Berdelaedjes

[lucyin]

Su les « Pépés » et les « Nûtons »

Gaston LUCY – Y.J.

Dins l’ cwin d’ Bîve et sul rivadje (les bords de la Semois), dins l’ timps, les vîs cåzint d’ persounadjes mèrvèyeus ki dmèrint dins les êwes et dins les crins d’ rotche. On les loumot l’ pus souvint les « Pépés » et pa des côps, des « Nûtons ». Mês çu terme là dèsigne ène ôte sôrte du persounadjes.

Cand les vîs cåzint des Pépés, i djint toudis k’ i n’ avint nin des pîds d’ oume, mês putot des pîds d’ ôye (oie).

Pépé, ça vut dire kwè ? Dins nosse monde, ça vut dire grand-pére, coume les afants l’ dijat. Mês dins l’ cas ki nous ocupe, çu n’est k’ l’ imådje ku les vîs s’ à fjint. Ces vîs ptits oumes pèrsonifyint l’ vèrtîje dul yåteur û bin dl’ êwe. (coume lu Pépé-Crotchèt).

Èn’ ôte Pépé su loumot Pépé-Bossu et sa bzougne ére d’ wårder lu bin des djins. Insi, on criyot cand onz à wèyot à marôde : « Cheu, cheu, les blosses, Pépé-Bossu ! »

Djan-Bîjon astot l’ Pépé du frèd et du vant d’ bîje (Nord) et les Pinçons astint ses scalots
(domestiques) ; ç’astot zès ki chouflint lu vant frèd et picant.

Dju counus co l’ nom d’ ôtes Pépés, mês dju n’ sé nin leu rôle. Gn avot : Tchèzô, ki vicot dzous ène rotche dins ène virée, nin lon d’ène place à sabat. Astot-ce lu muzicyin ki fjot dansî les sorcîres et l’ Djabe ?

Gn avot co des ôtes Pépes, ostiles à l’ oume, ki s’ loumint : les Pî-Pî-Van-Van. Des ôtes astint «protéiformes », ça vut dire k’i tchandjint d’ forme à volonté et k’ i n’ abordint l’ oume ku tchandjîs à «lumrète ». (feux-follets) .

Des ôtes ont co lêchî leu nom à des lieus-dits.

Lu Pépé est-i rèchu d’ l’imajinacion des djins, par peûr, par ignorance û bin pou d’ ôtes motifs ?

I san’rot bin k’ ahy.
_________________
Li ci ki n' a k' on toû n' vike k' on djoû.

[lucyin]

L’hîrlope

Gaston LUCY – Y.J.

