Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Tecses d' etermints
Potchî al pådje 1, 2  Shuvant
 
Sicrire on novea sudjet   Responde å sudjet    Djivêye des foroms di Berdelaedjes -> Berdelaedjes
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: sem 21 djl, 2007 18:44:34    Sudjet: Tecses d' etermints Responde tot citant

Pådje po mete des tecses lîs a des etermints

Po l' etermint da nosse mere

Nosse mere est revoye.

Elle a stî vite evoye, come on dit e walon, po ene djin ki n' trinne waire divant d' mori.

C' est çou k' elle aveut todi dmandé : mori sins sofri, sins esse ene ehale po les ôtes dins ses vîs djoûs.

Li dierin côp ki dj' l’ a houkî å telefone, k' elle esteut al clinike a Sinte-Oude, ele si rafiyive di rivni e s' måjhon. Elle î a rivnou, po ût djoûs, pu rawè ene atake, et, co so ût djoûs, mågré l' atimprance des docteurs, elle a fwait s' dierinne båye.

Elle n’ a nén cåzu stî avå les tchamps, sapinse k' on n' dit. Dj' ô bén k' elle a stî prezinte cåzu disk'' al fén.

Po ene ki n' vleut nén fini ses djoûs a l' ospice, dji dirans :« Li Bon Diu lyi a fwait ene bele gråce » ..

*******************************

Bridjite dijheut todi : « Moman, C' est ene sinte ! »

Dji n' so nén l' Påpe po dire si C' est l' vraiy, mins çou k' i gn a d' pus k' seur, c'est k' elle a rindou bon dvwer, tote si veye a long.

Ça n'a nén stî totes rôzes et totes violetes po l' båshele d'on cinsî avou on gros haswè, di vni dmorer dins ene pitieuse måjhon (nosse viye måjhon did divant 1960), et avou s' bele-mere, cobén. Elle a dvou dandjreus hagnî mwints côps so s' linwe.

Awè cénk efants, è piede deus, end aclever troes, les refaxhî, les nouri (sins botaye, adon), les rabiyî, les mete ås scoles. Et tot ça, dilé l' ovraedje del cinse : mode les vatches, al mwin disk' e 1965; aler al laitreye å cminçmint, pu tourbiner après; aler dins les tchamps avou si ome, aclairi as betråles, ritourner les hougnes a fenå cwand il aveut rploû dsu, fé des cojheas, les ratcheryî al gregne, distcherdjî, baler les tasseas (c' esteut todi leye k' aveut ç' corwêye la, pask' elle esteut pezante). A l' awousse, fé les croupetes, pu co totes les ceremoneyes po ramoenner les djåbes sol traveure pu å bår (å hangår) après.

Ci est nén l' tot d' ça : al måjhon, elle aveut co l' dår di bate li boure, avou on bûtea al mwin, a cminçmint. Et passer s' tins a fé del makêye po vinde ås djins.

Sins rovyî les ovraedjes do manaedje : aprester a ddjuner, a marinde et a soper, fé les taexhons, fé s' bouwêye, fé s' semdi, et hay vos nd åroz.
Ses ptits plaijhis : djouwer as cwates, lére des romans-fotos, et aler pormoenner dins les bwès l' dimegne.

Por mi, elle esteut co d' èn ôte sicour : c'est leye ki m' a raprins ene peclêye di beas vîs mots et ratourneures e walon : «Dj' a stî a scole cwand les mwaisse alént mexhner » «On n' årè nén mirabiliå å corti ciste anêye ci ! » « Dji n' a nén boune maye po vosse pere! ». « 1 n'est nén malwè ». Et mi, les riscrire a fwait. Li dierin k' ele m' a dit «dj' a berloufé djus di m' rôlante tcheyire al Bårire. »

Ele m'a todi ecoraedjî po mes rcweraedjes et mes scrijhaedjes e walon. Et co vinde mes lives. Åresse, elle åreut yeu stî ene boune vindeuse. Elle aveut todi ene pîce po mete e trô avou les pratikes.

