Berdelaedjes

[Thedarkfly]

Baby Blues

Baby, n' vos endalez nén
Vos alez tot m' dizavirer
Sins vos dji n' sé pus a ki m' date
Dji so dins l' disbene et l' bernate

[Resploe]
Ni m' leyîz nén tot seu baby
Ni m' leyîz nén e plan droci
Èn coroz nén-t å lon baby
Ervinoz a l' måjhon dlé mi

Schoûtez m' pôve cour tot e firloke
Ki toctêye come on sot l' berloke
Sins vos dji so foirt disbåtchî
Dji vôreu tant vos rastini

[Resploe]

Dji ni rloprè pus tant d' cråsse pinte
Ene å côp, ça ç' n' est nén ene minte
Dji srè pus djinti adon
C' est mi ki rlavrè les bidons

[Resploe]

Sins vos pus rèn m' fwait plaijhi
Gn a pus k' vos po m' rapåjhî
Baby dji vos voe pus voltî
Savoz k' el purnale di mes iys

[Resploe]

Sins vos dji so tot al disblouke
Et come dijheut todi Malbrouke
"Honni fuchisse qui mal y pense"
Mi dji vos voe voltî plén m' panse.

[Resploe]

Black Country Blues

Cwand l' rewoeye soune tot les djoûs å matén
Dji mete mes pîs dins mes pantoufes
Et dji dischind les mårtches* rouf-rouf
Dji boe ene djate di noer cafè
Dji mi rnetyî dins l' vî bassin
Avou m' briket dji m' va bouter

Dji prind l' otobusse di shîjh eure
Dj' arive a moens cwårt po pwinter
Po rovyî k' leu bouye est deur
Les ovrî pålnut d' condjîs
Di fotbale, des beas derbis
Et del samwinne des trinte-deus eures.

Les sindicats ont bén promis*
Bråmint des cwårs, bråmint des liårds
Les sindicats ont bén promis*
Mins oyî, mins c' est po pus tård
Bén pus tård... Bråmint pus tård

Asteure mi vla les mwins manneyes,
C' est scrandixhant di esse on man'daye
I m' fåt bouter tote ene djournêye
Po on patron, s' crever a l' taye
C' est nén k' dji fouxhénxhe* feneyant
Mins viker po bouter, ça c' n' est nén viker ça
Dayeur dji n' boute nén minme por mi
(fåt nén dmander !)

Dji sreut crevé avant m' pinsion
Boufé* tot crou pa l' polucion*
I fåreut fé l' revolucion
Et trawer l' panse des gros patrons,
Des plins di liårds, des crås minisses,
Mins sins awè peu del mwaijhe police

Paret i fåt bråmint mea s' taire
Nén s' plinde, nén gueuyî, nén braire
Rmonter l' rewoeye po dmwin matén
Et tot les djoûs
Fåt fé l' inocint

Come On Solea Padrî Les Brunes

Dji n' vos tchantrè nén des trissès tchansons
Adon k' èm cour est sketé-t a bokets...
L' espwer n' est nén moirt e l' bele såjhon
N' est nén ttafwait houte avou les ergrets
Ki sont co dins m' tiesse come les foyes so les coxhes.
Dimwin, eles tchairont come mes reves a l' disblouke.

El solea lût co dins mes iys
Paski mi, dji l' voe co voltî...
Come on sot, dji pinse a ses mwins
Ki m' ont diné yet pris telmint
D' tinrûlisté yet d' amour,
Les pus belès pires d' ès trezôr...
Po çoula, dji n' polrè l' rovyî
Et todi, dj' èl voerè voltî...

Serè-t ele trisse ou bén gaiye, èm tchanson ?
Ele s' eva l' campagne avou les moxhons
Et les foyes braiynut cwand dji rote dissu
Dins les pî-sintes ki nos avît veyou
Tos les deus eshonne å tins des tabarêyes
Et ki m' voeront mierseu sacwantès anêyes...