C’est kwè, oh, ça, l’hîrlope ?
Dins l’ timps, les vîs su plêjint a chiner des ôtes, surtout ås pus doûs et pa des côps, ås afants.
On lzî fjot insi crwâre k’ al nute, on plot vèy ène biêsse su såver dvant loû . Ké biêsse ku ç’ astot ? I nul dijint jamwês ; i n’ årint dja sû .
Les tindeûs djint k’ c’ ére coume èn ojê et k’il a purdint co bin ås laces et ås moussètes (lacets à terre). Cand on lzî dmandot d’a moustrer i djint : « Bin tumé k’ c’est anute ; èrsè, dju nn’ ê pris 17 ku dj’ ê rmètu ou cocassî d’ Linchamps . Si dj’a rprinds, dju tul dîrê.
Dins nosse payi, on djot k’ c’ ére coume èn ojê, mês on n’ savot nin la couleur ; yink dijot k’ c’ ére nwâr coume ène cornaye. Èn ôte dijot ku ça avot la couleur du gros-bètch, des ôtes, coume ène agasse. Les pus vicieux fjint l’ malin avu ça et les pus bènêts et les strupiyîs d’ cèrvèle avalint ttafwêt.
Or, i s’è fwêt k’ in djoû, dins in viadje a costé, onz vlot fwêre ène nouvèle vôye. Et coume adon, on travayot al sucoube et al bèrwète, i falot bramint des ovrîs sul chantier. I s’è don vnu agadjî in tas d’ compagnons et du dzarteûs françès ki kérint la djîsse (gîte) et il è min.me falu z a lodjî dins les travures.
Pis, il è cmincî a fwêre pus frèd ; il è nivloté in pô et il è nîvé pou du bon. Tout ç’ monde-la su rassan.not al chîje amon yink k’on n’ frèkantot wêre ou viadje. Il avot pindu ène brantche du påkî dzeus sn’ uche et i vindot a bwâre. Les oumes î cåzint du ttafwêt, des tapeûs d’ sôrt, des leus surtout. Et pou fwêre awè peu la djon.ne coumére ki les siêrvot, gn ‘ a n’è yink k’è raconté k’a l’arriére sêzon, lu vî pére sabotî ki wårdot ses 5 moutons avu les vatches dins les tchamps dusbanés, avot vu in gros leû tourner alantou des bèrbis. Lu tchin è pris peû et s’est såvé. Lupé sabotî n’è yu k’in rcours ; il è tiré ses sabots, pîs i lz è toké yink cont l’ôte, tant k’i plot a courant alantou des bèrbis C’est insi k’il è parvunu a s’ mète kite du leu.
Pîs, il ont vnu a cåzer dl’ hirlope et des moyins d’ la haper. Yink dijot bif, l’ôte dijot baf et nolu n’ savot rin du tout.
– Dju m’ va nn’ aler prinde yène, dit-i yink
– Coumint k’ tu vas t’ î prinde, dit-i l’ ôte ?
– C’est bin åjî, ki dit l’ prèmî. Tu prinds in satche du twaye, bin solide et grand assez, tu vas a ène place dulé l’ bwès, èyu k’ tu sondjes la vèy, tu t’ mès å rcwè du vant d’ bîje, durî ène virée du dgnêsses bins spèsses. Lu pus malåjî, c’est d’ awè kékin pou tnu l’ satch bin å lådje pou k’ la biêsse vinje moussî dd’ins, et adon, vitmint loyî l’ satch pou ruvnu avu.
La djon.ne coumére, cand ille è vû k’i n’trouvint pèrson.ne les î dit :
– Si vous m’ payèz bin, dju vus bin z-î aler, mi ! Coubin k’ vous m’ dêréz ?
Les ôtes s’ont rwêtî tout paf, zès ki buvint leus sous a fwêt. Mês la coumére astot dècidée, et al fin, i s’ ont mètu d’acôrd pou 10 francs, deus bèles cotes èt in moutchwa d’ lin.ne.
Et les vla vôys dulé l’ choûr du drî Nwâranfwè. Il ont posté la gamine, pîs il ont hoûlé et traké dins la virée. Coubin d’ timps k’ ça è dèré, cà ? Ène duméye eûre, putète, pîs on n’è pus rin atindu.
La coumére comptot k’ ç’ astot fini et k’il alint ruvnu. Ahy, wèt’ ! Rin d’ tout ça, ile n’è rvû nolu. Et pîs, les leus s’ont amonné, 7 û 8 k’ ahoulint å pus fwârt. Yink du zès è nodé la gamine et il ont vnu tourtous sur lîe. Lu prèmî è cmincî a la mwâde ou brès, èn ôte è chû, et cand il ont yu sintu l’ sang, il ont fwêt la fin dul gamine.
Su ç’ timps-la, les buveûs avint rintré ou cafèt et çu n’est k’ pus tård, k’il on rsondjî al gamine. Mês cand il ont rarivé al place k’ille ére, i n’ dumèrot pus k’ kékes lokes.
C’est sté fini pour zès avå la ; Il ont saîwé d’ tous costés et on les è pus rvû.
Vla coumint k’ des grands flandrins avint arandjî la tchèsse a l’ hîrlope.

Ène ôte histwâre d’ hîrlope.

