Berdelaedjes

[lucyin]

À l’ guinguète di Han

Sur l’air de « À joinville le Pont ». Musique : Etienne Lorin. Paroles : Roger Pierre. Paroles en wallon : Willy Marchal

Plombî zingeû, volà m’ mestî
Fôt ki dj’ boute come on-assotî.
Ç’ ki dj’ ratind c’èst l’ fin dèle samwin.ne
Po frékenter li grande Djermin.ne

Ou bin Gisèle, ou bin Guilin.ne,
Mins dj’in.nme ostant ki s’ seuye Dgermin.ne,
À ki on bia djoû dj’ l’î a dit :
« Si nos irinent danser sèmdi… »

À l’ guinguète di Han, Han, Han
À deûs nos-irans, rans, rans
Po-z-aler valser, ser, ser
Mon Gègèèèèène
Èt si ça vos dit, dit, dit,
Vos vinroz ossi, si, si,
Vos pouroz danser, ser, ser
Mon gègèèèèène

Ô bward di l’ éwe, gna dès pècheûs
One miète pus long, c’èst dès bagneûs.
On veut dès djins mougni dès mosses,
Dès frites si n’in.nmeut nin lès mosses.

On mougne avou sès dwègts, c’èst mia.
Dès copes ramneunt su lès batias.
Padzo lès ôbes on mougne dès glaces
Èt lès balteûs sont là su place.

À l’ guinguète di Han, Han, Han
À deûs nos-irans, rans, rans
Po-z-aler valser, ser, ser
Mon Gègèèèèène
Èt si ça vos dit, dit, dit,
Vos vinroz ossi, si, si,
Vos pouroz danser, ser, ser
Mon gègèèèèène

Avièt nouve eure, vlà l’ nêt ki toume.
On n’ sét pus wêre comint k’ on s’ loume.
Gn’a pu k’ lès pèlakes dès compîres,
Cocâres di mosses come dès tas d’ pîres.

Dgermin.ne mi dit : « Dj’a mô mès gngnos ! »
Fôt k’ dj’ èle ramwin.ne su m’ vî vélo,
Tot ratusant d’djà à sèmdi,
Paski li sèmdi… mi ça m’ dit…

À l’ guinguète di Han, Han, Han
À deûs nos-irans, rans, rans
Po-z-aler valser, ser, ser
Mon Gègèèèèène
Èt si ça vos dit, dit, dit,
Vos vinroz ossi, si, si,
Vos pouroz danser, ser, ser
Mon gègèèèèène

----
e rfondou

Plombî zingeu, vola m’ mestî
Fåt ki dj’ boute come èn assoti.
Çki dj’ ratind, c’ est l’ fén del samwinne
Po frecanter li grande Djermwinne
Oubén Djizele, oubén Guilinne,
Mins dj’ innme ostant ki ç’ soeye Djermwinne,
Ki on bea djoû dji lyi a dit :
« Si nos iréns danser semdi… »

Al guinguete di Han, an, an,
A deus, nos irans, ran, ran
Po-z aler valser, sé, sé
Mon Jèjèèèèène
Et si ça vos dit, di, di,
Vos vénroz ossi, si, si,
Vos pôroz danser, sé, sé
Mon Jèjèèèène

E boird di l’ aiwe, gn a des pexheus
Ene miete pus lon, c’ est des bagneus.
On voet des djins magnî des mosses ;
Des fritches si n’ innmut nén les mosses.
On magne avou ses doets, c’ est mia.
Des copes ramnut so les bateas.
Padzo les åbes, on magne des glaeces
Et les balteus sont la sol plaece.

å resploe

Aviè nouv eures, vla l’ nute ki tome.
On n’ sait pus waire comint k’ on s’ lome.
Gn a pus k’ les pelakes des crompires,
Cocårds di mosses come des tas d’ pires.
Djerminne mi dit : « Dj’ a må mes djnos ! »
Fåt k’ dj’ el ramoenne so m’ vî velo,
Tot ratuzant ddja a semdi,
Paski li semdi… mi, ça m’ dit…

oyåve so "VoBuze" https://youtu.be/qaDKedHzlDY
_________________
Li ci ki n' a k' on toû n' vike k' on djoû.

[lucyin]

Li vièrlète

https://wa.wikipedia.org/wiki/Vierlete

ONE MIÈTE D' ISTWÊRE

Ké drole di kayèt ! Il a sti fét po l' prumî côp avièt 900, pa lès mwin.nes ki vlinent trover on instrument d' musike capabe di doner one note (toltint li min.me) po-z- aprinde ô novices li tchant grégorien.
Ça s' lomeuve " l'organistrum ".
Is djouwinent à deux :onke ki veut tourner l' rouwe et l' ôte fieuve lès notes. On pou lès veûye tayîs dins l' pire pa-dzeû li pwatche d' ene cathèdrale di sint Djôke à Compostèle.
Après i gn' aveut pu k' on musucien , on aveut trové li "chifonie " (one pitite bwèsse di 50 centimètes di long). On -z- a co candji po l' fer come on luth, éco one miète pu tôrd come one guitare.
En français , ça s' lome one "vielle à roue " .

