Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Jean-Pierre Dumont

 
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 14 dja, 2022 18:34:52    Sudjet: Jean-Pierre Dumont Responde tot citant

Aprinde li walon è scole ?

Nin d' qwè s' rècrèster. Po l' moumint ci n' èst qui l' tite d'on p'tit ârtike è l' Gazète di Lîdje ou dè mons di çou qu' ènnè d'mane : ine pèlèye pâdje rèspounèye â mitan d' l' èdicion lîdjeûse dè l' Libre Belgique.

On-î pout lére qui l' mayeûr di Blègny, on fèl po l' walon ci-la, va mète so pîds d'vins lès p'titès sicoles di s' comeune « des activités d' éveil »n è walon. I vout dispièrter lès cèrvês dès-èfants âs-ôtes lingadjes qui l' francès afîse qui, pus târd, i-z-aprindèsse po-âhèy'mint l' anglès, l' alemand ou bin l' flamind. Clapante îdèye pusqu' insi on abatrè deûs djèyes d'on côp warokê.

On dispiètrè lès cèrvês èt on f'rè dè walon. Ca i n' fât nin èsse di doûce crèyince: i n-a-st- è Payis Walon dès hièdes di djonnes qui n' sèpèt d'dja nin qui l' walon ègzistèye. On l'zî a bin bouhî è l' tièsse qu' i n'èstît qu' dès « Bèljes francophones » èt rin d' ôte. .Et on a djowé avou lès pîds dès waloneûs èt d' âs cis qui disfindèt voltî l' walon. Dispôye trinte ans, on l'zî a fêt acreûre qui walon d'vins lès scoles c' èsteût po d'mwin. Lès-ostèyes èstît là! Et on a târdjî èt ratârdjî...ca , chake djoû qui passe èvôye â wahê dès waloneûs èt à l' banse dès franskineûs.

Est-ce po çoula qu' i s' fât lèyî djus ? Nonna, ca l' monde d' asteûr ni ravîze pus l' ci d' ayîr. L' Eûrope s' èmantche èt ribat' li cwârdjeû. Nos-èstons todi d' pus' èt on-z-a mèsâhe di s' pârler onk, l'ôte. Lès lingadjes « nacionâs « div'nèt dès lingadjes « rèdjonâs ». Lès Finwès, lès Maltès, lès Ongrès, lès Croates èt tos l's-otes ni sont sûr nin co prèts à lèyi là leû lingadje

Et d' vins lès grands payis avou, lès p'tits peûpes rilèvèt leû tièsse. Lès Catalans, Basques, Andalous, Corses end...sâf lès Walons!
Portant, lès bèljikins franskiyons, di Brussèl ou d' ôte pâ, si d'vèt rinde compte asteur qu'il- ont-st-avou l' coyon. Il ont fêt bèbèle avou lès Flaminds avou leû mâssîye « Comunôté Francèse di Bèljike ». Vol-lès-la gây, asteûr ! Ca valéve-t-i lès pônnes dè voleûr distrûre tot çou qu' èsteût walon tot atakant nosse lingdje qui nos a fêt quî qui n's-èstons.

Lès waloneûs s' ont lèyi andoûler dès fâs-djudas èt dès « blanks d'zos l' panse » qui l'zî pihît è l' oûy. I s' ont sortout batou po li walon è scole. Mins on n' si deût nin bate qu' avou s' pôce. On s' deût bate avou sès dî deûts!Et sèrers' pougn' qwand i fât! Et on n' mèt' ninnin pus sès oûs è l' minme tchèna. A qwè chèvreût-i mète ine gote di walon d'vins lès scoles si , a hipe foû dè l' classe,on s' ritroûve èn-on monde sins walon? Ci n' èst nin avou çoula qui nos sèrons francès!

Dè walon, i 'nnè fât tos costés. So lès noms d' nos rowes, d' nos vilèdjes, di nos vèyes. Lès noms d' nos ry èt d' nos rivîres. D' vins lès muzèyes èt lès bibiotèkes. A l' radio èt a l' tèlèvûzion.