*******************************

Elle est moite asteure. Pôves nozôtes et les tchéns d' tcherete, dabôrd!

Ebén nonna ! Nonna, ca nonna ! Ene ôte mwaisse apinse da nosse mere, c' esteut k' i n' faleut nén braire cwand ele ni sereut pus la. « Fijhoz m' do bén tins ki dj' vike co ! Cwand dj' serè moite, dji n ' sintrè pus rén. »

E rivnant a grandès hazêyes (e cénkinme vitesse di l' oto) po rariver po l' etermint, dji schoûtéve li posse. Gn aveut ene sicrijheuse vietnamyinne ki cåzéve des dujhances dins ç' payis la. Ele dijheut : «Dji va pus voltî a èn etermint k' a ene noice. Èn etermint, c’ est bråmint pus gaiy.»

Dji n' alans nén cwand minme fé l' dicåce po l' etermint da nosse mame. Mins motoit bén k' on dirè come mi, k' aveut 11 ans adon, al nute di l' etermint da bon-popa d' Viyance : «A çk' on s' a bén amuzé a l' etermint da bon-popa ! »

Amen!

Lucyin Mahin, Ii 20 di djulete 2007.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: mie 25 djl, 2007 23:20:45    Sudjet: Re: Tecses d' etermints Responde tot citant

lucyin scrijha:
«Dji va pus voltî a èn etermint k' a ene noice. Èn etermint, c’ est bråmint pus gaiy.»


Mi ossu, dit-st i Chôze, dji va pus voltî a èn etermint k' a ene noice, paski, a èn etermint, tertos voet l' trô.

Sapinse a Paul Brolet, di Viance, li fré del moite.

(Våt mî rire ki braire, li xhinêye est pus bele).
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: dju 02 awo, 2007 1:24:17    Sudjet: Sicrijhaedjes di condoleyances e walon Responde tot citant

Sicrijhaedjes di condoleyances e walon
(dji cmince pal fén)

Laurent Hendschel wrote:

Bondjoû Lucyin,

Il est ddja motoit ene miete tård, mins dji v' vou sohaitî bråmint do coraedje po passer ces laids moumints cial.

Dj' a sondjî a vos vénrdi, et a ley ki dj' a rescontré deus troes côps et k' aveut stî si binamêye avou mi.

A bén rade dj' espere,

Lorint

-----------
Binamé Lucyin,


Dju vins sol côp du toumer duvins Berdèlèdje sol male novèle à d'fèt' du vosse mame ki s'a lèye raler.

Bon Dju aye si-ame dist-on.

Ele n'a nin avou ahi tos les djous come sovint è nosse pôve Ardène i-n-a 50 ans èt c'èst bin sovint totes sôres du rapinsèdjes ki s'vunèt adon kubouter è nosse tiesse...là k'on tuze à lèye, à s' vicarèye, à çou k'èle èsteut, à çou k 'èle diheut, à çou k'èle pinséve, à çou k'èle a fêt ou areut sûr fêt si elle esteut co la...

Dju pinse à vos, Lucyin; dju n' sé nin scrire grand tchwè d'adreut mins dju v sohète dè corèdje duvins çusse male passe; ca, on-z-a bèle dè dire mins "one mame, on nn'a k'one" don.

Djusk'à tant k'on s' ruvèye

Jacques Werner


Candjî pol dierin côp pa lucyin, li mår 01 dja, 2008 13:02:15; candjî 1 feye
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 03 awo, 2007 11:57:21    Sudjet: Responde tot citant

Tecse di l' etermint avou l' accint d' Transene

http://walon.cultureforum.net/Scrijeuses-f8/Mi-t61.htm
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 03 awo, 2007 11:59:19    Sudjet: Condoleyinces e walon (shûte) Responde tot citant

Jean-Pierre Dumont scrijha:

Binamé Lucyin,

Dji so bin trisse por vos qui vosse mame âye qwité cisse "valèye di lâmes" po-z-aler sûre li piéce dè l'ôte dès costés dèl teûle. Li piède di sès parints èst-onk dès pus deûrs hikèts qui l'dèstinèye nos fwèrcih a avaler. Mins, vos n'èstez nin in-ome a s'lèyî djus èt dj'a l'acèrtinance qui c'èst tot v' tapant d'vos pus reûds èl combat qu'nos ninans dispôye tant d'annèyes qui vos trakerez èvôye vos pus neûrès pinsèyes.