COMINT LI FÉT-ON DJOUWER ?

I gn a one roue k' on fét tourner à l' drwète mwin avou one manivèle èt ki frote dissus lès cwades (come on violoneûs frote avou l' arche dissus s' violon) èt avou li pawène mwin on-z-aspouye su dès bokès d' bwès po fer lès notes di l' air k' on vout djouwer.
I gn' a deux cwades po plu djouwer l' air èt dès ôtes ki sont frotéyes ossi mins ki n' féyneut k' one seule note èt k' on lome dès "maltons" (èles ni font ki zûner).

----
Willy Marchal, sicoles di Bive do 1î d' avri 2014.
_________________
Li ci ki n' a k' on toû n' vike k' on djoû.

[lucyin]

LES TCHAUWES-SORlS
Leu no, po les sincieus, c’ est les kiropteres. Ça vént do grek.

I gn' a 351 sôrtes
En Belgike 23 sôrtes.
------------------
C' èst-one bièsse à tètes: ses p'tits skèpîyeneunt vikans èt vont bwère li lècia di leu maman . Di ci sôrte-là d' bièsse, c'èst li seule qu' èst capâbe di voler.
Come vos l' avoz vèyu su l' dèssin, leus dwègts d' ène mwin sont divnus fwart, fwart longs èt c'èst li trwèsyin.me dwègt k'èst l' pu long !
Leus djambes sont p'tites et leus pîds sont mètus au-r'viêrs: lès talons pa-dvant èt dwègts avou dès grawes pa-drî.
One tchauwe-soris a one tote fine pia d' one seûle pîce ki l' rafûrléye tote-ètîre.
----------------
Èles ont sti fwart sovint acuséyes di totes sôrtes di maus : on dijeut qu'èle s' agripinent dins lès longs tchfias dès coméres. Come èles ni voleneunt qui quand i fét nwèr, on pinseuve qu' èles èstinent èmacraléyes avou l'diâle.
Les sôrcires qui v'linent fér dès twârt à one saqui avinent dès r'cètes. Éles mètinent dès p'lits bokèts d' tchauwe-soris dins leus comachures.
On lès claweuve su lès uches dès grègnes po sayî d' lès-z-î fer peu.
Asteure, on sét bin k' i gn a rin d' vrai dins tot ça !
Au Brésil, i gn a jusse deus ou trois èspéces qui suceneunt li sang dès bièces, mins totes lès autes mougnneunt dès frûts, dès pèchons, dès insèkes. Lès nosses ni mougnneunt ki dès insèkes Dji vos è r'causrè pu taurd.
----------
En iviêr, èles sont sovint dins lès bômes où i fét frèche èt où i n' djale nin, èdwarmowes, pindouwes pas leus grawes, li tièsse è bas, lès èles riployîes rèssèréyes autoù di leu cwârp.
Au bon timps, èles comincneunt à s' dispièrter èt s' èvolneunt po sayî di trover des tchabotes po s' î r'trover à 10, 20 jusqu'à 50. Là, lès djon.nes crèchneunt trwès mwès dins l' vinte di leu moman. On côp k' i sont v'nus au monde, li lacia di leu maman èst télmint ritche k' i nèles-z-î faut ki 4 samwin.ne divant di polu volér.

(a shuve)
_________________
Li ci ki n' a k' on toû n' vike k' on djoû.

[lucyin]

Lès grands bwès

Lès djon.nes bag.nèt chaque à leû toûr
Po-z-aler fé leû vikérîye
Lon èri di leû p’tit viladje.
I l’zî faut tèyâtes èt cinés,
Mougnî dès frites à l’ môde anglèse,
Ou bin dès « tchôds tchins » mayonèse.

À l’ maujone pont d’ télévision.
À l’ sîze on djouweûve au couyon
Avou lès parints, lès soçons.
One boune doréye èsteûve su l’ tauve,
On riyeûve en s’dijant dès fauves,
Tot bèvant li pèkèt qui r’tchaufe.

Rèspleû
L’ritchèsse, c’èst l’aîr di nos grands bwès,
Là où lès grands ciêrs si batnèt.
Quand lès sauvadjès auwes pasnèt,
Inéyes, coleûrs s’î comachnèt.

Leûs tayons boutin.n dès longs djoûs,
One salade aus crètons au d’ bout,
Èt l’ dimègne one poye èt dès-oûs.
Leûs salades crèchin.n dins l’ corti,
Lès poyes ponin.n dins leû poli,
L’ blanc pwin cujeûve dins l’ vî forni.

Dès poumes, dès biokes èt dès cèréjes,
Nin dandjî d’ènn’aler acheter,
Gn-a qui l’ chaule à mète po lès coûde !
Dès poyes, one gade èt trwès bèdots,
On couchèt qui mougneûve did tot,
I n’ divin.n on franc à person.ne.

Rèspleû
_________________
Li ci ki n' a k' on toû n' vike k' on djoû.