Djivêye des foroms di Berdelaedjes Berdelaedjes
Forom di berdelaedjes e walon, so tot l' minme ké sudjet
 
 FAQFAQ   CweriCweri   Djivêye des mimbesDjivêye des mimbes   Groupes d' uzeusGroupes d' uzeus   Si fé mimbeSi fé mimbe 
 ProfilProfil   Lére les messaedjes privésLére les messaedjes privés   S' elodjîS' elodjî 

Fiesse ås lingaedjes walons 2023

 
Sicrire on novea sudjet   Responde å sudjet    Djivêye des foroms di Berdelaedjes -> Berdelaedjes
Vey sudjet di dvant :: Vey sudjet shuvant  
Oteur Messaedje
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: lon 25 set, 2023 20:55:35    Sudjet: Fiesse ås lingaedjes walons 2023 Responde tot citant

Bate di dvizes so les medias

https://vimeo.com/indiestudioco/review/831792698/1143ef2944

Li walon, c' est l' lingaedje etrindjir li moens etrindjir (Francard)

Kitapez l' walon ! Vos l' cåzroz mî après (Vetters)
_________________
Li ci ki n' a k' on toû n' vike k' on djoû.


Candjî pol dierin côp pa lucyin, li sem 28 oct, 2023 12:21:06; candjî 1 feye
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Èl-Gueuye-Noere



Date d' arivêye: 2019-05-13
Messaedjes: 184
Eplaeçmint: Tchålerwè

MessaedjeDate: lon 25 set, 2023 23:19:21    Sudjet: Responde tot citant

Ene grande rujhe avou l' publik, c' est k' il ignore les piceures del Waloneye linwistike. On comaxhe sovint les lingaedjes coinreces del Waloneye. C' esteut impôrtant d' awè ene bate di dvizes, ewou çk' les cåzeus estént drola po bén acsegnî les diferinces. Foiravant k' el prezinteu shonnéve esse ene miete pierdou. Come des sakîs dins l' monde di l' ercwerance.

C' est bén d' vo pårt d' awè peter eyet repeter k' el rifondou n' esteut k' ene ortografeye. Do moens, pol moumint. Cobén d' côp ki dji n' doe nén l' dire foû so les rantoeles di soçnaedje ! Metnant, dj' a podbon les pinses k' on n' est nén co presse po l' pézetsé (prononçaedje zero-cnoxheu).

Djans, c' esteut ene bate di dvizes mo ahessûle. Ci sreut bén d' end awè pus, avou ds ôtes cåzeus k' ont del sepiance ddins. Metans, des ôtes waloneus, mins ossu des picård-cåzants, des gåmès-cåzants, virpus des tchampnwès-cåzants. Copuvite k' ça pufkene do costé d' èç dierin lingaedje la. On biesse raploû pout, asteure, esse eredjistré so les vobuzes (YouTube, Vimeo, etet.) ey on-z endè pout fé avou on biesse programe (Teams, Zoom, evnd.).
_________________
El sopoirtance va djonde on si télmint hôt livea k' les sûteyès djins n' pôront pus sondjî a n' nén birer les bezéns.
Rivni al copete
Vey li profil di l' uzeu Evoyî on messaedje privé Viziter l' waibe di l' uzeu
Reptilien



Date d' arivêye: 2017-07-01
Messaedjes: 263

MessaedjeDate: dju 28 set, 2023 10:33:52    Sudjet: Re: Bate di dvizes so les medias Responde tot citant

lucyin scrijha:
[28:50] Parce que je sens les fusils qui se braquent sur moi.


Oyi, e 2023 l' idêye k' el walon sereut « [une] même langue » (po rdire li prezinteu), c' est ene sacwè ki gn a co des djins k' ont do må avou...

lucyin scrijha:
[29:20] Ce que j'voudrais faire comme remarque, c'est que, jusqu'à présent, notre projet, rifondou walon, n'intègre pas l'oral. Donc c'est l'écrit qui est visé. Ça veut dire qu'on lit la langue mais on peut continuer à prononcer avec toutes les variantes régionales. L'oral n'est pas visé.


Por mi, Lucyin, c' est ene idêye ki n' fåt pus disfinde et spåde, paski ça n' nos rind nén siervice.
Dire k' on screye -eure e rfondou (« vweteure ») des mots k' on pout prononcî -ûre (« vwètûre ») ou co -âre (« vwètâre »), ey did la dire ki EU si pout prononcî A, c' est (por mi) ossu biesse ki d' dire ki OU (« boure ») si pout prononcî U (« bûre ») ou EU (« beûre »), ou co ki U (« cåzu ») si pout prononcî I (« cåzî »), ou co ki O (« todi ») si pout prononcî OU (« toudi »), ou co ki -OURE (« ploure ») si pout prononcî -EUVE (« pleuve »).

