Berdelaedjes

[lucyin]

Sovnances d' on ptit botike

Il mio nome è Nessumo…

Christiane arive ô boutique. Èle a quarante èt dès-ans. C’è-st-ène pètite djint toute ratassîye, tène qu’èle trâwe, més toudis dalante èt avisante. Èle nè dèstèle jamés. Èt èle è-st-ossi djintîye qu’èle èst coradjeûse. C’èst s’ royète dè v’ni ô boutique èl djeudi après dinnér, t’t-ossi râde qu’èl camion Mestdagh a passè : èle trouve adon sins manque, a tous lès côps, tout ç’ qu’èle a dandji. Èle s’i-y-afîre bin…

’La bin râde èsʹ grand tchèna d’ojêrʹ t’t-a l’eûre rimpli, avou chîs kulos d’ suke cristalisè pou sès confitures, ène live d’abricots – c’èst l’ mèyeûs d’ tout an confiture, dit-st-èle, avou dèl rubarbe, èt pwîs ça candje dè roudjès guèrzèles… –, trwès boutêyes dè Stabilac an rèclame, in Sunil Color, in flèch’tô d’ Soli-Vaisselle, trwès paquèts d’ macaronis – dès Rivoire et Carret – ène lètchète dè tièsse prèsséye, ène maquéye, ène barquète dè crinme al glace vanîye Ola. Sins rouviyî, sul contwêr, in botia d’onions timprus, ène bobène dè nwêr filè, dèl sayète, deûs Urtyp, deûs Export, …

Marcèle èspite dins l’ résèrve, cachî après in cârton vûde pou-z-i stitchî l’ rèstant dès comissions dè ç’ djint la.

« Tu veux qu’Éric aille avec toi… porter le carton ?

– Ça me ferait plaisir, Marcelle, rèspont-èle Christiane, parce que je dois encore passer chez le boucher et… »

Èy’ al coupète èle a mô s’ bras : èle s’a arokè deûs djoûs d’vant su ’ne montéye an r’vènant dèl blanchirîye avou ’ne mande al buwéye.

« Je vais mettre le sucre aussi dans le carton, dit-st-èle Marcèle, tu auras moins de mal.

– Mèrci, m’ fîye ! »

Tèrmètant qu’ Marcèle fét s’ bèsogne, Christiane sè toûrne viès l’ gamin dèdja astampè d’lé lèy pa d’vant l’ contwêr.

« Si tu veux, toi, tu pourras déjà y aller, m’ pètit colô…, dit-st-èle toute doûce, a mitan bas, a bachète dèvant l’èfant, … Georges est à la maison. »

Georges…, l’èfant n’a jamés vu ç’n-ome la pou dîre, més i wèt bin l’ méso…

« … Tu dois toquer à la porte parce que la sonnette est en panne… Frappe bien fort… Merci m’ pètit ! »

La don l’ valèt èvoye franc batant viès Moûrfayt, pa d’la l’ voye dès mèsses, avou l’ cârton d’ comissions dins sès bras… Èt vèz l’ la bin râde bouchant fèl’mint a l’uch dè ç’n-ome la.

« Gn’a pèrsone ! » èrcasse ène grosse vwès dins l’ méso.

!!!

L’èfant n’mère ou preume tout sési. Il-a mô ètindu, asârd…

Non fét ! Èt, bin râde, il-a l’ riyô. Més i n’ sét trop qwè fé pou s’ dèstrapér… Èt s’i r’tok’reut dins l’uch, in bon côp… ? Més vèz l’ la qui bèzine… Èt s’i ’spliqu’reut s’n-afêre come u fôt trèviès l’uch… ! Més vèz l’ ci qu’i s’ rapinse…

Tout contè, tout rabatu, il-a mieus s’achîr sul pîre dè l’uch avou l’ cârton su sès djambes, sè dijant qu’i gn’a pont d’imbaras toudis, què ç’ feume va bin râde rarivér…

Més l’ tins passe. Èt ça lyi chène lon a l’èfant, qui n’ lache pus d’ soumadjî a ç’te eûre. Tant qu’al fin vèz l’ la qu’i s’ rastampe bon-z-èt reud, rambouchant tout sès pus foûrts a l’uch.