Dji v'sohête tot plin dè corèdje èt v's-èvôye mès mèyeûsès salutâcions walones.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 03 awo, 2007 12:08:57    Sudjet: Condoleyinces e walon (shûte) Responde tot citant

Binamé soçon,

Tote l'èkipe di nosse gazète "LI CHWES" si rachone autoû d'mi po vos
présinter totes nos condolèyances. Nos pirdans one paurt di vosse pwin.ne
tot vos sowaîtant brâmint d'coradje.

Ch.MASSAUX.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 03 awo, 2007 12:12:41    Sudjet: Responde tot citant

Bininmé Lucyin,

Dji prind one (pitite) paurt di vosse pwin.ne.

Mi mame a moru an 2005 èt dji pinse a ley quauzu tos lès djoûs.

Bon coradje a vos, Lucyin, èt a totes vos djins.

Bèrnârd Louis
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 03 awo, 2007 18:34:03    Sudjet: Condoleyinces e walon (shûte) Responde tot citant

André Gauditiaubois scrijha :

Sincères condolèyances.

Lucyin responda :

Gråces.

Li veye continowe.

André Gauditiaubois recassa :

Oyi mins kand ène vîye djin d'amon nos-autes s'èva, èl walon pièd co on bokèt d'sorvikance.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: sem 04 awo, 2007 13:22:21    Sudjet: Condoleyinces e walon (shûte) Responde tot citant

Mu chér Lucyin,

Dj' ê lî dins l' gazète ku vosse moman ess mwate a Ste-Ode. Dju vins v' tèni compagnîe po v' dîre ki dju si addé vos po v'z aspalè dins vos' chagrin.

Dju n' sorês alè a l'atèrmint, mès dju srê avou vos z'ontes an pinsée.

Emile Pècheur.

*******
Di tot nosse keûr avou vos.

Lucien Somme & Chantal Denis.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: sem 04 awo, 2007 14:26:01    Sudjet: Condoleyinces e walon (shûte) Responde tot citant

Dji m' ahesse må po vosse mame.

Dj' overe tote li samwinne, disk' a londi; normålmint dji n' pou måker d' cial; mins dji m' va sayî d' aler al etermint.

Georges Sfasie.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: sem 04 awo, 2007 14:29:27    Sudjet: Condoleyinces e walon (shûte) Responde tot citant

Lucyin,

C’èst-avou brâmint dèl pone ki d’ja-st-apris ki vos’ chére moman nos aveû cwité.

On ptit mot po vos dire ki dji tuze bin a vos dispôy châl â Québec.

Cwè dire, Lucyin ? tot çou qu’on pôreut dire ni sont ki dès pôves mots.

Dji wådrè di vos’ mame, li sov’ni d’ine brave feume d’Ardène ki dj’a-s-t’avoû l’honeûr dè rescontrer ès mohone.

Dji so di tot m’coûr avou vos è dj’ôrais ine pinsèye por lèye cwand vos li direz ârvèye pol djèrin côp.

Tûsez ki v’-z-avez-st oyou brâmint dèl tchance dèl wârder si lontins.

Avou mès meyeus sintumints,

Angèle Lovinfosse
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: sem 04 awo, 2007 14:37:39    Sudjet: Condoleyinces e walon (shûte) Responde tot citant

Dji n' pou rén fé po soladjî vosse pwinne mins, si c' èst possibe, dj' è prind ène paurt.

José Schoovaerts.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Berdelaedjes Totes les eures sont a GMT + 2 eures
Potchî al pådje 1, 2  Shuvant
Pådje 1 so 2

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci


Powered by phpBB © 2001 phpBB Group