Berdelaedjes

[lucyin]

Po on scrijheu on djheu (On ôteû, ène vwès=

I èstéve ritnu, Marie Clape Chabot duvéve li lîre mins, à l' place, s'a fêt opérer. Adon, bèrnike :

L’ YSER

Dji mèl rimimbère,

C’ èstéve on djoû tot come ctici,

Si frèd, si gris.

Volà, oufti, bén dès ans,

Dj’a vnu,

Vêci minme

Dins cite disloujîye plin.ne

Èwou corenut d’ droles di tchimins d’ têre.

Dji mèl rimimbère,

Dj’a vnu,

Pa dès bèrdouyeuses pîsintes ki lès cruwauds s’ î nèyîne,

Cotwârdus pa on rogneûs vint.

D’ sovnance m’ keûr si strind.

Dj’a vnu,

Droci minme.

Au truviè dèl campagne k’ avéve stî vète

Divneûwe bén sinisse.

Djî a roté, trisse,

Au dilon d’ nwârs fossés, ki dès rosias s’ î flanichîne.

L’ plouve m’a transi.

Dj’a roté, roté, triyanant dzo lès gotes, glacêyes.

L’ plin.ne di Flande èstéve pâlausse, ratassêye

Dzo l’ cîr, mêr gris.

Au mitan d’ l’ èsquèrlète payzâdje

S’ coloutéve li fleûve èteûre dès costés

Ewou sakants âbes, tot skètés,

Stindîne èviè l’ trisse cièl, bladjot,

L’dislamintâdje di leûs misbrîdjîs stos.

Mès ouy ont ravisé l’ vûde èt trisse plin.ne.

Et s’ astaurdji lontins

Dissu on cwin d’ pachi. Dès crwès,

On èscadron di grîches crwès,

Î avîne sitî di truviè sititchîyes.

Et après shûre, londjin

Au truviès dès pachis,

Li strwète roye, longue èt sombe, dès trinchêyes.

Is ont coru d’ kékes aflitchîyes toûrs,

Aus vîyes croûléyes cinses,

C’ki dimèréve dès places soflêyes pa l’ nwâre furdin.ne

Avou, co aclapés, les broûs

Dès bwârds do fleûve di lédjinde,

L’ Yser...

Insi, c’ èstéve dissu c’ cwin d’ têre

Ki tot au lon d’ trwès ans,

Dins lès brous èt dins l’ misére,

Des djins d’ mes djins s’ ont batu, ont sofru,

Dès soûdârds ki branmint î ont moru.

Adon, tot tchoûlant,

Dj’a vèyu dizo l’ anoyeû cîr,

Dj’a vèyu s’rilèver dès rèdjimints d’rivnants.

Lès ancyins, lès tuwés d’ octôbe padvant,

Avou leûs guènîyes, leus chabots

Leûs vizâdjes skèrnachîs èwou s’lîjéve li fwim

Et, d’ ène longue ritrète, li naujismint .

I gn’avéve lès valèts nén rivnus d’ patrouye

Et lès cîs k’avîne tchèyu

Flayîs djus dins l’ bèrdouye,

Ddrî leû bawète, l’ tins d’ène wârde

Adon ki n’ pinsîne k’ a s’tinu au rcwèt

Dès tchofes do vént d’ bîje.

Adonpwis shûvîne co

Lès tuwés k’on vinéve riléver, à l’ chîje,

Djusse au momint ki lès cwârps

Scrans mwârts, ink èt pink, trotenut tot révant.

Et les cîs fautchîs, à l’ nût, dissus ène passerèle

Pa ène mêrseule pierdeuwe bale.

Arivîne pa bindes aclapés.

Lès cîs d’ Dixmude, di Pervyse

Di Nieuport, di Ramscapelle

Di Sint Djôr èt d’ Lombaertzijde

Dèl cinse Bamburgh, do Pont d’ Tervaete

Lès cîs d’ Caeskerke èt di Steenstraete

Et d’ Woumen

Et d’ Merckem

Et po fini tot lès cîs k’ ont tchèyu

Chake djoû dèl dêrène èt moudreuse

Atake di l’ autone.

Di totes lès cwanes di l’ orizon, is arivîne

Moyates, leûs fratèrnèles ombes s’ rigroupîne

Adon leûs rindjîyes sins brûts s’ avancîne.


Mi keur skété d’ amôur èt d’ sofrance

Tot assoti, èstomaké,

Rèchant do grand-grand bouriaté dècôr d’ abatwâr,

Dj’ a vèyu si stinde l’ mêrgrande armêye dès mwârts...
_________________
Li ci ki n' a k' on toû n' vike k' on djoû.