Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Géo Warzée

 
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: mår 01 fev, 2022 15:57:01    Sudjet: Géo Warzée Responde tot citant

Citåcion:
Jean-Pierre Dumont

Géo Warzée .

TOT TUZANT

Nos-avans dit à nos léheûs qui l’ ârtisse-pondeû Géo Warzée ( di Wanze) aveût wågnî l’ pris dè « Cwèrneû » à Hu, po s’ powèzèys : « Dièrin foyou « .

Dji v’z’ èl va fé lére et vos sèrez d’ acwèrd avou mi po dîre qui lès mimbes dè djuri ont st’ avu qu’ arap’mint « l’ oûy’ è front » divins cisse kèsse-là.

C’ èst minme à s’ dimander, qwand on vôrè djåser d’ Géo Warzée, s’ èl fårè loumer l’ årtisse-pondeû ou bin l’ powéte !

« Dièrin foyou « , c’èst-on tot prumî bon boket, sins ‘ne fåte di goss’, di lingadje ou d’ vièrsificåchon.

C’ èst bin « vèyou », èco mî « sintou » ... C’ èst rimpli d’ ine doûce miråcolèye, èt çoula finih’ ènn’ on r’djet d’ solo .

Djudjîz vos-minme !


DIERIN FOYOU


Dispôy’ deûs- ans l’ brave ome n’ a pus kwité l’ coulèye !

C’ èst fini ...pus jamåy i n’ irè d’zos l’ grand cîr

Lanci les hos d’ frumint sol’ tére qu’ a stu tcherwèye.

Ni r’vèy’ sès prés, sès tchamps, lu qu’ ènn’ esteût si fîr !


I s’ assît, djèmihant pèneûs’mint d’vant l’ figniesse ...

On no ride foû d’ sès lèpes : li ci di s’ vî ham’tê ‘

Sès bons-oûy s’ arèstèt so chaque bohèye di gn’gnièsse..

So chaque teût dès wåmîres, so chaque på dè cot’hê...


I s’ riveût, p’tit cårpê, corant so lès gonhîres...

Låvå ‘n’ aveût st’ on så, tot djusse a l’ cwène dè pré.

Divant s’ tchaboté bôr’ il aléve fé s’ prandjîre

Ou hoûter l’ råskignou lès bèlès nutes d’ osté.


Là pus lon, tote djoyeûse acoréve li riv’lète,

Binåhe d’ aveûr potchî dju dè l’ rôle dè molin.

Ele tchantéve si rèspleû tot hossant ‘ne vîle bårquète,

Et lès bouhons s’ loukît divins s’ mureû d’ årdjint .


I r’tûse insi longtimps so s’ pèneûse vicårèye...

E s’ coûr eune après l’ ôte, lès sov’nances arouflèt,

Et tot s’ sintant d’fali dizos l’ pwès dès annèyes,

Mågré s’ vèye di mizére, il èst rimpli di r’grès.


E l’ cwène di l’ êsse asteûre, li pôve ome riprind s’ plèce,

Ca l’ nutèye, so l’ viyèdje, a toumé londjinn’mint...

Li sov’nance èst si fwète qu’ èle fét bahî s’ blanke tiesse

Et rôler ‘n’ amére låme so s’ vî hoyou mouss’mint.


Volà qu’ on fwért valèt d’ on plin côp droûve li pwète !

Deûs nozés p’tits-èfants qu’ ine djône feume tint po l’ min

Acorèt d’ leû pus reûd l’ apici po l’ hanète ...

Et l’ vî roûvéye sès pônes tot lès strindant lontimps...

Prix dè Cwèrneû 1953


VESPREYE


Sovint dj’ m’ assis so l’ pont qu’ asclahiche li rouwâ,

Qwand l’ solo s’ lêt goter podri lès hotès crèsses,

Qui l’ lâbureû fôqui rid’hint li basse tchèrâ,

Et qui s’ feume èl rawâde ine èfant so lès brèss’ !


On vî sapin qui s’ louque ès mureû dè l’ Semwès,

Sitind sès neurès cohes plintes di mirâcolèye...