I nos fåt esse aburtalés di fé passer l' idêye ki l' prononçaedje e rfondou ni pout nén esse long eri do scrijha. Del minme manire ki cloke et boke ni s' polnut nén prononcî clotche et boutche, vweteure ni s' pout nén prononcî vwetare, viker ni s' pout nén prononcî vikî ; batijhî ni s' pout nén proncî batizer. S' on permete li prononçaedje batizer adon i fåt otorijhî/otorizer li scrijha « batizer ». On n' pout nén fé otrumint.

Rifonde si manire di scrire c' est eto rfonde si manire di cåzer : li scrijhaedje, çou n' ene måy k' ene usteye do lingaedje.


Candjî pol dierin côp pa Reptilien, li vén 29 set, 2023 10:43:45; candjî 1 feye
Rivni al copete
Vey li profil di l' uzeu Evoyî on messaedje privé Viziter l' waibe di l' uzeu
Èl-Gueuye-Noere



Date d' arivêye: 2019-05-13
Messaedjes: 184
Eplaeçmint: Tchålerwè

MessaedjeDate: dju 28 set, 2023 20:35:43    Sudjet: Re: Bate di dvizes so les medias Responde tot citant

Tacser les djins avou on prononçaedje ni nos rind nén siervice nerén. Minme dins les lingaedjes les pus standårdijhîs, metans li francès, on-z ertrouve todi des prononçaedjes diferins. Çki n' arive nén avou l' ortografeye. Do moens, cwand des ideyolodjeyes politikes ni metnut nén leu nez ddins. Tot rivnant å francès, lu-minme, rwaitîz çki s' passe å Kebek ubén co e-n Afrike avou les diferins prononçaedjes. Copuvite ki, a m' shonnance, on prononce voltî les « r » al môde flaminde, espagnole, itålyinne, etet ; e-n Afrike. E-n Urope, on-z a eto des fenominnes dinsi. El dierin côp ki dj' a stî do costé d' Tornè eyet d' Moucron, on pout noter afeye des diferinces fonolodjikes, come des « a » ki dvegnnut des « o ». La k' c' est l' minme, cåzu ttavå el Bedjike, ewou cåzu tertot prononce le « ui », come dins « huit », dinsi « w ». Minme el France eyet, copadecô, c' est pé. Asteure, il ont sovint bråmint d' må a fé l' diferince inte « je mangerais » eyet « je mangerai ». Poirtant, les sons « é » et « è » sont foirt impôrtantes po fé l' diferince inte l' indicatif futurrece ey el condicioneu prezintrece.

Dji comprind tenawete pocwè vs el vloz. Pocwè standårdijhî on canå d' comunicaedje eyet nén l' ôte ? Aprume, mins c' est todi em-n avuzion, po les råjhons ci-dzeu. Houte di çoula, c' est l' nateure avou l' ci k' on standårdijhe el rifondou. Si tcherpinte est metowe so pî avou les betchfessîs scrijhas. Dj' ô bén des eshonnas d' letes k' on pout prononcî d' ene manire u d' ene ôte, sorlon les redjons. Tacser l' pézetsé, c' est ene miete daler conte ça. Metnant, dji n' di nén k' i fåt awè des prononçaedjes diferins timpesse, djusse wårder les pus gros.

Teyoricmint, c' est mo åjhey di standårdijhî les deus canås d' on lingaedje. Djans, si ç' lingaedje la est scrît. Tot rwaitant el walon, c' est ddja fwait. On-z a ene ortografeye standårdijheye ey el pézetsé k' est disponibe sol Wiccionaire. Si dj' el tén bén. Fé respecter les rîles, ça, c' est on deur ovraedje. A l' escrit, ça va co. Avou l' boke, come escrît padzeu, c' est ddja pus målåjhey. Tot çoula po vs dire ki dji so conte d' askepyî des rîles k' on n' a nén vraiymint dandjî eyet ki sont deures a fé respecter. Djans : askepyî des rîles po dire d' end askepyî.