Èt, al sègonde, come si l’ tonwêre s’reut a tchérʹ sul méso, fèyant triyanér lès cârôs dèl dèvanture èt zoublér d’ sésich’mint l’ pôve èfant, on-z-ètint :

« Pusquè dj’ vos di qu’i gn’a pèrsone !!! »

!!!

----
Sovnances d' on ptit botike (2020)
_________________
Li ci ki n' a k' on toû n' vike k' on djoû.

[lucyin]

I plouveut tant qu’ lès tchins buvint d’astampè. Èl boulindjî aveut r’pris l’goria dispus deûs grossès samwènes a ç’te eûre. I n’aveût nin pus d’corâdje qu’un lincheû r’mouyi. Il aveut co ‘ne miyète mô s’dos, més c’èst dins s’tièsse qu’il î l’ pus fayè I s’èrpasseut, sins r’lache, lès souv’nances dès s’djon.nèsse, èt p’in preumî, tout ç’ qu’aveût stî cron…

minme live, boket rprins dins l' conte-rindou da Djôzef Bodson

https://www.areaw.be/eric-monaux-souvnances-din-ptit-boutique-ill-danielle-lefevre-el-bourdon-2020-192-pp/
_________________
Li ci ki n' a k' on toû n' vike k' on djoû.

[lucyin]

I pârlint bètch èt queuwe : coureûs a vélo… pidjons… djârdin… toubac’, … s’èrpassint leû djon.n.nèsse, tout ç’ qui n’èrvinra pus…
« Siya ! D’é travayi al vèr’riye,… chîs mwès… Nos ‘stins come deûs cints a ç’tins la… Si fét ! dès bocâls, dès platias a tôte, dès flèch’tôs, dès potikèts pou lès fârmacïyes, branmint dès ramasse poûssières èt tout l’ sint tchinis’… Oyi ! Sèréye pou d’ bon, a ç’te eûre…! […] 
- Oyi ! Come Berthe èt sès piles dè sayas an galvanisè al quinquây’rîye d’ Moûrfayt ! Èle n’asteut nin d’in-abôrd ôjîye ! Vos n’avîz nin co m’tu in pîd dins l’ boutiquia qu’èle vos criyeut d’dja : « Èn’ touchèz a rin ! 
- Èt pwîs i-gn-aveut l’ mârchô, Arthur Demoulin, qu’asteut tout-al boune, èl popa d’ Mârguerite èt d’ Marcèle… avou s’ cindrè an pia d’via…
- Et l’odeur de la corne brûlée !
- Avez coneû Alfonse Carou èt Julia, qui fyint dès bales a djouwér ?
- Diabe, twè ! On djouweut co al’ bale ô tamis adon, tous l’ dîminces… »

**************************

Dès sclats d’ôr djibotint pa t’-tavô. L’eûwe èrglaticheut, èrdjib’leut su lès cayôs, tchapoteut dins lès brous. Come in gad’lot, èle sôt’leut toutes lès-astantches. Come ène fowène, èle s’èstitcheut dins ‘ne chabote, scafoteut lès stokéyes, scapeut a toutes lès grâwes dè toutes lès racènes. Lontins èle chûveut s’ voye insi, canâye èt tranquîye, sè djouwant dès toutes lès arokes. Pwis d’in côp, èstrapéye dins-in stritchot  passâdje, afèrnouyîe p’in court toûrnant, èle sè toûrminteut, groûleut dins lès cayôs, èskèmeut èt djigleut, warèche, èspitant lès bôrds…

----
dins: Fredi & Simone (2023)
_________________
Li ci ki n' a k' on toû n' vike k' on djoû.