En-on cîr div’nou môve tourniquèye on mohèt,

Et là qui l’ djoû ‘nnè va li rèw’ si lamien’n’tèye !


 pont d’ clauje li hièrdi braît po fer cori s’ tchin...

Lès vatches ripassèt l’ êwe èt fèt ‘n’ ahote po beûre

Divant dè r’djonde leû stâ, tot beûrlant londjinmint

Foû d’ halène li brav’ tchin va s’ rihaper d’vant l’ heûre.


Li grand-mére vint so l’ sou rihouquî lès-èfants...

On bon vî soye ine bwèche po fer l’ dièrin-ne blamèye,

Et disconte sès blokès heût s’ neûr’ pipe tot rintrant...

On ètind r’claper ‘n’ ouh, ca l’ nute tome so l’ valèye !


Lès steûles fèt dès clignètes, là d’zeûr, ès firmamint.

Li keuhisté s’ sitind so l’ racrampé viyèdje ;

Li zûvion, d’vins lès foyes sospîre si tinrul’mint

Qui v’ dirîz ‘ne doûce tchanson fête d’ amour èt d’ bâhèdjes !


Tchanson mirâcolieûse qu’ on a bon d’èl houter

Qwand l’ nutèye sol payis mèt’- on troublant mistère

Et qui l’ rèwe dizos l’ pont so sès flots lêt djouwer

L’ èblawihante Bèté, qui vint caressi l’ tère .


SOV’NANCES


Qui fêt pèneuûs lès djoûs d’ Tossint,

Qwand ine freûde plêve dihind tote fène

D’ on pèsant cîr pus gris qu’ li stin

Tot fant plorer lès sintès cat’rènes.


Ine cloke djèmih...lâvâ...bin lon...

Li nosse adon, d’ ine vwè parèye,

Es vî cloki douc’mint rèspond

Dès mèsèdjes plins d’ mirâcolèye !


Pôve vîle grand mére, vos n’ traftez pus,

Av’nante, djoyeûse avâ l’ mohone,

Levant l’ gôrdène à pus p’tit brut

Po vèye so l’ vôye si n’ vint personne !


Qwand dj’ arivév’ divant l’ posti,

Li djôye pleûtive voss’ bê visèdje,

Et v’s trèfilîz rin qu’ dè vèyi

On p’tit cârpê t‘t- avâ l’ manèdje .


On djoû v’ m’ avez dit : « Vos v’ la grand !

« Dji pou ‘nn’ aler, dj’ a l’ coûr a l’ âhe ... »

Vos -aviz bin dè l’ ponne portant :

Ca vos ploriz tot m’ dinant ‘ne bâhe .


Qui fêt pèneûs lès djoûs d’ Tossint

Ine fèye qui s’ dispiède li sov’nance

Dè l’ vîle grand mére qu’ on inméve bin

Et qui lès clokes hiltèt lès transses !



LI VÎLE MOHINETE



Les dièrinn’s mwètès foyes toumèt so lès brouwîres

Insi qui dès lâmes d’ or dè l’ nateure qui prind l’ doû...

Ine mâle bihe lès ramasse, lès k’tchèsse divins l’ ourbîre

Hoûle â triviè dès cohes, èsbarant lès tchivroûs.


Ine pôve vèye mohinète èst là, tote disseûlèye,

A l’ intrèye dè bwes d’ fâwes acropowe pèneûs’mint...

Lès frîleûses arondjes, dèdja sont rèvolèyes :

Il a volou nîver divant îr â matin .


Sins ahote dès nûlèyes covèt neûres èt man’cantes ;

Poqwè vont -èles si reud po passer d’zeû lès vâs ?

So lès vôyes distrimpèyes on n’ veût nole paysante

Et lès vigreûs bwèh’lîs raloumèt leûs fouwâs !


Li pôve vèye mohinète dimeûre tote disseûlèye...

Elle a portant vèyou co traze èt traze iviérs,

Mins oûy, elle a pawou, pawou d’ sès razannêyes

Et z-a-t-elle sogne dè vint qui boute todis pus fwèrt !