Dji n' a rén conte el pézetsé ki, si dji n' èm forbate nén, est drola po les noveas aprindisses : « prononçaedje zero-cnoxheu ». La k' minme sacwants noveas aprindeus inmnut ostant di prinde èn accint d' ene redjon k' èn accint standårdijhî. Ene sacwè ki dji pete eyet repete voltî : l' estandårdijhaedje d' on lingaedje, ça prind bråmint d' tins. Loukîz do costé do francès, do costé di l' inglès, do coste do neyerlandès, evnd. Copuvite ki dji pinse k' on s' pout co amidrer.
_________________
El sopoirtance va djonde on si télmint hôt livea k' les sûteyès djins n' pôront pus sondjî a n' nén birer les bezéns.
Rivni al copete
Vey li profil di l' uzeu Evoyî on messaedje privé Viziter l' waibe di l' uzeu
Reptilien



Date d' arivêye: 2017-07-01
Messaedjes: 263

MessaedjeDate: vén 29 set, 2023 8:02:26    Sudjet: Responde tot citant

Èl-Gueuye-Noere scrijha:
on prononçaedje ...


Kî çk' a dit k' i nd åreut k' onk ? Nén mi ! Po « pexhon » i nd åreut 2 : [pɛʃɔ̃], [pɛhɔ̃], et les prononçaedjes [pɛhɔŋ] et [pɛçɔ̃] sont-st espontanés po les cis ki prononçnut dinsi. Po « dischinde » i nd åreut 3 : [diskɛ̃t], [diʃɛ̃t] et [dihɛ̃t] ; les prononçaedjes avou dè- (dèskinde), dë- (dëskinde) et du- (duhinde) ni vont nén paski I ni s' prononce nén È, E ou U ; li prononçaedje avou -tch- (distchinde) ni va nén, paski SCH ni s' prononce nén TCH.

Èl-Gueuye-Noere scrijha:
Minme dins [...] li francès, on-z ertrouve todi des prononçaedjes diferins.


Oyi, mins gn a-t i des mots e francès (sins tni conte des epronts) avou :
* EU ki s' prononce A ? (acsegnEUre > acsègnÂre)
* OU ki s' prononce U ou EU ? (cOUr > cÛr/kEÛr ; sOUr > sEÛr)
* U ou É ki s' prononce I ? (lU > lI (avou on ptit L) ; vikER > vikÎ)
* O ki s' prononce OU ? (tOdi > tOUdi)
* R ki s' prononce V ? (plouRe > pleuVe ; por mi c' est deus mots trop diferints)
* ON ki s' prononce È ? (shONner > chÈner)
* N ki s' prononce L ? (shonNer > sonLer)
* ...

Si li scrijhaedje est long eri do prononçaedje çti-ci n' rind pus siervice.

On n' pout nén dire a èn aclot, dijhoz « is tchantONt » mins scrijhoz « i tchantÈt » et co moens « i tchantNUt », ça n'a pont d' sinse : ON ni s' a måy prononcî È ou NU. Et ça, vz åroz bon dire tot çou k' vos vloz, vos n' pôroz rén fé pol candjî.

C' est come dire a on francès ki « asseyez-vous » si pout prononcî « assoyez-vous ». Neni, on-z a dandjî d' deus mots paski EY ni s' pout prononcî OY.

Dji sai, c' est coixhant, mins on n' pout wårder les 36 prononçaedjes des mots k' i nd ont.
Mi-minme ki dit « chèner », scrire « shonner » mi fwait todi drole. Mins a m' neveu (k' aprind l' walon et li rfondou bén seur) dji lyi aprind a dire « chonner » et nén « chèner », paski s' i m' åreut dmandé pocwè on dit « chèner » s' on screye « shonner », dji n' mi voe nén lyi responde : paski c' est come ça ! Et si e francès on-z a candjî « oignon » po « ognon » c'est pol minme råjhon, rinde li scrijhaedje pus près do prononçaedje, del minme manire k' on-z aveut candjî « besoigne » po « besogne » i gn a ddja lonmint.

C'est por mi l' voye a prinde cwand on-z acsegne li rfondou.

Èl-Gueuye-Noere scrijha:
Dji n' a rén conte el pézetsé [PZC] k' [...] est drola po les noveas aprindisses.


Mins, nos stans tertos apurdisses divant di cnoxhe el matire, vos, mi et l' prumî vnou, endo ?


Candjî pol dierin côp pa Reptilien, li lon 30 oct, 2023 16:23:04; candjî 5 feyes
Rivni al copete
Vey li profil di l' uzeu Evoyî on messaedje privé Viziter l' waibe di l' uzeu
lucyin



Date d' arivêye: 2005-07-07
Messaedjes: 3661
Eplaeçmint: Sidi Smayil, Marok

MessaedjeDate: vén 29 set, 2023 20:14:14    Sudjet: Re: Bate di dvizes so les medias Responde tot citant

Reptilien scrijha:

Por mi, Lucyin, c' est ene idêye ki n' fåt pus disfinde et spåde, paski ça n' nos rind nén siervice.

