lucyin
Date d' arivêye: 2005-07-07 Messaedjes: 3678 Eplaeçmint: Sidi Smayil, Marok
|
Date: dju 19 awo, 2021 12:39:35 Sudjet: Istwere do rfondou... |
|
|
... po responde a ene kesse da M.L.
Citåcion: |
A m'tôr dè dmander on racsègnmint: djè so dèvins dè rcwèradges dè toponymie; To potchant d'one
coche so l'aute, djè lî què M. Jean Germain (lè linguiste) à sètu on ''précurseur'' do rfondu walon.
Mè question: lè Prof. Germain est-z-i andjôrd'û dèvins vosse groupe dè rfondeûrs, ou bé aveût-z-i / a-z-i on' aute pordjèt? |
Jean Djermwin: c' est lu k' a-st enondé l' idêye do rfondou, après awè stî a on raploû e l' Swisse so li rfondaedje do romantche (Romansch Grischung) (1987). Si papî (teyorike) a stî eplaidî dins l' rivowe so papî "Toudi" da José Fontinne (1989). Adon-pwis e 1992, il aveut-st ataké a sayî praticmint kimint fé, a pårti di l' Atlas des Lingaedjes del Walonreye (asteure so les fis [en ligne]: https://alw.uliege.be/alw/
Arivé al rujhe tchestê / tchestia (cawete latene -ellum), il aveut atåvlé li vî scrijha -ea (come dins quaremea = cwarmê, Barvea = Barvê u Barvia). C' est don lu k' a metou noer so blanc l' idêye des betchfessîs scrijhas (orthographe diasystémique). Mins dedja, al fén d' l' årtike, gn a do tchictaedje: i dit k' li scrijha "ea" sereut "riskeus".
Hendschel (1992) riprind l' ovraedje tecnike kimincî pa Germain, po ene cåkêye di foninmes eyet pol croejhete (grammaire).
https://rifondou.walon.org/hendschel-3.html#qqpropositions
E 1993, dji tuzéve a tcheryî so m' "discoviete" do walon, et dji scrijha k' on dvreut awè en kimene cogne do lingaedje, ki sj' loma "rufondu walon" (Singuliers, 1993).
Dji n' fijha cnoxhance di Lorint Hendschel k' e 1993, cwand dji priya Francard, Somme (Nameur), Pècheur (Sint-Houbert) , Mouzon (Li Tchestea) a on raploû so l' avni do walon a Rdoû, pol sitrimaedje di "Ene Båke so les bwès d' l' Årdene l° 2 & 3".
L' UCW (Union Culturelle wallonne) di Lidje aveut diswalpé l' minme idêye, avou les minmès djins (Hendschel, Tiri Dumont) + des "classikes" (Slangen, Van Crombrugge) + des neutes (Dominique Heymans, Pire Otjacques).
Li "tournant" shonne esse li papî Lechanteur di 1996, ki dji vos a-st evoyî. Adon, li contrumasse des waloneus, peu d' esse disdjokés di leu pôzucion di "cok so leu-z ansinî" criynut herleme siconte do pordjet. Gremain, onk des djins di l' eståvlixhmint (bibiotekî a l' Univ do Noû Lovén) ni oize nén aler conte. I s' rimete dins ses studias so les nos d' famile et les nos d' plaece. Mins i dmeure foirt plaijhant avou mi cwand dj' el rescontere.
Di 1996 a 2001, li tåvlotêye rifondaedje (commission normalisation) di l' UCW est saetcheye viè s' dismantchaedje, aprume pa Van Crombrugge, mins k' î dmeure minoritaire (vôtaedje di 1996, Rantoele 0.0). Come ele ni fwait pus rén, li tåvlotêye si dismantche cwnalminme e 2001. _________________ Li ci ki n' a k' on toû n' vike k' on djoû. |
|