Berdelaedjes

[Èl-Gueuye-Noere]

DJI VOS DÈS R'MÈRCIYE !

Quand vos-avèz seû qui vos m' ratindîz, vos stît d'jà bén seûr' qu' vos m' vîriź voltî ! Vos-avèz tout fét pou qui dj' fuche ôji, à pârtir du djoû qui dji s'reu vûdi.
Èm' tout preumî mot qui vos-èspèriz, Vos-avèz r'djiblè quand dji vos l' l' é dit. S' il a stî l' preumî, i s'ra co l' dénrin: dj' vos criy'ré "Moman", tout plin d' sintimints !
Vos n' avèz r'culè d'vant pont d' sacrifices, passant dès niûts blanches pou yèsse à m' sèrvice: quand dj' èsteu malade, qui dj' f'yeu lès poquètes, dèl tampèrature ou bén lès mouflètes. Èyèt minme à c' t-eûre qui dji sû mâriè, si m' arive ène quénte, vos vos trècassèz. Dispûs l' preumî djoû qu' vos-èstèz moman, vos n' avèz viki qui pou vos-èfants !
Mins, m' popa ètou, steut là, tout fièr' èt eûreûs, pinsant d'jà tout bas à tout çu qu' i f'reut, pou qu' dji n' manque di rén, qui dji fuche mieus qu' li, èt pou fé m' bouneûr, i s' a sacrifyi !
Quasi tous lès djoûs, i steut à l' usine. Minme malade, i daleut gangnî nos târtines. Èyèt, quand pa côp, i manqueut in franc, vos vos dès passîz, c' ît pou vos-èfants !
Si, avou l' z-anéyes, vos tièsses ont blanchis, vos-astèz co prèsse à tout r' cominchî ! Pou vos p'tits-èfants, vos n' v'lèz qu' leû bouneûr. Pour yeûsses, vos d' avèz plin l' bouche Èyèt plin vos keûr' ! Si bén qu' quand pa côp, dj' angueûle èm' gamin, vos vos-ènondèz, c' èst mi l' inocint !
Vos lyi pèrmètèz d' fé branmint d' z-afères, qui vos m' inspétchî mi, quand dj' aveu s' n-âdje. Si dji m' intchèsteu, vos stî an colére mins, ... come c' èst vo p'tit, il èst toudis sâdje ! C' qui fét qu' pou fini, pou n' nén dispitér, fôt qu' dji bach' lès bras èyèt l' léchî fé ! I l' sét ben l' ârsouye èt i dè profite. S' grand-pére èyèt s' grand-mére èl f'ront bénrâde quite, di toute punicion èyèt angueûlâde. Is vont toûrnér ça à 'n' boune rigolâde !
À c' t-eûre qui vos pèrdèz d' l' âdje ça m' fét tél'mint peû, peû di vos piède trop timpe ! Dj' voûreu co vos wâdér longtins di lé mi, fôrt bén lon dès rûjes, à yute dès soucis ! Moman, popa, pou tout c' qui vos-avèz fét pour mi, pou tout vo n-amour, toutes vos bontè, vo r'moustrances quand il l' faleut, çu qui a fét d' mi ène saquî d' come i fôt, capabe di fé vikî m' pitite famiye... du pus pèrfond d' em' keûr', tous lès joûs d' èm' vikériye, djusqu' ô dénrin dji vos dit èt dji vos diré: "Mèrci, mèrci, mèrci" !
_________________
El sopoirtance va djonde on si télmint hôt livea k' les sûteyès djins n' pôront pus sondjî a n' nén birer les bezéns.

[Èl-Gueuye-Noere]

CANDJ'MINT D' EÛRE ÈT D' ABITUDES !