Rifonde si manire di scrire c' est eto rfonde si manire di cåzer : li scrijhaedje, çou n' est måy k' ene usteye do lingaedje.


Oyi, dj' el sai bén. Et vos veyoz li foice ki dj' a fwait avou "Li Ptit Prince".

Mins sociolinwisticmint, c' est ddja ene foice po li rfondou ki les cis k' ont co on walon coinrece dins leu tiesse, polexhe lére li rfondou come des "ratourneus sol pî sol tchamp" [traducteurs instantanés]. C' est come çoula avou mes vîs scolîs d' Bive. Dj' end a yeu des pus djonnes (60 ans) e waeyén-tins 2022. Il ont motoit stî ene miete sibarés k' i plént lére "i veyèt" a môde di leu walon "i wèyat". Est ç' po çoula k' i n' ont pus rivnou e bontins 2023 ?

Po passer doûçmint do walon d'asteure å walon di dmwin, dj' avans dandjî des dierins cåzeus nés-natifs. Dji l' a dit dins on boket del Ronde tåve ki n' a nén stî rprins dins l' videyo. Et Francard m' a dit après ki dj' aveu stî foirt "comifåt" dins mes djhaedjes.

Adon, wårder l' idêye di poleur "radapter" si prononçaedje, c' est ene manire d' esse "politicmint comifåt" avou tertos.

Po les vraiys "zero-cnoxheus", oyi, i lzî fårè aprinde çou ki dj' lome pus voltî li prononçaedje eterpayis. E francès, Flipe Boula dit purade "supra-dialectal".

Dji va vey s' on pout adjinçner ene sacwè avou les scolîs d' SInt-Houbert di l' enaiwaedje [immersion] do moes d' avri.

Reptilien scrijha:

on n' pout nén wårder 36 prononçaedjes... (mins bén les cis des betchfessîs).


Dji va sayî d' apliker ciste idêye la si dj' a des scolîs a pô près zero-cnoxheus e moes d' octôbe nôvimbe.
_________________
Li ci ki n' a k' on toû n' vike k' on djoû.
Rivni al copete
Vey li profil di l' uzeu Evoyî on messaedje privé Evoyî èn emile Viziter l' waibe di l' uzeu Jabber
Èl-Gueuye-Noere



Date d' arivêye: 2019-05-13
Messaedjes: 184
Eplaeçmint: Tchålerwè

MessaedjeDate: sem 30 set, 2023 14:36:11    Sudjet: Responde tot citant

Citåcion:
Oyi, mins gn a-t i des mots e francès (sins tni conte des epronts) avou :

Po dvizer do francès, on-z a les mots « femme » u co « fils » ki n' si prononçnut nén come on lzès scrît. I fåt ossu tni conte des epronts come « album » k' a passé e francès, mins ki s' codût todi-tofer come on mot latén. La k' i gn a deus dvudindjes possibes :
- Al môde walone : on s' tént å prononçaedje d' oridjene, tot candjant l' grafeye (album => albom).
- Al môde batåve : on s' tént al grafeye, tot candjant li prononçaedje (al-bom => al-bum)*.
*Mande escuze po l' escrijhaedje fonetike espontané, mins scrire e-n AFE avou on clavî d' copiutrece, c' est målåjhey.

Citåcion:
Si li scrijhaedje est long eri do prononçaedje çti-ci n' rind pus siervice.

Citåcion:
On n' pout nén dire a èn aclot, dijhoz « is tchantONt » mins scrijhoz « i tchantÈt » et co moens « i tchantNUt », ça n'a pont d' sinse : ON ni s' a måy prononcî È ou NU. Et ça, vz åroz bon dire tot çou k' vos vloz, vos n' pôroz rén fé pol candjî.

Il est målåjhey d' sawè cwand c' est lon u nén. Avou ça, k' e-n inglès, po candjî ene miete, l' ortografeye est standårdijheye, mins li rapoirt ortografeye-prononçaedje dmore pår ewaeré. C' est l' veur ki n' ça nos rind nén siervice po nos, les aprindisses, mins ci n' est nén l' fén des féns nerén.

Citåcion:
Po les vraiys "zero-cnoxheus", oyi, i lzî fårè aprinde çou ki dj' lome pus voltî li prononçaedje eterpayis. E francès, Flipe Boula dit purade "supra-dialectal".