Aah, i nos-ont djondou! Nos ont rètchi â visèdje èt pris po dès rèscoulés-ènocints. Mins , on s' va rèvinter. On l'zès va bate là wice qui s' pinsèt lès pus fwèrts . Avou nos-îmâdjes èt nos vwès. Nos- indjoles èt nos copiutrèces vont -st-èvoyi so l' teûle ( youtube, face book,end) on rouwâ d' walonstés leû calin'rèye ni sârè astantchî.

Jean-Pierre Dumont; a parexhe dins "Li Rantoele-gazete" l° 56, ivier 2010-2011
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 14 dja, 2022 18:35:19    Sudjet: Responde tot citant

Li djonne mame èt l’ vî bordjeû


Li djonne mame aspite li boneûr . Mågré qu’ èle pwète co l’ dou d’ sès parints- qu’ ont d’hoté onk après l’ ôte so îh meûs timps, èlle èst-st-ûreûse...Elle aveût fêt tot si d’wèr ,lèye, li pus djonne dè l’ famile. Aveût d’moré avou sès parints dismètant qu’ sès frés èt soûrs, zèls, båtihît leûs vèyes bin lon. Ele l’zî aveût sacrifiyî s’ djonnèsse! Et portant, av’nante come èle l’ èsteût, l’ åreût-èle volou, qu’ èlle ènn’ åreût mètou pus d’ onk à sès pîds...Si rèscompinse rawårdéve si-eûre. On djonne docteûr ènn’ aveût toumé bleû sot. I s’ avît marié èt rademint, ine pite båcèle aveût v’nou å monde. p’tite fèye divant d’ ènn’ aler. Lès grandès djôyes souwèt lès låmes èt lès djonnes parints nèvît-st-é bouneûr. Et, leûs deûs, après s’ aveûr bin candôzé, fièstî, èvolé èssonle à ‘nnè piède li tièsse, come totes lès djonnes copes, i sondjît à leû vicårèye à v’ni, à l’ dreûte vôye qui volèt drovî d’vant zèls come dès distriheûs.
Ci djoû-là, c’ èsteût l’ grand djoû ! L’ cisse qu’ ine djonne mame ni roûvèye måy ! L’ cisse qui si-èfant fêt sès prumîs pas ! L’ cisse qui l’ papa qui lî tint lès mwins l’ dislahe po lèyî cori adlé s’ mame qu l’ rawåde sès brès’ å lådje ! ! Li ci qui mame vôreût fé sèpi à l’ tére ètîre qu’ si p’tite båcèle rotéve !!
Ele ni tint pus. A hipe qu’ arive l’ eûre dè l’ pôrminåde , vol-la so l’ voye avou l’ èfant gåyotèye à princèsse. ol-vol-la so l‘ « pôrminåde di l’ ïle » qui tos ès hutwès kinohèt. L’ île a div’nou on parc avou ine bèle alèye inte dès riglètes di tiyous. Lès vîs bordjeûs l’ åbitèt èt ont batî leûs mohones. Tins, djustumint, vola l’ vî Vincent qu’ èst-st-à copèner so s’’ sou avou sès camas. Enn’ a t-èle sondjî li djonne cope à l’ mohone Vincent. Qwand l’ vî ni sèrè pus là, èle sèrè-st-à vinde èt…
Mins, l’ djonne mame a bin ôte tchwè è l’ tièsse. Ros’lante èt fîre, èle prind bin s’ timps po-z- ariver disqu’ å qwatron d’ vîs-omes èt d’ arinner l’ mêsse dè l’ mohone :
- « Ne seriez-vous pas fier, monsieur Vincent, d’ avoir un si belle petite fille ? »
Et ci-chal dè rèsponde :
- « Qu’ ènnè f’rû-dje, don fèye ? Dji n’ a nole tètes ! »

Tote djinnèye, li djonne mame dimora ståmus’.

Cint Fontinnes Juin 2017

* Dè c’ trèvint-là, lès bordjeûs d’ Hu djåzît co walon.

riparexhrè e rfondou walon divins l' Rantoele 84, ivier 2017.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon Totes les eures sont a GMT + 2 eures
Pådje 1 so 1

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci


Powered by phpBB © 2001 phpBB Group