Pace qui qwand i s’ mâvèle i d’vint pés qu’ on sâvadje :

I raya l’ nute passèye li volèt qui t’néve co,

On boquèt dè vî teût sins respèt po s’ grand adje,

Fant ployî tot d’vant lu, to houlant come on sot !


Po l’ djoû d’ oûy èle èst wâke, pôy qui Mayane èst mwète :

C’ èsteût –st-al rossète leune, n’ ârè co vite dîh-an

On djoû ‘n’ djône fèye vina sèrer s’ vièrmolowe pwète,

Elle èsteût neûre moussèye èt ‘nn’ ala tot plorant .


Lès dièrinn’s mwètès foyes toumèt so lès brouwîres

Insi qui dès lâmes d’ or dè l’ nateûre qui prind l’ doû...

Et l’ mohinète ossi pleure dès lâmes di gotîre,

Pèneûs’mint...gote a gote ...sins rin dîre ...d’sus l’ vî s’ soû .


May’ 1934



TÂV’LÊ DI M’ DJONNESSE


Doûç’mint li solo d’hindév’ drî lès grands houlés plopes dès-èrîves di Mouhagne ... cîr’, saqwans p’titès nûlêyes si pondît di tinrès coleûrs et on mâvi apisté so l’ pus hôte cohète di noss’ cèlîhî, huflév’ on dièrin boquèt. Li grande pâhûlisté qui s’ rispârdév’ so lès vâs m’ ahâyîv’ tél’mint qui dji n’ polév’ qwiter l’ fignièsse !

-« Djans m’ fis, avez-v’ câzî fait vos d’vwèrs ? »

-« Dj’ a fini,mame . »

-« Adon, wèstez vos cayés et vos lîves, nos-irons st ‘à l’ sîze amon grand’mére ! »

A l’ sîze ! A l’ vole mès-ahèsses rimoussît è l’ malète et saqwantès minutes pus târd, vos-ârîz polou vèyî on, p’tit carpê qu’ è’n’ alév’ à cabasse avou s’ mame è l’ rouwalète ...

-« Mame ! I n’ a Minète qui vint avou nos-ôtes ! »

-« Aléz r’z’è, mi p’tit tchèt, vos v’ vinrez piède tot v’nant si lon ! »

Mins minète ni hoûte gote.

–« Vos veûréz, èle vinrè disqu’ â Tiyou, come l’ ôte djoû ! » ...

-« Et ‘ne fèy’ qui l’ gros tchin d’ mon l’ marhâ haw’rèt, qui f’rez-v’ don , vî tchèt? »

Et Minète sûr’mint s’ dit : -« Li gros tchin !... Va , t’ âreûs co bin rêzon ! » Ele s’ arèstêye , gnâw’têye on p’tit côp come po nos dîre « A-r’vèy’ « ... adon mousse è l’ hâye ...

Li nute toumév’ èt dès loumîres aspitît dèdjà âs f’gnièsses ; li hamtê s’ akeuhîv’ . Eco saqwantès-ascâhèyes èt nos veûrans l’ djîze di m’ grand’mére . Nos sabots clap’tît pus fwèr ‘ po z’ ariver rat’mint â posse . Ele èsteût bèle savez, li mohone d’ à m’ grand’mére avou sès vîs meûrs di pîres riblanquîs tot l’z’ ans, èt s’ teût tot cabossî come on tchapê d’ sôlêye !

-« Bondjoû, grand’mére ! »

-« Ah ! Vos v’ là tot l’ minme, mès-èfants ! »

Grand’mére moussîv’ foû dè fôrni ; ine bone odeûr di pan s’ rispârdév’ è l’ êr .

-« Intrez... N’ avez-v’ nin vèyou vosse mârène ? »

-« Nèni ! Volà –st-apreume qu’ on ôd hufler l’ tram à l’ tchâssèye, savez ! »

Mi grand’mére , vève dispôy’ lontimps, viquév’ avou l’ pus djône di sès fèyes, ine bèle grande kimére qui dj’ inmév’ bin, là qu’ èle esteût frisse, binamêye èt tofér bin moussêye . Elle ovréve à l’ vèye come costîre, mins por mi , djône payîzan, èle m’ avizév’ èsse ine grande dame.

