Berdelaedjes

[lucyin]

ADELAÏDE (Jacques Debronckart)

Mi qu’èst vêci, pierdu au coron d’ l’Australîye,
Dj’inme bin lès djins qui savenut bin d’où-ç’ qu’i vègnenut ;
Qu’ont dins leû keûr leû vile oubin leû p’tite patrîye
Èwou-ç’ qu’i, minme dèl nêt, jamaîs i n’ si pièdenut.
Volà douvint qu’ Djan d’ Châlèrwè, Djôsèf èt Zande,
Volà douvint qu’ Mimile, li vî ome di Cînè,
Bêrt di Dinant, èt Tchantchès dèl cité ardente,
Dji vos choûte si voltî causer nosse bia patwès.

Quand dji bwè on dérin vêre
Èt qui dj’ so bin lon di m’ têre,
Dji sin m’ tièsse qu’èst come wîdîye
Quand dji r’tûze à m’ Walonîye…

Al novèl an, on s’ dit : ç’ côp-ci, c’èst bin l’ dérin.ne
L’ dérin.ne anéye qui dji d’meure dins ç’ payis-ci ;
Mins l’ côp qui vint, sins manque on-z-î d’meur’rè tolminme
Maugré lès bèlès frases qu’on-z-aurè d’djà rovî.
Ça s’reut portant l’ momint di r’veûy li p’tite Beljique
Pace qui bin rade tos lès payis s’ vont richoner
Èt dins dîj-ans, al place di nos baraques à frites,
Gn-aurè qu’ lès Mac Donald po sièrvu à din.ner.

Vosse wiski, c’èst dèl pichate,
One saqwè qui rind malade
Quand vos r’vint au cabarèt
Li sov’nance do blanc pèkèt.

Èt dins vint-ans, sins-awè r’vu nos bias viladjes
È l’Australîye oubin on-ôte payis bin lon,
À nos-èfants nos frans conèche nosse bia lingadje
Mins leu-z-acsint n’ sèrè nin l’ cia di leûs tayons.
D’abôrd, dijoz, Djan d’ Châlèrwè, Djôsèf èt Zande,
D’abôrd, dijoz, Mimile, li vî ome di Cînè,
Bêrt di Dinant, èt Tchantchès dèl cité ardente,
Dins deûs trwès-ans, n’auroz nin rovî nosse patwès ?

Quand dji bwè on dérin vêre
Èt qui dj’ so bin lon di m’ têre,
Dji sin m’ tièsse qu’èst come wîdîye
Quand dji r’tûze à m’ Waloniye…

Aschoûtez lu:

https://wa.wikipedia.org/wiki/Im%C3%A5dje:251125_Debronckart_Hamblenne_Marchal_Adelayide.ogg
_________________
Li ci ki n' a k' on toû n' vike k' on djoû.

[lucyin]

Tins long après l' payis

Mi k’ vike låvå, pierdou å coron d’ l’ Aldjereye,
Dji voe voltî les djins k’ savèt d’ eyu çki vnèt ;
K’ ont dins leu cour leu viyaedje et leu ptite patreye
Ewou çki, minme del nute, djamåy i n’ si pierdèt.
Vola douvént k’ vos l’ ome di Bhô et l’ ci d’ Retni,
Vola douvént k’ vos mes plankets d’ après Måmdiy,
Sevrine li mônresse, et Benoet di dlé Gouvi
Dji vos schoûte tchanter nosse walon télmint voltî.

Cwand dji boe on dierin vere
Et ki dj’ so bén lon di m’ tere,
Dji sint m’ tiesse k’ est come vudeye
Cwand dji rtuze a m’ Walonreye…

Al novelan, on s’ dit : ç’ côp ci, c’ est bén l’ dierinne
L’ dierinne anêye ki dj’ va dmorer dins ç’ payis ci ;
Mins l’ côp ki vént, sins manke, on-z î dmeurrè tolminme
Mågré les belès fråzes k’ on-z årè ddja rovyî.
Ça sreut portant l’ moumint di rvey nosse Walonreye
Paski bénrade tos les payis si vont rshonner
Et k’ dins dijh ans, e l’ plaece di nos barakes ås fritches,
Gn årè k’ Mac Donal po nos siervi a nonner.

Leu rodje vén, c’ est del lapete,
Leu bire ça n’ våt nén tripete
Cwand mi rvént, då cåbaret,
Li sovnance do blanc peket.

Et dins vint ans, sins awè rveyou nosse viyaedje
E l' Aldjereye u dvins èn ôte payis bén lon,
A nos efants, dji lzî frans cnoxhe nosse bea lingaedje
Mins leu-z accint n’ serè nén li ci d’ leus tayons.
Vola douvént k’ vos, l’ ome di Bhô et l’ ci d’ Retni,
Vola douvént k’ vos, mes plankets d’ après Måmdiy,
Sevrine li mônresse, et Benoet di dlé Gouvi
Dji vos schoûte tchanter nosse walon télmint voltî.

Cwand dji boe on dierin vere
Et ki dj’ so bén lon di m’ tere,
Dji sint m’ tiesse k’ est come vudeye
Cwand dji rtuze a m’ Walonreye…

redjårbaedje Lucyin Mahin pol "moumint walon" des shijhes di "Périple en la demeure", Limerlé, li 20 di decimbe 2025

Aschoûtez lu:
https://wa.wikipedia.org/wiki/Im%C3%A5dje:Debronckaert_Hamblenne_Marchal_Mahin_tins_long_do_payis.ogg
_________________
Li ci ki n' a k' on toû n' vike k' on djoû.