré lon du l’uniforme du smwin.ne du fådeu, vous savèz bin ; s’tunot drèt tout seu, nwâr coume in tcherbounî al fåde

On l’inmot bin, « Agapit » !

Louwis Baidjot, Graide 28/01/2012
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 14 dja, 2022 18:48:40    Sudjet: Responde tot citant

Å traviêrs des sârts et des virées

I n’fåt nin sondjî ku la campagne est toudis sté coume anute. Lon d’ là !

Ku s’passot i, adon ? Les viadjes astint rèduits, les måjons û putot les tchåmîres rassêrées yène conte l’ôte, sins bêcôp d’êjes et co mwinsse du tèrins alantou.

Cand on nous cåze des « hiêdes » û des « sonres » du d’ dinltins, dju wèyans pu tôt ça d’ène manière påjûre et bucolike. Cè k’astot lon dul rèyalité.

Si ces pratikes là astint comunes, c’est pask’i gn’avot nin assez d’ tchamps ni d’ patures pouz î tnu les biêsses, et k’i n’dumèrot k’ les virées poul z’î fwêre passer la campagne.

A l’iviêr, on mètot des vatches « à mîre », in vî mot d’cinsi pou dire ku les cîs k’astint avu trop pô d’ fûr mètint ène vatche amon yink l’ôte ki’ nn’ avot assez pou noûri la vatche à l’ iviêr, à tnant pour loû l’ lacê et la mitan du vê.

C’ére du bèzwin co dpus k’ dul la charité, ku dèrivint d’ ces pratikes-là.

Ruvnans à nôs sårts, nôs virées et nôs bwès.
Cand dju dis bwès, çu n’est les hyôtes futêyes. Les seigneurs avant bin sougne du s’ les wårder coume chourd du ruvnus. Mês, cè k’on dit bwès à sårter, c’est putot des buchons et des tayis (tayes) k’on côpot tous les 15-20 ans, pouz î mète in côp du swaye, duvant du l’ lêchî rdjèter dèrant 15-20 ans. (vèy les cartes du Ferraris).

L’îdèye astot du grèyî les wazons et d’ les stinde su tère, pour zès l’î dner leus mêgues rèserves du phosphote et d’ potasse.
On djot k’après in rpôs du 15-20 ans, la tère astot propice à in samadje du swâye (rgon û wassin).

Après ène mise à blanc ètoc, on stramlot les spines et les fines coches ki dmèrint, pou fwêre tiradje, pîs pa dzeu, les foyes et les hyêbes koz avot lêchî souwer.

Cand l’ timps et l’vant convnint, cand i fjot bin tchôd, onz alumot l’feu ki courot su tère, on stårot les çades et on samot. Il ére kèstion d’ wêtî å singlés si on vlot z’à chaper in pô. Fåtchade al sîye (fåcille), radjavladje pou mète à djåbes et mètadje à vôye.

C’ére lu sårtadje à feu courant ku les Gålwas pratikint dupwis 2.000 ans.

Ene deujime manière du sårter, c’est l’ fournuladje (écobuage), lu brûlis, fwêre in tas du ptits fournês pou brûler les wazons.

Avu l’ gros et pèsant hawê, on dustatchot d’ tère, des linguètes de wazon du 3 à 10 cms du spès, k’on lêchot souwer toute la campgne.

Pîs, on lz aroulot et les camper , avu la tère fû, pou fwêre ène epèce du fournê k’on remplichot d’hiêbes åjites à brûler et k’onz alumot in côp tous les founês fwêts.
Tout coume les fådes, i falot tnu la mwin à ses fournés pouz ariver à z’awè ène fine poussîre k’on stramlot du vant d’ samer.

La difèrance atère les 2 maniéres, c’est ku l’feu courant dustroûjot tout ç’ k’astot su tère, tandis ku sårter à feu covru supôrgnot les rcinées ki dvint rdjèter pou 15-20 ans.

In mot des gnêsses, ki covrint les virées. Iles avint brâmint d’usadje dins la culture : pou fwêre des ramons, lîter les biêsses, fwêre des hayons pou s’mète à kwète dou vant, covru les tèts des rmises, les cwâdes du bwès et tout ç’ k’ avot dandjî d’èsse à kwète; les stos, zès, tchåfint fwârt bin lu feu su l’asse. On n’piêrdot rin, adon !
Les grin.nes, zèles, avint l’avantadje du polu dmèrer atèrées des ans au long sins piêde du leu fwâce et du rdjermer dès ku l’sol astot dusgarni.

Dj’achèvrans à rindant houmadje à nôs tayons et nôs ratayons (ancêtres) ki n’ont spårgnî leus fwâces pou surviker et nous lêchî èn’ hèritadje sins msère avu leus pon.nes. Srins-dj’ dins la cas d’ à fwêre ostant ?

L.Baijot, Graide, lu 2 d' fèvrî 2012.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon Totes les eures sont a GMT + 2 eures
Pådje 1 so 1

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci


Powered by phpBB © 2001 phpBB Group