-« Hante-t-èle co ? » d’monda m’ mame

-« Awè èdon, èle va riv’ni avou s’ galant : nos-èstans oûy’ djudi, èdon ! »

Qwand dji lès vèya intrer, dji m’ fa tot p’tit...Fât –st-ètinde, vèyez-v’, qui l’ galant di mârène èsteût –st-on èployî, èt ‘n- èployî, di ç’ timps-là, c’ èsteût –st-ine saquî !

-« A tâve, mès-èfants ! »

Mi mârène discôpév’ on gozâ, on grand gozâ âs pomes, avou dès corintes divins . A l’ vole, dji prindév’ mi plèce so l’ grand hame, disconte li meûr . Divant mi , i n’ aveût ‘ne bèle jate avou dès lètes d’ ôr, là qu’ dji lihév’ li mot « boneûr ! » Qu’ on-èsteût bin so hame amon m’ grand’mére ; qu’ èles-èstît bones lès-eûrêyes qui dj’ fév’ là !

-« Eco on p’tit boquèt, m’ fis ? »

-« Mèrci, grand’mére, dj’ ènn’ a disqu’ à là ... »

On pô djinné,dji louquîv’ li galant qu’ soriév’ . I n’ aveût nin l’ êr mètchant, mins c’ èsteût s’ bâbe –di-gate qui m’ èsbarév’ on pô !

Dèdjà mi mârène wèstév’ li tâve , dismètant qui m’ grand’mére ritchèrdjîv’ li stoûve d’ine pal’têye di plaquisse . Dji saveû dèdjà bin çou qu’ alév’ si passer : grand’mére arivév’ avou s’ djeû d’ kine. Li lampe di keûve, avou s’ vèr’ abajour’, mètév’ on bê cèke di loumîre so l’ tâve ; dj’ ad’vinév’ lès sints d’ crôye à l’ copète dè djîvâ èt, so l’ ârmâ, li kris’ gâlioté d’ fleûrs divins s’ boule di veûle ; à costé, li posteûre da Napolèyon, adon, là pus hôt, li câde avou l’ gros-oûy’ « Dieu me voit ! » èt dji m’ sintév’ pawoureûs â treûzinme boquèt d’ gozâ qui dji v’név’ dè magnî.

-« Mi fis, vos n’ fez nin atinchon à voss’ djeû ; vos n’ wagn’rez nin lès neûh’s ! »

Mins l’ doûce tchâleûr dè l’ plèce m’ èwal’pév’ èt l’ tic-tac di l’ ôrlodje mi racontév’ tant d’ istwères qui dji rouvîv’ mès limèrôs ..

–« L’ ome âs poussîres a passé... Rimètez voss’ caban, m’ fis, nos ‘nnè rîrans ! »

Ennè raler ! D’ on côp dji div’név’ mwèrt-nâhî ... Mon Diu, qui fév’ neûr âd’foû ! Mi marène vinév’ so l’ soû avou l’ lampe qui l’ vint fév’ blaw’ter .

-« Prindez astème po d’hinde li gridjète !»

Volà l’ vî posti...Vo-chal li vôye... Hay’ èvôy’ !

-« Bone nute, mi p’tit fis ! »

-« A –r’vèy’ , mârène . »

Dji m’ lèyîv’ on pô hèrtchî â brèss’ di m’ mame : mès sabots èstît pus pèzants qu’ torad’, mi sonlév’ -t-i...

Mins l’ bêté aspitév’ â mitan dès nûlêyes ...

-« Mame ! Poqwè coûrt- èle si reûd è cîr ? »

-« Po-z-èsse bin rade rèvôye, mi p’tit ... dispêtchons-nos ! »

Vo-chal nosse rouwalète, li hâye, li vî meûr...tot l’ minme nosse mohone !

-« Minète ! Minète ! Vinez, mi p’tit tchèt ! I fât rintrer ...c’èst l’ eûre dès brâvès djins ! ... »


22-4-1946
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Tecses e walon Totes les eures sont a GMT + 2 eures
Pådje 1 so 1

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci


Powered by phpBB © 2001 phpBB Group