Berdelaedjes

[lucyin]

Mwaisse raploû del Rantoele do 24 di nôvimbe 2024
(e l’ bressene di l’ Ône a Mont-Sint-Wubert)

Estént la : Jean Cayron, Joseph Dawagne, Marius Gigot, Gilles Seraing, Julien Noël, Joselyne Mostenne, Georges Staelens, Pablo Sarachaga et Lucien Mahin

N’ ont sepou vni : Laurent Hendschel, Jacques Desmet, Dimitri François, Gaston Wilvers, David Blaude, Pierre Otjacques (k' a-st avoyî les contes), José Schoovaerts, Vincent Delire.

Ponts k’ ont stî forbatous

1. Contes 2023 ont fini avou ene piete di 416 uros. Gn aveut co tolminme 983 € po rapougnî 2024. Gn a yeu 45 abounmints (on foirt bon chife po 110 imprimaedjes et 100 evoyaedjes). Les subsides do ministere ont bén stî rçûs (400 uros). Gn a yeu ene rintrêye foû ordinaire avou l’ tchapea do « tosseusolsinne » da Dimitri François (100 €).

Les costindjes estént ene miete rinflêyes, ca gn aveut ddins, l’ imprimaedje di 5 gazetes (li 4inme di 2022 avou).

2. Candjmint di statut del Rantoele: di SNR (Soce Nén Recwårlante [ASBL]), nos divnans ene SSP (Soce Sins Papîs [association de fait]). Ça n’ espaitche nén d’ awè des subzides po les somes ki dji rçujhans dabitude. Åresse, li soce a todi tourné insi, veyanmint k’ ele n’ a måy avou des cwårs assez po fé mete sol Moniteur tos les candjmints d’ djins (mimbes et consey di moennaedje) et di statuts.

3. Oficialijhaedje do rfondou come sistinme ortografike accepté pal « comission do francès, des lingaedjes do payis et des politikes linwistikes » do ministere.

Li tecse esteut parpinsé pa Julien Noël et Michel Francard dispu sacwants moes. I fourit prezinté a Lucien Mahin li 15 di may, pu rdiscuté avou ene pitite vintinne di waloneus di tos les costés (Relîs Namurwès, ALWAC, scrijheus do Cinte, SLLW-îs, Rweyål Club Walon d’ Måmdiy, Li Rantoele) li 4 di setimbe. Il ont tertos stî dacoird avou.

Il a passé divant l’ comission k’ on-z a dit li 12 di nôvimbe. C’ est bråmint des linwincieus do francès, inte di zels Michel Francard, avou ene pol walon, Esther Baiwir. Li comission n’ a rén trové a rdire. C’ est djusse èn advize d’ ene comission conseyrece [avis consultatif]. I doet co esse evoyî al minisse. Come c’ est ene novele, i nos fåt co rawårder s’ ele respond (oyi) u s’ ele ni respond nén. Adon, seulmint i serè scrît ene sadju sol waibe do ministere.

Avou ç’ papî la, n’ årè pus nou xhame-el-voye ni pire-el-roye [obstacles] po-z aveur nos subzides pol gazete (come e 2023 et 2024).

4. Gazete « Li Rantoele »

Li limero 112 a-st ataké, mins serè seur tårdou (dins tos les cas pol copeye éndjolike). Dins les cis k’ estént la, Djîle di Serè promete di fé l’ adrovaedje eyet l’ pådje « Beldjike ». Gn årè sacwants årtikes vinant des scolîs des scoles di Bive.

José Schoovaerts a motoit ene novele Binde d' Imådjes po cwand "Et l' nute s' a stindou" serè houte.

5. Nost ovraedje so les waibes [sites web]

5.1. Wikipedia : longue bate di dvizes sol mwaisse cogne di sacwants årtikes.

* Les nos d’ lives sont asteure prezintés avou l’ vraiy tite (e clintcheyès letes) come mwaisse intrêye (egzimpe : Patouè des vies djins d'Harnies). Li tite ahessåve e rfondou si mete come dizo-tite (e droetès letes mins a pus ptits carateres ; egzimpe : Motlî d' Arniye).