Di rozêye, mes iys sont frexhis,
Dji sou-z ewaeré dins l' brouyård,
L' espesse brune muxhant les paxhis...
Èl blanc tchén vénrè-t i, hazård,
Tchessî les tinres bedots do ciel*
Pou rglati sol tere rafroedeye,
Et vos, bele låme, lune di miel*,
Voerè dj' co vos beaté tchereye* ?

Adon, dji vôreu k' èm tchanson fouxhe gaiye,
K' èl tristesse s' endalaxhe avou l' brouyård...
Mins, sins leye, pus rén n' ertchåfrè m' vicårêye...
L' ivier arive et mi, come on båyåd...
Dji dmeure sins sawè kimint dji pou co viker,
Asteure k' ele n' est pus roci po m' vir voltî...

Ashî sins djoye so l' åbe djondou,
Dji pinse tot serant mes deus iys
Et dins m' tiesse, l'amour n' est nén djus...
Rola, ele mi voet co voltî...
Dins l' grand bois tot blanc d' rele, dji tuze
Et dji n' vou nén k' çoula finixhe...
Leyîz m' verziner mes barbôjhes...
A l' awaite, dji ratind l' blanke bixhe

Adon, dji l' voe-t å d' bout* do tchmin
Et aviè leye, dji tind mes mwins...

Djan Pinson

Les åbes sont tos tchenous
Bén rade vénrè l' ivier
Dji m' sin bén remolou,
Tot seu dzeu m' tcheyire
I fwait froed dins l' måjhone
Dins l' estouve i fåreut do bois
Eyou çk' elle est l' comere
Kî mi frè mwins deur l' ivier ?

[Resploe]
Djan Pinson n' a nén co rciné
Dinez lyi on ptit boket
Taeyîz bén ou taeyîz må
On ptit boket po Djan Pinson
Ey ene miete di solea
Po s' ertchåfer les oxheas.

Pont d' lepes po mes betchs
Pont d' espale po m' deur tiesse
Pierdou inte el vere et l' setch
Dji m' sin tot penou tot biesse
Trinner ses penas dins les cåbarets
Vudî des pintes addé(?) esse sô
Eyet rivni e rotant a hiket
Ça m' fwait nén rovyî k' dj' a må

[Resploe]

Kî asteure em voerè voltî
Et voeré m' poenne a viker
Dj' a dandjî d' ene miete di pwin
Po m' cour ki a tant fwin
Dilé mi gn a co nolu
Todi l' nute eyet l' solea-djus
Dj' åré des låmes plin mes iys
Cwand les moxhons tchantront roci

[Resploe]

C' est dins l' nute k' les estoeles lujhnut
C' est dins l' nîve k' el solea est l' pus bea
On n' pout nén dire « tot est fotou »
Tant k' tchaeke djoû est on novea.

[Resploe]

El Bouneur Est Råle

Dji n' tchantrè pus,
Mamjhele po vos beas iys,
Dj' a tot pierdou
Eyet c' est po todi
K' vos estoz evoye
Di l' ôte costé del tere,
Em cour ès noye
Yet adon dj' vôreu braire.
Mes iys sont setchs,
Dji vos inmeu trop foirt
Mågré vos betchs,
Asteure l' amour est moirt.

[Resploe]
Dji n' sai pus cwè fé,
Dji n' sai pus cwè dire,
Em amour a sketé,
Dji vôreu co bén l' vir,
Mins l' bouneur est å diåle,
C' est ene sacwè d' si råle,
On vôreut l' ertini,
Il est ddja fotou djus...
Il est ddja fotou djus...

Dj' a tot pierdou,
Yet c' est po todi...
Dji n' tchantrè pus,
Mamjhele po vos beas iys...
Mi, dj' aveu peu
Di télmint vir voltî,
Mins esse peureu
N' ersaetche nén les dandjîs...
Si enawaire,
Elle esteut dins mes bres,
Asteure tofer,
Dins m' reves, dji caxhe après...