Co on côp, dji n' a rén conte el pézetsé. Çki m' hertche, c' est l' pordjet d' el tacser ås noveas aprindisses. Por mi, ci sreut mî d' leu espliker les cas et les mås d' on prononçaedje pus coinrece (sins esse on prononçaedje d' on patwès peur, veyanmint ki ci n' est pus possibe, u do moens ttavå) eyet do pézetsé. Dins mes luçons d' neyerlandès a l' univiersité, on ns a tacsé on neyerlandès (puvite el ci del Flande) neute. El rujhe avou ça, c' est k' li prononçaedje, li motlî, etet., n' sont nén les minmes ttavå. Adon, ene kesse ns a vnou : est-çk' on vént d' aprinde el neyerlandès di tos les djoûs ubén ene varyisté pus oficire ?

Dj' a noté k' on vént di l' ortografe rfondowe pol pézetsé. Foirt bén ! Tolminme, i gn a des mås, mins i vegnnut nén do pézetsé, mins di l' ortografe, leye-minme. Li fwait ki l' betchfessî -LH- est todi metou sol costé, cobén minme k' il est impôrtant po bråmint d' cåzeus, come les cis d' èm redjon. Si å Levant, « veye » = « veye », dé mi, « viye » =/= « vile » (tot l' prononçant el lete « i », al môde d' on court « i » inglès). La eto ki, ene sadju, « dimorer » = « dimorer », dé mi, « dmèrer » (porshuve a esse) =/= « dmeurer » (viker ene sawice).
_________________
El sopoirtance va djonde on si télmint hôt livea k' les sûteyès djins n' pôront pus sondjî a n' nén birer les bezéns.
Rivni al copete
Vey li profil di l' uzeu Evoyî on messaedje privé Viziter l' waibe di l' uzeu
Reptilien



Date d' arivêye: 2017-07-01
Messaedjes: 263

MessaedjeDate: lon 02 oct, 2023 10:37:53    Sudjet: Responde tot citant

Èl-Gueuye-Noere scrijha:
Po dvizer do francès, on-z a les mots « femme » u co « fils » ki n' si prononçnut nén come on lzès scrît.


Dji n' sai nén pocwè i fåt todi tot ramoenner å francès cwand on cåze do walon, come si l' francès c' esteut on egzimpe a shure... Nonna ! Li francès a s'-n istwere da lu et l' walon l' sinne.

1) « femme » vént do latin femina, li « e » est etimolodjike ki s' ritrove divins femelle < lat. femella ou co divins féminin » < lat. femininus ; si on l' prononce avou A c' est pask' e vî francès on-z a prononcé « féme/fème » pus « finme » pus « fanme » (on-z a naziåljhî del minme manire k' e walon on-z a naziåljhî « minme » ou « mins », et si ouy i gn a deus « m » c' est eto pol minme råjhon), pus « fame » (disnaziålijhaedje), ortografeye avou -a- k' a-st egzisté.

Çou k' vos rovyîz d' dire, c'est ki gn a d' ôtes mots e francès k' ont l' minme istwere et k' on screye avou A : vanne < vfr. vanne [vɑ̃n], vinne [vɛ̃n], venne < lat. venna ; banne < vfr. banne [bɑ̃n], binne [bɛ̃n], benne < lat. benna.

Adon, si vos m' dimandez s' i fåt scrire « fame », pocwè nén ! C' est tolmoens çou ki rclameut Jacques Lafitte-Houssa divins s' live « La réforme de l’orthographe » e 1950.

2) « fils », i gn a nole målåjhisté a comprinde pocwè li L (etimolodjike) ni s' prononce nén adon ki s' prononce divins filial, filiation,... ; la eto çou k' est drole, c' est k' on screye : fiston (nén filston).

C' est cwand l' minme foirt diferint ki d' dire ki « tchantèt » (ou « tchantnut ») si pout prononcî « tchantont ». I gn a nole råjhon etimolodjike ni fonetike.

Èl-Gueuye-Noere scrijha:
I fåt ossu tni conte des epronts...


I fåt-st aprume tini conte di comint çk' on dit e walon ! I n' fåt nén awè peu d' candjî l' voyale/cossoune s' elle a candjî e walon. S' on dit [albɔm] on screye albom(e) et ça nos rind siervice di n' nén awè a dire åzès djonnes ki album(e) si prononce [albɔm] mins aprum(e) si prononce [apʀym].

Èl-Gueuye-Noere scrijha:
Il est målåjhey d' sawè cwand [li scrijhaedje] est lon [eri do prononçaedje] u nén.


Nén tant k' ça ! Si dji dmande a èn efant k' aprind pol prumî côp l' mot « èlèfan(t) » i nel va surmint nén scrire avou PH. Del minme ki « kronomète » i nel va nén scrire avou CH. L' etimolodjeye est forbatåve, minme e francès : « fantôme » ou bén « phantôme » ? ; « trésor » ou bén « thrésor » ? Les deus sont possûles, minme etimolodjicmint.

