Pablo Saratxaga Site Admin
Date d' arivêye: 2005-07-01 Messaedjes: 1158 Eplaeçmint: Oûpêye
|
Date: vén 27 nôv, 2020 20:23:55 Sudjet: |
|
|
Atincion ki l' mot « percussion » ça rascovere bén d' pus ki çou k' on fwait avou on tabeur.
Li sinse prumioûle (eployî e l' fizike metans) c' est on tchoca, foirt eyet court (dins l' tins).
Pol sinse eployî dins l' motlî del muzike, ça rascovere tos ls instrumints k' on bouxhe dizeur po fé l' son; eto les cis ki n' ont nén d' caisse (come les platenes, les triyangues, les marimbas (zilofones),... li piano avou, la k' c' est èn ibride, a percussion ey a coides)
Por mi l' « taburreye » c' est nén on sinonime di « percussion », mins ene dizo-troke del percussion.
Dins l' wikipedia e francès, a l' årtike Instrument de percussion, on es classifieye e 4 groupes :
* membranophones (ki l' son est prodût på vibraedje d' ene mimbrane, eyet amplifyî pa ene caisse) => li taburreye
* Idiophones (ki l' son est prodût på vibraedje di l' instrumint (ou on boket) lu-minme, sins caisse po l' amplifyî (come les platenes, les triyangues, les marimbas)
* Cordophones (ki l' son est prodût på vibraedje d' ene coide, mins nén pa froyaedje del coide come dins on violon, mins tot bouxhant sol coide avou on ptit mårtea: piano, koto djaponès, wuqi chinwès,...)
* Électrophones ... dj' a dvou lére a troes côps et sayî d' comprinde... i m' shonne ki c' est po les modêyes electrikes/electronikes des 2/3 sôres di dvant, dj' ô bén on bouxhe todi, avou l' mwin (do côp nén les pianos electrikes, mins on wuqi electrike oyi), mins li sacwè k' est bouxheye ni prodût nén l' son, c' est on capteu electronike/electromagnetike, ki transmete des racsegnes sol foice do bouxhaedje, et l' son est prodût electronicmint. Dj' ô bén, li manire di djouwer, li manire pol muzicyin di bodjî ses bresses, est l' minme k' avou on vraiy instrumint a percussion, mins l' manire di produre li son n' a rén a vey avou l' percussion. |
|