[Resploe]

Ès sovni dmeure,
Come el pus bea trezôr,
Å fond des beurs,
Des fosses d' årdjint et d' ôr...
Låvå dins l' tiesse
Do powete disbåtchî
Ki vôreut riesse
Avou leye, mins todi,
El tins passé
S' eva et n' ervént pus...
El tins passé
Yet ses beas djoûs s' piednut...

[Resploe]

El Mambo Del Loke A Rlokter

[Resploe]
Ni vnoz nén dire ki c' est sale* ça,
Vnoz nén dire ki c' est mannet,
Ni vnoz nén dire ki c' est sale* ça,
Dji l' a rnetyî, asteure c' est prôpe

[Resploe]

Dj' a minme passé l' loke a rlokter
Patavå l' tchambe eyet l' måjhon,
Ni vnoz nén dire ki ça n' blinke nén,
Ni vnoz nén dire çoula, endon...
Dji fote vos tiesse dins l' vî saeyea
Po fé des bouyes dins l' savonêye...
Waitîz, to rlût come el solea...
Dji n' provén nén del måle lavêye !

[Resploe x2]

Dji voe voltî l' bon Monsieu Prôpe
Et tos les djoûs, dji pinse a lu,
On m' lome bén seur Mareye Frote Frote...
Dji n' pou viker dins l' salopreye...
Dji voe voltî broushe et raclete,
Loke a rlokter et savonete...
Savoz, dji so l' fêye do lodjisse,
Mi, dji fwai ddja m' semdi, l' djudi

[Resploe x2]

Dji so continne dins les couvlêyes,
Dji so binåjhe dins les bouwêyes,
Asteure, gn' a pupont d' mecanike,
Mins po m' machine* otomatike,
Mi, dji n' vou nén candjî m' tonea
Conte deus ôtes poudes di canistea !
Savoz, dji so l' fêye do lodjisse,
Dji n' pou viker dins l' salopreye...

[Resploe x2]

Hey!

[Resploe]
Hey ! Fais gaffe à tes pîs
J'ai dit "Hey ! " fais gaffe à tes îys
Continue ainsi dji va t' discôper
Suivant les points, les pointillés, Hey !
Fais gaffe à tes pîs

Ça fait déjà deux heures que tu mi rwaite di cresse
Ti n' vôreu nén ti l' caûw(?) ki dji t' prezinte ene gonzesse
Avou t' bea costume rouge et jaune à carreaux
C' est k' ti n' åreus pont d' tiesse on dirait que t'es un clown

[Resploe]

Qu'est-ce que t'as donc ainsi a me rwaitî comme ça
Ti m' prind po kî, po Adamo ou bén Dalida ?
Avou t' grosse tiesse qui a comme qui dirait un manque
Ti n' riske nén on djoû d' passer a Télé Sambe.

[Resploe]

– Et alors, comment tu t'appelles, toi ?
– Ben moi je m'appelle Alfred, et toi comment tu t'appelles ?
– Moi je m'appelle... Alain.
– Ah mais ça c'est très bien, ça. Et lui il s'appelle comment ?

Just Like After The Ribote Blues

C' esteut a l' pikete do djoû,
El niût n' esteut nén totafwait houte,
C' esteut a l' pikete do djoû,
Dins l' gare*, gn aveut mes omes ki boutnut
Yet mi kî n' fote måy rén,
I s' ratindént l' prumî wagon,
Yet mi, l' rôleu, l' vagabond
El sôleye, dji n' ratindeu pus rén...
I brouzineut dins mes iys,
Dj' esteu come on vî tchén frexhi...
Pierdou... å trô do cou del niût,
Des airdiès, i gn a pus nou...
Des airdiès, i gn a pus nou !

C' esteut a l' pikete do djoû,
Dji n' esteu nén droet dins mes botes,
C' esteut a l' pikete do djoû,
Ewaeré dins l' brune del ribote,
Dji boeveu po m' disroister(?)
Ene djate di cafè dins l' bufet,
Pinsant a leye k' aveut dit :
"Dji vos voe pus eveye(?) k' voltî ! "
Les amoûrs parfaits sont råles
Yet mi, cwand on m' evoye å diåle,
Dji m' eva todi-z å demon,
C' est co bén deus eures pus lon...
Deus eures pus lon !