Si I s' prononce [i] ou [ɪ] (« li ») i gn a nole råjhon d' pretinde k' i s' pout prononcer U [y] (« lu »), pask' oudonbén cwand on va lére « pitit » on n' va nén sawè s' el fåt prononcî [piti] ou [pyty] s' on nel a måy oyou, et bén seur « putut » n' egzistêye nén ! Del minme ki si dj' prononce « murwè » (muroe) dji n' va nén sawè s' el fåt scrire avou -i- (miroe, mirwè) k' egzistêye, lu.

S' on-z a fé l' tchuze e rfondou di prinde « li » et « muroe », adon on n' pout nén aprinde åzès efants k' on pout prononcî « lu » (a Vervî) et « mirwè » (a Nivele). Ostant aprinde li lingaedje coinrece et l' sisteme Feller, c'est co pus simpe.

Mins bon, tchaeke si vuzion (vizion ?) d' l' ortografeye...
Ça n' tént k' a nozôtes di sawè s' i fåt rashonner ou dvizer les walons.
Çou k' est seur, c' est k' avou 36 prononçaedjes on les pout nén rashonner.

Èl-Gueuye-Noere scrijha:
dé mi, « dmèrer » (porshuve a esse) =/= « dmeurer » (viker ene sawice)


Portant c' est l' minme oridjene. Dji n' risin nén cisse diferince la (semintike), come cwè.

lucyin scrijha:
Et vos veyoz li foice ki dj' a fwait avou "Li Ptit Prince".


Et c' est clapant ! Dji n' åreu nén fwait mî !

lucyin scrijha:
Francard m' a dit après ki dj' aveu stî foirt "comifåt" dins mes djhaedjes


Oyi, dj' a trové eto. Vos stîz foirt bén.
Rivni al copete
Vey li profil di l' uzeu Evoyî on messaedje privé Viziter l' waibe di l' uzeu
Èl-Gueuye-Noere



Date d' arivêye: 2019-05-13
Messaedjes: 184
Eplaeçmint: Tchålerwè

MessaedjeDate: lon 02 oct, 2023 21:40:00    Sudjet: Responde tot citant

Citåcion:

Dji n' sai nén pocwè i fåt todi tot ramoenner å francès cwand on cåze do walon, come si l' francès c' esteut on egzimpe a shure... Nonna ! Li francès a s'-n istwere da lu et l' walon l' sinne.


Motoit bén ki vs el av dimandé indirectumint padzeu. Erlijhoz, don, ene miete. Copuvite k' i vs av porshuvou après.

Citåcion:

Oyi, mins gn a-t i des mots e francès (sins tni conte des epronts) avou :
* EU ki s' prononce A ? (acsegnEUre > acsègnÂre)
* OU ki s' prononce U ou EU ? (cOUr > cÛr/kEÛr ; sOUr > sEÛr)
* U ou É ki s' prononce I ? (lU > lI (avou on ptit L) ; vikER > vikÎ)
* O ki s' prononce OU ? (tOdi > tOUdi)
* R ki s' prononce V ? (plouRe > pleuVe ; por mi c' est deus mots trop diferints)
* ON ki s' prononce È ? (shONner > chÈner)
* N ki s' prononce L ? (shonNer > sonLer)
* ...


Metnant, rén n' espaitche d' ermete les lingaedjes etur yeusses. Ci n' est nén po ça k' on sindje on lingaedje. Cwek' ça, vos av mî mostrer k' mi k' el francès n' est nén on modele a shuve, tot rwaitant les rîles eyet l' etimolodjeye.

Citåcion:

C' est cwand l' minme foirt diferint ki d' dire ki « tchantèt » (ou « tchantnut ») si pout prononcî « tchantont ». I gn a nole råjhon etimolodjike ni fonetike.


Ni fåt nén comaxhî « mancance di råjhon » eyet « ignorance del råjhon ». Dj' a do må a croere k' ene sakî s' a dit, on djoû e s' dispåpiant : « Téns, a pårti d' ouy, dji va prononcî des mots a ene ôte mode ». Vos tnoz la on fel sudjet d' ercwerance.

Citåcion:

S' on-z a fé l' tchuze e rfondou di prinde « li » et « muroe », adon on n' pout nén aprinde åzès efants k' on pout prononcî « lu » (a Vervî) et « mirwè » (a Nivele). Ostant aprinde li lingaedje coinrece et l' sisteme Feller, c'est co pus simpe.


