Berdelaedjes

[lucyin]

Priyîre po on hache

Priyîre po on hache

I. I-n-a d’vins tot lingadje dès sacwès bin d’ a lu
Qui lès bokes dès tayons ont foirdjî sins ahote.
Cès pièles, djowions d’ on peûpe, i n’ divreût-èsse nolu
Qui lès wèse rinoyî, çoula no pô ni gote.

II. E nosse bê walon d’ Lîdje, i-n-a portant asteûre
On pièle di cisse valeûr qu’on veût taper a rin.
C’èst l’ hache d’amon nos-ôtes, qui brotche èt qui n’ a d’ keûre
Qui fêt hilter les mots, èt qui lès hatche si bin.

III. On-ôt dès djonnes, dès vîs, èt minme dès djins d’ tèyåte,
Qui v’ djåzèt di « mo-ones » d’ « oû-ês » èt qu’ sont « nå-is »
El plèce di v’ fé ètinde come ine djoyeuse rouflåde
Dès mohones, dès-oûhês, sèrît-i minme nåhis !

Anfin kimint volez-v’ qu’i djåzèsse di hah’låde
S’i n’ dihèt nin lès haches come on l’ zî a-st-apris
Vos cont’rîz pus voltî qu’i colèbet d’ salåde
Pus vite qui dè grand rîre qu’on tape a plin gozî.

Et qui va-t-èle tûzer nosse binamêye Nanète
S’i n’a pus nouk qui pout lî fé passer l’ håhê.
Et nosse poyowe halène el pôront tot-rade mète
Avou ine måle alène, lès deûs è minme banstê !

N-a télefèyes qui l’ pôve diâle, cwand on dit qu’ i hèm’lêye.
S’ on l’ dit sins nosse vî hache, i n’ tos’reût nin si reûd !
Mins si vos n’ vis polîz pus pèrmète qu’ ine pi-êye
Dji m’ dimande vormint bin si çoula v’ contintreût !

Si ‘ne saquî dit : « dji v’é », çoula n’ èst wêre vigreûs,
Dismètant qui « dji vi hé », çoula v’s-a ine ôte cogne
Et qwè dîre di cès mots – èt c’ èst bin målureûs –
Qui vos n’ såriz nin dîre si vosse hache èsteût d’ brogne :

Sayîz’ dè dîre ine mohe, ine tchimîhe, ine cèlîhe
Ine frumihe, ine corîhe, dji préhe, dji pèhe, dji crèhe,
Ine frombåhe ou ine båhe, ine fahe ou ine måle bîhe
Sins nosse hache, impossibe : i-n-a m’ front qu’ èst tot frèh !

Ossi, s’i v’ plèt, tchanteûs, comèdyinne, comèdyin
Et tos lès cis qu’ préhèt nosse si vigreûs lingadje
Rimètez’ a l’ oneûr nosse bon vî hache ancyin
Sins qwè nosse bon walon avîz’reût pôr bin flatche.

Dins "Djåzans walon, fevrî 1993, p. 7

----
C' est ç' tecse la ki m' a stombyî divins l' askepiaedje do betchfessî scrijhas xh (atûzlé e 1993). Come espliké voci :

https://wa.wikisource.org/wiki/Li_r%C3%A8sponse_da_Sint_P%C3%AEre_%C3%A0_l%E2%80%99_priy%C3%AEre_da_Marcel_Slangen_po_l%E2%80%99_hatch%C3%AAye_l%C3%A8te
_________________
Li ci ki n' a k' on toû n' vike k' on djoû.

[lucyin]