Dji m' sovén, ir a l' swerêye*,
Il a tcheu come ene laverdêye,
Ele m' a dit årvey, adon
Dj' a beu li mer et les pexhons...
Asteure, ça aroke dins m' tiesse,
Ça n' pout nén todi esse ene fiesse
Et so les tchmwins foirt mouyîs,
Dji so-z on marén ofraedjî,
Les "sirenes" sont des hoûlåd
Gueuyant l' muzike do pôve, låvå !
Sins espwer*, a l' pikète do djoû,
Dji n' brai nén-t ostant k' i ploût...
Ostant k' i ploût !

Asteure el djoû va s' lever,
Gn' årè pont d' solea, pont d' solea...
Eyet l' blanc tchén n' vénrè nén,
I ploût a saeyeas, a saeyeas...
Sins espwer*, a l' pikete do djoû,
Dji n' brai nén-t ostant k' i ploût...
Asteure, c' est tins d' eraler,
Yet rtrouver s' bedire, ès bedire
Asteure, c' est tins d' eraler,
Yet doirmi come on noer, on noer...
Pierdou... å trô do cou del niût,
Des airdiès, i gn a pus nou...
Des airdiès, i gn a pus nou !

Todi Sol Voye

Dji n' sai nén çki gn a
Dji m' sin bén flagada
Dji n' sai nén ç' ki gn a
Dj' a djamåy stî come ça
Dj' end a m' sô di esse todi sol voye
Todi sol voye, todi sol voye

Mi dj' a stî partot*
Di Mårcinele disca Djiblou
Dj' a pris ostant d' trén
K' ti n' as d' doets so ene mwin
Et mi dj' a beu telmint d' bistouye
Ki dj' m' arachreu* les pwels d' mes tchveas

Dj' vôreu bén ndaler ås U.S.Ê.
I paret drola tot est todi bén
Mins mi dji m' poize ene biesse kession
Est çk' a Nou York i pålèt walon ?

Dji n' sai nén çki gn a
Dji m' sinteu bén flagada
Dji n' sai nén çki gn a
Tè ! Waite asteure, ça va mea

Eyet ene boune pinte, alé evoye
Todi sol voye, todi sol voye
(x2)

Trop Tchôd

Dji waite pa l' finiesse
Les påtes e fiesse,
L' osté dins les tchamps,
Rinde ses efants,
Dins l' campagne pezante,
Padzo l' solea,
El bon tins nos tchante
L' awousse novea...
C' est on fel moumint,
El vicåreye
Va tot doûçmint,
Plinne di sondjreyes...

I fwait trop tchôd
Po pinser bouter,
Dji dmeure ståré,
Em pitit colåd,
Dins m' longue tcheyire,
Come on feneyant
Tot berlondjant,
Dji ratind l' ivier...

Pierdou dins m' tuzaedje,
Mes iys si sernut,
Dji voe des miradjes*
Ki m' epoirtnut...
Pierdou dins l' dezert,
Dji croe mori,
Dji so so m' tcheyire,
Dj' aveu doirmou...
Vos estoz dlé mi,
On vere a l' mwin
Dji l' boe po noyî
Ene soe sins fén...

I fwait trop tchôd
Po pinser bodjî,
Dji voe vos iys,
Em pitit Colåd,
Et vosse bea rgard*
Est plin d' aloumoere
Dj' etind l' tonoere
Bouxhî dins nos coirs... (x2)

On fameus oraedje
Loume el bedire
Ey on fel ramadje
Esclate dins l' noer
Pierdous dins l' dezir*,
Nos estans ledjirs
Et nos cavolans
Come des ploumions...
Nos n' fijhans k' on coir
Avou l' plaijhi
Di nos vir voltî
D' pus a pus foirt

I fwait moens tchôd,
I ploût a saeyea,
Dmeurans moyas
Em pitit Colåd,
Dins l' niût d' osté,
Ndalans pormoenner,
Nos rabressî
Padzo l' estoelî...
(x2)