Ene ortografeye n' est nén oblidjeye d' awè on rapoirt cint å cint avou li prononçaedje. Des lingaedjes timpesse li mosternut bén. Dji vs el a ddja mostré, d' ayeur. La eto ki n' fåt nén comaxhî « uzer s' patwès todi-tofer » eyet « awè èn accint (ledjirmint) coinrece cobén k' on scrît avou ene ortografeye standårdijheye ». I n' a nou loyén absolou, ki manke di nuwance.
_________________
El sopoirtance va djonde on si télmint hôt livea k' les sûteyès djins n' pôront pus sondjî a n' nén birer les bezéns.
Rivni al copete
Vey li profil di l' uzeu Evoyî on messaedje privé Viziter l' waibe di l' uzeu
Reptilien



Date d' arivêye: 2017-07-01
Messaedjes: 263

MessaedjeDate: mår 03 oct, 2023 7:49:54    Sudjet: Responde tot citant

Èl-Gueuye-Noere scrijha:
Motoit bén ki vs el av dimandé indirectumint padzeu. Erlijhoz, don, ene miete.


Dji n' a rén dmandé d' tot ça. Erlijhoz, VOS, ene miete, kî ç' ki cåze do francès l' prumî.

Èl-Gueuye-Noere scrijha:
Metnant, rén n' espaitche d' ermete les lingaedjes etur yeusses


Comparåjhon n' est nén råjhon !

Èl-Gueuye-Noere scrijha:
Ni fåt nén comaxhî « mancance di råjhon » eyet « ignorance del råjhon ».


Ça, c' est seur ki dj' ignore pocwè -èt ou -nut si pôreut prononcî [ɔ̃], del minme ki dj' ignore pocwè R si pôreut prononcî [v]. Mins dji croe ki minme on linwincieus åreut bén do må di trover ene råjhon a ça.

Èl-Gueuye-Noere scrijha:
Dj' a do må a croere k' ene sakî s' a dit, on djoû e s' dispåpiant : « Téns, a pårti d' ouy, dji va prononcî des mots a ene ôte mode ».


Voz riyoz, dji voe ça tos les djous. Èn egzimpe inte des cints : gn a kékes moes, cwand dji djåzéve avou ene djin d' "Valenciennes", ki boute e l' Beldjike, cisse djin la dijheut « gauche » [gɔʃ], et cwand i m' a-st oyou dire [goʃ], dj' a bén sintou k' ele s' a coridjî dins çou k' a shuvou et dire « ôtre » [otʁ] a l' plaece di [ɔtʁ] po calker s'-n accint avou l' minne. Dimandez don a Djåke Desmet s' i n' a nén candjî s'-n accint cwand il a bagué a Nameur. Mi-minme, cwand dj' a-st aprins a scrire e rfondou, dji n' mi voeyeu nén prononcî « tchèt » [tʃa] ou co « viyaedje » [vilaːtʃ]. Dispu k' dji scrî « tchén », dji n' di pus [tʃĩ] (come èm mame) mins [tchẽ], c' est l' minme avou les viebes e « -nut » ki dj' prononcive [nœ], asteure [ny]. Todi mi, ki va sovint e l' France, arivé låvå, dji n' di pus « sepante » mins « soixante-dix ». Vos m' diroz : çou n' est l' minme mot, et c' est l' veur, del minme ki : tchantèt, tchantnut et tchantont, c' est des mots diferints, del minme ki : « asseyez » et « assoyez ».

Èl-Gueuye-Noere scrijha:
Ene ortografeye n' est nén oblidjeye d' awè on rapoirt cint å cint avou li prononçaedje.


Dji n' a nén dit ça, et i m' shonne ki dj' vos (*) a mostré eto des egzimpes avou « pexhon » et « dischinde ». Mins si por vos li son [ɛ] si pout scrire « o », adon dji n' pou pus rén por vos.

----
(*) Dji prononce : ki dj' vos > ki d' vos [kid.vɔ], la co èn egzimpe d' ene ortografeye ki n' a nén « on rapoirt cint å cint avou li prononçaedje ».


Candjî pol dierin côp pa Reptilien, li lon 30 oct, 2023 16:32:58; candjî 1 feye
Rivni al copete
Vey li profil di l' uzeu Evoyî on messaedje privé Viziter l' waibe di l' uzeu
Èl-Gueuye-Noere



Date d' arivêye: 2019-05-13
Messaedjes: 184
Eplaeçmint: Tchålerwè

MessaedjeDate: mår 03 oct, 2023 20:47:30    Sudjet: Responde tot citant

Citåcion:

Voz riyoz, dji voe ça tos les djous. Èn egzimpe inte des cints : gn a kékes moes, cwand dji djåzéve avou ene djin d' "Valenciennes", ki boute e l' Beldjike, cisse djin la dijheut « gauche » [gɔʃ], et cwand i m' a-st oyou dire [goʃ], dj' a bén sintou k' ele s' a coridjî dins çou k' a shuvou et dire « ôtre » [otʁ] a l' plaece di [ɔtʁ] po calker s'-n accint avou l' minne.


