Berdelaedjes

[Èl-Gueuye-Noere]

Bonswer tertos eyet tertotes,

Dins l' novea roman da J. Goffart, li portagonisse moenne on « sidecar ». L' oteur a wårdé l' ortografe d' oridjene dins s' Feller. Adon, dj' a deus kesses :
- Comint l' erfonde ? Dj' a tuzé a « sidcar », tot rsaetchant foû l' « e ».
- Est-çk' il egzistêye èn ôte mot e walon ? Come di djusse, minme e-n inglès, « car » fwait gåy (dins l' sinse carolo di l' addjectif), veyanmint k' ene moto, ci n' est nén on « car ». Dj' ô bén, ene moto, ci n' est nén ene oto.

Ki ça vos våye bén,
_________________
El sopoirtance va djonde on si télmint hôt livea k' les sûteyès djins n' pôront pus sondjî a n' nén birer les bezéns.

[Reptilien]

[Thedarkfly]

Bondjoû,

Dji voe deus ådjeus.

On calcaedje di l' inglès, avou tot åjheymint l' inglesse ortografeye "sidecar" come e francès ou catalan, oubén foneticmint come e tcheke ("sajdkár") par egzimpe "saydcar".

On ratournaedje come e neyerlandès ("zijpan") ou e almand ("Beiwagen"). Mins ces lingaedjes la sont aglutinants, c' est målåhey di fé l' minme sacwè e walon. Ene ôte idêye est d' fé come li portuguès ("carro lateral") par egzimpe "lérece oto" ou "oto dlérece".

[Pablo Saratxaga]

Mi dj' eployreu "sidcar" eto (ki dj' prononce [si:tkaR]).
Li scrijhaedje "sidecar" dinreut [sidEkaR] e rfondou...
mins ene ôte rexhoxe sereut "side-car"; la l' moya "e" est al fén d' on mot, ça va.

I fåreut vey dins des motîs modienes (S0, O4, E34) si l' mot n' î sereut nén ddins.

[Reptilien]

[Pablo Saratxaga]

D' après l' wiccionaire e francès, c' est eto avou ene loyeure ("side-car") e francès (dispoy les refômes di 1990 et des, i gn a eto "sidecar").

Do côp, come sovint les calcaedjes vinèt do francès, ça fwait èn astoca d' pus pol sicrijhaedje "side-car".

Avou on pluriyal "side-cars" dabôrd ?

Dj' a fwait ene intrêye sol wiccionaire.

[lucyin]

Pocwè nén shuve li prononçaedje naturel walon ? sitcår. C' est come ça k' on åreut fwait la 100 ans (come po metingue).

Por mi (et po E34) li A est long.

Ci n' est nén on noûmot (asteure). Dji l' a oyou dire des cints côps di mes djins (sitcâr). Dj' el pou radjouter insi dins S117, sorlon les dujhances del diyalectolodjeye (mot acertiné pa des temoens).

Mete ene loyeure, c' est conte li rîle di l' economeye.

On n' pout nén mete on halcrosse E å mitan (ôtrumint : /sidèkar/)

Si on vout wårder li "d" etimolodjike, on pout scrire "sidcår". Li D si prononçrè T pa assimilaedje.
_________________
Li ci ki n' a k' on toû n' vike k' on djoû.

[lucyin]

Dins FC99 (Franwal Nameur, 2001) sidecâr. Mins dins leu sistinme, li dvintrin E est halcrosse. Mostere bén ki tos les Walons (såf après Bastogne) vont prononcî on long A.

Dins C99 (2008), li minme dicionairresse mete on long I: sîde-câr. Ele cite ene fråze da Hinri Matterne. C' est dandjreus on prononçaedje coinrece d' avå Sårt-Biernåd. Si on rfond avou on D, li prononçaedje zero-cnoxheu sereut ossu avou on long I /si:tkO:r/

Nén sins C106,C107 (Gilliard), C60 (Vellande). Ci-ci a on mot sîd(e)nadje : planche de rive (sur laquelle on fixe le chaume au bas du toit). Dji n' voe nén l' bodje, mins l' sinse rishonne felmint a l' inglès "side" (costé): plantche clawêye sol costé (å boird) do toet sol dibout des tchvirons.
_________________
Li ci ki n' a k' on toû n' vike k' on djoû.