* Po les nos d’ viyaedjes, on saye di trover ene mitan-voye [solution de compromis] inte li no come prononcî la-minme [sur place], et l’ cogne ki sereut pus rfondowe. Tchaeke cas est diferin, et on saye di fé plaijhi å dmandeu ki vike e cisse plaece la (s’ i gn a ene sifwaite dimande).

5.2. Wiccionaire

On nouzome ovraedje po radjouter des fråzes d’ oteur est fwait dispu èn an pa « Scribus electronibus ». Å cmince, i riscrijheut les fråzes téles kénes so l’ intrêye e rfondou. Asteure, li fråze est rfondowe dins l’ intrêye e rfondou. Mins ele est riscrîte come eplaideye so ene intrêye d’ onk des mot, scrît e Feller u dins on vî sistinme.

Fåreut bén espliker totavå k’ on pout fé insi des intrêyes e Feller, avou ene fråze e Feller. Li definixha, c’ est l’ mot e rfondou.

5.3. Wikisourd

On rmimbere ki c’ est « Reptilien » k’ a metou so pî cisse waibe la (e 2020). I boutéve dedja so les vîs motîs walons (Rimåke li vî) sol « Wikisource » e francès, èn ovraedje ki Pablo porshût todi. On doet ossu a « Reptilien » li nozé epådjnaedje do Wiccionaire, et les sûtis modeles radjinçnés lu et Pablo. Mins i n’ a pus waire li tins asteure.

On cwirt todi on manaedjeu po Wikisourd.

Lucyin î va mete bénrade deus clapants lives divnous foû abondroets : « Des croes dins les brouwires » (riscané pa Batisse Frankinet) eyet « Avå Trîxhes et bwès » (di Jean Lejeune di Djoupeye).

5.4.Berdelaedjes

Fåt waitî d’ î rsaetchî les messaedjes des spameus.

5.5. DTW (Diccionaire di Tot l’ Walon)

Joselyne s’ endè sieve tofer, mins ossu do « motî Beljike » da Johan Viroux. Gn a ene rujhe inte les limeros d’ rahoucaedje des deus motîs. Les prumîs, des deus costés, avént stî dnés pa Johan Viroux. Mins après 2000, i s’ ont recråxhî onk erî d’ l’ ôte [indépendamment]. Pablo sayreut bén d’ atôtchî Djohan po waitî d’ aveur les minmes limeros.

Po les limeros des motlîs del Wisconsene (rindous ecôdåves dins l’ Wiccionaire å raploû des rfondeus des 26 et 27 d’ octôbe), dj’ alans rcandjî li « C » [wallon Central] pa « W ».

6. Sinteze do pårlaedje

C’ est des Rantoelîs (Lucyin, Pablo, Joselyne) k’ ont-st ataké ç’ pordjet la fén 2023 avou Philippe Boula de Mareüil do CNRS di France. Ci-ci a polou aveur on stadjaire informatikî (payî 600 € l’ moes) k’ a bouté sol cayet. Nos avans passé d’ on sistinme « scrijha-foninme » [graphème-phonème] a ene tecnike « neuronike », avou des nouzomes programes di sûtisté éndjolike [Intelligence artificielle].

Les prumîs rzultats sont asprouvés [testés] pol moumint so ene waibe esprès. LM et JN ont ddja « respondou ». Les ôtes k’ estént la [présents] el doerént fé bénrade.

7. idêye Dimitri di dmander po esse « fondåcion rweyåle »

C’ est lu ki s’ ocupe did tot. Li ci ki vicrè vierè bén cwè.

8. Totès sôres

Bate di tchansons e walon al fiesse ås lingaedjes walons 2025. On sohaite des djonnes avou des stîles d’ asteure. Mins elzès fåt trover. Dji dmandans l’ aidance di tos les tchanteus e walon.

Les dnêyes (reglumint et cataloke di tecses possibes) sont so Wikinoveles.
https://wa.wikipedia.org/wiki/Wikipedia:Wikinoveles
_________________
Li ci ki n' a k' on toû n' vike k' on djoû.