Dji vos croe. Normåldimint, c' est dins les redjons d' oc k' on-z a do må a fé l' diferince inte « å » ey « o ». Cwek' ça, el waibe Français de nos régions mostere k' c' est possibe dins l' picardeye bijhrece, minme si c' n' est nén ostant marké come dins les redjons d' oc.

Foû d' ça, dji n' a pus rén a radjouter, pol moumint. Dji n' sai nén si vos, Reptilien, vloz ubén ene sakî d' ôte vout radjouter åk ?

Terchedon, ki ça vos våye bén,

Åmen.
_________________
El sopoirtance va djonde on si télmint hôt livea k' les sûteyès djins n' pôront pus sondjî a n' nén birer les bezéns.
Rivni al copete
Vey li profil di l' uzeu Evoyî on messaedje privé Viziter l' waibe di l' uzeu
Reptilien



Date d' arivêye: 2017-07-01
Messaedjes: 263

MessaedjeDate: mie 04 oct, 2023 8:39:39    Sudjet: Responde tot citant

Po clôre li sudjet, dj' inmreu djusse radjouter k' îr dj' a cweri totes les manires di scrire li son son [ɛ] (ou [ɛː]) e rfondou, dj' ô bén sorlon l' prononçaedje coinrece :

  • a : dj' a > dj' ê ; il a > il è ; abåbli > èbaubyi ; aburtale > aburtèle ; tchapå > tchè
  • å : råjhon > rêzon ; åjhe > êshe
  • ae : viyaedje > viyèdje
  • ai : diccionnaire > dicsionêre ; braijhe > brèje
  • e : e-n afrike > è-n afrike
  • é : tchanté > tchantè (pårt. erir. Tchålerwè)
  • è : dji tchantrè > dji tchantrè
  • ê : abêsse (long) > abèsse (court)
  • ea : bea > bê
  • er : tchanter > tchantè (inf. Dinant)
  • ès : vwès > vwès
  • es(t) : t' es > t' è(s) ; il est > il è(st)
  • et : A et B > A èt B
  • èt : i tchantèt > i tchantèt
  • eu(s)(t) : åreu(t) > aurè(s)(t) (cond.) ; pleur (di poleur) > plèr
  • ez : vos tchantez > vos tchantèz
  • i : tchivå > tchèvau
  • î : adiercî > adîrcè
  • ie : ådvier > a-d'vèr (sins diftonke)
  • in : influwincer > èfluwêcer
  • on : shonner > chèner
  • ou : avou > avè
  • oz : voloz > volèz
  • u : aburtale > abèrtèle ; abuvroe > abèvreû ; acåblumint > acåblèmint


On pout nén sotni ça. S' on screye « avou » i fåt-st aprinde a prononcî [avu]. Si « avè » n' a nén stî ritnou e rfondou i fåt-st abandner l' prononçaedje [avɛ].

Çou ki sreut bén eto, c' est d' cachî après totes les manires di prononcî ene lete, ou ene troke di letes, metans « a » ou « on », e rfondou, todi s' on ténreut conte des prononçaedjes coinreces.

Por « on » :

  • a : prane (pronne)
  • ɛ : chèner (shonner )
  • ɛ̃ : prinne (pronne)
  • ɔn : prone (pronne)
  • ɔ̃ : on-z a (idem)
  • oː : abôdreût (abondroet)
  • uː djne (djonne)
  • ...


Mins bon, dji n' a pont l' tins por ça.
Rivni al copete
Vey li profil di l' uzeu Evoyî on messaedje privé Viziter l' waibe di l' uzeu
Mostrer les messaedjes des dierin(ne)s:   
Sicrire on novea sudjet   Responde å sudjet    Djivêye des foroms di Berdelaedjes -> Berdelaedjes Totes les eures sont a GMT + 2 eures
Pådje 1 so 1

 
Potchî a:  
Vos n' poloz nén enonder des noveas sudjets dins ç' forom ci
Vos n' poloz nén responde a des sudjets k' i gn a dins ç' forom ci
Vos n' poloz nén candjî vos messaedjes dins ç' forom ci
Vos n' poloz nén disfacer vos messaedjes dins ç' forom ci
Vos n' poloz nén vôter dins les ploncaedjes di ç' forom ci


Powered by phpBB © 2001 phpBB Group