Deûs côps par an, on nos fét candjî l' eûre: èl preumî côps, à l' fin du mwès d' mârs èyèt l' deûzième côps, c' èst st' à pô près, à l' Toussint. Môgré qu' i gn' a cénquante ans qu' on dwèt candjî l' eûre, i gn' a co dès djins qui s' dimand'nut dins qué sans' ès' qu' i fôt boudji lès-èwiyes ? Fôt-i ravancî d' ène eûre ou bén, r'culér d' ène eûre ? Ça fét dès-ans èt dès razans, qu' on nos stitch' qui c' èst l' dénrin côps, qu' i n' lyeû d'meure pus qu' à s' dècidér avou lès-ôtes payis, si on va d'meurér à l' eûre d' ivièr' ou à l' cène d' èsté ? Come is n' ariv'nut à s' mète d' acôrd, on n' avance nén d' in pwèy', çu qui fét qui tous lès chîs mwès, c' èst l' minme ranguène, on-vance ou bén on r'cule d' ène-eûre !
Ô, à l' Toussint, i gn' a dès céns qui s' consol'nut an dijant qu' on va pouvwér' dôrmu ène eûre di pus ! On wèt bén qu' is n' ont pont d' chats à leû môjo ! Pace qui, dôrmu ène eûre di pus ..., bâwèt' ! Lès tchats, is-ont ène ôrlodje didins leû vinte, èyet s' ranvèye-là, i d'meure à l' vîye eûre, dès sèmwènes d' asto ! Adon, quand is cominch'nut à z-awè fwin, is s' dè fout'nut bén di t' léchî dôrmu ène eûre di pus ! Is cour'nut dins lès montéyes, niàwér à l' uch' di tchambe pou r'clamér à mindjî èt, t' âras bô fé chènance di nén l' z-ètinde, is n' lach'ront nén di niâwér djusqu' ô momint qui tu vas lyeû drouvu l' uch',... èy' ène bwèsse di viande pou mète dins leû gamèle ! Twé, èt' niût qui tu pinseus yèsse pus longue èt pus pôjère, èle èst foutûwe; tu n' sés pus t' rindôrmu, si bén qui tu vas co yèsse pus scran qui d' abitude ! Sins contér qui tu vas yèsse mô toûrné pou l' rèstant dèl niût.
Anfin, oyi èyèt non pace qui, quand is- âront mindji, lès vènront ès' fé cadjolér, èyèt s' frotér à tès djambes ou bén, is vont gripér d'ssus, sins roubliyî di ronronér pou moustrér leû contint'mint. Ô cominch'mint, tu voûs l' z-ès tchèssî mins, is t' conèch'nut bén; is sav'nut bén qui tu vas râde èt' léchî radoûci, èt qui d'ssus wére di tins, tu vas cominchî à lès carèssî ! Is sav'nut bén comint fé pou s' fé pârdonér ! Tout conte fét, tu l' z-ès wèts tél'mint voltî qui, minme si tu t' djures qui, quand tu n' d' âras pus, tu n' dè r'prindras pus, rète come buzète, tu cour.ras d' èr' qué yin... ou bén deûs !
À c' t' eûre, èr'vènons ô candj'mint d' eûre ! I gn' a ène quèstion à l'quéle, dji n' sés nén rèsponde ! Quand 'n' saquî vént à moru, on-a l' abitude di dire qui, ès' n-eûre asteut là ! Mins, c' èst quéle eûre qu' asteut là ? Èl cène d' èsté ou bén l' cène d' ivièr' ? Pace qui, quand on-èst djôn.ne, on n' èst nén à l' après d' ène eûre; on da co tél'mint pad'vant nous ! Mins, quand on prind d' l' âdje, ça n' èst pus l' minme: ène eûre, ça conte branmint. Yeûne di pus ou bén yeûne di mwins', ça conte ô piquèt ! C' èst pou çoulà qui, dji va vos fé ène confèssion. Dispûs tout p'tit, dji m' é toudis fét in-oneûr' di yèsse à l' eûre, dins n' impôrtè qwè, qui dji dwève dalér n' impôrt' èyû. Dj' arive minme souvint, branmint trop timpe ! C' èst st' insi qu' djé stî al'vè ! Mins, èl djoû qu' i m' fôra fé èl' grand cumulèt, pou l' preumî èyèt l' seûle côps d' èm' vîye, dji n' s'ré nén mwés, di m' èdalér ène eûre pus târd, minme deûs. Dji n' s'ré nén prèssè di dalér vîr qwè c' qu' i s' passe di l' ôte costè ! Qui du contrére, c' èst l' keûr' gros, avou branmint dèl pwène èyèt dès r'grèts, qui dji quit'ré no boune vîye tère èt toutes lès djins qu' dji wès voltî, sins p'tète minme awè l' tins di lyeû dire ô r'vwèr' èt dè l' zès rèbrassî in dénrin côps !
_________________
El sopoirtance va djonde on si télmint hôt livea k' les sûteyès djins n' pôront pus sondjî a n' nén birer les bezéns.