Ou cabaret des Wez, les chîjeus djint :
– C’est drole, on cåze toudi d’hîrlope et dju nn’ ans jamwês pont vû.
– C’est k’ tu n’ tumes nin su l’ocâsion, la !
– Mês, ké biêsse ku ça pu z-èsse ? Ile è des pates coume les ôtes biêsses ? E-t-ile des poys, des crins û bin des sôyes ? È-t-ile des plumes coume èn ojê ? Russan.ne -t-ile a ène rougne, a ène coulûve û a ène gurnouye ? Dju sros curieû d’ sawè !
– Alons, dit-i in trâjime, lu vî Lèyon nn’ è co pris èrsè ; i m’è dit k’ i lz avot mètu ou cocassî ki passot jusse. I m’ è co dit k’ i m’a mousturrot, s’il a purdot. C’est tout ç’ ku dj’ sés.
Et les ôtes choûtint, betch båyî. On-z astot tins du mwès d’ sètambe, en plin moumint du rpassadje des grives et les tindeus avint bon d’aler ou bwè, don ! Mê, l’ vî Lèyon, k’astot tindeu ossi, batot les pazês ossi et c’ est pou ça k’ i djot k’ i machot l’ hirlope a des roussètes.
In bê djoû, il è arivé ou cafè ène lète du djon.nes djans ki dmandint a passer in djoû û deus su l’ payis.
Lu cabartî, ki n’ ére nin pus malin k’ i n’ falot, lèzî è dné sn’ acôrd, a lzî fjant mancion du l’ hirlope k’on purdot ås grivlîres, ku c’ére lu vrê moumint du rpassadje et k’ i srot bon du vnu avu in fusik û deus, pou-z a scroter kékènes.
Il ont rusponduk’i vnint avu deus fusiks. Mês l’ caftî avot bin dit k’ on’ trakot nin l’ hirlope avu des tchins.
Dins les cîs dul vile k’ont arivé ou cafè, gn avot kékinkes ki doutint in pô, mês ki n’ ont rin dit sul moumint. I wèyint bin ku l’ cabartî avot l’êr du s’ foute du zès, mês n’ ont rin fwêt parète. Il ont payî in dmi ås trakeus k’ èstint la, pîs, il ont dit : »A dmwin, s’ i fwêt du timp ! »
Lu landmwin å matin, dins la bande des citadins, gn è trwâs ki n’ ont nin volu aler ou bwès et k’ont dmèré la. Les ôtes ont sté amon l’ vî Lèyon, pou k’ i les mon.ne.
Mês Léyon, ki lz avot vu acouru d’ô lon, è rintré mète ène èchèrpe, in gros tricot et ène bounète du lin.ne et s’ mète a toussî coume in pwatrinêre.
-Dju sus apotiké anute. Dju n’ såros jamwê v’ mon.ner, mê alèz vèy çutla k’ dju v’ dis. Tunèz, vla deus gamins ki vont v’ l’ aler kê.
Cand il è arivé, (c’ére in vî buveû), il è dit : « Dju vus bin v’ mon.ner, mês a payant, coume du jusse ! »
Et les vla voys ou bwès, sins fumer et sins cåzer, coume lu vî avot dit. Mês dins les trwas grivlîres k’ il ont fwêt, i n’ont rin vu ki rsan.not a ène hîrlope. Il ére du pus d’deus eures dul vèsprée, cand i s’ont dècidé a rvunu ou cafè et dire ås ôtes k’ i n’ avint rin vû, ku l’ timp n’ siêrvot nin.
Mê, dins in cwin, ène vîe fame les choûtot.
– Alèz vèy çut-la d’ ma pårt, i vz a mousturrè yène al chîje.
Il ont don sté avu çti la drî les hâyes et il ont yu la farce k’on counut avu les crotes.
I nu lzî dmèrot pus k’ a dècamper å pus vite. I nn’åront souv’nance, du l’hirlope !

Coume l’ hirlope est ène biêsse imajinêre, nin étounant du n’ a jamwê pon vèy.

Rutapé al machine pa Yves Joblin la dja mwintes anéyes et rmètu su compiutrèce pa Louwis BAIJOT, à gare du Grêde, lu 10 du fèvrî 2002
_________________
Li ci ki n' a k' on toû n' vike k' on djoû.